عشكت بت عمي الأربعينية

الجزء الواحد والعشرون

مراحب حبايبي شونكم ان شاء الله بخير شكو ماكو اخباركم اموركم ؟

أتمنى ان تستمتعوا بالبارت

زهور :
قبل الحنة بتلاث ايام :
(الفرق بين حچي زهور عن البقية اني تعمدت اخلط بين البغدادي والجنوبي بسبب انو هية عاشت نص طفولتها بالجنوب والنص الثاني ببغداد فلذلك هية تخلط بينهن واني تعمدت اسوي هالشي علمود لحد ينسة شنو قصتها)

چنت گاعدة دا اقرة وملتهية بدراستي وضاربة الدنية عرض الحايط ما اعرف الدنية طشت لو رشت گِل الي اعرفنة لزمن اقرة واشد حيلي عبن ما بقة لامتحاناتي الاخيرة غير چم يوم واخلص وتبگالي السنة الاخيرة واتخرج بحيل الله وبصراحة خايفة گلِش من الاسئلة الي رح تچي والأستاذ الي عدي شاد گِلش وياي عبن چان چاتل رويحته علي بس آنة اصده بحچة اريدن ادرس ومن هالگلاوات بس من هسع آنة تزوچت شرعاً وقانوناً وبقة بس العرس طعطش علي والله چابه اهو استاذي بأهم مادتين وبذيچ المادة الي امتحنتها چان چايبلي أسئلة تختلف عن الگِل بحيث الگِل ضَل يحچي عليه عبن أسئلتي لو چايبها لأينشتاين چان راسه انفچر بس الحمد لله بقدرة قادر عدت سلامات بس هالمرة مدري شون رح ادبرها فلذلك چاعدة آنة هس ادرس گِل حرف وسادة بابي يعني يمكن لو البيت يحترگ احترگ وياه وآنة ما ادري جريت نفس طويل من خلصت الكتاب وسديته وگلت خلي امدد شوي وبعدين ارچع على ملازمي والدفاتر واراچعهن خذيت نقالي ورحت للچرباية وآنة اسحل برويحتي سحل من التعب عبن صارلي فوگ الثمن ساعات على نفس الگعدة بس ادرس تغطيت بما انو السبلت مفتوح والغرفة باردة والمندر (الفراش)  ينزز (يعني الجسم من يلمس شي بارد) هسعت راسي چاي ينفچر گلت خل انام ساعة واگعد وفعلاً وقتت المنبه ونمت .

فزيت على صوت نقالي وهو يدگ شفت الساعة متاخرة يعني المنبه دگ وآنة مهسعته (حسيته) چريت نفس ورديت شفت الشاشة طلع سياف داگ فوگ العشرين مرة علي خذيت هوة ودگيت عليه .

زهور بصوت مبحوح من النوم : الو ها سويف شونك .

سياف بنبرة قلقة وصاير عصبي لان صاره ديدگ عليها ومترد عليه : ها ؟ وچعاه وطاگ الحاه وسماه شمالچ ادگن عليچ صارلي ساعة وما تردين وين چنتي وشعدچ بطيتي (تاخرتي) يلة رديتي ؟

زهور تحچي بهمس من النعاس وبالگوة تحچي حچاية : شمالك گلِتني بگشوري يعني وين غير بالبيت بالهحچرة مچبوبة وچاي اقرة بس دخت گلِش ولهيچ نمت .

تنهد سياف براحة ودخل بالموضوع بسرعة : الحمد لله عبالي صايرلچ شي طيحتي (اوقعتِ) گليبي المهم شچاي اگلچ ؟ ها ، اي صِدگ ، ترة آنة اليوم رحت لعميد كليتچ وتحاچينة وگتله على هاذ انور استاذچ وهو فهم الموضوع وانطاه إنذار وحذره بعد اذا تگرب صوبچ لو رد سوه هالشغيلة الخايسة (يقصد من اطاها إسالة تختلف عن بقية الطلاب) رح ينطرد وبواسطات العميد مرح يگدر يتوظف باي كلية ثانية ، فلذلك يا اميرتي ردي نامي وانتي مرتاحة ولا تشغلين بالچ زين يا حلوة ، يلة باي اترخص آنة عدي شغل مهم بس بعدين ارد اخابرچ ماشي .