وجع ذكريات

الجزء الخامس

الجزء الخامس

شهگاتي علت..مااحس اله ايد انمدت ع راسي ونوب صارن اثنين ادين مثل الحضن..قربت راسي اكثر..محتاجة لهيج شي..كانت مامه هي الي تحضني من اضوج ومن ابجي ومن اشتكي..هسه مالي احد وصفيت غريبه..
اجه حضن عمه نضال بوقته.. صبرتني وحجتلي هوايه حجي.. اصبري وكلنا انظلمنا والقدر هو الي اختار ومن هل حجي..
بقيت ابجي لحد مانشفت دموعي..هي كبل صرفتني كالت روحي نامي.. رحت ..بقيت اتكلب بفراشي.. اريد انام مااكدر.. شفت عمه نضال ع نفس كعدتها وبعدها ادخن..بداخلي كلت ياريت لو ممتقربه منها.. اكيد هي مجرمه والها سوابق.. شجاني واندحكت بيهه!
مرت ايام وعمه نضال عيونهه متفاركني.. اوقات اخاف من مراقبتهه اليه واوقات لا اشوفهه حنينه وماعدهه نيه مو زينه.. 
وبيوم طلعونا للساحه..كعدت بصفهه مثل مطلبت.. وصرفت المساعدات مالاتهه.. بقينه وحدنا..
طلعت جكاره وجداحه من صدرها وبدت ادخن.. كالت:تدرين مو بس انتي موجوعه؟ وتدرين اكو حالات اتعس منج؟ 
سكتت
نضال:تحبين تعرفين الوياج منو؟
-اي
بدت تحجيلي اسماء الي ويانه وشنو جرايمهن.. الي قاتله والي بايكه والي اشتغلت شغل مو شريف علمود العيشه.. بالنهايه طلع لكل وحده منهن اكو سبب للجريمه.. بس ظاهرا الي يشوفهن يكول قليلات ادب وخريجات سجون وووو حجي اشكال.. بس حسب ماشفتهن مابدر منهن اي شي.. لا مشاكل ولا مشاحنات.. طبعا هاي بس الي ويانه.. اما بقيه النزيلات حدث بلا حرج دوم نسمع اصواتهن ويجن الشرطيات يحجن لعمه نضال المشاكل مالتهن..
اني بنظري هنه مو مسالمات..يمكن الفضل يرجع لوجود نضال الي مسيطره ع الوضع ومسكته الكل..
كملت كل قصص الي ويانه.. بقت بس هي محجتلي عن نفسها..
رجعت شعلت جكاره لخ.. كالت:احجيلج عني؟ لو خاف تكرهيني؟
خفت من كالت هيج.. كلت اكيد وراهه بلوه سوده..
هزيت راسي اي..
كلت اسمع هسه احسن ماانصدم بعدين..
نضال:اني نضال.. عرفتي اسمي اكيد.. هزيت راسي اي..
عمري 34 سنه.. كنت ساكنه ... بمنطقه.. بيت ملك وبأسمي.. عندي نصر ابني الكبير عمره 9 سنوات..وسفانه 6 سنوات.. 
جريمتي هي قتل .. ومتعمد.. بس صار وادخلت معارفي ووساطاتي.. انحكمت بس خمس سنوات.. قتلت زوجي.. اي قتلته..
كنت راجعه من دوامي بعد ماخلصنه مسيره من وقت غير الي متوقعي .. اني مدرسه.. رجعت للبيت.. اطفالي بلمدرسه.. دخلت لغرفه نومي شفته ويه وحده.. بفراشي وبغرفتي وابيتي اني! كان سلاحي بخصري. لان اني كنت ولازلت رفيقه مناضله للوطن وللرئيس.. ضربته خمس طلقات .. وخليت الي كانت ويا تطلع مصلخه بدون اي شي بالشارع..
رحت سلمت نفسي وحجيتلهم الجريمه من اولها.. وهاي اني كدامج جمعنه الحظ والقدر وناس ساقطه تلاعبت بينه ..
احس نفسي انكطع من سمعتهه.. شنو من قدره وشنو من قابليه! تحجيها بكل صلابه.. مهتزت شعرهه بيهه.. عدا عيونهه الي لمعت من جابت طاري اطفالهه.. من كملت غيرت الموضوع ومصارلي مجال اسئلها وين اطفالهه ومنو الهم وليش تسرعت وقتلته...
