كرونيك جديدة بعنوان:🌹الحڨرة🌹

2⃣0⃣

#الحلقة_36: زهرة مخلوعة فيه معرفتش واش تقولو تلفتلها الهدرة ...يعني صح صح كما تدين تدان ويجي نهار كل واحد يخلص على فعالو . زهرة: يعني لهذا السبب لي قبلت بمنال !! محمد: تقدري تقولي ...لهذا السبب . زهرة : حابة نعرف شكون هذي لي تمسخرت بيها وواش قصتها ؟؟ محمد : ننن زهرة مانيش حاب نتفكر...قصتها توجع وبزااف ...مانيش قادر نتفكر واش صار ...صعيب ومنقدرش نحكيلك .. زهرة : تعبتك معايا بزااف ...الله غالب هذي هي الدنيا كلها دروس لي يفهمها وياخذ منهاعبرى...بصح المشكل ديما نفيقو فلخر حتى تطفر ..وياكلنا الندم ..والندم واعر... محمد : بلاك مكاش لي جرب الندم قدي. زهرة : ندمت كي سمحت فيها ؟؟ محمد: عقل الصغر ..والطيش ...كلفني غالي وبزاااف .. زهرة : واش صار احكيلي .. محمد وقف : منقدرش زهرة ...خليها عند ربي ...بيني وبينو ونشالله ربي يغفرلي. . زهرة وقفت معاه : نشالله ربي يغفرلك...شد فيه وكثر الصلاة والاستغفار راح يغفرلك نشاىله.. محمد: انا نروح درك..نتلاقاو المرة الجاية ..ياك جي؟؟ زهرة: ايه نجي نشوف خاوتي ... محمد: زهرة...بشرى ...اتهلاي فيها انا منقدرش نشوفها . زهرة:متخافش راهي كيما ختي صغيرة ولا بنتي.. محمد : عيشك... محمد وزهرة رجعو لدار الايتام ...محمد راح يطلع في طونوبيلتو زهرة شافت فيه . زهرة: رح تكمل تحكيلي المرة الجاية . محمد : نشالله. زهرة تبسمت وراحت .. محمد قلع بطونوبيلتو والماضي يدور في راسو ...تفكر نهار عيطتلو الطفلة هذيك وقاتلو لازمك جي تسترني وتصحح غلطتك...وهو قاللها ت** في حياتك منديش وحدة خامجة كيفك ...روحي لخماجك.. الطفلة هذيك صغيرة وهو صغير ودارو غلطة كثرمن عمرهم ومقدروش يصحوها ...لانهم صغار ومحمد خرج رخيس معاها وسمح فيها .. بعد فترة محمد نحاها من راسو وهي صغيرة وخافت دارهم كون يسمعو يقتلوها ...خافت باش تحكيلهم ويشتكو بيه... حملت في قلبها وندمت ندامة حياتها لي دارت علاقة فالحرام....بصح تانيب الضمير يجي فلخر ديما... صبرت وصبرت حتى نهار جاها خطاب ...الطفلة هذيك خافت وبزااف خافت الفضيحة نهار عرسها ..رفضت بزااف خطابة ...ومحمد مبان عليه حتى خبر عايش حياتو بالطول والعرض وخلاها تخلص في غلطتهم في زوج وحدها ... الطفلة هذيك محملتش حتى وحد النهار قرت تهرب من دارهم....عقل الطيش خمت غير فالهربة .نهار غلطت مخمتش ...ودرك باش رجع عقلها يخدم وخدم بالغلط... هربت الطفلة هذيك من دارهم ووين حوسو عليها ملقاوهاش .....وباباها كي سمع طلعتلو لاتونسيو....ورجع مذلول قدام الناس ...هبطتلو راسو ...ورجغو الناس يقولو هذاك لي بنتو هربت من الدار .. وكاين لي يقولو هربت مع صاحبها وماشي مربية. ..ومعرفوش
• ومعرفوش وين راحت... محمد كان كبر خاطر جازو سنين على هذيك الحكاية ...وحس روحو بلي خسر ...وحب يصلح غلطتو مي حوس وحوس ملقاهاش ...فاق وفاق روتار وبزااف ... واكثر حاجة قهراتو نهار سمع بلي باباها توفى مور ماطاح فاىفراش مالمرض....والسبة كامل هو لي متحملش مسؤولية غلطتو وهي لي هبطت راس باباها .... محمد فرينا مقدرش يسوق تفكر كامل واش جاز عليه حط راسو على الفولو ويبكي بقهرة.. محمد: اااه يااربي واش مزال تزيد تعاقبني ...يكفي لي عشتو بزااف يكفيني..