عشق وإبتلاء

البارت الثاني

البارت الثاني
#عشق_وإبتلاء 💔
#بقلمي_شمس

الحفله كانت مختلط وحلوه .. واحنه نرگص ونلعب ومتونسين .. ساعه ندخل نرگص وساعه نلعب بالحديقه
لو نروح نشرب عصير من السطل .
قبل كانو يسوون خبطات عصير بسطل ويوزعوه بگلاصات
حياتنا بسيطه وجميله .. #شمس

شويه وصار عياط .. وهوسه ..
وحجي بين بتول مرت بابا لماما ..
تگولها .. لابسة ضيگ وتتمرگصين حتى يشوفج وتغريه ليرجعج ..

ماما .. حبيبتي اذكرج .. اني الي تركته الج ..
ومستحيل ارجع الشخص تركته بأرادتي ..

ههههه اي صحيح .. قصدج هو الي شمرج وفضلني عليج

ماما .. اي بهذي صحيح .. لان وقتها عرفت ماعنده ذوق واختارج مع انه كلشي بيه احلى منج حتى اسلوبي ..
لهذا خليته الج .. لأن الطيور على اشكالها تقع ..

لج هاي عليه .. والله اريد اوريج منو الي ماعندها اسلوب ..#شمس
وهجمت على ماما وشبعتها ضرب ..

والناس تسحب بيها وهي متگوم ع سمنها ..
لان هي سمنانه وصايره محلوه ..
مو مثل ماتزوجها بابا ..
گامت من الاربعين تحمل وكل فتره سمعت اجاني اخ .
وهي فرحانه لأن دتجيب اولاد ..
وهملت نفسها ..
بعكس ماما .. الي كانت ع طول حلوه ورشيقه ومهتمه بنفسها ..#شمس

وهذا الي خله بابا يحاول يرجعها ..
ويتقربلها .. بس هي كانت تصده ومتنطيه فرصه ..

بيبي ماااسه .. لج بتول طرگاعه ع راسج .. متعبين من المشاكل ..
ليل مع نهار تتعاركين ..
لو وي عادل لو وي مرت علي ..
حتى حمواتج من يجن مايسلمن من السانج ..

بتول .. اي عمه حقج تدافعين مو هاي العزيزه نوارة .
الي كتلتي روحج عليها من تطلگت وخابصتنا عليها ليل مع نهار نواره ونواره .. ماما اسمها نيران
وهسا اتفقتي وياها عليه لحتى ترجعيها ..

بيبي ماااسه .. هيج وتقبل .. ياليت يوم المنى .بعدها ماكو جنه دخلت گلبي ..#شمس

بابا .. شكو يمه فضحتنا صوتجن واصل للشارع ..
حتى بالمناسبات مفشلاتنا ..

لك متحجي وي هاي الرفش الي جبتها مااعرف منين .
نامت على نواره وشبعتها ضرب ..
ماكفاها اخذت رجلها منها ..#شمس

صدوگ هذا الحجي بتول .. كم مره گتلج بطلي سوالفج

بتول .. دبطل انت بالاول نضراتك يله تحجي . مو عبالك مااشوف ..

سحبتني ماما من ايدي وطلعت ..

گالت البيبي هديه ..
يوووم انتو ترحون لو تتأخرون ..

هسا يمه شبيج تحملي الخاطر اخوج ولاتضعين فرحته ..

اوك لعد اني راح اروح البيت افراح ..

اخذتنا عمتي افراح ورحنا البيتها ..
دخلنا . بقت عمتي وامي يسولفن واني رحت العب وي بناتها عندها اثنين بنات حلا وعلا ..

شويه ودخل ولد هو اكبر مني بهواي بس مااعرف شگد
ابتسم وگال انتي مااسه .#شمس

هزيت براسي . گرصني من خدي ودخل ..

مبين عليه حباب مو مثل حمودي شقي .

حلا گالت .. يا المعقد ضحك ..

مااسه . منو هذا ..

هذا مصطفى اخويه الكبير ..

لعد ليش تگولين عليه هيج عيب غير اخوج الكبير .

هههههه ابويه دايما يگوله المعقد . لان يحب يمثل دور الكبار ويقلد جدو ع ساس هو شيخ مثله ..

ههههههه ..

خلصت الحفله واخذتني ماما ورجعنا ..
حضنت حلا وعلا لأن حبيتهم حبابات ..

اني قليل التقي بأهل بابا لهذا ممتعوده عليهم ومااعرفهم ..#شمس

رجعنا البيت جدو بالحله ..
واستمرت حياتنا مثل مكانت ..
لعب ووحياة حلوه ..
وبدأت المدارس .. وماما بين دراستها ودراستي ..
وخالو معتز تزوج وصار البيت مايكفينا

فأضطر خالو راضي. ابو حمودي يبني مشتمل بالحديقه ويطلع ..#شمس

وماما شگد اتقدمولها ناس .. بس موافقت مع انه هي صغيره وحلوه وطموحه ..
بس تگول مااترك مااسه وحدها بهذي الدنيا ..

مرت السنين بين لعب وجد .. وكبرت وگمت افهم الدنيا وافهم كلشي ..
حسيت نفسي كبرت وبأرشادات ماما وتعليمها الي ..
احس نفسي كبرت مع انه اني بالمتوسطه بعدني صغيره
بطلت لعب وي اولاد خوالي
وماما راحت معهد معلمات من السادس اعدادي ..
سنتين فقط ..

صار البيت هوسه من الاطفال كل وحده من زوجات خوالي صار عندها اربعه وخمس اطفال ..

بس اني علاقتي بساره ورنا .. احسهم اخواتي الي حرمتني الدنيا منهم ..#شمس

اخواني مااشوفهم هواي وحتى بابا كل شهر اشوفه مره ..
وخاصه بعد ماانتقلو . للناصريه .
لان جدو هندي اخوانه كلهم هناك ..
بس هو تبع حبه البيبي مااسه واستقر بالحله ..

بس بالاول الاخير الكل يرجع الاصله ..

لهذا صار قليل اشوف بابا ..

وكنت دايما الوم بماما واگولها شگد حاول يرجعج بابا وانتي رفضتي ..#شمس

وهي تگولي تكبرين وتفهمين ..

بس اني مااريد افهم واصر واتمنى يرجعون ..
وخاصه من اشوف ولد خوالي بين امهم وابوهم يگعدون ع السفره ..

وابوهم يوصلهم للمدرسه ..
وكلمه بابا متفارگ لسانهم ..
اتمنيت بابا يمي واطلب منه واطلع وياه واشبع من حنانه

صحيح ماما ممقصره عني بشي بس اني اريد احس بحنان الاب الي انحرمت منه ..

شنو ياخذني بالشهر خميس وجمعه اروح يمهم وينطيني مصرف ويرجعني ..
وبيبي ماسه دايما تبجي من اجي وارجع بسرعه ..

احس بحنانها اكثر من بيبي هديه ..

رغم بيبي هديه تحبني وتشتريلي بس اهتمامها بولد خوالي اكثر ..

كملت ماما معهد .
وبعد توصيات ومعارف ..
تعينت معلمه بسنه 2002 شهر 11 بمدرسه قريبه ع بيت جدو ..#شمس

بوقتها اني صرت بالرابع اعدادي ..
يعني كبرت وحسيت بنضوج ..
وفرحانه لان راح انتقل المرحله جديده بحياتي ..
بس ماكملت فرحتي بعد كم شهر ..
#بقلمي_شمس
#يتبع...