💜💜💜
ليلك:😐
محمد: ها شو صفنتي
ليلك: محمد صراحه صدمتني يعني انته شتعرف عنهة وحبيتهة بس باوع اذا ناوي تلعب عليهة من هسه اكلك لا تعرفني ولا اعرفك خطيه البنيه
محمد:لا لا لاوالله ابد مو هيج بالعكس اريد بس اعترفلهة بحبي وبس تطور علاقتنه اخطبهة شتكولين انتي
ليلك: والله يا محمد اكول..... جنت دا اريد احجي وطب اخويه وجهاله اوووو شلون نسيت اليوم خميس وكت زيارتهم
محمد: شفت ام فارس سكتت باوعت شفت اخويه اجه يبووو شراح يخلصنه اليوم من الهوسه كبل باوعت ع ام فارس وكتلهة..... لتلغلسين اليوم وره العشه من ندرب نكمل سالفتنه
ليلك: ماشي بس ما اظن ع هل وضع ندرب هههههه
محمد: اجفص ببطنهم وبطن اخويه اذا لزكو بينه
ليلك:ههههه كمت رحت سلمت عليهم اني ومحمد وطبو للبيت اني ركضت الغرفتي قفلتهة ونزلت تلكوني سوسو و عبود ع الدرج
عبود: ها عمه وين نازله خلي نكعد بغرفتج
ليلك: عمه اليعميك شتصخم بغرفتي يلا امشي نكعد جوه
سوسو: بصوت ناصي.... عوع انتي هم عمه
ليلك: سمعتج ترا لتخليني اشوفج العمه الصدك شتسوي
نزلنه جوه جانت ماما وبيبي ومرت علي كاعدين
كعدت يمهم وسولفنه وتعشينه بس طبعاً الجهال طلعو روحي اني احبهم والله بس همه وكحين ههه
محمد: يلا ام فارس اذا كملتي عشه حته ندرب
ليلك: دوكف شبيك بس خلي اكل لكمه
بيبي: يا يمه حميد دعوف خيتك تاكللهة لكمه متشوفهة كاضيه جنهة عود مال مطيرچيه
ليلك: انعم الله عليج بيبي
محمد: عزه بيبي وين اكو عوده صايره جنهة ثلاجه شكبرهة
علي: انجب لك محمد عوف البنيه تاكل لو ما يوميه هي تاخذك سحل علمود تتمرن
ليلك: عوفه علي هذا اليوم ناوي ع فضيحته
محمد: حبيبتي اختي كلبي اكلي منا للصبح واذا تريدين اكوم اصبلج بعد شعندي غيرج احبل اجيب
ليلك:اكيد ما عندك غيري ؟؟
محمد: غص وكام يكح
ليلك: انطو مي انطو مي ليروح يموت خطيه
بابا: كافي ولكم دوختونه يلا امشو ولو
ليلك ومحمد: يي يي كمنه
طبعاً عدنه غرفه بالحديقه منفصله عن البيت بيهة كل التجهيزات الرياضيه شوكت ميضيعونه اني ومحمد يلكونه بيهة رحت بدلت ولبست ملابسي الرياضيه وبدينه احماء وتدريب
محمد: ها هسه شكلتي نطيني رايج شسوي
ليلك: محمد انته شتعرف عنهة
محمد: مااعرف شي عنهة غير انو هيه ممرتبطه وابوهة ميت وعايشه
هيه وامهة
ليلك: بس؟
محمد: اي
ليلك: متكلي شلون حبيتهة وانته متعرف لا طبعهة لا اخلاقهة
محمد: لا والله مبينه كلش مؤدبه هسه عوفينه من هل سوالف كوليلي اعترفلهة لو شلون
ليلك: اذا انته هيج مصمم تقرب منهة بحجة اصدقاء وبعدين اعترفلهة وتقدملهة وخلص
محمد: يا مسهلهة عندج
ليلك: قابل شسويلك يعني هو هذا المفروض تسوي
محمد: يلا باجر اشوف شسوي يوم الالج تزوجين واخلص منج
ليلك:والله شكلي محمضه ع كلبك من وره اسمي
محمد: ليش
ليلك: والله يا خويه كل ما يجي شاب يخبل واحسه يريد يحجي كلمه يجي لو الممرض لو صدقاتي لو الدكتور يصيحولي ام فارس ويخرب ام البرستيج خطيه كبل يسحبون بريك عبالهم متزوجه يا اخي تعبو نفسكم وسألو اني خطيه ههههه
محمد: هههههه لا لعد شكلج مطوله
ليلك:يي
محمد: يلا اني كملت تمرين راح اروح من طلعين سدي الاجهزه وقفلي الباب
ليلك: اويلي فتهمت يوميه عايد هل كليشه واصلا انته اللي تنسه الباب مفتوحه
محمد: ضحك بخبث وكال باي
ليلك: يا ستار هذا الخبل شراح يسوي .. وره دقيقتين جنت صاعده ع جهاز المشي وفاتو الشياطين عطت بيهم.... هاي شطببكم هنا شكو
الجهال: والله عمو كاللنه ام فارس تصيحلكم
ليلك: الله ياخذك محمد ..... يي يلا تعالو خلي نركص طلعت اغاني وهمه المخابيل كامو يركصون اني هم اخذني الواهس وضليت اهز وياهم جان يكولون
عمه احنه نحبج
ليلك: اني هم اكرهكم عمه
الجهال: ههههههه
ليلك : من ضحكتو بلا ضروس كولو امين
الجهال : شنو معنى ضروس
ليلك: يعني هم وحزن خربت ضحك عليهم وهمه ميكفين الثولان
كملت والجهال راحو اني صعدت سبحت وبدلت قبل لا انام فتحت تلفوني لكيت مسج من سرى
"سرى" فاتج اليوم شصار
"ليلك"شكو
"سرى" والله ما اكولج خليج باجر تنصدمين
"ليلك"زين بس انطيني راس خيط او تلميح
"سرى"لو تموتين ما احجي بس باجر اكشخي وتعالي
"ليلك"امداج لعد ليش تكوليلي اذا مترضين تحجين شنو صاير وبعدين ع الكشخه حبي اني يوميه باحلى اطلاله
"سرى" اي عيني اي يلا باي حبي
"ليلك"باي
شلون حقيره خلت الفضول يموتني وراحت يلا شكو علينه باجر نروح ونشوف لفيت راسي ونمت وهذا جان اخر يوم انام بي بهدوء....
