من يومياتي أنا وضرتي و غاجلنا جاد (باللهجة الجزائرية)

الحلقة(٩)

أنا: شوف أنت جابلي ربي وليت زيادة في دار هذي !!

حط يديه في جيب السروال تاع السورڤات لي لابسو وقعد في طرف لاكوافاز وبقى يخزر فيا بدوك الخزرات لي حسيت رايحين يختارقوني طلع حاجبو مستغرب

قال:منين جاتك هذي الهدرة!

بقيت ساكتة ملقيت منجاوبو بقينا شحال ساكتين بقات فكرة تجيبني وفكرة تديني واش نقول واش السبة لي نديرها باه يأمني حتى لقيتها جيت نهدر حتى سبقني

جاد: فريال عقلية الذراري هذي خليها أكوتي وتخمام العيان هاذا نحيه تماما من راسك وتع انت زيادة في الدار هاذي المرة هاذي راني سمحتلك وخليتك قولتيها المرة الجاية منتسامحش علابالك أنت و أماني عندي كيف كيف كيما كنتو كيما مزلتو متخميليش تخمام عقلية تاع بكري تاع هي راح تجيب بيبي راح تولي خرمنك مزالت هي في بلاصتها و أنت في بلاصتك متفاهمين والطفل لينا كامل .
هزيت راسي كأني قنعت بهدرتو و أخيرا أمني .

جاد: نتمنى يكون هذا السبب بسك كيما علابالك أنا عارف عارف محكيتيش أنت الخبر يلحقني .

بعد هذو لكلمات خفت صح مي حاولت قدر المستطاع نخلي تعابير وجهي هادية باه ميفيقش المهم جازت ديك الليلة غدوة من داك رحنا أنا و أماني لطبيبة نطمنو على البيبي الحمد الله صحتو مليحة رحنا للجردينة لي تما قعدنا نتأملو في الدراري لي يلعبو رفعت راسي لمحت هذاك المخلوق في سيارتو باين عليه يراقب فينا شديت ضرتي من يدها وسحبتها بقوة باه تنوض قعدت تستفسر واش بيا أنا قعدت نقوللها والو مي لحق الوقت لازم نرجعو قبل ميتقلق جاد حسيتها قتانعت وصلنا الشيفور لدار أنا كنت مرة مرة نخزر مورانا نتأكد بلي مراهش يتبع فينا دخلنا عيانين رحنا ديراكت رقدنا كي فطنت لقيت تيليفوني فوق لاطابل دينوي من لبارح وهو طافي كي فتحتو لقيت بزاااف ليميساج من نفس الرقم المجهول وكلها ميساجات تهديد رجفت بكلي حرت واش ندير الميساج اللخر خلاني نفشل حتى تيليفون طيحتو من يدي .... 
              ستووووووووب😈
             
                     #أريولة
____________
البارت قصير علابالي 😌 مي علابالي راكم متشوقين مدولي توقعاتكم زعمة واش يكون بعتلي في الميساج 😏 حقا مكانش بارت زيادة 😊 كونوا هانيين فرولاتي 😘 حتى تولو تتفاعلو معايا مليح وتخطوني من كملي هذيك 😑 وتولو تمدولي رايكم في الحلقات 😤 ...

حقا بنات راني حطيت كرونيك جديدة أسمها أنتِ أنثى نتمنى تبعوها 😘 حطيت بارت الاول نتمنى ينال اعجابكم ومتأكدة لحكاية باش تعجبكم 😍