بارت 31
ريتاج : انداريت علية حضني ونمنة ماحسيت الة وهوة يكوم وصوت التلفون يوذن طفة التلفون وكام لبس وتوضا الساعة ب6 بس بعدني نعسانة افف رجعت راسي كمل صلاتة وبدة يقرة قرآن شكد حلو صدق وكال
حيدر : انتي ليش متصلين
ريتاج : ...
حيدر : مو احاجيج
ريتاج : ها
حيدر : وعلا ليش متصلين
ريتاج : ماعرف
حيدر : جربتي تصلين قبل؟
ريتاج : اي
حيدر : وين وشوكت
ريتاج : من رحنة للكاضم نشتري الذهب صليت ورة امك
حيدر : اخذت من وقتج؟
ريتاج : لا
حيدر : شكد طولتي وكم ركعة صليتي
ريتاج : يمكن دقيقتين هيج شي ركعتين
اتقرب وكعد كبالي
حيدر : يروحي هالشي بكيفج بس الصلاة هية عامود دينة وهية الطريقة الي نتقرب بيهه من رب العالمين رب العالمين طلب من عدنة نصلي خمس اوقات مختلفة باليوم علمود نتذكر دينة شنو ومننسة احنة منو وليش مخلوقين علمود منسوي المنكر ونتذكر احنة قبل شوية صلينة لو ورة شوية صلاتنة انتي اكيد سامعة بمعجزات عيسى صح؟
ريتاج : اي
حيدر : زين شلون صارت هاي المعجزات؟
ريتاج : هوة الانبياء كلهم جانو يدعون الرب ويصلون حتة ينصرهم على الكافرين وتصير معجزات
حيدر : واحنة هم نكدر نطلب من الرب معجزة عن طريق صلاتنة نكدر نشتري اخرتنة عن طريق ندفع لرب العالمين صلاة الدنيا خمس اوقات باليوم ونلتزم بيهه
ظل يحجي ويشرحلي وسألتة كم سؤال جاوبني عليهن شرحة جان كلش حلو كمل وكال
حيدر : افتهمتي
ريتاج : هزيت راسي
حيدر : يعني ياحلوة تلتزمين بصلاتج
ريتاج : انشالله
حيدر : كوليها عدل
ريتاج : شلون
حيدر : ان شاء الله
ريتاج : متوقعتك تعرف شي بالدين
حيدر : ههههههه ليش
ريتاج : مادري عصبي وتعارك ذبان وجهك وتكفر
حيدر : ههههههه اي هالانطباع بية كل شخص والة عيبة واني عيبي عصبي
ريتاج : زين ليش خزرتني اول مرة
حيدر : اول مرة اوكفي من جابج محمد
ريتاج : اي
حيدر : بالله كلت هاي لو عدي اتفنن بتعذيبها التيشيرت الجنتي لابستة ابو الصرة ونص ردان وحجولج والشعر مفتوح شسوي مثلا
ريتاج : مو ابو الصرة هوة للكمر
حيدر : واذا لبسج غلط حتلو مو محجبة لبسج غلط اكول خالج مجان يحاسبج
ريتاج : لا
حيدر : تربية خالتج شاتوقع مني
ريتاج : وليش عيني شبيهه خالتي
حيدر : مابيهه بس هية هم مو محجبة
ريتاج : اي غير مسيحية
حيدر : لج انتي من اسمج مراهم مسيحية والله بكيفج تحولين من دين لدين
ريتاج : شبي اسمي
حيدر : تعرفين شنو يعني ريتاج
ريتاج : بحثت بالنت ومكتوب الشخصية القوية والمرأء المستبدة ومن هالحجي الكذب
حيدر : ريتاج معناهه مفتاح الكعبة
ريتاج : هااا
حيدر : اي يلا كومي اقري وانتبهي الدراستج امتحاناتج قربت
ريتاج : اي وكلشي مقارية ولا كتاب خرب هاي اول سنة هية كلة من وراك
