ﻫﺎﺷﻢ ﻟﻤﻦ ﻣﺸﻰ ﻛﻮﺑﺮ .. ﻭﺍﻟﺠﻤﺎﻋﺔ ﺍﻻﺗﻨﻴﻦ ﺍﻱ ﻭﺍﺣﺪ ﻓﺮﺗﻖ ﻋﻠﻰ ﺍﻫﻠﻮ .. ﻫﺎﺷﻢ ﻛﺎﻥ ﻣﻔﺘﻜﺮ ﺍﻧﻮ ﺍﻟﻤﻮﺿﻮﻉ
ﺩﻩ ﺑﺎﻟﺴﺎﻫﻞ ﻛﺪﺍ ﺣﻴﺘﻮﻓﻖ ﻓﻴﻬﻮ. ﺯﻱ ﻣﺎ ﺍﺗﻮﻓﻖ ﻓﻲ ﺍﻟﺤﺎﺟﺎﺕ ﺍﻟﻔﺎﺗﻦ .. ﻟﻜﻦ ﺣﺼﻠﺖ ﻟﻴﻬﻮ ﻣﻌﺎﻛﺴﺎﺕ
ﺑﺴﻴﻄﺔ . ﻣﻨﻬﺎ ﻳﺎﺯﻭﻝ ﻛﺒﺎﺷﻲ ﺟﺎ ﺑﻌﺪ ﺍﻟﻤﻐﺮﺏ . ﻣﻦ ﺍﻟﺠﺎﻣﻌﺔ . ﻭﻟﻘﻰ ﻫﺎﺷﻢ ﻓﺮﺣﺎﻥ ﻓﺮﺣﺔ ﻏﺮﻳﺒﺔ .
ﻗﺎﻟﻴﻮ ﻣﺎﻟﻚ ﻳﺎﻫﺎﺷﻢ؟ ﺍﻟﺤﺎﺻﻞ ﺷﻨﻮ؟ ﻓﺮّﺣﻨﺎ ﻣﻌﺎﻙ ..
ﻫﺎﺷﻢ ﻗﺎﻝ ﻟﻪ . ﻃﺒﻌﺎ ﺡ ﺍﻓﺮﺣﻚ ﻳﺎ ﺧﻮﻱ .. ﻭﺍﻟﻠﻪ ﺡ ﺗﻔﺮﺡ ﻓﺮﺣﺔ ﺗﺸﻜﺮﻧﻲ ﻋﻤﺮﻙ ﻛﻠﻮ .. ﻟﻤﻦ ﺗﺠﻲ ﺗﺴﻜﻦ
ﻓﻲ ﺑﻴﺘﻚ ﺍﻟﺴﻄﻮﺡ .. ﺡ ﺗﺘﺬﻛﺮ ﻛﻴﻒ ﻋﻨﺪﻙ ﺍﺧﻮﻙ . ﺑﻔﻜﺮ ﻓﻲ ﺍﻻﻣﻮﺭ ﺑﻄﺮﻳﻘﺔ ﺻﺤﻴﺤﺔ ..ﻭﺑﻔﻜﺮ ﻓﻲ ﻣﺼﻠﺤﺘﻚ
ﻣﻊ ﻣﺼﻠﺤﺘﻮ ..
ﺍﻭﻝ ﺣﺎﺟﺔ ﺍﻧﺖ ﻋﻨﺪﻙ ﻣﻌﺎﻱ ﻛﻢ ﻣﻮﺵ ﺧﻤﺴﺔ ﻭﺗﻼﺗﻴﻦ ﺗﻘﺮﻳﺒﺎ" ؟ ﻃﻴﺐ ﺭﺍﻳﻚ ﺷﻨﻮ ﻟﻮ ﺍﻧﺎ ﻋﻤﻠﺘﻬﺎ ﻟﻴﻚ ﺗﻠﺘﻤﻴﺔ
ﻭﺧﻤﺴﻴﻦ ﻣﻠﻴﻮﻥ؟ .
ﻭﺑﺪﺍ ﻳﺤﻜﻲ ﻟﻴﻬﻮ ﻓﻲ ﺍﻟﺤﺎﺻﻞ . ﻭﺍﻟﻘﺼﺔ ﺍﻟﺤﺼﻠﺖ ﺣﻜﺎﻫﺎ ﻟﻴﻬﻮ ﺑﺎﻟﺘﻔﺼﻴﻞ ﺍﻟﻤﻤﻞ .
