الساعه 7 وسيد ماصحي من النوم..حُسنة جات تنضف الغرفة لقتو نايم😴صحتو من النوم
حُسنة:سجمي ياراجل ها..قوم علي حيلك الشغل بتتاخر ..
سيد:ياولية قولي بسم الله الليله اول يوم في رمضان شغل شنو البمشي ليه دا؟؟صيام وحر وشغل كمان!!😏
حُسنة:ياراجل بيخصمو من المرتب ,,قوم علي حيلك😳
سيد:خصم شنو ومنو يقدر يخصم مني كدي جيبي التلفون دا هنا النضرب لمدير شؤون الموظفين واظبط القصة دي 😼
ادتو التلفون وهي مستغربه..وهو بين صاحي ونايم دق الرقم وانتظر..
ترررن ..ترررن..تررن.☎
سيد:الو استاذ محمد....
محمد :الو عليكم السلام..منو معاي؟؟
سيد:معاك سيد محمد سيد ..
محمد: سيد.!! رمضان كريم ياراجل الرقم غريب في البيت انت ولا شنو؟؟
سيد:الله اكرم..اي اي في البيت..
محمد :خير مالك ماجيت الشغل..؟؟😳
سيد:انت عارف انا عندي القرحه وليها كم يوم قايمه علي وكمان السكري مرتفع شوية..وكلاي ديل منتهيات مع الصيام بتعبني شديد قلت اخد اجازة كم يوم لما ابقي كويس..😌
حُسنه تعاين ليه بخلعه,,وتقول ليه :ياراجل اختشي دا رمضان بطل كضبك المسيخ دا!! لا تمارضو فتمرضو فتموتو😏
سيد يحمر ليها ويقول ليها اصبري لي النكمل كلامي مع الراجل..😡
محمد:خلاص ياسيد بعمل ليك اجازة مرضية..😓هو طبعا عارف سيد ماعيان لكن خايف منو وبينوا وبين نفسو قال رمضان بوجود سيد ماااابنفع احسن اديه إجازة ونرتاح منو
سيد:الله يخليك ,,ان شاء الله نسد ليك في الافراح....يقفل السماعه ويقبل علي حُسنه..ياولية اتي انا كم مرة بكلمك اقول ليك وكتين اكون بتكلم في التلفون ماتقاطعيني يقطع رقبتك يافقر 👊🏻👿
حُسنة:نان ياسيد الكضب دا حبلو قصيييييييييير ,,ورمضان دا ربنا قال من صام رمضان ايمانا واحتسابا غفر له ماتقدم من ذنبه..انت ماداير مغفرة ربنا..بطل كضب في رمضان علي الاقل..
يحس سيد بالخوف من كلامها ويطردها من الغرفة علشان كلامها بخوفو وبتديه النصيحه اللي هو ماعاوز يسمعها..
سيد:ياولية طيري من وشي انا برااااي عطشان وجعان ما اتفش فيك ..اللهم اني صايم..😖
ويغطي وشو ويتكرفس تاااني وينوووم ويشخر..وحُسنه تحسبن عليه وتمشي..😣
الساعه 3 قام علي حيلو مخلوووع وريقو نااشف من العطش
سيد:حُسنة,,ياااولية..يااسجم..
حسنه في المطبخ تجهز في حاجات الفطور سمعتو بيكورك..في سرها الله يستر من اليوم دا الليله الراجل دا من يبدا رمضان يكشف حالنا في الحلة بالطريقة دي..يا الله تعقلو وتهديه..
حُسنة:هوووي ,,اي جااية ..وتجي جاارية جرري ماالك ياراجل؟؟😳
سيد:الساعه كم🤔؟؟
حُسنة :الساعه 3 😌..
سيد: تلاته شنو ياوليه خرفانه اتي..قولي 6 إقلاعها خليها 5ونص☹..!
حُسنه :تلااته قلت ليك..وكدي قوووم عل حيلك صلي ليك صلاتن تنفعك الصبح والضهر ماصليتن بعدا العصر اذن..صيام برا صلاة دا صيام شنو هو؟؟😣
سيد:بكره رمضان عشان نقتك الكتيرة ووعظك المابتفتري منو دا..😡
حُسنه:ياراجل بدون صلاة صيامك دا رايح عليك جوع وعطش سااااااي..
سيد:اوووووووف,,خلاص اقفلي قدومك دا الواحد مايسعلك سعال تنفجري فيه👊🏻
قام صلي وقال ليها..ياحُسنة انا مااشي انوم..وصحيني مع الاذان قبل الاذان كان مات ابوي ماتصحيني خلي اليوم الطويل دا الانتهي علي خير..قبل الاذان بربع ساعه حُسنة صحتو.قام علي طول قعد في الفرشه منتظر الاذان..الاذان قبل ما يأذن هو كب العصير في كبايتو..لما الاذان بدأ هو ماصدق والعصير خلص قبل المؤذن مايكبر سمح..كباية وراء كباية وياكل بشراااهة ونهم لما نفسو اتقبض تااني ومن هناك علي السرير..
حُسنة صلت المغرب ولمت العده للبنات يغسلوها وقرت شوية في المصحف وعملت القهوة وجات شايلاها..لقت سيد ناايم في السرير يشخر..حُسنة:لا حول ولا قوة الا بالله لاااا إله إلا الله..ياا رب لطفك..
سيد سمعها وقام مخلووووع :مالك ياولية في شنو؟المات منو؟؟
حُسنة:نبري ياخوي موت شنو؟؟الجاب سيرة الموت شنو هسي؟؟
سيد:المرة المطرطشة دي خلعتيني ..صحيتيني من النومبصوتك المتل الرعد دا و سامعك بتحوقلي قلت اكيد زول مات..
حُسنة:بحوقل في حالك ات دا ..رمضان دا انت قائلة نوم واكل؟لا صلاة لا عبادة!!😒
سيد:حالي مالو هسي؟ناااايم سعلتك ولا جيت جمبك؟؟
حُسنة:قولت ليييك وبعيد ليك واكرر تاني حالك في الصيام برا صلاة ولا تعبد..شهر رمضان دا للعبادات ما للاكل والنووم....وكدي بالمرة قوم وشوف اولادك ديل طفشو وين كمان من الضهر قامو من النوم مرقو ماجو راجعين البيت تاني ☹.
سيد:طفشو منك اتي دي,,مابتصدقي رمضان يجي وتستعدي بري نقنق نق نق باعوضة بس😠.
حُسنة:ياراجل عقاب حديثك المسيخ دا لمو عليك..رمضان دا فارضاه عليكم انا؟؟😡كدي قوم استغفر ربك وصلي المغرب وارحكا معانا الجامع نصلي التراويح خلي ربنا يرحمنا ويقبل صيامنا ...
دا كان ملخص اليوم الاول من رمضان لسيد جرسه وعيلتهولسه القصص جاااية.
يتبع....
