اول الأيـــــام

سفرة البصره

#اول_الايام
الفصل الثامن
#بقلم_اسراءالجميلي

سلم على الكل بعدها حچه وي حسن بصوت ناصي ..
انظار عليه حسن ..
حبيبتي اليوم ابقي يم بيت عمي ابو علي و باچر نروح البيت اهلي ..
ليش شكو حسن شنو يصير ؟
ابو عبدلله : لا خية ماكو شئ ..
حسن : ماكو شئ بس حتى نرتاح من السفر ..
سكتت ما بيدي غير اصدگهم ..

بعدها اخذتني مرة عمهم طبعاً كلش خوش ناس ..
ام علي : تعاي يمه نگعد يم البنات ..
وحدة من بناتهم نطت : يااابه لو تدري بيها ام كاظم لا تگلب الدنيا و ما تعدلها ..
گالتله امها : ضمي السانچ بحلكچ احسلچ ..
اني بقيت اتلفت على اليحچون ..
زين ام كاظم شجابها بالوسطية ؟

بعدها طلعوا بناته ديسونه غده و گعدت وي المره ..
گلت خلي استفسر من الام افتهم شنو هاي الالغاز الي طلعتلي بالبخت ..
عفية حنان ميصير حياتچ تصير مثل الاوادم ..
عمة اني شفتچ اصيله و حبابه احجيلي شكو ماكو شنو هاي الالغاز حلفتچ بكل عزيز و غالي عندچ ؟
ام علي : و الله بنتي حقچ ..
هو متزوج بت عمه بس عقد سيد لان احنه عشاير و مو الا محاكم ..
حتى جهالهم ما دخلوهم مدارس ..
بس مرته مو خوش مرة وكحه و عرمه ..
حتى من يضربها تردله الضربه ..
بعد ما اتحمل و طلگها و ذبها هي و جهالها يم اهلها ..
بس ابد ما ممقصر وياهم يدزلهم فلوس حتى اكثر من حاجتهم ..
هاااا ..
زين و عن شغلة المحطة و هروبه قبل ما ينزل .. و كلام ابو عبدلله وياه ؟
ام علي : حبيبتي رجلج چبير اخوته يعني ابن الشيخ و ناس كتلو عمه ..
عمه ما عنده ولد كبار فهو اخذ ثار عمه و كتل اثنين منهم ..
فالعشيرة ذيچ تريد اتكتله ما تريد فصل ..
فتحت عيوني عليها ..
شگول شحچي بعد ميفيد الفاس وگع بالراس بعد ..
اوووف يا حنان چنچ مراح تشوفين راحه ابد ..
لا تشغلين بالچ گومي اغسلي و ارتاحي من الطريق بين ما انكمل الغده ..
لشوكت الهم و القهر ملاحكني يا اللهي ..

غسلت و فتت الغرفة البنات ..
تمددت و افكر بالجاي ..
اوف ربي شكله سيئ كلش ..
قررت اكون قويه مو مثل قبل ..
مو حنان الي اكلو حقها بالحياة و اخرست ..
لان الي يقتل حتى لو بالحق و ياخذ ثار هذا ينخاف منه .. اخذ الروح صعب بس على الخلقه سهل ..
يرادله جلادة قلب و قسوة ..
بده يشتغل عقلي وي حسن و اهله و وضعه ..
يعني طلع ثار على حسن بأي لحظة يروح مني ..
نمت و اني افكر بالجاي ..

گعدتني ام علي صايره دنيا الليل ..
گومي حنان ...
ليش عمة عفتوني الهالوكت ؟
مو شفناچ تعبانه حبيبتي ..
يلا گومي تعشي حتى يوديچ ابو علي لهلهم ..
ليش حسن وين ؟
طلع من الظهر و منتظرچ ابيت اهله ..
ما يگدر يطلع وي احد من گرابتنه لان الكل متراقبين ..
لا تخافين يمه اآنا حجي وياچ ..
لا خالة مخايفه الروح تناخذ من الي انطاها و بس ..
حچيت بقوة و اني روحي ترجف جوه جسمي ..
تعشينه گمت بدلت و رحنه ..
وصلنه البيتهم ..
باطراف البصرة ..
بابة عرب و بساتين و مواشي و بيتهم شكبره ..
دخلنه للبيت تلگونه كومة عالم و مرة گاعدة ما گامت النه ..
چبيرة بالعمر سمره سمينه و ضخمه ..
ام علي : يمه هاي عمتچ ام حسن سلمي عليه ..
گاعدة و وجها مگلوب ما اعرف شبيهها ..