السلام عليكم..
اسمي ليلك 🌷معناه اسم زهره بس ابد ما اله علاقة بشخصيتي لو بأيد اسمي يتبره مني
عمري ٢٥سنه طولي ١٦٠سم مربربه ام خدود بس جسمي كلش مرتب ومتناسق عيوني سود وشعري اسود طويل ابويه شيخ رائد عايشين بالرمادي بس مصار هواي من اجينه هنا جنه ببغداد عائلتي متكونه من امي وابويه وبيبي ام بابا حبيبتي واخوان ثنين علي عمره ٢٩متزوج وعايش ببيت وحده عنده جهال ثنين بس الله ليكتبهم المحروم ومحمد عمره ٢٦هو اكثر من مجرد اخويه هو صديقي وحافظ اسراري واقرب شخص الي بحيث اني ويا علاقتنه ببعض اقوه من علاقتنه ويه علي لان علي يحب المشيخه وجان ع طول الوقت ويا بابا وطبعاً هسه تكولون شلون شيخ وعنده بس ٣ لان المعروف عن الشيوخ يخلفون هواي بس بابا يحب ماما هواي فمكتفي بينه وطبعاً اني جنت مدللة بابا وجدو الله يرحمه بصغري جنت عرمه ووكحه ام اللسان محد يكدرلي بس نفس الوكت حبابه ومطيعه ويه اليتعامل ويايه زين ف جدو من وره تصرفاتي جان يصيحلي ام فارس ومن يومهة مشه عليه هل اسم كامو كلهم يصيحولي ام فارس حته مرات انسه اسمي😂😂جنت بالبدايه ابجي لان هيج يصيحولي بس من سألت جدو شنو معنى ام فارس كالي هذا اسم من اسماء انثى النمر وانتي مثلهة وتكبرين وتعرفين معنى هذا الاسم زين وشلون ينطبق عليج اني من يومهة كمت افتخر يصيحولي ام فارس جنه عايشين ببغداد لان بابه جان شغله هناك كملت ابتدائيه وسويت نظام تسريع لان جنت كلش ذكيه وكذلك بالمتوسطه والاعدادي ف امتحنت سادس علمي واني عمري ١٥سنه ما اتذكر جانت عندي صديقات لان جانن يكوللي امشي جنج ولد هو بالعكس شكلي جان كلش انثوي وحته تصرفاتي مثل اي بنيه بس لان اني واخواني تربينه سوه اني اخذت هواي من اطباعهم وشيحبون يسوون اني اسوي مثلهم واهتماماتي نفسهم بحيث جنه كل خميس لازم نلعب طوبه سوه وجان محمد يروح قاعه ويتعلم ملاكمه اقترحت ع بابه بوكتهة اني هم ادخل بس اعترض ومقبل ومن يومهة حكمت ع محمد شيعلمو هناك يجي ويعلمني عليه وضليت ادرب ويا يوميه وصارت عندي الرياضه هوايه المهم تخرجت من السادس بمعدل ٩٨ وبوكتهة كرمني المحافظ وانقبلت طبيه واني بهل عمر من وصلت مرحله خامسه وجنت من الاوائل لان اني اعشق الطب بس صارتلي ظروف وتركت الطبية وحولت قسم تحليلات مرضية واني عمري ٢٠سنه هسه تكولون شكد غبية بس اني ممتندمه ولا راح اتندم ع هل قرار وكالعاده جنت من الاوائل ومثل كل سنه مجان عندي صديقات هو مو الخلل بالبنات بس اني اتخبل من سوالفهن والتموع مالتهن ف جنت ابتعد وحته الولد جانت علاقتي بيهم اقل من السطحيه ابد ما احتك بيهم اروح وارجع ويه محمد لان جنه نفس الجامعه هو دخل صيدله هو جان مرحله ثالثه واني اولى مشكل فرق السنين الراحت بالطبيه لان اللي بمواليدي جانو مرحله ثانيه واني مرحله اولى ف جان الكل عبالهم راسبه ويستغربون انو اني تاركه الطب وتخرجت من الكلية واني من العشره الاوائل وطلع تعيني مركزي بس بأطراف بغداد بفتره الكليه توفه جدي وكلش كسرنه فراقه بس اني قويت اكثر وراها عمامي طلبو من ابويه يرجع للرمادي يم باقي اخوته وخواته لان هو من ريحة ابوهم ميردون يضل بعيد ابويه قرر نرجع اني عارضت لان اذا اروح هناك ما اكدر اسوق سيارتي ولد عمي الهمج اكيد راح يدخلون واصلا مراح يخلوني اتوظف لان المكان يصير يبعد ساعه عن البيت واني ما اتحمل كلمه منهم لان عدهم المره وله شي بس للخدمه وتربية الاطفال وهاي وحد عن شغله الملابس اني لبسي عباره عن