#الحلقة_37: رجعت زهرة للدار وعقلها عند محمد متوقعتش يكون صار فيه الشي هذا كامل وانو راه عايش بتانيب الضمير ..لي يشوفو من برا يحسبو راه عايش لباس بيه مي للبيوت اسرار. ..محمد كي شاف منال تبكي وحكاتلو واش صار معاها ...تخيل الطفلة لي عرفها هي لي راهي تحكي .. رجعولو ذكريات بزااف ...حياتلو جرح قديم ...جرح مقدرش ينساه ...جرح عميق وخلاه نادم طول حياتو ... العقاب مش دايهم يكون ظاهر احيانا يكون مخفي ومدفون في القلوب ...الحاجة لي لازم نكونو متاكدين منها انو ان الله يمهل ولا يهمل ومدام ربي كاين كل واحد يخلص فعالو...مهما طال الزمان . .... بعد ايام رجعت زهرة لدار الايتام تنهدت ...كلما تدخل وشوف لولاد يلعبو جيها الدمعة. ..كاين بزااف ولاد وبنات صغار كان قدرهم يكونو يتاما ويترباو هنا بدل الجو العاىلي... زهرة رغم لي يتيمة الاب مي امها عوضتها باباها ومخلاتهاش تحس بغيابو ...مهما الضروف لي جازت عليها صعيبة من فقر ومزيرية لكنها تربات مع يماها في الوقت لي بزااف اطفال راهم محرومين من والديهم وعايلتهم... زهرة رغم كل مشاكلها مي كي تدخل للدار هذي تحمد ربي على انها كانت لها الفرصة تعيش مع يماها وعايلتها في الوقت لي كاين ناس تتمنا كون شافو يماهم ولا باباهم ولو لحظة 💔 ... تبسمت زهرة مع لولاد حتى شافت ملاك جات تجري عندها ملاك: زهرة زهرة جيتي ... زهرة عنقتها وتتبسم فرحانة : هاني جيت توحشتكم .. ملاك: مام انا .. زهرة: فيصل ارواح عندي..متوحشتنيش ؟؟! فيصل كان رايح عند زهرة واميرة حبساتو اميرة: متروحش.. درك اميرة وفيصل راح يجوزو السيزيام ... زهرة مخلوعة مفهمتش وقفت وراحت عندهم.. زهرة: علاه محبيتوش جو عندي ؟؟ فيصل شاف في اميرة وساكت.. زهرة شافت فيها لقات مشنفة.. زهرة: شبيك اميرة؟؟ هبطت لعندها وشدتها اميرة نحاتلها يدها .. اميرة: روحي متزيديش جي عندنا.. زهرة مخلوعة متوقعتش تقولها هاك زهرة: علاه واش صار ؟؟ وشبيكم ؟؟ اميرة: علاه رميتينا هنا؟؟. وجيبيلنا هذوك الحوايج والحلوى ...مكلاه عندنا روحي متزيديش جي روووحي. زهرة قلبها وجعها اميرة كبرت ورجعت تحس وتفهم ورمات اللوم فوقها . زهرة دمعو عينيها: مرميتكمش انا اميرة....ياك راني نجي عندكم.. اميرة: وعلاه متديناش عندك..؟؟ زهرة: منقدرش !!! اميرة تبكي: صحبتي انيسة البارح داوها راحت ونتي هنا خليتينا وحدنا متحبيناش تتمسخري بينا . زهرة: منقدرش اميرة لازم نكون متزوجة !! اميرة: ايه اتزوجي وخرجينا منا .. زهرة دموعها نزلو حاسة بحرقة في قلبها : منقدرش والله منقدر... اميرة: امالا متزيديش جي ...منحبكش انا منحبكش... روووحي.. ودخلت.. زهرة شوف فيها ودمو
• ورجعت تتحسس والشي هذا راح يخلق مشكل وحدوخر لزهرة.... دخلو لولاد وزهرة شوف فيهم وتبكي ...خرجت مقهورة يا ما تحملت وشقات في جال خاوتها بصح هوما صغار ومراحش يفهموها.. تمشي وتبكي حتى صونالها محمد.. حبست شافت فيه ..هبط ليها . محمد: زهرة؟؟ زهرة: سمحلي محمد اليوم والله مهدرت مع بشرى.. محمد: فهميني علاه تبكي فهميني واش كاين ؟؟ زهرة: عييت محمد علاه مجيش الموت درك وتريحني علاااه يعني
