من يومياتي أنا وضرتي و غاجلنا جاد (باللهجة الجزائرية)

الحلقة (١٤)

كان جاد رايح جاي في صالون و أماني قعدت تراقب فيه

جاد: أواااااه كانت كاينة حاجة في الشهور اللولين وهي كانت تبان أنورمال وشكيت كان لازم عليا نتحقق .

أماني: بصح مع شهور لخرين ولات نرمال .

جاد: متنسايش بلي تقريبا 7شهور معتبتش برا ..

شد راسو وعيط..

جاد : فرياااااااااال­ واش مخبيا عليا وين راكي يا*** وين ؟؟؟

أماني تنفضت من صياحو وبدات تبكي خبط جاد يدو في راسو تاع تفكر حاجة : أمير..أمير لازم نعيطلو

(أمير هذا صحبو يخدم بوليسي)
رفد تيليفون وحكالو واش صرا موراها بشوية دخلت روزة مرتو تبكي وتنوح (هذي صحبتي ههه موت فيك رناكتي) موراها دخل أمير نخلع كي شاف دنيا مقلوبة وهنا عرف بلي راها واصلة معاه للخر روزة قعدت تحظن في أماني ولزوج يتنادبو

(زعمة لوكان تصرا صح تبكو عليا هههه خلاص ني سكت بعيد الشر عليا) جاد تقلق منهم راح هو و أمير لشنبرة أنتاعي وبدا يحكيلو بالتفاصيل...

أمير: متقدرش دير بلاغ بلي راها مخطوفة ولا مبحرة حتى تجوز 48 ساعة على الأختفاء .

جاد تعصب وحكا: أمير مجهلنيش راك حاب تقول نبقى هكا نتفرج اذا هذا **** داها باه يقتلها نخليه يتسمى نسمح فيها علاه حسابك طحان منعرفش ندير البوسيبل باه نرجع حاجتي.

خلاه أمير يهدر يفرغ شوية غشو : أنا مكانش قصدي هكا ! قصدي يتسمى نحوسو عليها وحدنا بلا معاونت لابلويس ..قلتلي بدلت الرقم انتاعها !!

جاد:ايه بدلاتو 

أمير : معلابالكش لابيس لقديمة وين دارتها!! 

جاد: منعرف مي ان شاء الله تكون مرماتهاش.

أمير: همال نوض خلينا نقلبو عليها بلاك كشما نلقاو فيها حاجة تفيدنا .

بداو يفتشو في شنمبرة درج بدرج بلاصة مخلاوها ملقاوهاش قعد جاد فوق لفراش أمير تكى على لخزانة وقعد يراقب فيه جامي شافو ضعيف هكا و أما جاد حس طرف الخيط لي كان قادر يوصلو لفريال راح شاف فوق لاطابل دينوي كادر صغير فيه صورتي  رفدو وقعد يتأمل فيا حتى لاحظ لابيس في كوانت الكادر ضحك و أخيرا لقاها فتحو جبدها ركبها أمير في تيليفونو وبداو يشوفو في ليميساج تحلو عينين جاد على وسعهم مرتو تتعرض لتهديد وهو لاخبر زادو وساعو عينيه وهو يشوف في ليفوطو تاع نساه في زوج افهم بلي مام أماني كان قادر يديها يعني كان قادر يأذي ولدو لي مزال متزادش العصب زاد وعينيه ولات تقدح نار الفكرة لي تملكت عقلو ضرك أنو الخاطف لوكان يطيح بين يديه مصيرو الموت مكانش حل آخر...

أمير: هذا يعني عندو مدة ملي كان يهدد فيها مي زعمة علاه واش يستحق منك كان يراقب فيكم كامل مي علاش هدد فريال بالضبط.

جاد: لوكان حكاتلي برك لوكان موصلنا اللهنا ..ياربي علاش واش ندير ضرك واش ندير..

أمير:نبعت الرقم هذا لواحد صحبي هو يجيبلي شكون مولاه وبلاك نتعقبوه.

جاد:تعيش ياخو قولو يزرب فريال ربي عالم بيها واش راها تعاني.

أمير: تهدن ميصرالها والو إن شاء الله..

                     #أريولة
______________
اييييييه راه وصل ماي فرعوني لطرف الخيط 😍😈

أرائكم توقعاااااااتكم بنوتاتي ❤❤

علابالي البارت قصير مي راح نعوضكم ببارت في حكاية أنتِ أنثى 💋💪 نتلاقاو تم لحكاية بدات تحلى 😍

وكي العادة 20 فوت نحط البارت لي موراه البارت لي فات لحق ل51 مشاهدة عشرين ماشي حاجة تجيبوها نعرفكم فحلات 😘😙
تشاو في لامان 👋