بناطير وفوكاهن شي طويل بس همه وتخلفهم ميقبلون اله عبا ولو اخر يوم بعمري ما انفذ كلمه منهم بابا حاول بكل الطرق يقنعني ومحمد هم وكف ويايه ماما وعلي جانو قابلين بعدين بابه كال انطيج وعد محد يحجي وياج كلمه وكلشي مثل متريدين يصير بس لتسوين هيج وخليني اموت مرتاح بين اهلي وناسي صراحه انقهرت ع بابه اول مره يطلب مني شي بعدين اقتنعت اني ومحمد ورحنا هناك وره شهرين اني تعينت بنفس المكان اللي كالولي علي بس انصدمت انو ذابيني بقرية حالتهة كلش فقيره وجان بيهة مجمع طبي اللي اني اشتغل بي متكون من صيدلانيه ودكتور جراح وممرض وبنيه للاشعه والسونار ابد مجنت متوقعه هيج المهم بديت بالشغل وجانت تجي حالات اطفال تمرد الكلب جنه كل شهر نجمع وننطي مساعدات للقريه جان دوامي من ساعه٩ لان الطريق ساعه والدكتور مقدر وضعي واطلع ب٣ اوصل ساعه ٤ روحي طالعه من الطريق بس اريد انام هاي عدا المضايقات اليوميه من المرضى وكم حثاله بالشارع بس اللي يتعده بالكلام اردهة بالكلام اما اللي يتعده حدوده ويلمسني ارجعهة براشدي لو كفخه اخلي راسه يون ههههه فديوم من الايام جنت كاعده ع المكتب ويمي البنات نسيت اكوللكم صار عندي صديقات واخيراً ههههه الصيدلانيه سرى واخصائية الاشعه والسونار فاطمه صدك لو هيج الصديقات لو لا جانن كلش محترمات ومؤدبات وهم الممرض مصطفى جان يتعامل ويانه مثل خواته كلش انسان راقي ومحترم لان هو خطية اصغر واحد بينه ههههه وجان الدكتور رجال جبير بالعمر هو من دره بيه انو جنت طبيه وتاركه كام بيوم اللي ميجي بي مصطفى يخليني اني اساعده مع العلم جنت ما احب ادخل بغير شغلي بس خطيه شكله يقهر من يتعب هههه جنه اني والبنات كاعدين نسولف ماكو مرضى اني جنت منايمه البارحه سهرانه ع لعبة برشلونه حسيت دخت استأذنت قبل البنات وطلعت رجعت للبيت تلكتني امي
ماما: هاي شنو شعجب اليوم جايه من وكت خوما بيج شي
ليلك: لا يوم مابيه شي بس البارحه منمت زين وتعبت
ماما: يطبج وجع ان شاء الله اني شكتلج انتي واخوج مو كلت نطمرو عدكم شغل باجر ولا يكول كبار وواعين عبالك زعاطيط تستاهلون هسه هم يجي ذاك الخ راسه يوجعه و
ليلك: اووي ماما يعني جيت من وكت صارتلي محاضره ترا والله اكوم ارجع متروحين ترزلين ذاك العار
ماما: وسم ادبسز يلا كومي بدلي وتعالي اكلي لكمه
ليلك :ماشي
.....بدلت ونزلت اكلت بيبي جانت نايمه مشفتهة خطيه صحتهة صايره مو تمام كملت وصعدت نمت ما حسيت اله ع دفره بظهري كمت وجان اشوف اخويه العار
... كبر لفك هايييييي شببيييك تخبلللت
محمد: انجبي لج كومي اريد احجي وياج فد شغله
ليلك: وشنيه هاي الشغله اللي جايني ساعه ب ٦ تكلياها وره مخلصت دياحه بالشوارع
محمد: كلمه وحده تكومين لو ترا ابطل ما احجي
ليلك : اووف امداك يلا كمت
نزلنا لكيت بيبي كاعده بوستهة وكعدت يمهة شويه غمزلي محمد كمنه طلعنه بالحديقة
ليلك: يي يلا طلعهة للدره
محمد: باعي ما اعرف شكلج بس اني ... اني..
ليلك: اذا تضل تعتعت بالنعال ع حلكك احجي ولك
محمد: اني حبيت وحده ويانه بالصيدليه وعجبتني وما اعرف شلون اصارحها
ليلك: 😐
محمد: ها شو صفنتي
.......................................
اتمنى يعجبكم البارت الاول اذا اكو اغلاط غلسوا لان هاي اول قصة اكتبهة
💜💜💜🥀
بالنسبة للتنزيل يكون كل يومين لان اني هم طالبه وعندي هواي التزامات
💜💜💜💜
واللي متعجبه القصه ياريت ميكملهة بدال متكتبون كلام سلبي واللي عنده رأي اتمنى يطرحه بكل احترام وبس
💜💜💜💜