ظلت تسولف عن النزيلات وشنو محتاجات وسألتني اذا محتاجه شي.. اني بلا وعي جاوبتهه .. اصلا بعد الي سمعته احتاجيت ساعات يله اركز.. يمكن لان هي قريبه مني هلكد تأثرت بيهه.. 
بعدهه صار وقت دخولنه للسجن.. حتى متهنيت هلمره بشوفه السما والشمس..وشم هوى نقي ..بقيت مسطوره بكلام نضال...
مرت الايام واني وعمه نضال يوم عن يوم نتقرب من بعض.. صارت تعرف عني كل شي.. واني همات عرفت عنها كل شي.. صح كنت خايفه منها بالاول ومتردده اتقرب لاي وحده.. بس ما بقى هذا الشعور غير ايام معدوده.. صارت عمه نضال هي سلوتي..
الطيبه الي شايلها كلبها صعب تنوصف.. وصعب واحد يعرفهه.. الي يشوفها وحده قاسيه وجريئه.. بس هي افعالهه عكس شكلهه.. احتضنتني ايام وليالي.. ياما دموعي نزلت واني ع رجلها لو تضمني لصدرها.. من غير اهتمامهه باكلي ولبسي.. حتى اللبس شاركتني بي.. كانو بين فتره وفتره يجيبلوها اشكال الوان..من كل شي تحتاجه.. وهي ابد متبخل عني بشي..
مرات استغرب حظي واكول معقوله اني الي صارت كل هاي المصايب ويايه الله يبعثلي هيج رحمة وطيبه.. اي صارت عندي عجيبه.. من شفت العم والجار والقريب مني صار ضدي.. 
تقريبا بديت اتماشى وي الوضع.. وصرت اسمع السوالف الي ادور بينهن واتجاوب وياهن.. بس مو من كل كلبي.. هيج مجرد تقضيه وقت.. 
ةل مااصفن واتذكر ال20 سنه بتعكر مزاجي اليوم بطوله.. بس عمه نضال متعوفني.. تعرفني من نظراتي اذا ضايجة او بيه شي.. تجي تواسيني وكلامهه ينزل مثل الطيب ع جرح.. بس مااكول كنت ارتاح نفسيا.. بالعكس كنت مدمره دمار.. داخلي محطمه ومكسوره.. بس كنت اتصرف مثل الناس العاديه.. والصدك كان كله لخاطر عمتي نضال.. مااريد اضوجها عليه..
مرت سنه تقريبا واني بالسجن.. لااحد سأل عني ولا احد وصلني..
بس بيوم من الايام.. اجتي الشرطيه كعدت تحجي ويه عمه نضال..
من راحت كبل اجتني عمتي..
كالت:رناوي.. عمه اريد احجي وياج..
-خير عمه؟ 
نضال:والله مااعرف شنو اكولج.. هي صعبه لكن شفتي الاصعب انتي فتقبليها لهاي الحقيقه..
ظل كلبي يلعب وخايفه..احس جسمي ثلج..
نضال:تذكرين المحامي الي ترافع عنج .......
-اي عمه.. ليش اكدر انساه.. ماانسى وكفاته وافضاله ويايه ..
نضال:....... قتلو.. انقتل قبل شهرين..
-لاااا! 
الخبر كان صدمه الي فوك المصايب.. مااعرف ليش انقتل .. كالتلي اسباب مجهوله وع الاغلب بسبب القضيه الي مستلمها.. عرفت انه جايته تهديدات همين بسبب قضيتي سابقا.. بس خطيه مكال ولا حجة.. كنت اشوف الخوف بعيونه بس ماكلي ولاحب يخوفني.. مااعرف شنو هو بشر لو ملاك:..
ماانسى وكفته ويايه..حاول بكل طريقه يطلعني بس مكدر.. الرادوها كانو اكبر مني ومنه.. سوو الي رادو وخلوني بالمكان الي يردو...
ظليت ايام تعبانه نفسيا بسبب خبر مقتل المحامي.. شذنبه ينحرم من شبابه وفرحته وواهسه بلحياة..
