كرونيك جديدة بعنوان:🌹الحڨرة🌹

3⃣

الحلقة_3: نرجعو للحادث....زهرة تبكي وترجف شوف في دارهم تتحرق يعني خسرت يماها وخاوتها وراح تبقا وحدها... حبت تدخل مخلاوهاش . زهرة تشهق بالبكا : خلووني ندخل ...يمااا ملاااك ...فييصل. ..امييرة.... تعيط وتبكي...حتى شافت فيصل واميرة يبكيو كانو برا حتى هوما كانو يقراو ....واقفين ويبكو... ناضت تجري ليهم عنقتهم وتسلم عليهم وتبكي فرحانة كي لقاتهم حيين... زهرة مخنوقة ومعنقة خاوتها وتحمد في ربي لي لقاتهم حيين... زهرة : حمد لله يا ربي ...حمد لله لي مزلكو حيين..خفت نفارقكم....و....ونبقى وحدي ..حمد لله.. اميرة تبكي: وين...وين...راهي ماما ....!؟ وملاك ختيتو وين راهم ؟!! زهرة شافت جيهة دارهم ليبومبي يطفو فالنار.. تنهدت محروقة من قلبها وشوف في دارهم تتحرق وماهيش عارفة يماها وختها اذا مزالو حيين.. حطت يديها على وجها وتبكي معرفتش واش دير... وخاوتها شادين فيها ويشوفو في دارهم تتحرق مفهمو والو صغار وميعرفوش وشافو زهرة تبكي يبكو معاها.. شوية هاك خرجو البومبيي رافدين يماها ومخرجينها طلعوها فلومبيلونس... جرات زهرة ليها تعيط وتبكي ملحقتهمش قلعو بيها ديراكات...كانت راح تروح معاهم مي خاوتها صغار يبكو موراها ...حبست شافت فيهم رجعت ليهم شدتهم وحايرة واش دير .... جاو الجارات يصبرو فيها وهي تبكي بقا عقلها عند يماها وحالتها وعند ختها ملاك لي ملقاوهاش... زهرة تسقسي فيهم.. زهرة:خويا ...كاينة طفلة صغيرة مزالت ...عمرها 3 سنين... رجل الحماية : ملقيناهاش..!!! زهرة: لوجه ربي زيد حوس ...ياخويا طفلة صغيرة بلاك مبانتلكمش ربي يسترك زيدو حوسو... الراجل: درك نزيدو نشوفو ... دخلو يحوسو عليها وزهرة تستنى والو ... خرجو قالولها ملقيناهاش... زهرة قعدت تبكي....على ختها الصغيرة كي ملقاوهاش مالغري النار طفاوها لحقو بيها مي ملاك مكاشها... دخلت مع خاوتها عند دار الجيران وتبكي معرفتش وين راحت ختها... الجارة: متتقلقيش بنتي مزية لحقوها الدار ومنهلكتش بزااف الحيوط برك كحالو مي مش حاجة.. زهرة ؛ انا عقلي عند يما كيفاه راهي وختي لي ملقاوهاش... الجارة تنهدت واستغفرت: نشالله يكونو بخير.... الجيران برا مع الحماية مور ماطفاو النار نقاو الحالة ومزية منقاستش كامل الدار...وشكو بلي سبب هو قارورة الغاز..لي انفجرت كي كانت فطيمة طيب فالخبز باش تبيعو وتوكل ولادها ...انفجرت عليها وتحرقت الكوزينة كامل... اما لبيوت لخرين شوي شوي..... رجع صالح حالتو حالة كي شاف دارو هكاك...والناس تصبر فيه...قالولو مرتك فالسبيطار وولادك عند الجيران . دخل وليد الجيران : زهرة هاو جا باباك...حوس عليكم.. زهرة تنهدت غمضت عينيها بقوة اصلا هي متحبوش ماهوش باباه
