زي ماعرفنا في المواقف السابقة..سيد جرسة شخص عصبي وبتجرس من الصيام شديد..واليوم صحى من النوم ماطايق نفسو كالعادة يعني ماشئ جديد..قام من سريرو وحام شوية في البيت ..ورجع علي سريرو تاني رقد...جات حُسنة داخلة الغرفة..قعدت قدامو وبقت تعاين ليه ماقادرة تسألو لانها شايفاه زهجااان😡
سيد:مالك بتعايني لي كدي؟؟بتدوري شنو؟؟👺
حُسنة بتردد:ماني دايرة شئ🙁
سيد:خااابرك انا من تقعدي تغرِوِدي لي في عويناتك ديل وتكتلي فيهن بتكوني مسوية ليك نصيبة او دايرة ليك شي...اها انطقي في شنو😖
حُسنة:مافي شئ..عِلا حليمة اختي دي كانت دايرالها سُلفة كدي..قالت لمن راجلها يصرف المرتب🤐
سيد:سُلفة شنو يسل حلقومك اتِ وهي😡..عرفتك انا من قعدتي قعدتك دي دايرالك شئ😤
..حُسنة:مالك آآراجل بتكورك كدي؟؟الناس بالناس ياخوي وهي لو ما احتاجت شديد ماطلبت😞
سيد:بقيت اخوك اسع دي؟؟قوليها ماااعندنا😏يعني انت اي طلب لازم تنفذيه؟
حُسنة:ماعندنا كيف؟وهي عارفاك عندك قروش جابوهن ليك حقات الحصاد🙄
سيد:ماعندنا قلنا..جنس ريدتك للشبك دي ماشفتها اصلو..ثم تانيا انت الوداك تكلميها بي قروش الحصاد شنو آآ الفقر ماك عارفاها عينها فارغه وبتدور حق الناس وعايشه علي الشحدة!
حُسنة:شبك شنو؟؟دي اختي آآآ سيد..والرسول صلي الله عليه وسلم قال في مامعناه من فرج عن مسلم كربة من كرب الدنيا فرج الله بها عنه كربة من كرب يوم القيامة ..وانا ماكلمتها هي سمعت في الحله😪
سيد:قلت ليك مااااااافي..اختك دي جنها شحده..ومابترجع القروش بالساهل..وانا ماااااعندي ليها قروووش..😖
حُسنة:سيد عليك الله قول خير..والله حالتهم تحنن ,,شئ ياكلووه في البيت ماعندهم..ودا رمضان شهر الرحمه اي شي تقدر تطلعو في سبيل الله ماتقصر!
سيد:اها قمتي.؟؟رمضان دا اي شئ تعلقيه فيه..خلي رمضان اليرحمها انا قرش ليها ماعندي😤
حُسنة:رمضان بيرحم بانو يخلي الناس الزيك يتصدقو من قروشهم..والمساكين ذينا يترحمو بالقروش والعندهم الله يرحمهم بالصدقة دي🙁..
سيد:يا ولية هووووي..انا صدقة ماعندي..شايفاني عندي قروش لي صدقه كمان..انا اسي بدور ادفع قروش المكيف ماقادر.. وزاااتو الصدقه في جنس ناس اختك دي مابتمش😒
حُسنة:كيفن مابتمش؟؟الصدقة دي انت من تمرقها الله بيقبلها..بس تحسن النية..واختي مالها؟؟
سيد:اختك جنها شحده,,و راجلها مسوي روحي فاهم اي شئ..وعفيف تقول متربي في قصور موش متربى بالشحده..اولادو زاااتهم مربيهم بالشحده..وينكر دا كلللو ويطول لسانو علي الزول..ويسو روحو شيخ😒
حُسنة:ياراااجل هووووي..ماتغلط في الناس..عندك حسنة امرقها ساي خلي الله يقبلها..ماعندك ماتقول جنس كلامك دا..وخليفة راجل حليمة دا..راجل مسكين زول الله سااكت..بيثبت المعروف للناس..
