احببته وكرهت سجاني

الحلقة السادسة عشر (16)

فمسك علبتين . وخدنى وقعدنا على السرير.
وقال: دى لعيد ميلادك الاول من بعد ما شفتك؛ والتانيه لعيد ميلادك التانى. .
والاولى ده خاتم؛ والتانيه اسوره.
يلا افتحيهم عشان البسهملك.
وفتحتهم ولبسهملى وباس ايدى. .
وقالى :كل سنه وانتى طيبه يا رونى وعقبال 10000000000 سنه. 
فضحكت وقلت : وانت طيب يا وليد.
وقطع كلامنا صوت التلفون بتاعه . 
فتنهد ..وقال :مين الغلس المتصل دلوقت.
فضحكت وقلت : اكيد واحد بيحبك.
فابتسم وقال :والله .. طيب هو جابه لنفسه ..
وقام جاب التليفون . واتسعت ابتسامته.
وقال : وجه وقت الحساب يا غالى؛
وجه الوقت الاطلع عليك العملته فيا كله يا محمد يا ابن طنط ام محمد .
ورد فيه نبره ضيق وقال : نعم ..هو حد يتصل بحد الساعه دى.
هو ده مش وقت نوم ولا البعيد ما يعرفش فى الذوق ؟ ولا انت هتجيبه من اين الذوق؟
ده وانت محروم منه؟
عايز ايه انطق يا بارد ؟
وبعد السماعه شويه عن ودانه .
عشان يضحك.
والمتصل ما يحسش بيه وهو بيضحك وشغله اسبيكر. وانا استغربت جدا انا شفت تعامله مع اصحابه.
مين ده البيبهدله كده. 
فرد الطرف التانى المدعوا محمد وقال : بقى كده. ماهو خلاص خلصت حاجتى من جارتى.
الله يرحم لما كنت بارجع من الشغل القيك قاعد مستنى فى البيت بالساعات.
عشان اطمنك بخبر ولا جمله تبرد نارك.
فرد وليد وقال : وانت عملت فيا شويه.
دا انت زليتنى زل محدش زلهونى.
بس انا وعدتك انى بس اتجوزها واردهولك اضعاف مضاعفه.
فرد المدعوا محمد العرفت من صوته؛
انه ابن عمتى الكان بيجبله اخبارى .
وقال : وانت ماشاء الله رحت ضحكت على الراجل الطيب بكلمتين وانتهزت فرصه انك كاتب عليها وخدتها معاك. 
لا يا راجل ليهم حق يسموك الكبير.
بصراحه ضربت معلم. 
فرد وليد وقال :وانت مالك يا بارد.
واحد ومراته وحماه ايه اليدخلك فى وسطينا. .
ايه يحشرك .صحيح ناس ما عندهاش دم .
انا اتخضيت وقلت ايه ده بيتخانقوا بسببى فشاورت لوليد عشان يهدى.
فضحك وقالى بهمس : ما تخافيش احنا متعودين على كده. 
وكملوا غلاسه مع بعض . 
فرد محمد وقال : مهو للاسف انا الجايبك . وانت محسوب عليا.
يعنى يا مفترى البت ما تعرفش عنك حاجه؛ وبتكره الكوره وما شفتش وشك قبل كتب الكتاب. 
امال لو تعرفك كنت عملت ايه؟
فضحك وليد وقاله: لو متغاظ قوى روح اتجوز وخلصنا؛ مش تقعد تنق علينا.
واليسالك عنى قول ما اعرفوش.
فقاله: انا مش عايز وشك.. 
وقال انا بقلبى الكبير قلت اتصل اباركلك؛
مع انى عارف جنانك؛ بس بصراحه المرادى جون ولا بتوع كاس العالم.
دا انا صاحبك واتفاجئت بالخبر.
شوف ادينى بنت خالى حبيبتى اكلمها قلبى عندها مش عارف هتتحملك ازاى.
فرد وليد وقال : حبيبتك فى عينك اسمها مدام راندا. .
شوف انت اصلا ما تكلمهاش انساها.
هيا بقت ليا لوحدى وانا هنسيها الناس كلها واولهم انت ومعرفتك الزى وشك.
فرد وقاله : يا ناكر الجميل لولا معرفتى ماكنتش عرفتها يا اصيل.
فضحك وليد وقاله :عارف احلا حاجه فى معرفتك انى عرفتها.
فرد محمد وقال : بلها واشرب ميتها يا غالى. .
بس اندها تكلم عمتها عشان تباركلها. 