حيدر : اني شعلية
ريتاج : بالخطوبة يومية جايني واخذتلي اجازة 10 ايام وهسة يومية مشكلة وممداومة من وراك كلة
حيدر : ههههههه ان شاء الله ماكو مشاكل والفاتنج اقريهن وحضري يومي والمتفتهمي تعاي اني اقريج
ريتاج : اوك
كمت حضرت الجدول لزمت فوني وكلت لنهى تصعد تطيني الواجبات وهوة ع التلفون شوية وصعدت نهى هوة باوع ورجع دنك ع التلفون اخذت منها الواجبات وكالت امتحان يومي بهذا خطية كلما ينطونة رياضيات لو انكليزي لو عربي تتكتبلي وياهه ف مفايتني شي كتلهه شكرا وراحت قريت الواجبات بقة الرياضيات كعدت قريت الشرح مادخل مخي جبت الملزمة ممفهوم شي
ريتاج : حيدر
حيدر : هاحبيبي
ريتاج : هذا تعرفلة
حيدر : شنو ياموضوع
ريتاج : المتتابعة
حيدر : سهل شبي
ريتاج : باجر امتحان يومي بي ومقاريتة
حيدر : جيبي دفتر وقلم وتعاي
ريتاج : جبتلة وفهمنياة حبيت شرحة بسرعة يوصل الفكرة ويفهم كملت كام كال
حيدر : اذن العشة
ريتاج : اصلي وياك؟
ابتسم وكال
حيدر : يلا تعاي
رحت يمة توضة وعلمني شلون اتوضة فهمني شاقرة بالصلاة افتهمت كام وكف واني وراة كملت وسلمت وهوة واكف بعدة كمل وسلم
ريتاج : تقبل الله
حيدر : اعمالج يروحي
ريتاج : ليش طولت خاف اني غلطت بشي
حيدر : ماغلطتي بس اني اقرة سور طويلة
ريتاج : وشلون حفظتهن
حيدر : اقرة السورة يومية قبل مانام شهر هيج شي واحفظهه
ريتاج : وهسة ياسورة قريت
حيدر : يس
حيدر : تعرفين منو يس؟
ريتاج : مرة اخذناهه بس ناسية الشرح هوة نبي
حيدر : النبي محمد صلى الله عليه وسلم
ريتاج : حيدر لعد ليش تكفر
حيدر : من اعصب اصير انسان ثاني مادري بنفسي شاحجي لو شسوي
ريتاج : يي والله انسان ثاني متلوكلك ترة
حيدر : ههههه
ريتاج : والله
حيدر : انتي وشطارتج تمتصين غضبي😉
ريتاج : 😒
حيدر : ول يابة متعرفين تحجين جلمة تريح كلبي
ريتاج : انتة ليش تحجي هالشكل
حيدر : شلون يعني؟
ريتاج : ماعرف اكو بحجيكم شوية من اللهجة الانبارية
حيدر : ههههه اي
ريتاج : ليش
حيدر : هيج عشنة فترة هناك
ريتاج : شوكت هالحجي شو اني مادري
حيدر : اوو جنتي بالكماط يمكن وبعدين امي اصلهه انبارية خوالي هناك بالعرب
ريتاج : الله حيدر بنفسي اروح
حيدر : ول يابة وين تعيشين دقيقة بالعرب😂
ريتاج : والله بنفسي حباب اريد اروح
حيدر : شتسوين
ريتاج : عليك الله عدهم بساتين وابقار
حيدر : اي
ريتاج : وتنور؟
حيدر : هههههه ولج ترة احنة هم عدنة تنور
ريتاج : لا بنفسي اضوك خبز التنور طين
حيدر : شنو ماماكلتة
ريتاج : لا اصلا احنة جنة كلة نجيب صمون وبس من نطلب كباب بالمطعم يجيبولنة خبز
حيدر : لعد عمرج خسارة
ريتاج : عليكك الله اخذني
حيدر : ان شاء الله خلي نعطل كلنة ونروح روحة جماعية