ﻛﺒﺎﺷﻲ ﻗﺎﻝ ﻟﻴﻬﻮ .. ﻻﻻﻻ ﺍﻧﺎ ﻣﺎ ﻣﻮﺍﻓﻖ .. ﺩﻩ ﺣﺮﺍﻡ ..ﺍﻧﺖ ﻣﺎﻋﺎﺭﻑ ﺍﻟﺴﺤﺮ ﺣﺮﺍﻡ ؟ .. ﻭﺍﻟﻨﺎﺱ ﺩﻳﻞ
ﺑﺴﺘﺨﺪﻣﻮ ﺍﻟﺸﻴﺎﻃﻴﻦ .. ﻭﺍﻟﺸﻴﺎﻃﻴﻦ ﺑﺘﺎﻋﺘﻬﻢ ﺑﺘﻤﺸﻲ ﺗﺴﺮﻕ ﻣﻦ ﺍﻟﺒﻨﻮﻙ .. ﺍﻧﺎ ﺳﻤﻌﺖ ﺑﻲ ﺍﻟﻜﻼﻡ ﺩﻩ
ﻛﺘﻴﺮ ..
ﺑﻌﺪﻳﻦ ﻛﺪﻱ ﺗﻌﺎﻝ ﻧﺴﺄﻟﻚ . ﻟﻮ ﺍﺩﻳﺖ ﺯﻭﻝ ﻗﺮﻭﺵ ﻭﺭﺟﻌﻬﺎ ﻟﻴﻚ ﺯﺍﻳﺪﺓ ﻣﻮﺵ ﺩﻩ ﻳﺎﻫﻮ ﺍﻟﺮﺑﺎ؟
ﺍﻧﺖ ﻣﻦ ﻭﻳﻦ ﺗﻘﺪﺭ ﺗﺴﺘﺤﻞ ﺍﻟﻘﺼﺔ ﺩﻱ؟ .. ﺍﻧﺎ ﻳﺎ ﻫﺎﺷﻢ ﻟﻤﻦ ﺳﻤﻌﺖ ﻛﻼﻣﻚ .. ﻭﻓﺎﺭﻗﺖ ﺍﻫﻠﻲ ﻭﺍﻣﻲ
ﻭﺍﺧﻮﻱ .. ﻭﻫﻢ ﻓﻲ ﺍﺷﺪ ﺍﻟﺤﻮﺟﺔ ﻟﻲ. ﺍﻧﺎ ﻭﺍﻟﻠﻪ ﻧﺪﻣﺖ ﻟﻜﻦ ﻣﺎ ﻛﻨﺖ ﺩﺍﻳﺮ ﺍﺧﺬﻟﻚ .. ﻭﺍﺧﻠﻒ ﻭﻋﺪﻱ ﻣﻌﺎﻙ ..
........... ﻫﻬﻪ .......
"ﺷﻮﻑ ﺍﻟﻐﺒﻲ" .. " ﻃﻴﺐ ﺍﻧﺖ ﺧﺬﻟﺖ ﺍﻣﻚ ﺍﻟﻮﻟﺪﺗﻚ .. ﻋﺸﺎﻥ ﺍﺧﻮﻙ ﺍﻟﺘﻴﺲ ﺍﻟﻤﻌﺎﻙ ﺩﻩ "..
ﻏﺎﻳﺘﻮ ﻓﻲ ﻧﺎﺱ ﺑﺘﻔﻜﺮ ﺗﻔﻜﻴﺮ ﻏﺮﻳﺐ ﺧﻼﺹ !! ؟؟ ﻳﻌﻨﻲ ﺍﻟﻮﺍﺣﺪ ﺗﻠﻘﺎﻫﻮ ﻣﺎﺑﻌﺮﻑ ﻳﻮﺍﺯﻥ ﺍﻻﻣﻮﺭ ﻛﻠﻮ
ﻛﻠﻮ . .. ﺗﻠﻘﻰ ﻭﺍﺣﺪ ﻣﺨﺎﻟﻒ ﺍﺑﻮﻫﻮ ﻓﻲ ﻣﻮﺿﻮﻉ .. ﻣﺜﻼ ﻣﺎﺷﻲ ﻣﻜﺎﻥ . ﻭﺍﺑﻮﻫﻮ ﻣﻨﻌﻪ . ﻳﻘﻮﻡ ﻳﺮﻓﻊ ﺻﻮﺗﻮ
ﻋﻠﻰ ﻭﺍﻟﺪﻭ . ﻭﻳﻌﺘﺮﺽ ﻭﻳﻘﻮﻝ ﻻﺑﻮﻫﻮ ﺍﻧﺎ ﻣﺎ ﻣﻤﻜﻦ ﺍﺧﺬﻝ ﺻﺎﺣﺒﻲ ﻋﺸﺎﻥ ﻛﺪﺓ ﻻﺯﻡ ﺍﻣﺸﻲ ﻭﻳﻌﺼﻰ ﺍﺑﻮﻫﻮ