فرد وليد وقال : عمتو حبيبتى هات اكلمها دا وحشانى. فقال محمد : عمتو وكمان حبيبتى ....الله يرحم ايام طنط ويا حجه .والله يرحمك يا رجوله . فى يوم بقيت تقول عمتو يا وليد ؛
عليه العوض فى الرجاله .
خد يا خويا عمتو معاك اهى . 
وردت عمتو وقالت : ازيك يا وليد يا ابنى عامل ايه والف مبروك يا بنى ؟
فرد وليد وقال : الله يبارك فى حضرتك واسمحيلى هقولك يا عمتو زى رونى.
فردت وقالت : يا حبيبى انت تقول الانت عايزه؛
انت زى ولادى ومتربى قدام عينى وصاحب محمد من وانتو صغيرين.
والله يا بنى لو كان معايا بنات تانى كنت انا الخطبتك ليهم.
بس رونى اغلى بنات اخواتى وزى بنتى خلى بالك منها.
دى قطه مغمضه ما تعرفش حاجه عن الدنيا وبلاويها. 
وانت دلوقت بدل اهلها كلهم حافظ عليها؛
واتقى الله فيها .
هيا طيبه وبنت حلال؛ وانت احسن والله وربنا يباركلكم يا ابنى.
فابتسم وليد وقال : والله هيا فى عنيا وانا اخدت بالى من كل كلامك.
وان شاء الله ربنا يقدرنى واصون الامانه المعايا واحافظ عليها.
وانا جيت اخدت التلفون منه وقلت :ازيك يا عمتو وحشانى والله ياعسل انتى عامله ايه.
فقالت :ازيك يا بنت اخويا ازيك يا راندا عامله ايه يا غاليه وحشانى والله.
والف مبروك عليكى وليد . هو والله ابن حلال ومتربى ومحترم حطيه فى عنيكى وحافظى عليه دا زى ابنى اوعى تزعليه.
فضحكت وقلت : ما تخافيش ان شاء الله ما فيش زعل.
انتى عامله ايه واخباركم ايه وكل الفى البيت وحشتونى كلكم . 
فردت عمتى وقالت : كلنا كويس يا حبيبتى وفرحنالك . وان شاء الله عايزين نيجى نباركلك نيجى امتى؟
فقلت :فى اى وقت تنورونا طبعا.
فردت عمتى وقالت :لا يا حبيبتى ما تديش معاد لحد غير لما تستاذنى جوزك. 
وتشوفى يوافق ولا لا وهو فاضى امتى الاول ما تنسيش الاصول يا غاليه. 
وانتى دلوقت عندك بيت ومسئوله خلى بالك منه. فاتكسفت عشان هو سامع.
واخد التلفون وكلمها واتفقوا على يوم اجازته يوم الجمعه.
وادانى التلفون تانى اكلمها وسابنى وخرج من الاوضه.
فكلمتها وقالت : مش عايزه اجبلك حاجه معينه وانا جايه؛ او نفسك فى حاجه اعملهالك. 
فقلت : شكرا مش عايزه حاجه.
فقالت :ان محمد عايز يباركلى.
واول ما كلمنى قالى:قولى بسرعه قالك ايه عشان ترضى تروحى معاه؛
وانتى اصلا بتتكسفى تكلميه مش تسافرى معاه . فحبيت اضحك معاه شويه وكنت باكلمه وانا بابص من ورا ستاره الشباك على الشارع.
وقلت :اقولك ايه يا محمد على القاله احلى كلام ممكن يتقال.
فرد محمد وقال: طيب بالله عليكى لتقولى قالك ايه .؟ فضحكت وقلت: ليه بتحلف بس ؛ مش كتير. 
هو قال : تيجى معايا وانا وافقت ؛وخلاص.
فمحمد ماكنش مصدق وقال: مش ممكن.. ليه يعنى هو سحرلك ولا ايه. ..
يا هبله يفتكرك واقعه عليه وما صدقتى حد يبص فى وشك.
ايه الدلقه الانتى فيها دى.
فاتغظت منه وقلت :انت مالك جوزى وعايزنى معاه انت تعبان ليه.
انا اصلا اول ما شفته نسانى الدنيا وما فيها ومكنتش اقدر غير اقوله نعم وحاضر.
فاطلع انت منها ومالكش دعوه.
فرد وقال : معقول وليد برمجك من يوم. .
مش مصدق البتتكلم دى البت راندا البتتكسف تبص فى وشنا.
تقولى اول ما شفته نسانى الدنيا.
اوعى تكونى حبتيه من اول نظره دا انتى كويس انه خلوك روحتى معاه.