ريتاج : اييييييييي حببببباب
حيدر : وج اكعدي لتوكعين
ريتاج : مااا
حيدر : هههههه تعاي
ضليت اكمز ع الجرباية وهوة يصيح واندكت الباب وقبل ماحيدر يكول منو طبت حوراء هية وهيام ونهى سلمن وضلن يشاقن وياة وهوة منطلق يلعب وي ابن هيام الزغير عمرة سنة هيج شي
حوراء : اي ريتاج بشري شطلع بيج ولد بنية
هيام : كولي يالله تو الناس بداية حملهه مو هسة يحددون وبعدين شيجي من الله انعم الله اهم شي تكوم بالسلامة وسلامة الخلق
حيدر : اي والله ياخوية لاعاب حلكج شيجي من الله انعم الله
ريتاج : اي بعد لازم اربع اشهر يلا
بهالاثناء كام حيدر وكال هدوم وطب للحمام اخذتلة هدوم
حوراء : اي وكل شكد تطبين بشهر
ريتاج : كل يوم 29 بالشهر
حوراء : يعني انتي حبلتي ورة اسبوع من العرس
ريتاج : داجاوبهه وقاطعني حيدر وكال
حيدر : هيام رجلج جوة
هيام : اي يعيون اختك جوة وسئل عليك
طلع ورجعت سئلتني بلة هاي شبيهه انصرعت
حوراء : اي ريتاج ورة شكد حبلتي
ريتاج : ورة اسبوع
حوراء : زين مو استعجلتي شجاج ماصدكتي
هيام : وج شبيج مجلوبة شوية شوية ع البنية اكلتيهه وشربتيهه يعني رزق واجاهه شلون بلة
اندارت على هيام بس عود اهتمت لو سكتت لا اندارت علية و كملت كلامهه
حوراء : اي شبيج داسولف وياهه اي ريتاج يعني قصدي مو عدج مدرسة شنو راح تبطلين
ريتاج : لا اداوم
حوراء : يااا وتداومين انتي وبطنج
ريتاج : لا حسبت امتحاناتنة بشهر ال5 واني حامل 6 اشهر
حوراء : اي واذا ام ال6 اشهر ماعدها بطن
هيام : يووووو ولج محققة انتي شعليج بيها امشي كومي ننزل صوجي صعدتج رتوجة امي بدلي ونزلي
ريتاج : ابتسمتلهه وكتلهه ماشي كامت دتطلع وصاحت على حوراء كالتلهه متكومين كالتلهه لا ننزل اني وياهه هزت ايدهه ونزلت داطلع هدوم وسئلتني
حوراء : اي ريتاج وين هدايا السبعة
ريتاج : هذني بالكنتور
حوراء : ياااااا اخذتيهن
ريتاج : عمة كالت بيوم السبعة لحيدر يصعدهن
حوراء : اي واذا جان نزلتي لامي شي قابل انتي الواصلة العالم همة اجو لخاطرها هية التدفع فضل
ريتاج : ضليت صافنة عليهه بلا هاي شجاوبهه كتلهه والله مادري اصلا بعدني مفاتحتهن وتدلل عمة كلهن انطيهيا اصلا اني مشترية كلشي اخذت دشداشة ورحت للحمام هاي شنو بشر بدلت وطلعت لكيتهه تكلب بالمكياج
حوراء : اكول هذا الاساس زين
ريتاج : حسب البشرة يناسب البشرة العادية ميناسب البشرة الدهنية ولا الجافة طبي
حوراء : يعني شلون طبي
ريتاج : يعني نكدر نكول للبشرة الحساسة حتلو مو حساسة عادي تستخدمة لان سلبياتة اقل
حوراء : وشكد يطلع سعرة
ريتاج : ماعرف بيش اخذتة ماذكر بس 35 هيج شي
حوراء : شنو شو غالي
ريتاج : امريكي الاصلي وصيتة من النت شركة امريكية
