طبعا عارفين أن سيد هجم عليه الكلب وعضعضو وخربشو ودوه المستشفي عقموه ولفوه والمحتاج خياطة ظبطوه المهم راااقد ملفوف بالشاشة واللصقات🤕🤒..جنبو راجل عيان شديد وعندو ضيوف كتار..وسيد طبعا حاسي بالغيرة..
كلما يتونسو ويضحكو سيد يحمر ليهم..ويتافأف..وينقنق برااااااه😖👺..
حُسنة:اتا آآ راجل..بتحمر للناس ديل كدي مالك؟؟ناهبين منك قروش😳؟؟
سيد وهو لسه بعاين للناس بعين حاقدة:لا لا بعاين ليهم ساااااااااكت كدي..يا ولية ديل كلامهم كتير وجعو لي راسي دا😠..
وهنا فجأة تعلو ضحكه من الناس اياهم..ولان سيد فاض بيه خلااااص قام عليهم😡😡.
سيد:اها آآ ولية شفتي؟؟غلطان انا وكتين حمرت ليهم؟؟شاقين حلوقهم كدي اتقول موهن صايمين😠
ويمشي علي الناس وعيونو مقلعه ونافش ريشو ويبدأ يكورك فيهم..ويحمر للزول العيان..
سيد:ها غجر هاآآ اتو قايلين روحكم في بيت بكاء تكوركو كدي؟؟دي اسبتاليه(مستشفى) يعني هنا في ناس عيانين مامتحملين غاغتكم المسوينها دي😖..
الناس اللي في العنبر كلهم انتبهو لي سيد وكواريكو..واحد من الضيوف اللي بتكلم معاهم سيد رد عليه..
الضيف 1:انت مادام عارفها مستشفي بتكورك مالك اسي😳..
سيد:ها الممسوخ دا اتا انا بتكلم معاك؟؟وبعدين تانيا يعني انا بكورك عشان اوريكم غلطكم🙄 وانا راقد هنا عيان اتو حميتوني الغمده تكوركو مما جيتو..وتقهقهو كدي اتقول في السوق مافي مراعاة للعيانين..
يتكلم واحد تاني من الضيوف ..وهو شاب صغير لابس لبس محذق ولابس اساور في يدو وعامل جل في شعرو..
الضيف 2:انت ياعموو مالك هسي؟؟زعلان؟؟طيب معليش وي اري فيري سوري للانتربشن(متأسفين للازعاج الحصل دا) الحصل دا😊.
سيد عاين ليه من فوق لي تحت وطبعا نص الكلام مافهمو وحرقو الكلا ولفا مرتين حوالين الولد,,وهبش الاساور اللي لابسها الولد😨..
سيد:واتا جنسك شنو كمان؟؟ولد ولا بت؟؟كدي قول عشان اخبر لي لغه اتكلم بيها معاك..والسافر بالطربشن دا منو دا كمان🤔؟؟هاشئ ها انعدل احسن ليك وأسلِب طولك ما اصفقك كف ارجعك بطن امك اسع دي الله يقطع عقابك آ المخوزق.
الضيف2 بنفاذ صبر:ياعمو انا ولد ماشايفني😏؟؟وبعدين تضرب منو كف انتا قايلها سايبه؟؟
سيد:والله انا الشايفو قدامي بت مسبسبة شعرها وبي غوايشها ولابسه ليها بنطلون ضيق خلاف كدي ماني شايف شئ😒..والبلد اكان مي سايبة جنسك اتا دا بنطلق سااااكت كدي لا حسيب لا رقيب؟؟
حُسنة:سيد خلاص بطل المشاكل..دي مي الحلة اسكت دا مستشفي🤐..
سيد:ياولية يحني كُدرِك ..عارفة مي الحلة.علا ديل بشر ديل؟؟
هنا الضيوف كلهم بدو يتكلمو والزول العيان زااتو اتدخل..وهو بياكل في الفطور بتاعو وقعد يتكلم مع سيد بصوت تعبان وبعييييد..
