من يومياتي أنا وضرتي و غاجلنا جاد (باللهجة الجزائرية)

الحلقة (٨)

لحقت لعشية ورجع جاد لدار كي لعادة بعد مفطرنا قعدنا في الصالون نسهروا ملي دخل مهدرش معايا الخزرة مخزرهاش فيا مام أنا محوستش نهدر أمعاه طول السهرة هو و أماني يڨصروا أما أنا حاضرة غايبة قعدت هايمة مع أفكاري نطقت أماني وهي تخزر فيا

أماني: ايه جاد ليوم وين تبات .

أنا قلبت عينيا شديت داك الكاس تاع الجو لي كان قدامي شربت منو شوية ودرت روحي مسمعتهاش حسيت بلي راها حابتني نهدر مي أنا قعدت ساكتة حتى هدر جني لصفر .

جاد: أوااااه ليوم لمبات عند فريال باه نجيبو لبيبي لي راه جاي لي يونسو .

ضحكت أماني ومام جاد رجعلها الضحكة مي أنا متبدل والو في وجهي ملامحي بقات جامدة حسيتهم بداو يحسو بلي راني أنورمال وليت نضت من بيناتهم رحت لغرفتي وغلقت الباب بالمفتاح باه جاد ميجيش العندي .

في الصالون جاد : أماني واشبيها فريال !!

أماني: صباح كانت نرمال مي من لعشية وهي هكا والله منعرف واش بيها .

جاد: هذي فيها إن.

أماني: مع لعشية رحت لشنبرتها لقيتها صفرة تقولك حبة قارص مي كي سقسيتها قالتلك لالا راني نبانلك صفرة برك ..أي جاد وعد يكون زعفانة منك كي عيطت معاها الصباح هكاك !! وأنت ملي جيت محكيتش أمعاها ماكش فايق بلي راك هاملها شوية ..

جاد: نو منضنش هذا السبب ياك موالف نعيط معاها .

أماني: زعمة تكون غايرة مني ولا بصح لالا أنا قلتلها الصباح نربوه كيف كيف وأنا ولا هي مكاش فرق بينا .

جاد: نن فريال ماتخممش هكا أنا نعرفها مليح كاينة حاجة لا أنا لا أنت علابالنا بيها راني حاس.

أماني: إيه أنت جاد فرعون تقدر تتأكد .

جاد: وهذيك هي لي راح نديرها.

أماني: روح حكي معاها طيب خاطرها شوية راك ناسيها .

جاد: تصبحي بخير.

أماني : و أنت من أهل الخير

كنت راقدة حتى سمعت صوت دقديق عرفتو بلي جاد محبيتش نفتح ولعبتها مسمعتوش مي علامن راني نلعب على لفرعون لي نملة يعرفها وين راحت نضت نجر في روحي لباب نفتح وبقيت ندعي برك ميسقسينيش فتحت لباب وخزر فيا من ساسي لراسي ومع نضراتو هذي قلبي رجف عطيتو ظهري و أنا موليا لفراشي دخل مورايا وغلق الباب حرف محكاه بقى يراقب في كل تحركاتي حتى كي دخلت لبلاصتي وتسطحت ربع يديه وهو مزال يخزر فيا .

جاد: ايه يا لالة واش بيك !!

أنا: والو مبيا حتى حاجة .

جاد: ووجهك لاه قلباتو هكا !!

حرت واش نقول ..دوك واش نهدر باه ميشكش بلي كاينة حاجة لازم الكذبة لي نكذبها يقنع بيها ولا نلقى سبة نحصل فيها باه يأمني.....

                      #أريولة
____________
بارتي زيادة في خاطر فرولاتي 😍😘
سمحولي على الروطار 🙇🙇 ان شاء الله تقراوه 😅 متنساوش الفوت في طريقكم و عجوني رايكم في الحكاية لحد الآن حبوباتي 💕