اصلا هي متحبوش ماهوش باباها وعمرها ماحست بيه ...كانت يماها هي كلش بالنسبة ليهم.. خرجت شوف حتى لقات ملاك برا تلعب تبسمت وحست غمة تنحات على قلبها... زهرة : ملاااك..ختيتو.. ملاك تلعب صغيرة وماهيش حاسة ولا عارفة واش راهو صاير...سمعت زهرة عيطتلها...راحت ليها تجري.. ملاك: ختيتو ختيتو...ثوفي بابا ثرالي كوثاك... زهرة عنقتها وتبكي بفرحة مخلطة مع حزن وقهرة...ماهيش مامنة ختها حية وقدامها..ربي قدرلها تخرج مع باباها ومتكونش فالحادث هذاك ... ملاك : ختيتو وين راهي ماما ؟؟ زهرة : ..راهي عيانة راحت عند الطبيب و كي تريح ترجع... بقات زهرة مع خاوتها عند الجيران باش يباتو الليلة هذيك عندهم حتى تتخمل دارهم مليح...وترجع يماهم ويرجعو ليها... باباهم راح للسبيطار لي داو مرتو ليه باش يشوفها وحالتها مرجعتش حتى نص ليل... زهرة رقدت خاوتها الصغار وملاك تبكي ملاك : ماما وين راهي ماما؟؟ زهرة تسكت فيها وترقد فيها : ارقدي غدوة جي ماما وترجع ياك قتلك تريح وجي . ملاك تبسمت ورقدت على امل انو غدوة تشوف يماها. الجارة : رقدت ؟! زهرة تنهدت: ايه..بسيف ... الجارة : ميكون غير الخير نشالله..روحي ترقدي.. زهرة: نستنى بابا وراجلك يرجعو يطمنوني على يما.. بقات زهرة تستنى وتحكي مع الجارة حتى شافو صالح وجارهم لحقو...#rezak_fouad زهرة وقفت جرات ليهم..متحيرة.. زهرة : ك...كيفاش راهي يما ؟؟ بقاو ساكتين يخزرو في بعضاهم..وزهرة قلبها يضرب ومريحهاش.. زهرة : يما...واش صرالها ؟؟ الجار تنهد : ربي يرحمها..الله غالب حاجة ربي .. زهرة بقات واقفة ماهيش تامن واش تسمع..يمااها توفات ؛!! راحت يماها لي كانت سندها فالدنيا كانت الاب والام في نفس الوقت...اليوم راحت وخلاتها مع خاوتها صغاار وراجل معلابالوش بيهم ...خلاتلها مسؤولية خاوتها ومستقبل مجهول ... زهرة تبكي وتشهق والجارة تصبر فيها.. زهرة: وعلاه يااربي ديتلي ميمتي ...كانت كلشي في حياتي ..ياااربي يااما تعذبت وتمرمدت باش رباتنا ..اليوم اديتها علينا هاكاا!! ... ربي يرحمك يالميمة...ربي يرحمك...عشتي شاقية علينا ومتي شاقية علينا ....ربي يرحمك و يكتبلك الجنة ياااربي يالعزيزة ...خليتيهالي ظلمة مورااك...ياااربي صبرني ياااربي
علابالي حلقات حزينة مي هذا قضاء الله وقدره ...الصح فلي جاي هذو احداث قادرة تصير لاي واحد فينا...وهذي مجرد مقدمات برك
طرحت قصة زهرة وحبيتكم تحطو روحكم في بلاصتها ..لما يغيب المسؤول سواءاا الاب او الام او الاثنين معااا الاخ او الاخت الكبرى راح يتحملو المسؤولية غالبا ويضحو في جال خاوتهم ..ممكن الاخ بعد فترة يقدر يتزوج ويعيش عادي مي هل تقدر الاخت الكبرى انها تعيش عادي..؟؟؟ هذا واش راح تشوفو ...جاااام للناس لي حابة تكمل كتكريم لهذي الطبقة من الناس
**************
و ما تنساوش جام لي الحلقات