اول الأيـــــام

الابن هو الكبد

#اول_الايام
الفصل الخامس عشر
#قصص_اسراءالجميلي

اتصلت بحسن يلحگلي ..
اني بعيد حنونه راح اخابر اخوية ابو عباس ..
اجه ابو عباس دخلهم جوة ..
بقوا يتعايطون و هي تفشر و لا عبالك مره ..
گام يكتلها هي و ابنها دمرهم ..
و طردهم من البيت ..
رجع حسن حجيتله و اتصل باخوه ..
افتهم منه اكثر ..
گعد تعشه ويانه بعدين گال حروح عليهم ..
يمعود عوفهم ..
اريد اروح افتهم شبيهم وياچ ..
راح اتاخر اتصلت على اخوه ..
عفية ابو عباس حسن راح و بعد ما رجع ..
حضري نفسچ جايج بالسيارة ..
عفت جيرانه يم الجهال و صعدت بالسيارة ..
ابو عباس : ماخذين البيت ام كاظم و ابنها ..
يا بيت ؟
البيت البنالچياه حسن ..
عزه بعيني ..
خابروني الجيران ورى ما خابرتيني ..
ديتعارك هو و كاظم ..
وصلنى بخمس دقايق ..

لگيناهم يترامون بينهم و الناس تباوع تخاف تتقرب ..
نزلت من السيارة ركض على حسن ..
وصلتله لزمته من ورة من چتفه و جريته ..
فدوة عوفهم الله يخليك ما اريد اخسرك و هستوني ارتاحيت ..
وگف اخو بينهم اخذ السلاح منهم ..
عاط حسن ..
وچ هذا ابني شلون يوگف بوجهي ؟
ميهم عيني الله يخليك خلي ياخذوه ما اريده ..
اني اريدك الك ..

فضينه المشكله بتدخل الجواريين و اخوته ..
راح البيت الهم و كالعادة حنان متنازله عن حقوقها في سبيل تحافظ على احبابها ..
من الهبطة صارت عدي الالام ولادة ..
رحت للدكتورة ..
الدكتورة : بنتي انتِ بأي شهر ؟
اني بالسابع ..
اصعدي ماما اسويلچ سونر ..
الدكتورة : حبيبتي انتِ حامل بتوئم ..
صدگ دكتورة و الله ؟
فرحت كلش گلت ربي عوضني عن البيت ..
الدكتورة : هاي مو الالام ولادة هاي تقلصات اثر جهد ..
تاخذين هاي ابر التثبيت كل اسبوع وحدة اربع ابر ..
و ميصير تسوين جهد لحد ما تولدين باذن الله ..
دكتورة شنو جنس الاطفال ؟
حبيبتي ولد و الثاني مو كلش واضح لان مشربكين رجليهم ابعض ..

رجعت بشرت حسن كلش فرح خطية ..
مرت الايام و دخلت بالتاسع ..
بس ماكو ولادة ..
رحت للدكتورة ..
گالت هسة احولچ مستشفى لازم عملية نبض الاطفال ضعيف ..
ما عندچ وكت بنتي ..
خابرته ..
حسن فدوة ترى حيدخلوني ولادة حالة الاطفال صعبة ..
شنو صدگ ؟
اي و الله تعال بسرعة و خلي عمه ام علي تجي وياك ..
دليته على ملابس الاطفال ..

دخلت للعمليات وحدي لان تأخروا عليه ..
اباوع على اضوية غرفة العمليات اشوفها شمس ..
غفيت بعد ابرة البنج بسرعة ..
فزيت من البنج على عياط و صوت عالي ..
لچ حقيرة ليش تچذبين عليه ؟
شكو شبيك ؟
شلون تكولين ولد طلعوا اثنينهم بنات ..
گمت احچي بـ متمته ..
و الله الدكتورة گالتلي شعلية اني ..
ام علي : يمه حسن و اذا بنات خلقة الله ..
احمده و اشكره ..

المهم سكتته ام علي و طلعته من الغرفة ..
بعد اسبوعين اجاني مثل الوحش ..
يعيط و يكفر چان يكتلني و اعيط اكله ليش ميحجي ..
دفعني قوي وگعت على حافة السنگ و انشگ راسي ..
عافني و طلع حتى مشافني ..