سيد جرسة

الجزء 08

زي ماعارفين من رجب سيد جرسة جاب احتياجات رمضان واجبر حُسنة المسكينه انها تعوس الأبري(الحلو مر) والرقاق..وركب مكيف في غرفتو علشان الحر..ومن نص شعبان بقي ماشي وجاي من المستشفي>>بجهز في تزكرة علشان لو مافطر اقلاها يكون مؤجز في رمضان..ويشيل ويتشكي من السكري والملاريا ووجع الكلي،ومن أول يوم في رمضان استلم اجازتو واترزع في البيت،،ومن ما يناقر ويشاكل في الناس ومرتو واولادو..بروفة لمشاكل رمضان...طبعا يومي يتعشى يدفس كرشو دفس ويساهر لحد السحور..يتسحر وينوم..لا يصلي صبح لا ضحي ولا ضهر ولا عصر لا هم يحزنون..

يوم من ايام رمضان صحى سيد علي كواريك وزول بناديه ..ياسيـــــــــد..

قام مخلوع مافاهم شئ وشو مورم من كتر النوم..وعيونو محمرة👺..

سيد:اصبحنا واصبحت الناس جايطه..انا ماعارف دا رمضان اصلو بيجيب المصايب..

حُسنة:استغفر الله ياراجل..رمضان شهر العتق ماتقول كدي تفسد صيامك انعل ابليس😨..

سيد:ابليسن غيرك اتي وين دا؟؟انا ماني خابر لي ابليسن غيرك اتي..كدي اسع البكورك لي دا منو؟؟وبدور شنوو؟😡

حُسنة:دا مُحمد ود التوم قال داير القصد بتاع المكيف ولا بشيلو..

سيد:اريتو بالشلل ان شاء الله..انا دافع ليهم ربع القيمه..يشيلوه شنو كدي النمش عليه😤..

مُحمد ود التوم:السلام عليكم يا سيد..ورمضان كريم😊..

سيد:لا بدور منك كلام لا سلام ..قصد شنو البتدورو دا لي هسع زمنو ماجا...الجابك لي شنو😡؟؟

مُحمد ود التوم:المدير قال لي اجيب القصد او المكيف..وهسي لو ماعندك القروش سلمني رقبة المكيف دا😏..

سيد:يازول احسن ليك تختاني انا صايم..المكيف دا مابنشال من هنا ويتلاسنو وسيد يكيل لمحمد الاساءات وفي الاخى يضرب مُحمد ود التوم كف وبنية..

مُحمد ود التوم:معناة كدا انا بمشي القسم والبوليس هناك ياخد لي حقي ويشيلو منك المكيف بالقوة نشوف تاني تطول لسانك ويدك كيف😤..

وفعلاً الشرطه تجي وتسوق سيد جرسة للقسم..ويبدا التحقيق معاه..

الشرطي:اسمك وسنك وعنوانك🤔..

سيد:اسمي سيد..وعمري دا قدرو اتا براك مش انت الحيكومة وعارفين اي شئ😏

الشرطي:يازول الزم حدودك وجاوب قدر السؤال😤

سيد:اسع المطلوب مني شنو جنابك😨؟؟

الشرطي:مطلوب منك تعتزر للزول الضربتو واذا عفي تدفع القروش او تديه المكيف موضوع الشكوى😠..

سيد:لا حول ولا قوة الا بالله..قروش دي اجيبها من وين اسع؟؟رمضان دا معاه قروش؟؟دا بنفض الجيب😟..

مُحمد ود التوم:انا عافي ياجنابو..لكن خليه يجيب المكيف بس🙄..

الشرطي:طيب ياسيد تتعهد انك تديه المكيف او القروش😒؟؟

سيد:يعني ياجنابو اصوم بدون مكيف😫؟؟التلاجه كمان خربتي رمضان بدون هواء صاقط وموية تلج بيبقي دا؟😨..

مُحمد ود التوم:اتا الا تصوم بمكيف؟؟صوم سااي في الحر دا😏..

سيد:يازول الاجر بتاع الصيام دا مش واحد سواء كانت الحته حر او برد😟؟؟

الشرطي :اي صح..

سيد :نان انا اصوم في الحر..وعيان..والتلاجه خسرانه ومافي تلج افطر بي مويه حاارة تقطع المصارين..وعتمان و ود المصطفي ضاربين الهواء الصاااقط والموية المتلجه..واجرنا واحد؟؟دا كلام شنو دا😫؟؟

مُحمد ود التوم:اتا ااا زول ها متجرس من الصيام ساكت والله..وبطل تنق في خلق الله..دا حسد منك بس😏.

سيد:ياجنابو امسك مني الزول دا ما اعوقو ليكم وافش فيه مغستي دي..

يفض الشرطي المشكله ويشيل مُحمد المكيف ويقعد سيد في غرفتو يتحسر علي الهواء الصاقط الما لحق يفرح بيه دا😫😫.

تجيه حسنة تتكلم معاه..وتحاول تمتص غضبو شوية..

حُسنة:اتا يا سيد..المزعلك شنو اسع؟؟المكيف؟؟نحن من زمااان بنصوم برا مكيف الجديد شنو السنه دي🙁؟؟

سيد:المزعلني ما المكيف المزعلني الناس الصايمه سلفقه ساااكت واجرها زي اجرنا نحن المساكين الشاوينا الحر ديل😤

حُسنه:سلفقة كيفن يعني😱؟؟

سيد :سلفقة يعني لا حر لا عطش..بي مكيفاتهن ومويتهم الصاااقطه ماهن حاسين بالصيام زينا كدي اليوم يجري الا يلكزوهم يقولو ليهم الاذان اذن حتى يحسو بالوقت..

حُسنة:ياراجل استغفر وازكر الله..ربنا كريم..وعادل وبدي الاجر حسب العمل..ونحن اكيد لو صمنا بي نيه خاااالصه اجرنا مضاعف لان مشقتنا كبيرة والمشقه دي فيها ذيادة اجر لينا😊..احتسبها عند الله وبطل غلك وسواد قلبك دا..واتزكر ان الله خلق الناس وبرزقهم حسب مشيئتوا والحساب حسب العمل..

يتبع.....