انين النسايم

الجزء 12

ﻧﻬﻰ ﻭﻛﺖ ﻃﻠﻌﺖ ﻣﻦ ﻋﻨﺪ ﺳﻤﺎﻫﺮ .. ﻗﺎﻟﺖ ﻟﺴﻮﺍﻕ ﺍﻟﺮﻛﺸﺔ ﻋﻠﻴﻚ ﺍﻟﻠﻪ ﺍﻣﺸﻲ ﺑﺎﻟﺸﺎﺭﻉ ﺍﻟﻘﺪﺍﻣﻲ .. ﻋﺎﻳﺰﺓ

ﺗﻤﺮ ﺑﻲ ﺷﺎﺭﻉ ﺍﻟﺒﻴﺖ ﺍﻟﻘﺪﻳﻢ .. ﺟﺎﻫﺎ ﺷﻮﻕ ﺗﻌﺎﻳﻦ ﻟﻲ ﺑﻴﺘﻬﻢ ﻣﻦ ﺑﺮﺓ ﺑﺲ ﺍﻥ ﺷﺎﺀ ﺍﻟﻠﻪ ..

ﺍﺣﺴﺎﺱ ﺍﻟﺤﻨﻴﻦ ﺍﻟﻰ ﺍﻟﺪﻳﺎﺭ ..

ﻃﺒﻌﺎ ﻛﺪﺍ ﻭﺿﻌﻴﺔ ﺍﻟﺨﺮﻳﻄﺔ ﻭﺿﺤﺖ .. ﺍﻟﺤﻲ ﺑﺘﺎﻉ ﻧﺎﺱ ﺳﻤﺎﻫﺮ ﻓﻲ ﻧﻬﺎﻳﺔ ﺍﻟﺸﺎﺭﻉ ﻣﻦ ﺍﻟﻨﺎﺣﻴﺔ ﺍﻟﺸﻤﺎﻟﻴﺔ ..

ﻭﺍﻟﺒﻴﺖ ﺍﻟﺠﺪﻳﺪ ﺣﻖ ﻧﺎﺱ ﻧﻬﻰ ﻣﻦ ﺍﻟﻨﺎﺣﻴﺔ ﺍﻟﺠﻨﻮﺑﻴﺔ .. ﻭﺑﻴﺘﻬﻢ ﺍﻟﻘﺪﻳﻢ .. ﻓﻲ ﻧﺺ ﺍﻟﻤﺴﺎﻓﺔ ﺑﻴﻦ ﺩﻩ ﻭﺩﻩ ..

ﺍﻫﺎ ﻳﺎﺯﻭﻝ ﺟﺎﺕ ﻣﺎﺷﺔ ﺑﻲ ﻗﺪﺍﻡ ﺍﻟﺒﻴﺖ .. ﺷﺎﻓﺖ ﻓﻲ ﻛﻤﻴﺔ ﻣﻦ ﺍﻟﺤﺮﻳﻢ ﺩﺍﺧﻠﻴﻦ ﻭﻣﺎﺭﻗﻴﻦ ..

ﻗﺎﻟﺖ ﻟﺒﺘﺎﻉ ﺍﻟﺮﻛﺸﺔ ﺍﻗﻴﻒ ﺩﻗﻴﻘﺔ .. ﻧﺰﻟﺖ ﺳﺮﻳﻊ ﺑﺪﻭﻥ ﻣﺎﺗﺤﺲ.. ﻭﻻ ﺍﺗﺮﺩﺩﺕ .. ﺳﺄﻟﺖ ﻗﺎﻟﺖ ﻓﻲ ﺷﻨﻮ

ﻳﺎﺟﻤﺎﻋﺔ ..

ﻗﺎﻟﻮ ﻟﻴﻬﺎ ﺍﻟﺒﺖ ﺍﻟﺼﻐﻴﺮﺓ ﺑﺖ ﺍﻟﻤﺮﺍﺓ ﺩﻱ .. ﻟﺪﻏﺘﻬﺎ ﻋﻘﺮﺏ .. ﻭﺍﻣﻬﺎ ﻗﺎﻋﺪﺓ ﺟﻮﺓ ﻣﻨﻬﺎﺭﺓ .. ﻭﻣﺘﺪﺳﻴﺔ

ﻭﻫﺴﻲ ﺍﻟﺒﺖ ﺗﻌﺒﺎﻧﺔ ﺗﻘﻄﻊ ﻓﻲ ﺍﻟﺰﺑﺪ .. ﻧﺤﻦ ﻳﺎﺩﻭﺏ ﺳﻤﻌﻨﺎ ﺑﻴﻬﺎ ..

