رجعنا السودان بعد تمنية شهور ونزلنا طوالي في بيتنا ،بعدما ارتحنا شوية ،ابوي فاجأني لما قال: جهزي نفسك بكرة ح نسافر لى عماتك .
انا: شنو؟؟؟ عماتي؟؟ لالا يا ابوي خلينا هنا احسن.
ابوي: عارفك ما عايزة تمشي ،لكن ح نمشي ونقعد يومين بس وانا ما ماشي ليهم هم ،في ناس غيرهم،وما ح يقدرو يعملو ليك حاجة ما دام انا معاك❤
قلت ليهو بإستسلام : طيب يا ابوي ما مشكلة.
وفعلا اليوم التاني سافرنا ،وزي ما قال ابوي ما قدرو يعملو لي حاجة،كأنهم ما عماتي الكانو بهينوني ويذلوني ويضربوني بكل وقاحة،عماتي الاحتجت ليهم في اضيق وقت خذلوني💔💔💔ومستحيل اسامحهم بعد العملو فيني💔💔.
طبعا بقو لما اقول عايزة حاجة ،جري بعملوها لي،واستغليت الفرصة وبقيت اتأمر عليهم وكل شي بعملوهو لي،وكل ما اعاين لى ابوي القاهو بضحك علي وبضحك معاهو .
واخيرا رجعنا الخرطوم. صراحة في اليومين ديل استمتعت شديد ،عكس الكنت متوقعاهو ❤.
في اليوم التاني حوالي الساعة ٨ ،كنا بنشرب في شاي الصباح قلت لابوي: ابوي الليلة عايزة امشي لخالتو سمية .
ابوي: طيب ح نمشي.
المهم نضفت البيت وجهزت الفطور وفطرنا .بعدها دخلت غرفتي ،شوية وابوي جاني في الغرفة وقال: مشاعر والله انا مصدع شوية ما بقدر امشي معاك ،ممكن تمشي براك؟؟
انا: لالا يا ابوي بخليهو يوم تاني.
ابوي: امشي انتي وما تخافي علي.☺❤
انا: طيب.
حوالي الساعة ٥ كنت جاهزة وشلت هدية خالتو سمية ولين في كيس ،وهدية وليد في شنطة اليد لاني مترددة اديها ليهو ولا لا.
المهم وصلت بيتهم وفتح لي عمو عبد الله ،طبعا اتفاجأت ،ما كنت متوقعاهو يكون قاعد،سلمت عليهو ودخلت وبقى ينادي في خالتو.ولما شافتني جات وحضنتي بشوق شديد❤.
بعدها دخلت جوة ولقيت وليد قاعد في الصالة وبحضر في التلفزيون ،ولما شافني اكتر زول اتصدم ،سلمت عليهو وقعدنا .
سمية: وين ابوك لى ما جا معاك؟؟
انا: والله ابوي تعبان شوية
عمو عبدالله: سلامتو
انا: الله يسلمك.
اتونسنا شوية ،بعدها عمو عبدالله ووليد مشو يصلو المغرب .
انا: وين لين؟؟ واخبارها شنو؟؟
سمية: والله بخير ،قبل كم شهر هي ومنذر سافرو السعودية ،واسي هي حامل وفي الشهر الخامس❤
انا: بالجد؟؟ والله فرحت ليها شديد.
سمية: عقبالك تعرسي وتبقي ام❤
بعدها عمو وليد جو ،ولما انتبهت للساعة لقيتها ماشة لى سبعة .بعدها مديت لخالتو كيس الهدايا وقالت لي: ما كان في داعي يا بتي.
انا: دا شي بسيط جدا بالنسبة للعملتوهو معاي❤
عمو عبدالله: تسلمي يا بتي.
انا: يلا بعد استأذنكم .
سمية: اقعدي شوية لسه الوقت بدري.
انا: لالا والله اتأخرت على ابوي وعايزة اتمطن عليهو وكدا.
عبدالله: وليد قوم وصل مشاعر.
انا: مافي داعي المواصلات في.
عبدالله: يابتي كيف تركبي مواصلات في الوقت دا ؟ معقولة؟؟
المهم ركبت مع وايد وطول الطريق ساكتين ،لمن وصلت وقبل ما انزل طلعت الهدية وقلت لوليد : امسك
وليد: دا شنو؟؟
انا: هدية.
وليد: يعني انتي كنت متذكراني؟؟ كنت فاكرك نسيتيني زمان😏💔💔
( عاينت ليهو في عيونو وقلت): وانت نسيتني صاح؟؟؟
( ضحك) وقال: هو انا بقدر انساك؟؟؟
ما كنا متوقعة الرد دا منو،ونزلت طوالي وجريت على بيتنا ،وهو في العربية شغال يضحك بس.
دخلت لقيت ابوي بحضر في كور سلمت عليهو وقعدت جمبو وقلت : بقيت كيف؟؟
ابوي: احسن كتير .
دخلت غرفتي وانا في قمة الفرح ،غيرت ملابسي واتصلت على لجين واريل واتونسنا شوية وحكيت ليهم بالحصل معاي وقفلت منهم.
اليوم التاني مها كانت معاي من الصباح وطلعت مني قريب العصر ،وطبعا عرسها قرب باقي ليهو ٣ شهور.
وبعد يومين كان يوم الكارثة ،في اولو كان عادي بعد صلاة العصر قلت لابوي نتغدا برة وفعلا جهزنا وطلعنا بعربية ابوي ،اشتراها قبل ايام.
اول ما نزلنا من العربية واحنا داخلين المطعم فجأة ابوي وقع على الارض ،ما قدرت استوعب الحاصل ،لقيتو مغمى عليهو ،بقيت بكورك وبصرخ بأعلى صوت وبقول: ساعدوني يا ناااس ( كنت عايزة زول يسوق العربية عشان نمشي المستشفى )
الناس دي كانت بتعاين لي كأني كنت بغني ،وفجأة.........💔💔💔💔💔💔
يتبع...................
