روايه : سجين حبك "لعنه حب " بقلم شيماء حسين

10

الــــبـارت الــعــاشـــر ♥
"وأطوفُ أبحثُ عن خيالك هاهُنا فأراكَ في كلّ الجهاتِ تَمثّلُ
ما بالُ طيفكِ غازياً كل الوجوه ما بالُ عيني غيرَ قلبكِ لا ترى"

فــــــــــــــــــــــــــــــــــــــــــــــــــلاش بااك

بعد تخرج نور  من الكليه لم تذهب الى هناك كانت تهاتف الفتايات من وقت للتانى  للاطمئنان عليهم وكانت تتهرب من كل الاجتماعات لكى لا ترى عمر  ولترك له المجال ف نسيان وهم حبه لها
فى أحدى الايام رن هاتفها وكان هو المتصل اجابت عليه
عمر :
ازيك ي نور عامله ايه
نور :
الحمد لله ..ازيك انت
عمر :
ممكن تقابلينى ف كافيه (....) عايز اقولك على حاجه
نور :
خير ؟
عمر :
لما اشوفك ..... كمان ساعه كويس
نور :
اوكى 
توجهت الى الكافيه وبعد السلامات
عمر :
انا عايز اقولك ان معاكى حق ف كل اللى قولتيه اخر مره ...... انا دلوقتى جاى علشان اعزمك على فرحى
نور بزهول  :
بجد هتتجوز ... مين ؟
عمر :
أسماء
نور بفرحه :
بجد انا فرحانالكوا جداا ...انتوا تستاهلوا بعض
عمر :
انا حبيبت اقولك قبل اسماء علشان اعتذرلك على اخر مره .... وعايز اقولك خدى بالك من نفسك
نور :
اعتذار اييه احنا صحاب ....... وبعدين اخد بالى من ايه مش فاهمه ؟
عمر :
من اى حاجه .... المهم اسماء هتكلمك واحناهنفضل اصدقاء ولو احتجتينى ف اى حاجه انا موجود اخ قبل صديق
نور وهى تنهض  :
اكيد

أسماء  بضيق :
عزمتها ليه ي عمر مش كفايه اللى حصلك بسببها
عمر :
هو ايه اللى عزمتها ليه ... اسماء نور صاحبتك ومينفعش تخسريها بسببى انا مش موافق على كدا وكمان هى مالهاش دعوة ومقولتلهاش على اللى حصل ولا هنقولها واتفضلى اتصلى عليها اعزميها
أسماء :
يوووة
عمر :
متخديهاش بذنبى ي اسماء انا اللى قولتلها انى معجب بيها وهى رفضت  يعنى انا السبب من الاول ف اللى حصلى
أسماء بضيق  :
ممكن تبطل تفكرنى باليوم دا ..... وب انك قولتلها انك معجب بيها
عمر بأبتسامه :  
ههه حاضر مش هفكرك عارف ان الموضوع بيضايقك بس حابب اقولك ان دا كان زمان دلوقتى انا بحبك أنتِ  ولايمكن احب غيرك
أسماء :
وانا كمان بحبك وبخاف عليك
عمر :
طيب يلا كلميها
★★★★★★★★★★
نور بعصبيه :
يعنى ايييه مش موافق اروح هو بمزاجك ... انا قولت ل بابى وهو وافق
أياد :
ايوا بمزاجى .... هتتأخرى هناك هترجع لوحدك ف وقت متأخر ازاى
نور :
ما انا قولتك تعالى معايا انت اللى قولت عندى شغل وكلام مالوش اى لازمه .... يبىقى خلاص انا هروح لوحدى  وخليك انت ف شغلك
أياد :
طيب روحى وتعالى الساعه 9
نور بأستنكار :
9 اذا كانوا هيوصلوا القاعه الساعه 8 وشويه 
أياد :
هو انت لا عاجبك كدا ولا عاجبك كدا اعملك اييه يعنى بحاول اتفاهم معاكى وأنتِ  اللى بتعاندى
نور :
انت مش بتتفاهم انت بتأمر وبس
أياد :
شوفتى أنتِ  اللى بعصبينى
نور :
بص لا اعصبك ولا تعصبنى .... انا هروح وانت ابقى تعالى خدنى وانت راجع من شغلك تمام
