دخلنا كانت راقدة كيف لملاك شعرها موزع على لمخدة يدها في كرشها و اليد لوخرا معلق فيها السيروم جبد جاد كرسي وقعد قدامها أما أنا بقيت بعيدة شوية نراقب فيهم حكم خصلات شعرها بيدو بتأمل فيها وطبع بوسة على راسها تململت وبدات تفيق حركت راسها شوية وفتحت عينيها وقعدت تخزر في الغرفة كأنها تستكشف وين راها حكات بصوت تاعب .
أماني: وين راني جاد واش جابنا اللهنا.
جاد: عييتي شوية وجبناك هنا ودوك شوية ندوك .
أماني: بصح واشبيا واش صرالي!؟
جاد: مابيك والو برك ...
حط يدو فوق يدها لي في حاطتها فوق كرشها وحكا بصوت دافي: راكي حامل وراح تجيبيلنا بيبي يعمر علينا الدار. أماني فتحت عينيها على وسعهم كأنها ماشي مأمنة حكات بصوت متقطع: أ..أنا..حا..حامل
هز جاد راسو بمعنى إيه تقعدت أماني وحضناتو وعيونها دمعو من الفرحة أنا مقدرتش نزيد نشد روحي ونزيد نشوف كل هذي الدراما قدامي وليت رفدت روحي وخرجت مخليتلهم شوية خصوصية خرجت من الغرفة نرجف بكلي دموع سيقو وجهي تسياق اليوم عندي مابكيت مشاعري تخلطت فرحة حزن حب كره غيرة معلاباليش واش الشعور لي شعرتو بضبط في ديك الدقيقة أقرب كرسي رميت كتلة جسمي لي حسيتها ولات توزن أطنان حتى رجليا مولاوش يقدرو يرفدوني تنهدت تنهيدة من عروش قلبي مسحت دموعي بكفوف يديا شبيا مانيش فاهمة روحي واش هذا التناقض لي راه صاريلي بقيت هكاك نسترجع في أنفاسي بدات تتنظم بلعقل بلعقل حتى رجعت لوضعي الطبيعي نضت توجهت لي عمرت في ڨوبلي شوية ما ردت فيا الروح عاودت رجعت للغرفة لي كانت فيها ضرتي أماني لقيتها وقفت وجاد ساندها مدلي مفاتح وبعد ما سمحونا نخرجوها طلعنا في الطونوبيل ورجعنا لدار في جيهة أخرى كانت عينين تراقب فيا من لي دخلت لسبيطار حتى وين خرجت داك لوجه ماشي غريب عليا مي وين شفتو متذكرتش خزراتو رعبتني طريق كامل و أنا نخمم وين شايفاتو عصرت مخي بلا فايدة وصلنا للدار حطينا أماني في غرفتها و بالطبيعة الحال جاد بات معاها أنا رحت للكوزينة خملتها وغسلت لماعن بعدها رحت لبيتي تكيت في فراشي لقيت تيليفوني مرمي فوقو فتحتو لقيت 6 ليزابال من رقم مجهول هو نفسو لي عيطلي البارح ولقيت لابال اللخرة عندها وحد ربع ساعة قتلني الفضول باه نعرف شكون وليت رفدت وعاودت عيطت صونا لولة تانية ثالثة رفد بقيت نقول آلو آلو مكانش لي يجاوب نسمع صوت النفس بصح ميحكيش والخط مفتوح بعد محاولات عديدة وليت قفلتو مهتميتش بزاف وغطصت في نوم عمييييق.
#أريولة
________
البارت قصير عارفة سامحوني 🙇
توقعااااااتكم نستحقهم حابة نعرف واش راكم تخمو 😍😘 راح يصراو أحداث 💥
أنت تقرأ
من يومياتي أنا وضرتي و غاجلنا جاد (باللهجة الجزائرية)
Şiirقصة مخالفة على واش تعودتو راح تحكي على يومياتي أنا وضرتي بين فرح و حزن منطولش عليكم تابعوها تفهمو كتر ❤?
