سيد جرسة

الجزء 11

سيد جرسة قام من النوم زهجااان..ومن الصباااح الدنيا حرر....سيد طلع من الغرفة..لقى حُسنة جاية من الشارع..وشكلها زعلااانة.

سيد:ها ولية الواطه متين صبحت قمتي تتحاومي ؟؟وتكوسي بالحله!

حُسنة:الواطة صبحت من واحده ..وهسي الساعه 12..يعني اليوم في نصو🙄علا ات نااايم ماك جايب خبر

سيد:نصك للكلاب..شوف المرة المسيخة دي عليك النبي..واقفة علي الهبشة بس😖

حُسنة:ها راجل ها ..كاتلة ليك زول انا مناقرني كدي؟؟

سيد:اي ,,كاتلاني انا دا بالمغايس..ماك عارفه روحك يعني؟؟هسي كنت ِ طاشة وين؟؟😡

حُسنة:امونة بت حاج حمد دي ضربتها عربية علي السوق كدي..مشيت اشوفها قالو في المستشفى..🙁

سيد:تستاهل..ماكتلتها ريحت منها؟؟..انعملها بت مابتسمع الكلام ..وايام الله السبعه هي طاشه 😤

حُسنة:تبرى وتستبرى,, البت صغيرة ماتدعي عليها..وكدي ارحكا مع الناس موقفين عربية برة ماشين ليها المستشفى😏..

سيد:مستشفى شنو البمش ليها في الهجير دا؟؟ماك نصيحه اتي؟؟دا حر يكوس فيه زول صايم؟؟😣

حُسنة:ها راجل الصيام بتخلي ليه الواجبة كمان؟؟ولا ات برااك الصايم والناس كلها فاطرة.؟؟البت في حالة خطرة قالو فيها تعيش وفيها ماتعيش😪

سيد:وانا بستفيد شنو منها كان عاشت؟؟وبفرق معاي شنو كان ماتت يعني🙄؟؟علشان اطلع في حر متل دا!!علشان تقولي امش اسع دي كمان

حُسنة:سيد,,رمضان دا القلوب بتحن فيه..ات قلبك بقسى..خت في مكانا بت من بناتك لا قدر الله ..بترضى الناس مايجوك؟؟ويقولو ماعندنا بيها شغلة؟؟😪

سيد:بعد الفطور بنمرق نمش ليها آآ مرة ماتجوطي لي راسي وتفطريني ..ات اصلك اكان ماكتلتيني في رمضان دا مابترتاحي😖..

حُسنة:بعد الفطور شينه مننا..والمستشفى بعيد..اخير نرافق الناس ونمش من اسع..

سيد:خلاص آآمرة انطمي ارحكاكي..

طلعو برة لقو البص منتظر الناس في الميدان..سيد دخل في البص وقعد قدااااااام..وبقي يعاين لاي زول يركب ويديه حقو..ويتنرفز في الناس😡

دخلت زينب جارتهم..وبقت تفتش ليها في كرسي..سيد اصلاَ بكرهها..ولشقاوتها توبها عتر ليها وقعت وثبتت فوق مقعد سيد..وهو طبعا لقاه سبب يتشاكل بيه😖

سيد:ياولية ات طايرة وين!تتراجفي كدي تقول عندك صرعه!

زينب:مكان ات طاير.

سيد:تطيري ماتركي..شوف المرة المعولقة دي..

زينب:اريتك بطيارة محومد ود سعد,,كاسوها مالقوها..😡

حاج مضوي شيخ الحلة:ها ناس ها صلوو علي النبي..سيد..بتشاكل في الحريم مالك؟؟🙄

سيد:هو اسع عليك الله ادي تشبه الحريم.؟؟دي تشبه الككو..

زينب:الله يصبرك يا حُسنة يختي..دا مو راجل(ن) ينحمل..قاعدة معاهو كيف دا!🤗

اي زول يحاول يسكتهم سيد يكيل ليه من الشتايم اللي يسكتو..غير زينب ماف زول برد عليه ..

زينب:ياراجل ات مزهجك الصيام دا عارفاك انا..من رمضان يجي ضُلك تشاكلو..وماعندك حل هدي شبكة حدك القبر بس حتى توقف صيام😏

سيد:مجنون انا بشاكل ضُلي ..ياولية انزلي احسن ما انزلك انا😡

زينب:عربيتك دي وانا ماني خابراها؟

عتمان:ياناس في شنو..الزمن بتأخر ونحن بندور نصل المستشفي ونرجع نحصل الفطور في بيوتنا..🙄

سيد:علي بالطلاق الليلة الولية النقناقه دي ماتنزل البص مايتحرك ولا شبر..😤

زينب:شووف الراجل المعولق دا النبي..!!دي رجالتك علي انا؟؟صوم صيامك الغالبك دا👹

سيد:ياولية منو غالبو الصيام؟؟قايلاني زيك؟؟

زينب:زيـي انا بتلقاه وين انت؟وات عندك زي مع الناس؟؟يا راجل يا خايب😏

سيد اتحمق شديد وكفكف يدين جلابيتو وجاي يضربها وهو يكورك:شوفو ليكم حريم اخر زمن..زيك شنو اتِ مع الحريم..كمان بتقولي علي خايب يا معولقة .انزلي قلت ليك ينزل هدادك...مرة خازوق.

طبعا بعد كواريك والاجاويد ادخلو ...حجزوه منها ...ونزلو زينب من البص..وسيد قاعد ماف زول قادر يفتح خشمو لما وصلو المستشفي..

وصلو لقو البت في الانعاش والدكتور قاليهم حالتها متأخرة...وامهامتجرسة وابوها صااابر يستغفر ويدعي بس ..الناس كلهم كفرو ليهم وقعدو مع اهل البت في ضل شجرة في المستشفي..

سيد: قاليهم اتو حاج حمد دا ساااكت كدا كإنها البت دي مابتو ..

عتمان:ياسيد دا كلام شنو الراجل صابر ويدعي الله يرفع بتو...انت بتدورو يتجرس متل النسوان؟؟

سيد:انا ماقولت يتجرس لكن مابقعد ساكت زي الحيطة كدي!

يمش يقعد جنب حاج حمد ويتكلم بصوت عالي مع الراجل الجنبو:الدكتور قال احتمال انها تعيش ماكتير علشان كدي انا بشوف تسبقو حاج حمد علي البيت و تجهزو حالكم للبكاء تشوفوا الصيوان والكراسي وكدي🙄

الراجل:لا اله الا الله ..دا كلام شنو يا راجل!الاعمار بيد الله ماتقول كلام ذي دا!

حاج حمد:استغفر الله العظيم...يا سيد مافي زول بعرف حاجة ذي دي دا في علم الغيب

سيد:ماهو علشان مامعروف انا قولت ليه كدا بدل يتكسرو في المستشفي وتقعد تصرف عليهم اكل وشراب ...وبعدين تبقي ليك ميتة وخراب ديار🙁

حاج حمد:لا اله الا الله يا سيد اختاني احسن ليك..

عتمان:ياسيد كلامك الشين دا مامكانو..مافي داعي للبتسوي فيه دا

وطبعا عارفين انتو سيد وعتمان مابجتمعو الا المشكله تدور... اتشاكلو وبقو يتضاربو لما جوهم ناس الهدف الفي المستشفي فكو المشكله وطردوهم برا المستشفي

الله يهديك يا سيد________

يتبع.....