ﻃﺒﻌﺎ ﻳﺎﺟﻤﺎﻋﺔ ﺩﻱ ﺍﻟﻤﺮﺍﺓ ﺍﻟﻤﻄﻠﻘﺔ .. ﺍﻻﺧﻮﻫﺎ ﺍﺷﺘﺮﻯ ﻟﻴﻬﺎ ﺍﻟﺒﻴﺖ ..

ﻧﻬﻰ ﺩﺧﻠﺖ ﺑﻲ ﺳﺮﻋﺔ ﺍﻟﺘﻘﻮﻝ ﺍﻟﺒﺖ ﺑﺘﻬﺎ ﻫﻲ . ﻭﻣﺎﻟﻘﺖ ﺍﻣﻬﺎ ﺟﻤﺒﻬﺎ

ﻗﺎﻟﺖ ﻻﺧﻮﻫﺎ ﺍﻣﻚ ﻭﻳﻨﻬﺎ؟ .. ﻗﺎﻟﻴﻬﺎ ﺍﻣﻲ ﻣﺘﺪﺳﻴﺔ ﻓﻲ ﺍﻟﻤﻄﺒﺦ . ﻧﻬﻰ ﺟﺮﺕ ﺩﻓﺮﺕ ﺑﺎﺏ ﺍﻟﻤﻄﺒﺦ ﺑﻲ ﻗﻮﺓ

ﻟﻘﺘﻬﺎ ﻣﻨﻬﺎﺭﺓ ﻭﺗﺒﻜﻲ ﻗﺎﻟﺖ ﻟﻴﻬﺎ ..

ﻗﺎﻟﺖ ﻟﻴﻬﺎ ﺍﻟﺴﻼﻡ ﻋﻠﻴﻜﻢ .. ﻛﻴﻔﻚ .. ﺳﻼﻣﺘﻬﺎ ﺍﻟﺒﺖ .ﻋﻤﻠﺘﻮ ﻟﻴﻬﺎ ﺷﻨﻮ ؟

ﻗﺎﻟﺖ ﻟﻴﻬﺎ ﻭﻻﺷﻲ .. ﺍﻧﺎ ﻣﺎﻋﻨﺪﻱ ﺣﻖ ﺍﻟﺮﻛﺸﺔ ﺍﻟﺒﻮﺻﻼ ﺑﻴﻬﻮ ﺍﻟﺪﻛﺘﻮﺭ ..

ﺍﺧﻮﻱ ﻋﻴﺎﻥ ﻓﻲ ﺍﻟﺴﻌﻮﺩﻳﺔ .. ﻭﺗﻠﻔﻮﻧﻮ ﻣﻘﻔﻮﻝ .. ﻭﺍﺑﻮﻫﺎ ﻣﺎﻗﻌﺪ ﻳﺮﺳﻞ ﻟﻴﻨﺎ ﺍﻱ ﺷﻲ .. ﺍﻧﺘﻲ ﻣﻨﻮ؟

ﻗﺎﻟﺖ ﻟﻴﻬﺎ ﺍﻧﺎ ﺍﺳﻤﻲ ﻧﻬﻰ . ﺍﻟﺒﻴﺖ ﺩﻩ ﻛﺎﻥ ﺑﻴﺘﻨﺎ ﻧﺤﻦ ﺑﻌﻨﺎﻫﻮ ﻻﺧﻮﻙ .. ﺑﻨﺤﻦ ﺑﻨﻌﺮﻑ ﺻﺎﻟﺢ ﺍﺧﻮﻙ ﺷﺪﻳﺪ ..

ﺍﻧﺎ ﺟﻴﺖ ﻣﺎﺭﺓ ﻟﻘﻴﺖ ﺍﻟﺤﺮﻳﻢ ﻣﻠﻤﻮﻣﺎﺕ .. ﻭﻣﺎﻻﻗﻨﻚ ..

ﻗﺎﻟﺖ ﻟﻴﻬﺎ ﺩﻳﻞ ﻧﺴﻮﺍﻥ ﻓﺎﺭﻏﺎﺕ ﺳﺎﻱ.. ﻣﺎﻋﻨﺪﻫﻦ ﺷﻐﻠﺔ ﻏﻴﺮ ﺍﻟﺨﺒﺎﺭﺍﺕ ..

ﻧﻬﻰ ﻗﺎﻟﺖ ﻟﻴﻬﺎ ﻃﻴﺐ ﻗﻮﻣﻲ ﺳﺮﻳﻊ.. ﻓﻲ ﺭﻛﺸﺔ ﻭﺍﻓﻘﺔ ﺑﺮﺓ ﻧﻮﺩﻳﻬﺎ ﺍﻗﺮﺏ ﻣﺴﺘﻮﺻﻒ ..