احببته وكرهت سجاني

الحلقة التاسعة ( 9 )

لا انا معايا مناديل شكرا .
فقال: ايه يا رونى انا جوزك عادى يعنى .
وشدها ليه لقاها غمضت عنيها بسرعه .فابتسم وبدل ما كان هميسحلها بالمنديل لقى نفسه بيمسحها بشفايفه. وهى كانت هتمسحها ولما شدها ليه اتكسفت وتلقائى غمضت عنيها بس اول ما حست بلمسته حست بكهربه فى كل جسمها وما قدرتش لا تفكر ولا تتحرك ولا حتى تفتح عنيها .
واول ما خلص حط جبهته على جبهتها وغمض عنيه واتنهد ثم ابتسم
وقال :شفتى اخرت الايس كريم بيعمل فى الناس ايه وسكت. وفتح عنيه لقاها لسه مغمضه .
فقال: رونى معلش سامحينى انا والله كنت متفق مع نفسى انى مش هقربلك ولا هاعمل حاجه من كده الا لما تاخدى عليا شويه بس بصراحه انتى لذيذه قوى اكتر مما تخيلتك وكنتى شهيه قوى قدامى مقدرتش امنع نفسى .ما تزعليش منى .
وسكت لقاها لسه مغمضه فبعد عنها شويه وقالها بصوت فيه قلق :رونى انتى فعلا زعلتى؛من فضلك فتحى عنيكى وكلمينى .
وفعلا فتحت عنيها بس عدلت نفسها وبصت فى الارض وما اتكلمتش .
هيا اصلا من ساعه ما شافته وحست انها مرتاحه ليه ولما شافت نظرت الحب فى عنيه اطمنت اكتر بس ما فكرتش انها هتتعامل معاه كده هيا كانت واخده الموضوع اخوه وصحوبيه تحت اطار جديد عليها اسمه الزواج بس لما باسها حست بانها اتكهربت وحست بانها اتلخبطت وان مشاعرها مش عارفه توصفها وفى عز زحمتها وتفكيرها وكسوفها لقيته بيقولها لما حس بشده كسوفها منه :رونى حبيبتى انتى مراتى يعنى عادى يحصل كده بينا واكتر.
هو كان فاكر انه بيطمنها ويهديها بس هو زود كسوفها اكتر وارتبكت وخلاها حطت ايديها على وشها من كتر ما هيا مكسوفه منه .
فابتسم لحركتها الطفوليه وحب يستفزها عشان تطلع من المود الهيا فيه.
فقال :خلاص يا حبى قوليلى تحبى تاكلى تانى ايه.
وفعلا نزلت اديها من على وشها وصرخت فيه.
وقالت :لا. اكل تانى لا. مش هناكل اى حاجه تانى لما تروح كل الانت عايزه.
وهنا هو انفجر تانى ضحك عليها وعلى شكلها
وقال :شفتى اهو خليتك تبصيلى وتكلمينى.
وغمزلها وقال بس فيه ايس كريم كتير معانا هنسيبه يسيح كده مش هناكله .
وهيا اتكسفت وحمرت خدودها من شدت احراجه ليها وبصت قدام وربعت اديها.
وقالت بصوت مرتبك حاولت انه يبان جدى اتفضل سوق عشان نوصل احنا مش هنفضل اليوم كله هنا .
فابتسم وقال :تحت امرك يا اميره حياتى.وابتدا يسوق.
وقال باسلوب مرح :مش عايزه تعرفى انا شفتك ازاى . فقالت وهى بيتبصله وفرحانه :اه طبعا احكيلى بالتفصيل .وعدلت نفسها وكانت بصاله وحاطه اديها سانده وشها ومبتسمه .
وقالت : انا عارفه انه كان فى فرح بنت عمتى بس عايزه التفاصيل .
فرد وقال بصى يا قمرى :انا اصلا ماليش فى موضوع الافراح والدوشه بحب الهدوء اكتر بس لما حد عزيز عليا من اصحابى بيعزمنى على فرح اومناسبه بروح اقعد شويه صغيرين وامشى .
وابتسم وكمل :بس فى فرح اخت محمد صاحبى ده كان اول فرح اقعد للاخر . كان بالنسبالى نصف ساعه وامشى بس من ساعت ما شفتك نسيت نفسى والدنيا ولقيت مش حاسس بالحوليا الا بيكى وانتى كنتى كل شويه تروحى للعروسه تظبطيها وتنزلى تسلمى على الناس وترحبى بيهم وترجعى للعروسه وتنزلى تروحى للنا س كنت عامله ام العروسه . فبصتله
وقالت: يا سلا م .ليه يعنى دى قربتى وانا بحب قرايبى جدا وبحب اشوفهم فرحانين وده فرحها يعنى لازم تحس ان الكل مهتم بيها ويفرحوها مش هيسبوها كده قاعده وخلاص .
فابتسم وقال :عارفه عجبتنى حنيتك قوى معاها واهتمامك بيها وبالناس انا شفت ان حتى اخواتها ما اهتموش بيها زيك .انا كنت حاسس ان عندك قدره غريبه للاهتمام بكل الحواليكى وعجبنى البسمه العلى وشك ما سابتكيش لحظه فى كل الاوقات ومع كل الناس الكلمتيهم فردت .
وقالت :ما هما كلهم اهلى فلازم ابتسم فى وشهم.