كل ماذكره ابجي.. وكأن اني عايزه ضيم حتى تطلعلي هل سالفه.. يمكن رجعت لحالتي الاولى الي دخلت بيها السجن.. تايهه وضايعه.. ايام ماادري بلدنيا وين.. حتى الوقت مااعرفه.. عمه نضال تندمت لان حجتلي.. بقت تلوم بنفسها لان كالت... الى ان بيوم عصبت عليه كلش.. عله صوتهه عليه وصارت تصيح حتى الي ويانه سكتن وصارت هدووء..
اني عاد من يومهه منزلت دمعه كبالهه.. بدت شخصيتي تتغير يوم عن يوم صار عندي من القوة الي عدها.. شجاعتها لباقتها بالكلام... التحمل والصبر كلهن تعلمتهن منها.. اجت ايام صرنا ندخن سوا.. مو بطرندخن.. لا صدك موجوعين .. الدخان الي يخنك احسه يجوي گلبي وجرحي.. 
مرات كنت بيها اصفن ع حالي.. اكول معقوله اني هيج صرت.. ادخن وجسره وجريئه مااخاف من شي.. صح كنت قبل قويه.. بس مو بقوه هسه.. الظروف والسجن والاشخاص العرفتهم حولتني لوحده غير عن رانيه الاولى..
مرات عمه نضال صارت تلمحلي ع طلعه من السجن.. كنت اظنها تقصد بعد ال20 سنه.. بس طلعت قصدها غييييرر...
-عمه منا ل20 سنه يجوز اموت اصلا..
نضال حجتها بصوت ناصي: يحظي مو20 سنه.. بالوقت الي تردي..
-يعني قصدج اشرد؟
نضال:واخيرا افتهمتي؟! 
-بس شلون عمه؟ صعبه ومااكدر اسويها.. خليني اكل جزاء ذنب ماسويته.. 
نضال:لصيرين جبانه! وهاي انتي كلتيها ذنب مسويتي؟! ليش انتي تاكليها وغيرج سارح ومارح وهو الهدر دم اهلج؟!
الغضب اشتعل بداخلي..نار وتسعر من سمعتها منها.. هو صح مو شي جديد بس مرات امور من يكولك بيها شخص ثاني تصير ردة فعل عجيبه بداخل الواحد... هيج اني صار بيه..
بقيت ساكته..
نضال:شوفي .. اني بيدي اطلع اي وحده.. بس محد تستاهل غيرج.. كل الي هنا ارتكبن جرايم.. بس انتي غير..
-لا عمه مااجازف.. اخاف..
نضال نترت بيه: لج اني امج! انقهر من اشوف بنتي تكضي عمرها بالسجن!
حجتها وبعدين دنكت.. عبالك هل كلمات طلعت منها بدون متدري وبعدين ندمت.. رجعت تحجي بحديه وغيرت ملامح وجهه..
نضال:الامر راجع الج.. بس ثقي اني بس اطلع منا راح ينهشون لحمج هنا!
رأسا خطرلي اليوم الي تطلع هي بي وتعوفني.. 
اي صدك الي كالته.. اذا طلعت اني الخسرانه.. اصلا اني بزودها امشي ع طولي وبزودها اكل واشرب .. 
سكتت بيومها ومجاوبت.. مرت ايام تقريبا خفت لقاءاتنه وكعداتنه اني وعمتي نضال.. كنا كلمن بصفحه.. اني الفهمته من بعدها عني انها تريدني افكر بموضوع الشرده... وصدك بقيت ليالي انتظر الكل ينام وافكر بهدوء.. اتخيل نفسي خطوه بخطوه لحد مااطلع من السجن.. بس يرجع الخوف ياكل كلبي اكل.. وارجع افكر بعمي وعامر.. اكيد مراح يتركوني اذا عرفو اني انهزمت..
وفوك هذا مااعرف شنو الي مضموم الي اذا طلعت.. اكيد مو حياة هاديه ولا مستقره.. اساسا وين اروح.. لا بيت ولا اهل.. حتى اذا رحت لخوالي.. اكيد هم صدكو اني قتلت امي.. منو يغفرلي ومنو يصدكني.. كنت اشتعل بنار وماادري شسوي.. مااعرف منين طلعلي موضوع الشرده.. 
لو باقيه ع حالي قبل ومامفكره بالانهزام.. انحطيت بين نارين..
مرت ايام غلست بيهه وشفت سالفه الهروب مستحيله.. رجعت علاقتي بعمه نضال.. وهم سألتني اكثر من مره اذا غيرت فكري.. هي مبقى الها غير 2 سنه من محكوميتها.. ومااعرف شحيصير بعد ال2 سنه..
