عشق وإبتلاء

البارت العاشر

البارت العاشر
#عشق_وإبتلاء💔
#بقلمي_شمس

احبج واليحب بلوة
وين الله وقسمتي تروح يم عيونج الحلوة
واسولفلج عليج اهواي
واتبلل يواهس ماي
عينج يمي لاتغفة
اريدن كون وجهج يترس الغرفة
واشتم بيج حنية
احبج حيل يبنية
جهالي بحضنج ينامون
هنياااااالي
اضل جم دوب اسولفلج على العرسان
من زفوهم كبالي
ويمر مني عرس واذكرج
وانسه اتنفس واشتاگلج يمج
يبت گلبي ياوجه الماي
انه ميت عليج اهواي
غورت الگمر بخدودج السمره
احب عيونج #الشگره
اباوع واصفن بكل قوتي بعيونج
واگولن ماخذت حگي…

مصطفى لاتسوي هيج تدمرني .. اني افكر اذا رحنا شلون بيه .. تعودت عليك ومااگدر على فراگك..

وانت مامهتم ..(بقلم الكاتبه شمس)

ولج اني مامهتم . اني اتگطع من ساعة الي گلتي بيها امي تگول راح نرجع بعد كم يوم ..

بس ماردت اضيع هاي اللحظه ..
ردت نعيش نلحظات حلوه نتذكرها ..

اوووووف كلها من بتول .. شايفتنا نحجي سويه ورايحه فاضحتني وحنين هم مأيدتها وتگول كل يوم اشوفهم يسهرون سويه ..

اني اعلمها حنين .

لا مصطفى اتركها مالي خلگ مشاكل ..
خلينا بهسا . شلون اذا رحنا ..

وليهمج هسا احجي وي خاي واخطبج وينتهي الموضوع ..

لا مو الهاي الدرجه .. بعدني جاي ادرس وانت هم بعدك
خليني اخلص سادس يله ..
وانت ترتب امورك…

ماستي حبيبتي .. اسوي المستحيل حتى نجتمع ..
نبقى نتواصل بأي شكل ..
والمسافه ابد ماتبعدني عنج ..
حبنا اريده يقوى وتوعديني .. نبقين تحبيني لو بعدتنا المسافات والايام ..

كلامه حلو وخجلني مااعرف الله شلون خلانا نحب بعضنا هيج بسرعه وبهيج قوه ..

تحجي صدگ مصطفى .. اني اذا احب .. فأحب بكل جوارحي وماكو احد ياخذ مكانك بگلبي ولاينسيني حبك .
انت كل شي الي بالدنيا صرت ..

ظلمت الدنيا ..
رجعنا اني ومصطفى ..
هو منبه ع حلا تنتظرنا يم النهر حتى نرجع سويه ومحد يشك ..(بقلم الكاتبه شمس)

بس حلا تعرف بعلاقتنا .. وهي الي تخلقنا الفرص حتى نتقابل ..

يوم عن يوم يكبر حبنا .. وصار كلشي بحياتي ..

احلى ايام عشتها بالناصريه ..
حبي نولد بالناصريه ..
بقلعه سكر .. الي اعتبرتها قلعة حبنا ..
ونهر الغراف شاهد ع كل لحظاتنا ومشاعرنا ..

كنت اسمع يگولون ولد الناصريه اذا يحبون يوفون ويحبون بكل جوارحهم ..
وكنت. مااصدگ لان بابا ترك ماما ..
بس هو بنفس الوقت حب بتول وكتل نفسه عليها ..

وهسا صدگت هاي المقوله .. من شفت حب مصطفى الي ..
وشلون تغيير ع مودي ..
رغم عصبيته وثگله بالكلام ..
الا انه يمي احسه شاعر مليان بالحب والرومانسيه ..

كنت كل ليله ماانام الا اسمع شعر منه لو اغنيه بصوته العذب ..

مصطفى اخترق مملكه قلبي وبقوه .. مااعتقد يجي يوم اتركه او اگدر احب احد بگد مااحبه ..