كدامج
حوراء : لا تسلمين مالتج
ريتاج : عادي اخذي اني اوصي غيرة
حوراء : هاا
ريتاج : اي والله اخذي بالعافية عيوني
حوراء : لا خاف مالتج اني اشتري
ريتاج : عادي يمعودة اخذي قابل شمطيتج اني اوصي على واحد ومحتاجة كم شغلة
حوراء : تسلمين شكرا من انزل انطيج فلوسة
ريتاج : لا شنو السالفة اعتبري هدية بالعافية
حوراء : الله يعافيج اذا وصيتي على مكياج كليلي اني مو كلش افتهم بي دائما اوصي نهى لو اخذهه ونشتري بس مرة انطيتهه كتلهه جيبيلي باودر اشو حبب وجهي
ريتاج : خاف كوبي ومناسبج
حوراء : يعني شنو
ريتاج : يعني تقليد
حوراء : مادري كالت هذا هسة نزل
ريتاج : عادي اي شي تردين كولي من اوصي اوصيلج وياية
حوراء : اي خوش بس كولي قبل يوم حتة اجي اجيبلج فلوس واختار
ريتاج : ماشي تدللين
ننزل؟
حوراء : اي يلا
نزلنة جوة ديحظرون بالعشة رحنة للمطبخ وندى مرت اخو احمد ونور مرت سجاد كالبات خلقهن مدري شبيهن سئلت نور كتلهه وين خالة جاوبت بنتر كالت بالاستقبال ياا هاي شبيها كعدت ع الميز وندى تخصرت
ندى : اكول ريتاج سبعتج وعبرت من زمان ليش متجين تساعدينة هم هالله هالله مو كل الشغل علينة لتنظفين ولتوكفين ع التنور ساعدي بالمطبخ شوية
ريتاج : عادي بشنو اساعدكم
نور : تسلمين عيني مكملين كلشي
ندى : شوفي اني اكعد من ال7 اسوي الريوك واغسل مواعينة وانظف المطبخ ونور عليهه التنظيف والغده علية وخالتي تجي تشوف وتجيك الوضع ومهى وي نور لان تعرفين البيت جبير ويهد الحيل بالتنضيف ونهى عليهه مواعين الغدة والعشة كلنة نطبخ واني اغسل مواعينة ومهى تغسل الكراج والسطح بس بما انو عدج دراسة وحامل ساعديني بالمطبخ يومواليوم الثاني ساعدي بي نور بالتنضيف
ريتاج : بس لحضة اني ماكدر اشتغل اساعدكم باشياء بسيطة اي بس مو مال يومية لا اعذروني ماكدر اني حتة من اقرة متمددة واقرة
ندى : وشدعوة ترا كانة حبلنة وجبنة ونكوم نشتغل بالنفاس وحتة بطنة واصلة لحلوكنة ونشتغل ومحد اشتكت ترا احنة بيت واحد حتة انتي مترضيها تاكلين واني اشيل ماعونج
ريتاج : بس اوكفي افتهميني اني عندي دراسة اول مارجع من المدرسة كبل انام وادرس وارجع انام وساعات نومي طويلة وخصوصا هالفترة كوة منظمة وقتي بين الدراسة وحيدر
حوراء : ترة طوختيهه شنو يابة اول وحدة تزوجين عجل يشتغلن عدج هنة
تحجي ومنفعلة وصوتهه عالي
ريتاج : بس افهميني اني متفاهمة وي خالة وحيدر بهالامور
حوراء : اي واذا حركتي ايدج وياهن بس فالحة تنامين جوة رجلج وتحبلين
ضليت ساكتة فشلتني كبالهن الدمعة وكفت بعيني واجة صوت رج البيت
حيدر : هااااااااااييييي شكككككككككككووووو شنو هالحجيييي
