اول الأيـــــام

عرس من لا چاره

#اول_الايام
الفصل السادس
#بقلمي_اسراءالجميلي

اسمعيني بنتي ..
خالتچ تگول حسن امطلگ مرته و عايفها يم اهلها هي و جهالها ..
و مناوي يرجعها ابد لان السانها طويل و عرمه ..
تربيتها و تربية جهالها صگط يعني لا خوش مره و لا خوش ام ..
عنده فلوس و مقتدر و راح يگعدج اهنا ابغداد مو يمهم بالبصرة ..
شالت التلفون اتصلت بخالتي ..

امي : هاچ ام عبدلله تريد تتاكد منچ حنان من كم شغله ..
الو شلونچ خالة ؟
خالتي : هلا ببنيتي ..
خالة صحيح امطلك مرته ؟
خالتي : اي يمه امطلكها صار سنتين و هو اصلاً متزوجها هيچ ..
يعني شنو هيچ ؟
يعني زواج تقليدي حتى ما مختارها و لا مختارته بنت العم لابن العم ..
هي مو خوش مرة ..
و ترى راح يتزوجج عقد محكمة و يگعدج بيت وحدچ ابغداد وين هي عليچ يا يمه !!!
شتريدين منه يجرالچ ..
للعلم ابو شيخ عشيرة معروف و حيجون هو و عمامه كلهم البغداد بيوم خطبتچ ..
يعني ناس رفعت راس ..
اي خالة فهمت ..
يلا اروح اني ..

سديته و صعدت فوگ ابچي كالعادة ..
على حظي و نصيبي ..
وسام مرتاح و عايش وي بنت بيوت و صغيره و حلوة و اصيله ..
و اني اليخطبوني شكول شكول ..
حظي امي سوته ..
گعدنا الصبح على الريوگ كلنه ..
اني گالبة خلقتي و اتحرك بدون شعور و احساس ..

سعيد : حنونه ترى خابر حسن و ديسال شنو ردكم ؟
بعدني محاچية شئ و چان ترد امي ..
امي : اي حبيبي كله اي اي متشوفه ساكته و هاي علامة الرضا ..
سكتت فعلاً ردت ابينلهم حبنه و الي چان يربطنه اني و وسام اطهر من عقولهم الوصخة المريضة ..
خابره سعيد و گله ..

اقل الساعة اجه حسن و سيارته محمله بانواع الهدايا عبالك متاكد من موافقتي مسبقاً ..
دخل هو و اخوية للصالة بعد شوية صاحني سعيد ..
اجيت كعدت يمهم ..
سعيد : حسن يگول الي تريدي گوليه ..
اريد انكمل كلشي قبل لا يجون الزلم ..
هزيت راسي اي ..
حسن : شلونچ عيني حنان ؟
اني گلت الـ سعيد الي تريدي يصير ..
گلولچ اني متزوج و امطلك و عدي جهال ؟
هزيت براسي اي ..
ترى هي و جهالي بالبصرة يعني بعيده عنچ و متجي يمچ ابد ..
هزيت راسي نعم ..
و الي تريدي و تتمنيه يجرالچ مني ..
هزيت راسي مرة لخ ..
انتِ خرسه لو معاجبچ الحچي ؟
باوعتله بعجب على جرئته ..
جاوبته بصوت ناصي : الي تريدو سوو ..
طلعت راساً من الصالة ..

ثاني يوم العصر اجه هو و ابوه و عمامه كلهم ..
تم الموضوع قروا الفاتحة من طلعوا بالباب رجع حسن و دخل بالهول علينه و انطاني صفطت فلوس ..
رفعت عيوني عليه ..
هذا شنو ؟
السياگ غير ينطي الچبيرنه اني شعليه ؟
حسن : انطيتهم الاهلچ هاي الچ خاف تحتاجين شئ ..
بس هذا مبلغ چبير شسوي بيه اني ؟
حسن : ليش انتِ تتثمنين بمال ..
بعدين هاي عاداتنة هديت الخطبة تتسلم بيد العروس ..
لزم راسي بيده اليمين و قربني عليه و باسه ..
گدام امي و خواتي و خالاتي و الكل ..
جرئ كلش و ميستحي ابد ..
حسن : اخابرچ بالليل ؟
اي باذن الله ..