كعدت الصبح تريكت ولبست بينصل احمر طويل وبي چاكات من الصفحات تبين شويه من رجلي وحجل وفوكا قميص اسود ينشد من الخصر ولبست شيله سوده لان اني الشال يضايقني بالشغل وحطيت بس كحل ومسكاره لان ما اريد اجذب احد واتعرض الموقف محلو ولبست بوتين اسود ابدل واضحك ع روحي اسمع كلام الخبله سرى الله يستر اليوم شراح يصير ركبت سيارتي ورحت اول مطبيت الفرع سيارات جيش تارسه الشارع مال مجمع اني كلبي نقبض لان تذكرت خالي ووجع كلبي علي اللي لحد هسه مشفى جان شاب عمره بالثلاثينات ربانه اني ومحمد ع ايده وكبرنه احنه ويا جان ضابط وكلش تعلقت بي اخر فتره وبيوم من الايام اجانه خبر استشهاده اني احس جتني صاعقه حركت روحي حرك وبوكتهة شهرين اني اعتكفت ع روحي وكوه رجعت حياتي طبيعيه وكمت كل ما اشوف جندي كلبي يعصرني وتنزل دمعتي لا ارادي اني شفت ذوله وكمت ابجي بالسياره ابجي وامسح بوجهي اخاف ع الكحل ههههه فجاءة ندكت الجامه مال سياره باوعت جندي نزلت الجامه
ليلك: خير اخويه اكو شي
الجندي: ليش سيارتج واكفه هنا
ليلك: اني موتي ولا احد يحجي ويايه هيج
... عفواً مواكفه بشارعك حته تحاسبني هذا مكان شغلي وهسه راح انزل
الجندي: اسف اختي تفضلي
ليلك: صعدت الجامه وطبكت السياره ونزلت وطول الطريق مال دخول مليان جنود اني كلت اكيد جايبين ضابط مصاب لو شخص مهم امشي وذوله عيونهم منزلت كلش ضايقوني الله ياخذج سرى خليتني صدك اكشخ وذوله كصوني كص وصلت طبيت للمختبر ذبيت غراضي وطبعاً المجمع هوووسه عباره عن جنود اني ستغربت كمت ادور ع سرى وفاطمه باوعت لكيتهن كاعدات بالصيدليه فتت وذني كومن ضحكن
ليلك: شبيجن
فاطمه: هاي شنو ام فارس عيني اليوم أحمر
سرى: بشرفج اي رقم حصلتي اني وياج بالنص احنه خوات
ليلك: انتي بالذات تنجبين ليش مكلتيلي هلكد زلم اكو هنا جان لبست عبا من وره نضراتهم الادبسز
البنات: ههههههه
ليلك: بنات هاي شكو ليش اكو جنود خوما جايبين احد مصاب
فاطمه: والله احنه هم مندري بس صاحب المجمع اليوم راح يجتمع بينه
ليلك: خير ان شاء الله هسه شنو ماكو شغل اليوم
سرى: والله شوفت عينج محد يطب ويطلع بدون تفتيش اكيد محد راح يجي كلهة خافت
ليلك: لعد هاي اليوم جايبينه بس علمود الاجتماع اووف شكد فارغين
جنه كاعدين ونسولف اجه مصطفى كال بده الاجتماع تعالن رحنه اني وسرى وفاطمه والدكتور ابو ماجد ومصطفى بده الاجتماع والمدير كال
المدير: طبعاً الشي اللي راح اكوله هسه مو بكيفي ولا بكيف احد بس هو امر من وزارة الداخليه انو هذا المجمع نظراً لموقعه وقلة الحالات اللي تجي قررو يتحول لمجمع صحي عسكري لان مثل متعرفون موقعه قريب لجبهات الحرب سواء بتكريت او سامراء واي مصاب ميكدرون يسعفو لمستشفيات بغداد لان المسافه طويله وايضاً خوفا من انو يستهدفون المستشفيات ف هذا المجمع راح يكون سري حتى ميتعرض الاي خطر من هجمات داعش وهو راح يكون اشبه بمستشفى صغيره وللاسف محد منكم يكدر يستقيل او ينقل لان اسمائكم تثبتت بالوزاره وصرتو منتسبين للدوله وايضاً راح يضيفولكم مخصصات لرواتبكم ومكافئات وبالنسبة لساعات الدوام راح تصير خفارات بالحالات الطارئه وايضاً راح ينظم الكادركم ويصير مديركم طبيب عسكري برتبة ضابط خوفاً من التعرض الاي هجوم وان شاء الله بعد كم ساعه يشرفنه وتتعرفون عليه وع بقية الاعضاء الجدد وهسه تكدرون تتفضلون