حوراء : ماكو خوية سلامتك البنات ديحاجن ريتاج على شغل البيت ميصير شبيهه اذا ساعدتهن شوية هنة هم جهال عدهن
حيدر : بشنو يحجن وياهه؟
حوراء : على شغل البيت
حيدر : بيتمن؟
حوراء : بيتنة شبيك
حيدر : يعني مو بيتج ف اطلعي منهه ولتدخلين ريتاج متشتغل شي هنا وامي بنفسهه كايلة امي هية ام البيت وتحدد الشغل اذا زاد ماعون مراح ينقص منجن شي الي متثاكلة من لكمتهه لو من ماعونهه خلي تجيني واني عود اجيب اكل من برة وانعل ابو اليكعد وياكم لو ياكل وياكم هاي مرتي الي تحجي عليهه يعني حجت علية والي معاجبهه الوضع الباب يفوت جمل مو تكعدن هنا وتحجن عليهه ماعجبجن تشتغلن اعزلن بس مرتي مالجن علاقة بيهه حسجن واصل للديوان على كم ماعون هسة اهجم المطبخ هجم كافي متردن تشتغلن لتشتغلن اي كافي عاد طكت اروامنة من هالاسطوانة
هيام : هدي ياخوية اعصابك ماصار شي بيناتهن ويحلنهه عليش هسة يصعد ضغطك على مشكله تافهه
حيدر : تافهه وحسجن واصل لديوان ادري ماحسبتن حساب زلم برة هاي تصيح وهاي تعيط هية وضعية هاي
ريتاج : سحب جكارة وطلع والكل وجهه مكلوب يالله اني شسويت لو ساكتة مو احسن هسة يزعلن راح وضلن نور وندى يحجن اووف كلة من لساني كمت لغرفة نهى كاعدة تقرة طبيت كالت ها ولج عدنة امتحان
ريتاج : او قريتة من زمان
نهى : عزة لج صارلي ساعة اريدة يطب بمخي ماكو شلون قريتي وانتي غايبة
ريتاج : حيدر قراني
نهى : الله هنيالج والله يفهم
ريتاج : ترة سهل افهمج مثال؟
نهى : الله ويدج تعاي
ريتاج : كعدت قرينة شوية وطبت مهى وسدت الباب ركعتة قوي بحيث الغرفة نرجت
نهى : هي شكو شبيج
مهى : هي بعينج انجبي لا بالله الزمج ابتلي بيج انتي الثانية
نهى : ليش منو الاولى بعدين شنو اشتغل عدج
مهى : نهى سكتي لا اسحلج بالبيت كلة هسة من فوك ليجوة والله يالله اجاك من تالي عكبك بس هوة مو صوجج صوج البعير المنطيج مجال
نهى : اوكفي اوكفي يابعير شبيج منو منطيني مجال
مهى : بالله سكتي ولي مني
ريتاج : وطلعت وعافت الباب اعرف تقصدني زين هية اصلا المشكلة مو يمهه شبيهه ليش تغلط على اخوها
نهى : وج شكو شبيهه هاي المنغولية
ريتاج : ماعرف
نهى : لج سمعت المشكلة وطبيت شنو حيدر صيح عليهه
ريتاج : لا
نهى : لعد
ريتاج : والله ماعرف
خليت وطلعت صعدت فوك بلة اني يمهم شبيهم متخبلين علية ضليت ابجي شوية واليدة مال باب تحركت لان جنت قافلتهه كمت مسحت دموعي صحت منو
حيدر : اني
فتحت الباب قفلهه وعقج حاجبة
حيدر : مو صبو اكل ليش صعدتي
ريتاج : ماكو نفسي دتلعب
جرني وكال
حيدر : يولي خوما من كل عقلج زعلتي من ذني لو من حوراء
ريتاج : لا مو هيج هنة حقهن مزعلت انتة ماشاء الله ماقصرت بس ضجت من تعامل بنات عمي وياية ماعرف شمسوية لحوراء لو لمهى وهيج يسون حتة ندى ونور ماحجن شي