بدل ما كنتى هتولعى فى البيت وتقولى ماليش دعوه انا عايزه وليد بحبه يا بابا.
بصراحه اتكسفت وما قدرتش اكمل فى دور الجرائه الكنت بحاول امثله. .
ولما ما ردتش لقيت ايد وليد خدت التليفون. .
واتفاجئت انه واقف ورايا من بدرى وانا الهبله مش واخده بالى.
وانا سبته ورحت على السرير واتغطيت حتى دماغى. 
مهو مش هينفع ابصله بعد السمعه منى.
ورد عليه وقال :كفايه رغى يا واد احنا مش فاضيلك. فرد محمد وقال : ايوه طبعا عريس ويحقلك بس اعمل حسابك هاجى مع ماما وتحكيلى بالتفصيل الممل كل حاجه.
هاسيبك تستمتع يا وحش.
فرد وليد :سلام يا خفيف .
وقفلوا . وجه وليد نام جنبى على السرير 
وقال: ايه انتى مش كنتى هترتبى الهدوم.
فابتسمت وانا تحت مفرش السرير.
وقلت: لا يوم تانى ان شاء الله.
فقال بكل سهوكه : اقولك ايه يا محمد على القاله احلى كلام ممكن يتقال. 
وتنهد. وقال بهيام : انا اصلا اول ما شفته نسانى الدنيا وما فيها ومكنتش اقدر غير اقوله نعم وحاضر . فصرخت وقلت : اسكت خلاص .
انت مش تكح او تعمل صوت.
انا اصلا كنت فكراك روحت تقعد قدام التليفزيون او تعمل اى حاجه مش واقف ورايا.
فضحك وقال :انا اصلا كنت رايح اجيب الشاحن عشان ما يفصلش واشحنه. 
بس جيت لقيتك هيمانه وواقعه فى غرامى.
ولا ايه يا رونى ما تتكسفيش قولى قولى يا حبيبتى عبرى عن احساسك.
فقلت فى نفسى انا عارفه مش هيسكت غير لو اضرب.
وفعلا رميت المفرش وطلعت وقعدت اضرب فيه وهو يضحك.
واقول: اسكت كفايه كلام وهو يضحك. 
ومسك ايديا ونيمنى على السرير وبصلى فى عنيا وقال :بحبه ياابه. هتلى وليد يا ابه.
هو انتى كنتى فعلا هتولعى فى البيت لو كنت سبتك ؟ فضربته باديا ورجليا واقوله :اسكت اتلم اسكت تتكلمش تانى.
وهو يضحك ولف ايديه حواليا وشدنى نيمنى فى حضنه.
وقال ايه انتى طلعتى قطه بتخربش كمان.
فضحكت وحاولت افلت بس ما قدرتش.
وقلت: خلاص عشان خاطرى كفايه تكسفنى اكتر من كده مش هاتكلم مع حد تانى عشانك.
فباس دماغى وقال: والله بحبك قوى يا رونى. ربنا يخليكى ليا .
يلا بقى خلاص ننام ولما نصحى نشوف موضوع الشنط.
وكمل وقال : بس ما قلتيش هو انتى جايبه ايه فى الشنط دى. .
فقلت: هدوم بنات عمامى هما الرتبوها وانا رحت ساعتها اغير عشان البس لبس خروج عشان ما اتاخرش عليك.
انت بتسال ليه؟ 
فضحك وقال : باطمن على مستقبلى يعنى فيه هدوم من البتبقى مقطعه دى بتاعت العرايس ولا لا. 
فضربته وقلت :اطلع بره يا قليل الادب انت عايزنى البس الهدوم المقطعه دى بتاعت العرايس دول مش مودبين. 
فضحك وقال :ليه يا حبيبتى هو انتى مش عروسه. 
فقلت :عروسه بس محترمه.
مش زيهم .وانت عايزنى ابقى مش محترمه؟ 
فضحك وقال :يا ريت. .
فقمت وقعدت اضرب شويه؛ واقول انت قليل الادب شويه؛ واطلع بره شويه. 
وهو كل ما يهدينى يرجع يناكف فيا وفضلنا كده لغايه لما نمنا. 
.بس اصر انى انام فى حضنه 
وانا طبعا رفضت بس شدنى ولف اديه حوليا وغمض عنيه وما رضيش يرد عليا. 
لغايه لما بطلت كلام وانا مكسوفه انى انام كده جنبه. طيب يقول عليا ايه مش مودبه.
بس محستش بنفسى لما غمضت عنيا ورحت فى سابع نومه.....