هو مثل مااتغير عمودي .. گدر يغيرني ويصنع مني انسانه رزنه وواثقه من خطواتها ..
كنت احس نفسي طايشه ومالي هدف بالحياة ..

هسا هدفي دراستي ومستقبلي وقبل كولشي حبي ووفائي المصطفى ..(بقلم الكاتبة شمس)

……………………

هدأت الاوضاع وماما اصرت نرجع ..

وصار وقت الوداع .. تعودت ع الحياة هنا وبساطتها ..
راح اشتاق مو بس المصطفى ..
البيبي الي تعودت عليها وعماتي ..
وبابا الي عشت وياه لحظات ماعشتها بطفولتي ..
الاخواني وحبهم الي رغم خوفهم من امهم ..

وبنات عمتي الي صاروا مثل اخواتي ..
هذا كله خلاني اطگ بجي واني اودعهم ..
لحد ماوصلت العمتي افراح دا اودعها ..
حظنتني وگالت لاتبجين .. يجي يوم اجيبج جنه الي .

بين خجل وبين دموع وفرح .. سكتت ماعرفت شنو اجاوبها معقوله مصطفى حاجيلها لو هي حاسه علينا ..

لبست حجابي والجبه .. واجو الولد اخذوا جنطنا وغراضنا ..
وهم جدوا مهدي ..
طلب يصعدون صوغه صناديگ خضروات وفواكه من المزرعه مالتهم ..(بقلم الكاتبه شمس)
وطلب نجي بين فتره وفتره ..
وگال اريد اسمع اخبار طيبه عنج بدراستج ..ادري بيج سباعيه ومو بحاجة اوصيج ..

اني مدنگه واهز براسي .. تالي بست اديهم هو وجدو هندي ورفعت راسي ..
صار مصطفى گبالي .
ضايج
ومهموم
وعبالك بحداد.
يباوعلي بحسره والم ..

اني عيوني حمر من البجي ووجهي احسه ورم ..
نزلت دموعي لا اراديا ..
عيونه تحجي وگلوبنا تبجي ..

سلمنا وصعدنا بالسياره بابا يوصلنا .
تالي الله نطق جدو مهدي ..
گاله عادل .. اخذ مصطفى وياك ..
حتى لاترجع وحدك ويساعدك بالسياقه ..

احس گلبي طار وروحي رجعتلي ..
گعد بصف خالو ..
واني ورى مصطفى وماما صارت ورى بابا ..

رجعنا للحله ..
بقينا نباوع البعضنا بالمرايا الخارجيه الي يمه ..

نباوع للشوارع شلون مهجوره ..
وهوي بنايات قاصفيها والحرب مخربها ..

المستشفيات والدوائر والمدارس مخربيها وصاير بوگ ..
ونهب ..
شعب ينهب ممتلكاته ويستولي عليها بدل ميحافظ عليها ويحميها يخربها ويدمرها ..

ميلام جدو مهدي من يگول شعبنا لو گلب ع گلب ماگدر المحتل يدخل اراضينا ..

همه يبوگون والامريكان يضحكون عليهم ويصوروهم ..
اكيد راح ننفضح بين الدول ..

ساعه وگفونا والسيارات كلها وگفوها من وصلنا الطريق السريع بين الناصريه والديوانيه ..

اجه رتل امريكي دخل بكل معداته وتجهيزاته ..
واضح انهم ناوين يستقرون ومايطلعون بسهوله من العراق ..

بصعوبه گدرنا نوصل الحله ..
بينما كنا قبل نروح ونرجع وبكل المحافظات بسهوله بدون عوائق ولاسيطرات ولا احد يوگفنا ..

وصلنا بابا وتلگونا خوالي ..
ونزلوا الغراض ..
طلع حمودي .. شافني ضحك .. وين هالغيبه اشتاقينا ..
باوعت المصطفى هيج ..😡😡😡
#بقلمي_شمس
يتبع… .