أياد :
انا هرجع من الشغل الساعه 12 هتفضلى هناك كل دا
نور :
ايوا ..... بلييز ي أياد كفايه خناق و وافق
أياد :
ماشى ي تعبه قلبى
نور بفرحه  :
ميرسى كتيييير
أياد بحب  :
بحب اشوفك وأنتِ  مبسوطه والضحكه على وشك .... بس انت عنيده وبتخلينى اتعصب عليكى 
  نور :
انت اللى مزودها  مفيش حب كدا
أياد :
عارف بس انابخاف عليكى افهمى ي غبيه
نور :
طيب لييه الغلط دا طيب ؟
أياد بأبتسامه  :
اهو كدا بقا عجبك ولا لا
نور :
عجبنى طبعا .... شوفت تبقى لذيذ ازاى وانت  هادى
أياد :
بكون لذيذ لما بتكونى لذيذه أنتِ  كمان
نور :
خلاص نكون احنا التنين لذيذين ونبطل نعاند مع بعض تمام
أياد :
تمام 
ذهبت الى حفل الزواج وانتهى اليوم على خير
★★★★★★★★★★
كان الاب جالس على الفطار هو وأياد وكانت نور نائمه لم تستيقظ بعد
الاب :
هتروح تشوف مامتك انت واختك النهارده
أياد بضيق  :
اففف  لازم يعنى الزياره الاسبوعيه دى
الاب:
ايوا طبعا دى أمك ي بنى لازم تصل رحمك وبعدين هى اتصلت عليا امبارح وقالتلى عايزكم تزوروها
أياد :
حضرتك عارف كويس قوى انها اتصلت عايزانا علشان الفلوس اللى بتاخدها مننا ف زياره كل مره مش علشان انا واختى وحشينه
الاب :
حتى لو كان كدا لازم تروحوا
أياد :
انا مش عارف هى بتكره حضرتك ليه مع ان لولا  حضرتك مكناش روحنالها لا انا ولا اختى
الاب :
امك مفكره انى واكل حقكوا وبضحك عليكوا .. بس ربنا واحده اللى عالم انى بتقى ربنا فيكوا
أياد :
من غير ما تقول ي عمى انا مصدقك 
استيقظت نور وأدت فريضتها وتوجهت الى الأسفل
نور وهى تقبل والدها :
صباح الخير
الاب وأياد :
صباح النور
أياد :
طيب اقوم انا بقا أشوف اللى ورايا ... ومتنساش ي عمى اللى كلممتك فيه ها
الاب  :
حاضر ي بنى
أياد ل نور :
هكلمك بعدين اوكى
نور:
اوكى ....بعد ذهابه
الاب :
اتبسطى امبارح
نور :
اهااا جدا ي بابى كان يوم حلو قوى واسماء كانت جميله جدا ف الفستان
الاب :
عقبال ما اشوف عروسه .... بالمناسبه دى أياد كلمنى امبارح فى موضوع خطوبتكم
نور :
تانى ... طبعا دا الموضوع اللى بيقولك متنساهوش
الاب :
قصدك مليون ... ي بنتى حرام عليكى قولتى لما اتخرج اديكى اتخرجتى مسنيه ايه تانى
نور :
انا نفسى اعرف اييه لازمه الخطوبه  والدبل والكلام الفارغ دا
الاب :
الواد عايز يعرف الكل انه خطيبك
نور :
دا على اساس انه مش معرف حد ...دا طوب الارض عارف
الاب :
اهو نريحه ...وانا عايز افرح بيكم ولو تعملوا فيا معروف وتخلوها جوازة
نور :
جوازة اييه ؟ ابوس ايدك اوعى تقول الكلام دا قدامه ل يشبط فيها
الاب :
أنتِ  مش عايزة عايزة تكونى مع أياد ي نور
نور :
لا ي بابى مش كدا  انا مش مستعده للكلام دا دلوقتى ..... وبعدين انا ورايا شغل وهتعطلنى عليه  نبقى نتكلم ف الموضوع دا بعدين  ....سلام
الاب :
طيب اقوله ايه
نور :
حاول تقوله  بأنه لسه بدرى على الكلام دا زى كل مره يعنى
الاب :
ايوا حطينى كل مره قدام المدفع واهربى