العيان:اتا يا زول مالك من الصباح انا شايف اي زول يجيني هنا تحمر ليه وهسي بقيت تشاكل في شنو🙁؟؟
سيد:كدي ابلع لقمتك دي اول شئ وبعداك اتكلم معاي يبلعك سحار قول امين..
المريض:لا حول ولا قوة الا بالله ياناس خلوكم منو دا اظنو ويأشر ليهم بيدو علي راسو(نظام مجنون)
الضيف1:انا زاتي من معاينتو لينا من قبيل دي شاكي في الحكاية دي😁.
سيد:حكاية شنو آآزول ها يحكوك من الظلط(تضربو عربية تلصقو علي الظلط ويحكو الجثة من الظلط).خبارك اتا؟؟قايلني مجنون؟الجن اليركبكم شحدت ربي عليكم شوف الناس العياقة ديل..
وهنا الضيوف ما استحملو نفسهم ومسكو سيد وهااااك ياضرب وسيد يكورك الحقوني ..كتلوني..ويجو الناس يرفعوه منهم..ويرجعوه سريرو..وهو مرضرض..ومعفر..
سيد:كتلوني الله لا كسبهم عافية..ايديهم تقول مصبوبة بي خرسانه يمين بالله الواحد يصمتني كانو بصمت في حيطه يصمتهم لوري ان شاء الله شاحد ربي عليهم 😪
حُسنة:مابتوب اتا ؟براك فتشت المشاكل..الناس ماسعلوك..انت ماعندك حيل للمضاربة مافي داعي تشب للناس في حلقها 😞
سيد:ياولية انطمي الطامه التاخدك ان شاء الله..
وهنا يجي الدكتور لافي ويقول للزول الجنب سيد ممكن تطلع ..واداه تعليمات للاكل..وقال ليه ماتصوم علشان جسمك ضعيف..
جاء لي سيد..وقال لي سيد:ممكن تطلع خلاص مافي شئ..بس تجي تاخد الحقن في زمنها💉 لان احتمال الكلب يكون مسعور وكدا..
سيد وهو بعاين للمريض الجنبو وللدكتور:وتاني مافي وصية😟؟؟
الدكتور بظرافه:لا مافي..بس تبطل شكل ومهابشة😁..
سيد:يهبشك الجن ان شاء الله..بهابش مالي ملبوس قالو ليك؟؟انا بقصد علي الاكل واني افطر وكدي يعني🙄..
الدكتور:تفطر لي شنو؟؟من متين عضت الكلب بفطرو ليها😳؟؟
سيد:اتا ماك جايب خبر لي شي..كيفن مابفطرو ليها؟؟انا مانزفت وفقدت دم😒؟؟يعني جسمي بقي ضعيف ودمي نقص😖؟؟
الدكتور: دا منو القال ليك كدا ؟مافي عضه كلب بفطرو ليها..كلها نقطتين دم ونحن خليناك تفطر امس..والاكلتو وشربتو دا بكون عوض ليك..لكن جسمك كويس مامحتاج وماعندك حبوب علشان تفطر ليها وجروحك نضفناها ومامحتاج الا بعد اسبوع نفط ليك الخيط الفي الجرحتين ديلك بس😊
سيد ماعجبو الكلام نهائي وقال :دكتور اتا ولا حمار؟؟اتعلمت الدكترة دي في الزريبة اتا؟؟الشافع الولدو من بطن امو بيقول ليك عضة الكلب البنزف منها دم بفطرو ليها😤
الدكتور: استغفر الله العظيم انا ح اعتبر نفسي ماسمعت الإهانات دي..و العندي قلتو ليك فطور مامحتاج تفطر وانت حر اللهم قد بلغت اللهم فأشهد..😡
حُسنة:اتا اااسيد ما قالو ليك ماتفطر خلاص ماتفطر.😟
سيد:ونان البغل الجنبي دا قالو ليه يفطر لشنو😤؟؟
حُسنة:اجي ياخواني..دا عيان😟..
سيد:وانا حتيي عيان عاد جاي المستشفي تغيير جو؟؟ ماياهو المرض😖.
حُسنة:يا راجل الله مابكضبو عليه..واتا ماعندك شئ بحميك الصيام..ارح علي بيتك ارح علي بيتك..
يتبع....
