عارفين من البداية انو رمضان السنة دي جاء في الصيف..والدنيا مولعة من الحر..سيد كان ناااايم فجأة الكهرباء قطعت..وحس بالعرق والحر قام من السرير زهجااان.
سيد:احمد ..ياااولد..
احمد:اي يابة مالك في شنو؟؟
سيد:انا بناديك تقول لي جاااي ولا تقولي في شنو😡؟؟دايرك تركب لي الخرطوش في الماسورة وتفتح الموية..وتجيبو لي هنا..
أحمد يعاين لأبوه بزهج..ويمش يركب الخرطوش..
أحمد:اسع عليك الله كان ما كسسل منك الحمام جنبي ولا جنبك؟
سيد:جنبي انا الا بدورك ات تقوم من رقدتك دي وتتحرك شوية
أحمد يحمر لي ابوه ويدخل الغرفة..سيد زعل من ولدو شديد ,,لكن ماسألو لانو متعود غير محمد مافي زول بحترمو في البيت..ومافي زول بسمع كلامو..سيد بدأ يرش لقى الموية بسيطة..تاني كورك لي احمد..
سيد:احمد..ياااولد..ها السجمان دا..انا مابكوروك لي؟؟
أحمد:الله يطولك ياارووح ..مااااالك في شنوو؟؟😖
سيد:روحك مارقه الرمزية دي ضعيفه كدي مد لي الجردل والكوز ديل هنا..
أحمد: والله اتَ جنك مراسيل وغلبة..عليك الله اسع الحر دا ماك حاس بيه قاعد في الحوش وتكورك كدي؟؟
سيد:خلي الكلام الكتير دا وجيب لي الجردل والكوز ديل..ما اقوم اخنقك بالخرطوش دا..براي الصيام مزهجني😖
أحمد:ياحاج هوي انا مافاضي ليك..ماشي لي اصحابي ديك العب معاهم كتشينة..قوم براك جيب حاجاتك قايل روحك براك صايم ولا شنو😏
سيد:الله يازاك آآ المعولق..اصلك الزول مابقول ليك شئ تسويه..ولادة شنو دي المافيها فايدة كلها دي ولادة مانافعة!!
أحمد يطنطن ويطلع من البيت لي بيت خالد صاحبو يلعبو الكتشينه..
سيد:حُسنة,,ها مرة ها..حُسنوووووووووو..
حُسنة:هووووي,,بتدور شنو؟؟
سيد:جيب لي الجردل والكوز الموية ضعيفه داير ارش كان الواطة تبرد شوية..ونقدر نكمل باقي اليوم دا..
حُسنة تشيلهن تديهن ليه وتجيب بنبرها وتقعد جنبو..سيد خت الخرطوش في الجردل وبقى يشيل شوية من الجردل يكبها في الارض وشوية في راسو..وحُسنة تعاين ليه..
حُسنة:هاراجل بجيك التهاب كدي😬
سيد:اكان ختيت الصيام دا..ونقتك اتِ دي فد شئ بيجيني مافي😤
يشيل كوز يكبو في راسو ويكشح التاني في الارض..
حُسنة:هاراجل خلاس كفى..الحوش بقى بحر..
سيد:خلاس خليتو ليك مارق علي الشارع..شيلي المقعد والجردل ديل ختيهن لي في الشجرة في الشارع ويشيل هو الكوز والخرطوش ويطلع الشارع يقعد قدام الباب ويقعد يرش في الشارع..كوز في راسو وكوز في الارض....