نور وهى تقبله :
وانت قدها ي كبير
االاب :
ايواا كلى بعقلى حلاوة ...اكمنى طيب يعنى
نور :
قدم السبت علشان تلاقى الاحد
الاب :
طيب الاحد جه ... ممكن تجيبيلى بسبوسه
نور :
لا كله ألا دى ...احنا ماصدقنا السكر ظبط شويه
الاب  وهويشير بأصبعه على عقله اصبعه الاخر :
حته صغيره قد كدا
نور وهى تقلده :
قد كدا ! .... ماشى بس المره دى بس
الاب وهو يقبلها :
حبيبه ابوها ي ناس
نور :
حبيبى ربنا يخليك ليا ي رب وميحرمنيش منك ي أحلى ابن ف الدنيا
الاب بهزار :
على قلبك لحد ما اشوف احفادى واجوزهم كمان
نور :
واحفاد احفادك كمان ي حبيبى
الاب :
بأذن الله يلا بقا امشى هتتأخرى ومتنسيش البسبوسه
الطبيب وهو يعطيها منديلا :
وحدى الله كدا وبطلى عياط
نور ببكاء :
وحشنى قوى ي دكتور مش قادره اصدق انه مش معايا كل شويه اقول ل نفسى انه ممكن يفتح الباب ف اى وقت ويدخل ياخدنى فى حضنه وافضل احكيله على اللى حصلى ف يومى ونتفرج على افلام سوا زى الاول وان كل دا مجرد كابوس 
الطبيب :
بتروحى تزوريه ف المقابر
نور :
لا مش قادره
الطبيب :
لازم تواجهى علشان تعرفى تعيشى الهروب مش حل
نور :
وهى اللى انا فيها دى اسمها عيشه
الطبيب :
حالك احسن من ناس كتير قولى الحمد لله
نور:
الحمد لله على كل شئ ....  انا النهارده  وانا بجرى  دخلت منطقه غريبه كدا حسيت انى روحت المكان دا قبل كدا وقلبى اتقبض جامد
الطبيب :
وطبعا كل الذكريات عباره عن صوت وغلوشه وشوش كالعاده
نور :
ايوا انا حاسه ان الدواء دا مبيجيبش نتيجه وبقيت بنام كتيير  جدا
الطبيب :
كملى الدواء فتره كمان لو مجابش نتيجه هغيره .....وحاولى تروحى بيتك قريب يمكن تلاقى اى حاجه هناك
★★★★★★★★★★
كان عمر ف المنزل كانت اسماء بجواره
أسماء :
مالك ؟
عمر :
مفيش ي حبيبتى 
أسماء :
انت بتتعب نفسك جامد ف الشغل دا .... لما ترجع البيت حاول تفصل علشان صحتك
عمر وهو يضع يده على بطنها المنتفخه  :
حاضر ي حبيبتى ... المهم أنتِ  عامله ايــه دلوقتى
أسماء :
بنتك متعبه جدا يعنى
عمر :
طالعه ل مامتها هى هتجيبه من بره
أسماء بأستنكار :
طيب ليه متكونش طلعالك انت
عمر :
انا متعب دا انا طيب وغلبان
أسماء :
اها جدا انت هتقولى
عمر :
ي بنتى أنتِ  حبيتينى اصلا بسبب طيبتى .... وانا حبيبتك علشان طوله لسانك
أسماء :
لا ي راجل   ؟
عمر :
ايوااا  مش عاجبك
أسماء
اه مش عاجبنى ورينى هتعمل اييه
عمر وهو يلقى عليها احدى المخدات الصغيره :
هعمل كدا
أسماء تمثل التعب :
اااه
عمر بخضه :
اييه ف اييه ... اسف والله مكنش قصدى هو أنتِ  هتولدى ولا ايه
أسماء بأبسامه :
ههههههه دخلت عليييك تعيش وتاخد غيرها
عمر وهو يلقى ما تبقى من المخدات عليها :
تصدقى انك هبله وتستاهلى اللى اعمله فيكى
بدأت ف التأوه والصراخ :
ألحقنى ي عمر انا بولد
عمر :
انا صدقتها المره الاولى مش هصدقك المره دى كمان هو انا مجنون
أسماء بصراخ :
اااه مجنون انا بولد بجد  يخربيتك
عمر :
نعم بتولدى بجد !
