من يومياتي أنا وضرتي و غاجلنا جاد (باللهجة الجزائرية)

الحلقة (١٥)

كنت مزالني في ديك الغرفة مزالني نبكي على زهري لمنحوس كرشي راح تدخل في ظهري من قوة الجوع 😭 (رغم المحنة لي راني فيها مي نخمم في كرشي 😅)

سمعت الباب تفتح شفت آدم دخل وجاب معاه سنيوة ماكلة في يدو غلق الباب برجلو وحطها طرف الفراش قعد فوق كرسي كان محطوط تم ، دارلي اشارة بعينيه تاع كولي كنت جيعانة مقدرتش نرفض دنيتها العندي ربعت رجليا وبديت ناكل ...

هو بقى يخزر فيا ومرة مرة يضحك ضحكة خفيفة باينة على المنظر انتاعي لي يشوفني يقول هربت من سبيطار مهابل شعري مكشرد وعينيا منفخين حوايجي ماشي مرتبين كملت مسحت فمي طلعت عينيا عكرت فيه .😒

دار صباعو جنب شفافو تبسم وقال:بصحتك يا الوردة.

قحرتلو تقحيرت موت ودورت وجهي حسيتو تنرفز من جاست أنا أصلا مانيش حملاتو كلامو قلقني كيفاه يقرر يبعدني على جاد وزيد يقولي تولي مرتي حسيت بيه كي ناض وجا قعد قدامي...

أدم:وجهك أقلبيه ولا قعدي مراح تجيبلك حتى نتيجة من ليوم يسموك ليا على هذي ارضاي بلي راه جاي .

تعصبت من كلامو كتر ملي كنت معصبة عقدت حواجبي خزرت فيه وقلت: أنت مريض على حساب واش راني نشوف شكونك أنت باه جي تتكم فيا وفي حياتي وتقرر و تمشي كيما هوالك.

أدم :تعرفيني أنا لي في راسي انديرو ويكون واش يكون.

أنا : أدم إفهم أنا منقدرش نحبك بطريقة لي راك حابها أنت وشفت من جيهتي في الاول حاولت مي الله غالب مقدرتش قلبي حب راجل واحد وهو جاد راجلي .

أدم: فريال قلتلك سيرتو متجيبيهاش على لسانك أنا لي علابالي ..علابالي بلي ماكيش فرحانة معاهم وهوما ضك كي يجيبو بيبي أنت تولي غير خديمة عندهم هوما عايشين في رحمة و أنت اقعدي اندبي كي ذيك الخطرة اااه هاذي لمعيشة لي راكي حابتها.

هزيت براسي لا لا ودموعي طيح ريبونديتلو بصوت محشرج :لا لا حتى أنا فرد من أفراد العايلة وليد أماني ولا وليدي كيف كيف غالط وتخمامك غالط عمري ماكنت ولا راح نكون خديمة طول عمري ملي عتبت رجلى ذيك الدار وليت مرت جاد كنت ومزالني عايشة كيف السلطانة عمرو جاد فرق بينا أنا ولا هي كيف كيف في كل حاجة مساوي بيناتنا غالط يا آدم عارفة راك حابلي الخير وحابني نتهنى معاهم هانية و الحمد الله ضرتي نحبها وتحبني خطرات نتفاهمو وخطرات لالا هاذي هي حلاوت لحياة .

تعابيرو بقات جامدة قلت يا ربي ونكون أثرت فيه يالوكان شوية خزر فيا وقال:حاسبتني حمار ومنفهمش باين لوكان نبقاو هنا ديريلي مشاكل كنت حاب نديك برضايتك مي الظاهر راح يكون العكس.

أنا:أدم واش قصدك وين تديني !! ..مرجعليش الخوف ملكني شديتو من كول الشيميز بقيت نهز فيه:أدم حكي راني نهدر أمعاك .

نطر يديا وطبعني جيت مكسلة في الارض حتى ظهري حسيتو نقسم وقف وقالي ببرود:حاجة متخصكش.

خرج وقفل الباب بديت نصك برجليا في الأرض ونبكي بكا كيف الصغيرة لي سرقولها لعبتها بقيت ندعي في ربي يكون شاف لابيس
مزيا مكسرتهاش يا ربي ويفيق ويقلب عليها.....يتبع

                      #أريولة
______________________
الحلقة طويلة نوعا ما هذا لي قدرت نكتب 😅

أرائكم وين راح يديني آدم ؟!

زعمة جاد يلقاني كيفاش تتخيلوه ؟!

مرسي بزااااف ليكم فرولاتي 😍😘 لي راكم تقراو و تخلو أثركم بفوت و كلمات حلوين كيفكم في التعليقات ❤💋
حتى لي يقراو و يهربو نقوللهم مرسي 😙😋

كي العادة 20 فوت تحبط الحلقة لي موراها 😇 متنساوش كومونتيو بين الفقرات 😍 وتبعو كرونيك أنتِ أنثى لحقنا لحلقات شابين 💜💓
مبقالي غير نقوللكم تشاو في لامان 👋