سيد:مالك الكلام وجعك؟؟مو صاح؟؟من يلاقيني يقعد يدرسني في الاخلاق تقول انا قليل ربايه ويفتخر بي قرايتو في بلدان الله..انا مالي جاهل؟ولا ماني خابر القراية ولا ماني خابر الدين؟؟؟👺وهو كان فيه عمار كان قعد في الواطة دي ولمه ليه قريشات لي اولادو..بدل و يحوم عُمرو كللو ويجي في النهاية يشحد ويتفلفس..
حُسنة:لمن كان بيحوم للقراية كان بيشتغل..واسع ماك شايفو بقي امام الجامع في الحلة الجنبنا..
سيد:قرايتو سوت ليه شنو؟اكلتو ولا شربتو؟؟ماهدا يشحد هو ومرتو.😤
حُسنة:اجي آآ راجل جنس الكلام الشين دا ماتقولو..مالو شحدك شنو😨؟
سيد:هو مابيجي يشحد..عِلا برسل اختك اُم صنقور دي..اسع اتِ تيابك كلهن من عند اختك؟؟البنات والاولاد هدومهم كلها ميهن عند اولاد اختك وبناتها؟؟اكلهم وشرابهم من وين؟موش من عندنا من هنا؟؟
حُسنة:اي صاح كلامك..عِلا آآ سيد الزول مابحسب جنس دا..بسكت عليه علشان يلقاه في الآخرة😞
سيد:يااولية انا صااااايم..والنقة الكتيرة بتعطشني..وانا نعسان عشان كدي اختيني اسع وغوري من وشي😡 ..
حُسنة:سيد..عليك الله كدي اديني ان شاء الله 100 الف بس انجبر بيهن خاطرها😞
سيد:100 ألف بس؟؟وهي قبيل كانت بتدور كم؟؟
حُسنة:كانت بتدور 200
سيد:200 مرة وحدة؟؟شوف المرة ام عين(ن)قوية دي..الزو ل الزيها يستلف 10 بالكتييييير..
حُسنة:السلفة ياها السلفة..
سيد:ما ياها..في واحده بترجع ودي حبابها..وفي واحده من تطلعها اعرفها براااااك مي رااجعه..والله يعوضك فيها..علشان كدا احسن تستلف عشرة علشان لو مارجعتها ماتكون حارة😒
حُسنة:انا خاته لي صندوق مع نسوان الحلة..لمن اصرف بديك ليهن كان حليمة ماجابتن🙄
سيد:ياااولية دا شنو كمان الصرفه قروشها وارثاهن من ابوك؟؟ولا جايباهن من مرتبك؟؟مامديك ليهن انا؟؟😳
حُسنة::ماني وارثاهن..عِلا مُوفِراهن..واتِ بتسعل من القروش البتديني ليهن مالك؟؟
سيد:عشان بشوف لسانك طويل وقلتي بتجيبيهن لي..وهن قروشي..تستغفليني يعني؟؟تسدي لي الدين بقروشي؟؟شايفاني دلاهة اظنك👺
حُسنة:ماني قاصده شئ ياسيد..وحات تربة المرحومة امك تديني ليهن🙄
سيد يعاين ليها وهو ماعارف يديها القروش ولا يقول شنو
سيد:خلاس قومي شيليهن..100 بس,,وتكتبي لي بيهن وصل امانة وكان مارجعتن تدفعيهن ات يا إمتن علي بالطلاق ادخلك الحراسهٍ....
حسنة:وصل أمانة ل 100جنيه ياراجل؟😳
سيد:كان ماعاجبك خلي انا زااااتي احسن لي الم قريشاتي علي😏
حُسنة:لالا خلاص بكتبو وانت الله يخليك ويطول عمرك..ويخترك ويبطرك😁
سيد:هووي آآآمرة ,,شغل الشحده دا مابنفع معاي..وتاني مرة اوووعك تجي تتمرحكي لي كدي..
حُسنة:خلااس سمح..
يتبع.....