فقال :عارف بس عارفه لما كنتى مع العروسه ولما لقيتى البنات طلعوا وخدوها عشان يرقصوا وانتى نزلتى ومرضتيش ترقصى معاهم فرحت قوى بيكى وعليتى فى نظرى وبعدها روحتى لترابيزه باباكى وعمامك وقعدتى تهزرى معاهم وبيقلولك مبروك وعقبالك ؛وانتى قلتى اعتبروه فرحى يلا بقا باركولى ولفيتى عليهم وسلمتى عليهم وبوستيهم كان نفسى وقتها يبقى ليا حكم عليكى عشان اجى اشدك واقولك ما تبوسيش حد تانى .
فردت باستغراب :ليه ما كلهم بابا وعمامى مافيش غيرهم.
فبصلها بنص عين وقال :طيب ما انا جوزك وانا اولى يلا تعالى بوسينى زيهم وشاور على خده .
فطبعا هيا اتكسفت وعدلت وشها الناحيه التانيه فحب يزيد كسوفها.
وقال :ايه يارونى اشمعنى انا يعنى .
وحب يستعطفها شويه .
فقال :ولا انا يعنى عشان ماليش اهل يبوسونى ويباركولى على العموم ؛ ليا رب اسمه الكريم .
فبصتله بحزن وصعب عليها وقالت :ما تقولش كده انت مش قلت ان انا كل اهلك وعلى العموم مبروك وربنا يسعدك وعلى موضوع انى بستهم هما اهلى وانا عايشه معاهم طول عمرهم وواخده عليهم .
فرد بجديه وقال :عارفه يارونى باتوجع قوى لما احس ان برغم كل حبى ليكى الفتره الفاتت وانك بقيتى كل حاجه ليا ان بحس فى المقابل انى واحد غريب عليكى اول يوم تقربى منه النهارده . انا عارف انه ده الواقع بس ده واجعنى نفسى فى اليوم التبقى بتحبينى زى ما انا باعشقك كده.
هيا لما سمعت كلامه وحست بحزنه فعلا حبت تغير فكرته شويه وتخفف عنه فقالت : هو اينعم احنا النهارده اول يوم نتكلم مباشرمن غير وسيط وبس الحصل النهارده عايز شهور عشان يحصل مع غيرنا .واحنا قربنا لبعض لدرجه كبيره جدا ماكنتش اتوقعها ولا اتوقع انه فى كام ساعه اشوفك واقربلك كده انا حاسه انى اعرفك من وقت طويل حتى تلاقينى عماله اتكلم معاك وكاننا اصحاب من زمان دا انا من وقت ما خبطت عليك الباب وكان فى نيتى اننا نقرب شويه من بعض ونتكلم سوا بس ما كنتش اعرف ان ده كله هيحصل والله انا بقيت بعزك جدا زى اخويا بالظبط .
فبصلها ورفع حواجبه .
وقال :اصحاب وكمان اخويا لا والله كتر خيرك اما بالنسبه للايس كريم وكده ده تبع اصحاب ولا اخوكى.
فضربته على كتفه وقالت :بس بقا دا انت غلس كل شويه تقولى ايس كريم ايس كريم مش هخليك تدوق من الباقى مهما اتحايلت عليا .
فابتسم وقال :وانا موافق انا مش عايز ايس كريم انا كفايه عليا امسحه وغمزلها .
فقعدت تضربه على كتفه وبتقوله :كفايه كده بقا اسكت انت مش بتبطل تكسفنى كده .
فقعد يضحك ومسك اديا بايد وحده وشدها ليه وحط ايده على كتفها ووشها كان فى صدره .
وقال: كفايه يا مجنونه مش عارف اسوق وبعدين كده لا قدر الله لو عملنا حدثه مش هنعرف نروح وتستفردى بيا وانا عريس ونبقى انا وانتى والشيطان تالتنا وكده.
فبعدت عنه وهيا مكسوفه وقالت :بطل كلام بقى اسكت عارف انت عايز واحد زى رايا وسكينه هيا الهتعرف تسكتك ؛ ولا ليه ما انا اهه.
وبصتله واتكلمت وهيا شاده على سنانها .
وقالت :دا انا مدوباهم اتنين.
فتصنع الخوف وقال : ايه ده يا وليد انت الجبته لنفسك محدش قالى على موضوع ريا وسكينه ده انتى ناويه تستفردى بيا عشان انا وحدانى وماليش اهل يسالوا عليا. فلقيت فجاه دموعها ملت عنيها وطبطبت على كتفه. وقالت : انا اسفه يا وليد حقك عليا وان شاء الله ربنا يقدرنى واعوضك عن التحرمت منه .وباست كتفه ومسحت عليه وقالت وهيا بتبتسم من بين دموعها :اوعى تشيل هم تانى وانا معاك واعتبرنى كل اهلك وناسك ودنيتك وان شاء الله عمرى ما هاخزلك ولا هازعلك .
ولما بص ولقاها فعلا بتعيط شدها لحضنه وباس راسه ومسح على ضهرها .
وقال :رونى حبيتى ما تعيطيش انا كويس وراضى بقضاء ربنا ويا حبيبتى انا باعتبر ان ربنا عوضنى بيكى وان بحنانك هتعوضينى كل الدنيا دى وانا مش عايز غيرك من الدنيا دى.
كلامه حسسها بقدايه هو حاطط امل فيها وده خلاها تحس انها مسئوله عنه ورفع راسها ومسح دموعها .
وقالها اوعى تعيطى تانى سامعه حتى لو عشانى . فابتسمت وقالت :حاضر .
فرد وقال :وانا مش عايز اكتر من البسمه دى انام واصحى عليها ربنا يخليكى ليا.
يتبع