• .#الحلقة_38: محمد:زهرة وعلاه واش صار فهميني؟؟؟ زهرة تهدر وتبكي : خاوتي رجعو يتحسو مني ودايرين. في بالهم انا سمحت فيهم..والله معرفت نفهمهم ولا نشرحلهم.. محمد تنهد حاس بزهرة وغاضتو بزااف : زهرة ...اصبري هوما صغار ونراحش يفهموك ..مي راح يجي وقت ويفهمو.. زهرة تنهدت : نشالله...قهرني كلامهم والله انا كلشي درتو في جالهم محمد تبسم: عارف...هيا نهبطو نكملو هدرتنا.. زهرة مسحت عينيها : اوك هيا.. لحقت زهرة للجاردان هي ومحمد وقعدو يحكو... زهرة: عندي فظول نكمل حكايتك. محمد تنهد : بقية حكايتي كلها ندامة ...الطفلة هذيك كانت عقدة في حياتي ..وعلى هذي قررت نصحح غلطتي ....مور ماهربت قلبت عليها الدنيا ...وليت كي المهبول نحوس من جيه لجيه والو...ملقيتهاش..حوست في كل بلاص وين متتصوريش في مخك....مي الله غالب ملقيتهاش.. زهرة. قلبها وجعها: وعلى هذي قبلت بمنال باش تصحح غلطتك محمد : ايه ...كنت كاره وكي عرفتك وحبيتك كنت نكذب على روحي وحاب ننسى الماضي .مي الدنيا مكتوب ...وكتبلي ربي نتزوج بمنال .. زهرة: وبشرى؟؟ محمد تبسم بسخرية : بشرى...بشرى واستغفر.. زهرة: احكيلي مور زواجك واش صااار ؟؟ محمد: مور زواجي كان كلش عادي تقبلت حياتي وقلت هذي مرتي ونعيش معاها ونبني معاها الداار ...كنت نروح نخدم عادي ونرجع وهاكي عارفة خدمتي في اي وقت ليل ولا نهار ...الله غالب هذي خبزتي ... منال كانت عايشة معايا بالقليل ومع الوقت والفتها و والفتني.. .يعني الحق تاع ربي كانت قايمتني كيما يلزم .. رجعت نحمد في ربي وقلت راح نكون معاها راجل ونعوض الماضي...يعني هي واش ذنبها ...كانت كلما تتبسم ولا تبكي تغيضني نتفكر الطفلة لي عرفتها فللاول.. . عمري ماحرمتها من حاجة ...لي تطلبها تحظر... مكنتش مقصر معاها ...واجبي كزوج ليها وسيرتو من نهار قاتلي راني بالجوف ...فرحت فرحة عمري ... محمد يهدر ويتبسم والدموع في عينيه... نشفالها كي اليوم كي قاتلي منال: محمد طلعت بوزيتيف ... محمد مدهووش : واش معناها ؟؟؟ منال : راني بالجوف واااع . محمد مااصدمة بقا مدهوش..حتى منال عنقاتو وتضحك عليه محمد: كانت اسعد لحظة في حياتي ...لحظة لي عرفت راح نولي اب ..متتصوريش يازهرة شحاال فرحت ...كنت حاس ربي بلي قبل توبتي واهدالي نواارة لداري تزهيلي حياتي.. زهرة : هذي فرحة عمرك !!! راك متاكد ؟؟؟ رميتها في دار الايتاام ؟؟ منك بصح ؟؟ وحتى متحبش شوفها ؟؟ محمد ساكت ويسمع مقهور ...هبطت. دمعة من عينو مسحها .. محمد : يازهرة منقدرش ياازهرة.. زهرة وقفت تسب فيه : وعلاااه واش صار؟؟ ومهما يكون صاير هذي طفلة صغيرة واش ذنبها ؟؟ محمد ساكت... زهرة: نتا ماكش انسان مسؤول ومتعلمت
• ماكش انسان مسؤول ومتعلمتش من اخطائك...وعمرك متتعلم ...شاطر غير في حاجة وحدة تهرب من مشاكلك !! محمد: خلاااص زهرة مااكيش فاهمة زهرة: فهمني .. محمد وقف : ماشي ضروري تفهمي ومشا .. زهرة حبساتو بغش: يهمني ..لاازم نعرف محمد:وااش تعرفي ؟؟؟ بيمن نبدالك...بنهار لقيت عليلو في داري وانا بايت خدام....ولا نبدالك نهار عرفت بلي ماشي هذيك اول مرة ؟؟؟ ولا نقولك نبدالك بنهار عرفت بلي زهرة ماهيش بنتي ؟!؟ ؟ بيمن حابتني نبدا ؟؟ قوليلي نتي وخيري... زهرة مخلوعة هذا كامل صاار فيه محمد ؟؟ محمد قعد على ركبتو دموعو ويدان محمد: ضربتني في ضهري ...وضربتني في اغلى حاجة عندي...بصح كون نحكمها نقتلها ...نقتلها ونشرب من دمها ونريح
""""""""""""""""
فوت& كومونت بليز