اول الأيـــــام

لعبة النسيان

#اول_الايام
الفصل الثالث عشر
#بقلمي_اسراءالجميلي

گمت اشوف اهتمامه بجهالي ..
و يزيد اهتمامي بيه ..
يحچي وياهم بأسلوب الاب ..
بابا ادهم ..
بابا سمر ..
گمت اعشق جيته و افرح بيه مثل جهالي الي ما شافوا اب ابد رغم عدم تقصير اخواني وياهم بشئ حتى بالمشاعر ..
بس الطفل يبقه يتمنى اب اله وحده و مهتم بيه وحده ..
فرحت وي فرحت جهالي بـ سيف ..
حسيت سيف طوق النجاة الي اجاني من الله ..

بعد كم اسبوع اجتي جيرانه ام فرح ..
يمه حنونه ليش متروحين تقدمين على راتب الرعاية شوية يفيدچ يمه ؟
قنعتني و قنعت امي و رحت اسوي الراتب ..
رحت وحدي ..
دا اتمشى حتى اوصل للشارع اخذ سيارة ..
وكفت بصفي سيارة و رجال يجرني يريد يصعدني بالگوة بيها ..
اني بس اعيط و ميته خوف ..
وچ اصعدي ..
اصعدي لا اصگطچ هسة بالشارع ..
من صوته عرفته الحقير ابو جهالي ..
انوب ارعبت اكثر مليت الدنيا اعياط ..
حسن عوفني حرام عليك شتريد مني ؟
وچ انتِ الي متصيرين الغيري ..
بالگبر و الحگچ يا حنونه ..
منو غيرك حسن ؟
انت منين جبت هالحچي ؟
غيري الچلب الي ديجيكم كومة ..
عوفنييييي انت ميت بالنسبة الي افتهمت ؟
اجتي سيارة عسكرية ..
شافها من بعيد چان يصعد بسيارته و حركها ..
فتح جامة السيارة ..
حشوفچ الميت شيسوي ؟
شحط السيارة و انهزم ..
الضابط : منو هذا خيتي تعرفيه ؟
لا ما اعرفه ..
فدوة الله يخليك ودوني الاهلي اخاف ارجع وحدي ..
اجه وياية واحد من الجنود وصلني الباب البيت ..

رجعت ميته خوف شافتني امي ..
لج حنان شبيج ليش وجهج اصفر ..
شنو لحگچ چلب ؟
خفت عليها و على اخوتي و سكتت ..
لا ماما ماكو شئ بس ضغطي ارتفع بالشارع ..
دگعدي يوم ارتاحي و روحي على غير يوم ..
بالليل اجانه سيف اني من يجي بس اسلم و ابقه گاعده بغرفة امي ..
بس اسمعه شلون يتصرف وي الكل ..

دخل عليّه سعيد ..
سعيد : حنونه ترى سيف هالمره جاي يخطبچ ؟
شنو كل عقلك هو متزوج ..
ارجع اكرر مأساتي وي حسن ابداً ما اسويها ..
سعيد : الي فهمته منه مرته مريضة و ايامها معدودة ..
منو گلك ؟
مو دا اگلچ عرفته منه ..
ما اقبل ابد ..
راح سعيد و رجعلي ..
سعيد : سيف يگول اذا اجتي مرتي بنفسها عليچ و هي خطبتچ و تشوفين حالها شنو رئيچ ؟
( اتكرر گدامي حادث اليوم و شلون جان رحت بالرجلين و محد عرفلي طريق على وضع بغداد المخربط و لان وحدي بروحتي و جيتي و ماكو رجال يحميني )
قررت افكر بالموضوع ..
زين انطيني فرصه افكر ..

مر اسبوع ..
اجونه سيف و اخته الچبير و زوجته ..
مرية كلش حبابه ..
بعد السلام و الچاي ..
بدت هي تحچي ..
زوجة سيف : خيتي انتِ يمكن تشوفين حالتي غريبة بس اني بيه سرطان و ايامي معدودة و اريد اطمئن على جهالي ..
اني صافنه عليها و عيوني مليانه حزن على وضعها ..
سيف رجال و اكيد باچر عگبة يتزوج وراية ..
ليش ما يتزوج وحدة اني اختارها الجهالي ام من بعدي ..
سيف مدح بيكم كومة و اني دزيت اخوتي يسالون عليكم ..
طلعتوا نعم الاصل و الناس ..