بيوم من الايام طلعونا للساحه.. كلعاده نبقى اني وعمتي نضال.. اول منكعد بس ساكتين.. واكثر شي عمتي نضال تضرب صفنات..
كالت:تشوفين ذنيج الزوج؟
اشرتلي ع اثنين كاعدات كبالنه.. كتلها اي؟ شبيهن؟
كالت:ذولي علاقتهن شاذه.. يعني بينهن علاقه مثل رجال ومره..
احس راسي ثلج من سمعت! جلدي كزبر ..
نضال:اي مامه اي.. شعبالج.. اني حجيتلج الجانب الزين.. اما الاظلم بعدج متعرفي اله تخلصين هنا فد3 سنوات او اكثر..
سكتت ودنكت.. رجعت كالت:تشوفين ذيج؟
-اي؟ اعرفها مروه؟
ضحكت وكالت:مروه.. هه.. هاي تشتغل كواده لمدير السجن والمسؤولين.. 
-عمه كافي تخوفيني.. والله بديت اخاف من نفسي ع نفسي!
رجعت تبتسم:لعد مسمعتي بسميحه؟ 
-شبيها؟
نضال:هههه احسن لتعرفين لان يجوز تكومين تتخيليها تجيج بالليل!
-شسوي عمه.. كوليلي.. مااريد انهزم اخاااف..
تقربت مني اكثر وكالت:معليج.. انتي بس قرري اليوم.. وراح أأمنلج حياتج منا لسنه..
-صذك عمه؟ زين وين اروح اذا شردت؟ منو الي يلفيني؟
نضال:كله مفكره بي.. انتي بس قرري..
-مااعرف عمه مااعرف.. اخاف من الطلعه صرت.. يجوز حتى اذا كملت ال20 سنه مااطلع..وين اولي اصلا؟
نضال:لا مراح تبقين ل20 سنه.. حياة كاملة كدامج بس فكري وقرري ورجعيلي جواب..
اجت وحده فاتت من يمنا.. تغيرت السيره واني بقيت اضرب صفنات بكلامه.. تحجي كلها ثقه.. وتكلي حياه كامله كدامج؟ شنو هاي الحياة ووين..
ايام واني افكر.. مااريد استعجل بشي كون سبب لدماري من جديد..
صرت بدوامه.. تناقض.. اريد ومااريد.. 
صرت اعصاب كلش ذيج الفتره.. حتى اكلي وشربي قل.. ماصرت اهتم.. اريد افكر وافكر وافكر طول اليوم.. بس شنو الفائده اذا مداوصل نتيجة..
صار ويوم من الايام.. هم طلعنه للساحه.. لمحت ذوليج الاثنين الي حجتلي عنهم عمتي انه بينهم علاقه شاذه.. بيومهه تأكد كللم عمتي بشوف عيني.. وحده تلمست الثانيه بخطف.. كل ماتخمل الشرطيات من يمنا هنه يرجعن يسون هل حركات.. تمنيت اكوم افلش روسهن واديهن القذره..
كلش تقززت.. وصارت حالات اشكال الوان.. وهي مو جديده صارت..
لا كانت تصير وهوايه بس اني الي ممنتبهه.. بس كلام عمتي وعاني..
خلاني اركز وانتبه وصرت تقريبا اعرف شنو تفكيرهن وشنو يردن من نظراتهن.. زادت عدي الرغبه بالهروب بعد الي شفته بالسجن..
علاقات شاذه.. عاداتهن تالي الليل .. الكواده حشاكم الي كانت تصير .. حسيت نفسي اني كنت سنه كامله مثل الاطرش بالزفه.. خفت لا بعد سنتين او اكثر اصير مثلهن لو ابقى يمهن ويبلني بشي..
وصلت لطريق مابي غير الهروب.. لازم اطلع مهما كان الثمن..
بليله رحت لعمتي نضال.. كلتلها.. عمه استعجليلي بالطلعه اني مالي ظله هنا.. يتبع...

هي ابتسمت واحس الابتسامه من كل كلبها طالعه.. 
كالت:جنج ع طلعه.. كولي ترديها باجر لو بعده لوشوكت؟
من كالت هيج خفت. ماتخيلت بهل سرعه راح اطلع..