أسماء بتعب :
مش وقت انبهار خالص أخلص أطلب ماما ولا الاسعاف ولا اى نيله ف اليوم اللى مش فايت دا
عمر :
طيب خلاص يلا قومى هوصلك بالعربيه
نقلها الى المستشفى وظل فى حالته توتر أمام غرفه العمليات
★★★★★★★★★★
توجهت نور الى منزلها للبحث عن اى شئ توجهت الى غرفتها وظلت تبحث بها لم تجد شئ وأثناء خروجها وجدت بوكس  موسيقى على الكومود بجوار السرير أمسك بها وظلت تحاول تشغيلها فحركت الغطاء مكان وضع الحجاره  وجدت ورقه صغيره مطويه فتحتها  " كتب الكتاب الساعه 1  بحبك "
ورساله أخرى ف ورقه
" لو فكرتى انى ممكن اتخلى عنك فى يوم من الايام .....تبقى غلطانه هو فى حد ممكن يتخلى عن نفسه .....طبعا لا .... انتِ نفسى ي نور يبقى هتخلى عنك ازاى ؟ ......على الرغم من كل اللى مرينا بيه الفتره اللى فاتت ...  فضلت جنبك وفى ضهرك وحبى ليكى كان بيزيد ....مع ان التخلى عنك كان سهل بس انا مقدرتش مقدرتش اتخلى عن البنت الوحيده اللى قدرت تقتحم اسوار قلبى .... حبى ليكى ميتوصفش ولا يكفى لعمر واحد .... لو فكرتى انى ممكن اتخلى عنك افتكرى انى علشان افضل معاكى واحميكى محيت آسر اللى بيحبك ....وبقيت شخص تانى خالص ....كل  اللى بيحصل دا هياخد وقته وهيعدى وهترجع كل حاجه زى الاول ودا وعد منى ....انا مش هطلب منك غير الصبر وكل حاجه هتبقى تمام ثقى فيا ......آسر 
نور لنفسها "دا اللى هو ايه دا كتب كتاب ايه دا وليه آسر يبعتلى حاجه زى دى  ؟
أخذت بوكس الموسيقى والورقه وخرجت من المنزل وتوجهت الى المنزل
★★★★★★★★★★
كان يحمل صناديق الخضروات التى كلفه بها العسكرى بحملها و وضعها ف مخزن المطبخ أنهى ياسين العمل المكلف به وتوجه الى آسر لمساعدته
ياسين :
اييه ي بنى انت لسه مخلصتش
آسر :
لا الصناديق كتيره
ياسين وهو يعطيه زجاجه ماء  :
والجو حر كمان خد أشرب مايه واقعد استريح شويه ونقوم نشيلهم مع بعض
آسر وهو يأخذ الزجاجه ويضع بعض القطرات على وجهه لينعش نفسه  :
تسلم
ياسين :
ما تخفف اللبس دا انت لابس التىشيرت الى ب بكُم دا ليه تحت اللبس
آسر :
عادى انا مبحبش ألبس نص كُم
ياسين :
اوقات بتعمل حاجات مالهاش تفسير
آسر :
طيب يلا بقا لو العسكرى  شافنا مش بعيده يدخلنى الانفرادى
قاموا بحمل الصناديق وجلسوا مره اخرى
آسر بتعب رفع كُمه الايسر بعفويه  :
آف اييه دا كل دى صناديق
ياسين وقد رأى شئ من أسفل على يده فقال بزهول   :
ايه دا ي آسر ؟
آسر بتردد  وهو يخفى معصمه بالكُم :لا مفيش متخدش فى بالك 
★★★★★★★★★★
كان مازن وساره جالسان معا  على البحر ف وقت متأخر من الليل
ساره :
انا مش عارفه انا ازاى سمعت  كلامك وجيت  معاك ف البرد دا ؟
مازن :
طيب انا راضى ذمتك ف احلى من الجو دا ؟ المكان هادئ ومفيهوش حد والهواء نقى
ساره :
وهناخد برد
مازن :
ما ناخد فيها ايه يعنى ؟ المهم انك تكونى مبسوطه ف الوقت الحالى واللى هيحصل بعدين دا شئ بأيد ربنا مالناش اننا  نفكر فيه
ساره بأستغراب :
انا مش فاهمه كميه السلام النفسى اللى انت فيها دى جايبها منين
مازن بمرح :
من عند البقال هبقى اجيبلك وانا جاى المره الجايه
ساره :
ه ه ه   ظريف
مازن :
انت مش واخده بالك انك اخدتى عليا جامد
ساره :
اه وفيها ايه ...وبعدين انا الكبيره
مازن بضجر :
دى هى سنه
ساره :
كبيره ولا مش كبيره
مازن  بضيق :
لا مش كبيره ..وبعدين مش بالسن علفكره
ساره :
طيب  خلاص مالك قفشت كدا ليه ..... يلا علشان نمشى انا اتاخرت 
مازن :
يلا ي اختى  ..... هشوفك بكره
ساره بتفكير :
اممممممم
مازن :
مش مهم رأيك اصلا .... خلاص هنتقابل بكره
ساره :
لا ي شيخ
مازن  :
اه ... بطلى بقا البؤس اللى جواكى دا وعيشى حياتك ... هاا قولتى ايه نتقابل بكره
ساره بأبتسامه : تمام

يتبع
#Shimaa Hussien