حيدر : معليج بيهن يروحي شكد ميحجن لتجاوبين ولتراددين وصوتج متعلي اني من شفت اصواتهن طالعة واجيت وشفت صوتج ناصي وماغلطتي بكلامج اتدخلت شميحجن لو شيسون اسكتي وتعاي كليلي واني اتصرف وعدج ابوية وامي موجودين واذا بخواتي انطيهن اذن الطرشة اذن سمعي بيها الكلام والاذن الثانية طلعي منهه ادري يسون مشاكل خوما اطردهن من بيت اخوهن
ريتاج : اوكف اوكف بيت اخوهن؟
حيدر : ول عفتي كلامي وركزتي بهاي اي بيت اخوهن
ريتاج : ليش هذا مو بيت عمو
حيدر : لا
ريتاج : شلون يعني اوكف
حيدر : اووو سالفة طويلة
ريتاج : اسمعك
حيدر : والله الج خلك امشي نتعشى
ريتاج : لا حباب كلي شنو السالفة
حيدر : من شلنة من الانبار اجينة لبغداد ابوية اشترة بيت
ريتاج : بس فهمني شلتو قبل موت ابوية لو وراة
حيدر : وراة ولتقاطعيني ورة مامات ابوج ابوي باع البيت جدي كلة لان بعد مالهم نفس بالبيت ورحنة للانبار كم سنة ورجعنة ابوي اشترة بيت هنا بس تعرفين جدي شيخ وعالم طابة طالعة وذاك البيت بي استقبال واحد بوكتهه جنت متعين اشتريت هاي الكاع لان انطوني تكريم لزمت واحد مطلوب وراهه
بعد ماصار السقوط هم جانت عدنة دورية واجتني اخبارية على ارهابي مطلوب بس هذا انكس من ذاك كلش جرايمة كومة لزمتة وكرموني وانطوني مبلغ جبير ف بنيت البيت وبنيت ديوان وشلنة بي
ريتاج : وذاك البيت
حيدر : ذاك البيت اخذة محمد وتزوج بي
ريتاج : يااااا جنتو كاعدين بيت محمد
حيدر : لعد شكلت اني
ريتاج : هااااا
حيدر : اكول هسة حتة الاكل كملو
ريتاج : اف اكل اكل والله لعبانة نفسي
حيدر : دكومي لبسي اي شي خل نطلع نتعشى
ريتاج : تعرف شنو مشتهية
حيدر : شنو
ريتاج : همبركر
حيدر : هههههه ديلا كومي هسة اخذج لاحسن واحد يسوي همبركر بالكرادة
ريتاج : اوووووك ثواني
كام هوة لبس بنطرون عسكري وقميص اسود اندار وكال
حيدر : متكومين تبدلين
ريتاج : يصير البس مثلك؟
حيدر : شلون يعني
ريتاج : بنطرون عسكري وقميص اسود😃
حيدر : ومنيلج بنطرون عسكري
ريتاج : عندي البسة؟
حيدر : ديلا لبسي بس خوما ضيك
ريتاج : لا والله مو كلش حتة القميص زين طولة
حيدر : ديلا فضيني البسي
اخذتهن ولبستهن ضحك وكال يلا لفي الشال دنطلع نازل اطلع السيارة
ريتاج : اوكف تعال ناخذ صور حباب
حيدر : هههههه شتسوين بيهن
ريتاج : هيج مدام لابسين نفس الشي
اخذنة صور ونزلنة سلم وطلع وطلعت وراة اكلنة وراهه رحنة اخذنة ازبري والجو ثلج بس اشتهيتة وهوة جابلي كملنة ورجعنة للبيت ب12 وصلنة البيت ضلمة
حيدر : ياستار شكو
وللحكاية بقية
انطوني ارائكم؟
عفيه صوتوا يعني مشاهدات كومه وتصويت ماكوو.
😒😒