كالت:ها؟ خفتي مو؟ عادي هذا الخوف.. بس رانيه متنكسر بسهوله.. ومو اي احد وراهه.. اني وراهه..
كول وفعل عمتي نضال.. 
-ماشي.. خليها نهايه هذا الاسبوع..
نضال:تدللين.. عافتني وكامت للصندقجه مالتهه.. اشوفها اتبحوش بس مااعرف شدسوي لان ظهرها كان كبالي..
رجعت كعدت يمي .. طلعت فلوس ..
كالت:هاي خمسين الف.. تخلصين بيها شغلج لحد متوصلين للعنوان الي راح ادلج بي..
ترددت اخذهن.. بس نظرتها جبرتني..
نضال:راح اطلعج منا بكل هدوء.. بليل راح تلبسين ملابس وحده من المنتسبات هنا.. راح اخلي الحارسات يسهلن عليج الطريق.. لزمت ذراعي وشدت بالحجي.. بس هاا مو معناهه ترحين تحجين وياهن وتخليهن ياخذن وينطن وياج! تره مو الكل معارفي هنا! اكو بيهن يحوز يحاولن يوكعنج ويوكعني.. اني راح اوصي باليوم الي تردي يسهلولج الطريق..
-عمه خفت.. بطلت مااطلع!
نضال:اشش جبانه! اصلا اسهل من طلعتج ماكو..
-زين عمه اطلعي ويايه؟
نضال:اني مااكدر.. واذا طلعت هل شي راح يمس سمعتي ويجوز توصل للسيد الرئيس.. مااريد تخرب صورتي .. لو كنت انسانه عاديه مثلج ومثل اي احد اطلع وبدون ماافكر ولااتردد.. بس مااكدر وضعي صعب..
-ها.. زين وين اروح.. اني مااندل شي هنا؟
نضال:راح اخلصج من المنطقه الي احنه بيها حاليا.. وعليج الباقي. ترحين للكراج.. تصعدين سيارات بغداد.. راح انطيج عنواين ترحيلها.. 
-عناوين منو؟ زين خاف انلزم بالسيطره؟ زين وين اندل الكراج اني.. عمه والله صعبه.. 
نضال:كافي ترجعينه كل شوي للبدايه.. كتلج عوفي الخوف ع صفحه مو وقته .. راح انطيج عناوين لمعارف اليه هناك.. ترحين يمهم.. همه بحاجة مربيه ومساعده بالبيت .. 
-منو همه عمه؟
نضال:معارف اليه ولتسألين اكثر.. انتي من ترحيلهم لتبينين انج كنتي بالسجن.. كولي انج باحثه والتقيتي بيه بالسجن وقوت علاقتي بيج اكثر من مره واني دزيتج..
-واذا مصدكو بيه؟
نضال:يصدكون يصدكون.. انتي بس احجي بثقه وانسيلي الخوف.. وثيقتج مال تخرج موجوده؟
-لا عمه اصلا مااعرف اذا نجحت لو لا؟
نضال:لتخافين راح تجيج الوثيقه... وحتى شهاده ممارسه وخبره كباحثه راح ترحين وهي بيدج..
-شلون؟ ومنين؟
نضال:معليج.. هذا شغلنا.. شي يومين وتجيج..هاي تاخذيهن حتى يصدكون بيج ومحد يشك..هاا نسيت اكولج.. الاسمه سامي.. اياج تخلي يشوف الاوراق الي راح ترحين بيها.. كبل يكشفج.. انتي بس خلي رغد تشوفهن كلش كافي.. بعدها اتلفيهن .. حركيهن شكيهن.. المهم اذا سألج سامي وينهن كولي ماادري ضاعن مني.. التجئي لرغد هي تحجي ويا تفهمه..
-كل هذا اسوي وحدي؟
نضال:وتالي وياج؟! ليش تخليني ابطل مااساعدج؟! ترا حتى اني دااجازف بيج .. لتفشليني وخليني واثقه منج مراح تسوين شي تعمين بي عليه.. كلها سنتين واني اجي واتكفل بيج.. نعيش ابيت واحد اني ووياج واطفالي..
هااا.. صدك نسيت السالفه الاهم.. لتصيرين حنينه لو تصرفين بغباء وتحاولين تزورين بيت اهلج.. ابد ابد ذيج المحافظه لترحيها! سمعتي؟ لترحيها ابددد..
-ماشي عمه..

يتبع....