كرونيك جديدة بعنوان:🌹الحڨرة🌹

2⃣

الحلقة_2: نرجعو ليلة قبل الحادث...زهرة في البيت خاوتها صغار راقدين في ثلاثة ...طفلة اسمها اميرة 6 سنوات وخوها فيصل 6 سنوات توام وختهم صغيرة ملاك عمرها 3 سنواتً...الفرق العمري بينهم وبين زهرة كبير خاطر زهرة اختهم من يماهم برك مش من باباهم... ام زهرة فطيمة راجلها توفى وهي مكانتش حابة تعاود الزواج مي الضروف ومشاكلها مع خوها ومرتو وهي ببنتها اضطرتها تعاود الزواج..وتخرج من هذيك الدار وتتزوج ... تزوجت بصالح وطامعة تعيش بكرامتها مي كان العكس ... فطيمة مع خوها احمد فطيمة : احمد خويا سقسيت عليه مليح وفهمتو بلي انا عندي بنتي .. احمد : ايه فهمتو وقابل معندوش مشكل. فطيمة : وزعما ناس ملاح؟؟ احمد: لباااس به متندميش عليه....ووصيتو عليك قالي بلا متوصي .. فطيمة تبسمت مرتاحة : مليح. جات زهرة تجري لعندها ...رفدتها فطيمة فرحانة واخيرا بنتها راح يولي عندها اب.... .ً..الحاجة لي مكانتش عارفتها فطيمة انو خوها كان عارف بلي صالح يشرب وخاطيه المسؤولية وهكاك طبعها ليه باش تخرجلو مالدار خاطر مرتو ظل تشتكيلو ...حب يتهنا منها فطيمة تزوجت بصالح وكلها امل بلي راح ترتاح وبنتها كيفها ...لكن لقات العكس ..صالح كان سوكارجي وميخدمش وكي تهدر معاه يضربها... فطيمة كرهت منو وحبت تطلق مي وين تروح هي وبنتها وتوام في كرشها.... تحتمت عليها تبقى معاه وتحمل الذل والضرب والسبان...باش تكبر ولادها... كانت تعجن الخبز وتبيعو وكاشما تخيط للناس حاجات ولا تعسلهم ولادهم كي يخرجو ويخلصوها... فطيمة كانت المهم تخدم وتوكل ولادها وتقريهم ..راجلها يصبح راقد ويبات سهران وهي تخدم كانت مرا بالف رااجل... زهرة كبرت وكانت شوف يماها واش راهي تعاني كانت تغيضها...وعولت باش تقرا وتفرحها. . ليلة الحادث...زهرة كملت كتيبتها...ناضت خبات دوزانها شافت. في خاوتها صغار راقدين تبسمت... خرجت للكوزينة لقات يماها مزالها تخيط..تنهدت زهرة : يما روحي ترقدي راح الحال !! فطيمة : روحي نتي ترقدي غدوة تقراي عندك باك السنة متنسايش.... زهرة : خليني نعاونك.. فطيمة: بووه لالا كي تكملي قرايتك وتتزوجي نشالله هذيك هي فرحتي. زهرة تبسمت بقهرة غايضتها يماها... فيقها صوت باباها داخل...يمشي ويتمايل...سكران. فطيمة شافت في زهرة : روحي للبيت خفي.. دخلت زهرة للبيت تغطات ورقدت..وصورة يماها وهي تتعب عليهم ..بين عينيها ...غمضت عينيها ودايرة في بالها تقرا وتنجح وتفرح يماها..# Rezak_Fouad رقدت زهرة... الصبح ناضت لبست ولبست لفيصل واميرة توصلهم للابتادئي يقراو... زهرة : يما راني رايحة... فطيمة كانت تعجن فالخبز تبسمت : روحي بنتي وبلاكي الطونوبيلات .. زهرة : نشالله
جات ملاك تجري ليها ملاك: ختيتو ....ثيبيلي معاك كوثاك زهرة تبسمت..خاطر هي تعيط لملاك ختيتو ملاك رجعت تقولها ختيتو كيفها.. زهرة : نجيبلك كوجاك...كي نرجع نجيبلك...بصح اقعدي عاقلة متقباحيش وتقلقي ماماك..!!! ملاك فرحت ورجعت تنكز : ايه ايه منقباحش ...وااااي وااي ثيبلي كوثاك.. خرجت زهرة وخاوتها معاها وصلتهم للبريمار وكملت طريقها لليسي ومكانتش عارفة بلي اليوم راح تفارق ناس عزاز عليها ومتزيدش شوفهم
************
فوت & كومونت بليز