اول الأيـــــام

حق الايتام ميضيع

#اول_الايام
الفصل السابع عشر
#قصص_اسراءالجميلي

بعدها خلصت السبعة و سالتهم كالو منعرف ..
اني الفار لعب بعبي ..
ام علي : حبيبتي اني حكلج بس لا تكولين اني الي حجيتلج ..
اي عمة بس كولي ..

حبيبتي من راحوا ديسوون شهادة وفاة الـ حسن مقبلوا ينطوهم ..
ليش عمه ؟
الطبيب كايللهم ما انطي شهادة وفاة الا اشرح الجثة ..
ليش عمة هو مو توفه من الفايروس مال الفلاونزة ؟؟؟
ليش خطية يشرحوه ؟
لا عمة الدكتور كايللهم ابنكم مسموم ..
عززززززة العزاج حنان ..

ام علي : هربوا جثته من المستشفى طبعاً بالفلوس ..
و اخذوها للرعاية الصحية مال النواحي و كتبوا بشهادة الوفاة سكته قلبيه ..
طبعاً ام علي تحجي و اني اضرب على صدري ..
عيوني تفرفر متدري وين تروح و تذب من الدمع مليون ..
زين عمة ليش مخلوهم يشرحوه حتى يعرفون منو قتله ؟
هيج يكرهون اخوهم ..
الله اكبر عليهم ..
ام علي : يمه لان الكتله قريب و اذا كالو العشيرة تنتهي ..
زين عمة اني مو من حقي اعرف كاتل رجلي و ابو جهالي ؟
ام علي : يمه من حقج اصبري عليه ..

زوجج من مات و الدكتور راد يشرحه بالليل ..
لانه متوفي بالبيت قبل ما يصل للمستشفى ..
لعد شلون اجه ابن عمه ياخذ غراض اله ..
ام علي : اصبري يا يمه هسة يجيج الحجي ..
اخوته كبوا على ام كاظم ابنه شلون مات و ليش ؟
كامت هيه تبجي و تكول حنان كتلته بسحورته ..
و هذا نفس الكلام كالته الج بالمستشفى
اول ما اجانه متخربط وديناه و ما لحكنه عليه ..
بس اخو ابو عبدلله شك بكلامها ..
شسوه دز على بنته سهام المتزوجها كاظم ..
دخلها بغرفته و همه بالمستشفى بعدهم ..
سئله شلون مات عمج ؟
كالتله مثل مكالتلك عمتي ام كاظم ..

كوم طلع سلاحك و خليه براسها ..
كلها اذا متكوليلي شنو الصار اكتلج و ادفنج و اكولن ناهبة و تفضحين امج و خياتج ..
كامت تبجي و حجتله :
( يابه اجه عمي متعصب و يعيط و يكلها وين الفلوس الي انطته بنتج ال كاظم ..
هيه نكرتهم عليه ..
ظلوا يتكاونون ..
اشو على غفله كالتله اكوم اسويلك چاي و بصوت هادي و بلا عصبية ..
فاني كمت اسوي مثل كل مرة ..
عاطت بيه : كعدي اني اسويه هذا رجلي ابو بيتي هو ظل فاتح عينه ..
راحت جابتله شاي و مي ..
بعد نص ساعة من شربهم اتخربط و ما لحك عليه كاظم )
وج احجي يعني كاظم وياها ؟
يابه و القرعان ما اعرف ..
الي ادري بيه هي جابت الچاي ..
و مجان بيه شئ عمي ابد ..

طلع بنته و اجه للمستشفى يعيط و يسب عليها ..
بس ابو عباس الشيخ سكته و كله لا تفضحنه يكولون نسوانه تكتل رجولتهم و بعد محد ياخذ منه مره ..
و ينفضح اخوك و ابنه و يطلعون بناته بنات الحرامية الكتاله ..
اكتفوا ما يخلوها تحضر العزة عود لان مسويه مشاكل ..

يا يمه يا حسن راح دمك بين اهلك ..
ميردون يحجون حتى لا تزعل ست الحسن ..
بس دم اخوهم يضيع عادي ..
ام علي : اني فهمتج و ما اريد احد يدري ..
بس ابداً لا تكولين الولدج تره يكرهون اهلهم ..
اخ عمه اخ ..
انا لو اريد احجي جان حجيت على ابوهم و مصايبه ..
اني حسكت الخاطرهم حتى لا يتعبون بحياتهم و ينقهرون ..
بس كون ربي يعوض حظهم اضعاف ..