الثامن عشر
كملت العشا.. صوتهه وصوت ابنهه يريح بالي وروحي..
كعدنه ناكل.. وحده تباوع ع الثانيه.. اني اعرف الي كان يدور بعقلي نفسه الي يدور بعقلهه.. عن ايامنه عن كعداتنه قبل.. ع الحصير والاكل البسيط
ع ضوه اللاله.. طفولتنه الخلصت بس لعب وركض.. مكان عدنه هم.. بس انه انام ونكعد ونخلص اليوم بطوله نلعب..
كملنه.. غسلت المواعين.. حضرت فاكهه واجيتهه.. شفتهه غافيه.. كلت خل ترتاح.. ابنهه همين نايم..
تمددت بصفهه.. كبل كعدت.. صنت بوجهي واني همين..
كالت:هم مشتاقه الهم؟
-اييي.. هوااااي.. زرتيهم؟
زينه:اي.. بس حتى شوفتهم يطلعوها من خشمي..
-اذوج؟
زينه:اي وهوايه.. شوفي؟!
نزلت صفحه ثوبهه.. كان كتفهه ازرك.. فوك ما قلبو حياتنه يضربوهه.. نار وشبت بيه..
-شوفي بعد رجعه الهم انسيهه! سمعتي؟
هزت راسهه والدمعه بطرف عينهه..
-احجيلي شصار بذاك اليوم؟
زينه:مادري.. كعدت لكيت نفسي بالسطح مربوطه.. نزلوني بيت عمي.. وكنتي انتي ماكو.. شفت الدم بغرفه اهلي.. سألتهم عنج كالو قتلتيهم وانهزمتي!
-وصدكتي؟
زينه:مادري.. يمكن اي ويمكن لا.. من الصدمه مااعرفت افكر..
-وبعدين؟
-اخذوني بيت عمي.. كنت اشك بيهم.. يجتمعون ويحجون ع كيف.. حاولت اسمع مكدرت.. بعدين بدو يعيروني بيج.. سنه ونص اني خدامه الهم.. من غير التحرش مال جميل بيه قبل الزواج.. لحد ما عمي زوجنه.. وهنا بدت مذله جديده.. جميل كان مو صاحي.. اضرب من عامر.. كان يضربني يزوركني ومحد بيهم يخلصني من ايده.. ارجع اكوم اشتغل كأن مصار شي..
اسمعهه واحس روحي تتكطع.. دموعي تصب وهي تحجي..
بعدين سألتني.. حجيتلها عن المريت بي.. بالتفصيل.. بحيث بقينه نسولف ونبجي لوجه الصبح.. طلعت الشمس يله نمنه..
اني بيهه انفجرت بالبجي.. هوايه التمن عليه.. ومحتاجه شخص اشكيله.. وهياتهه يمي زينه..
كعدنه الصبح ع صوت ابنهه.. سوتله ريوك.. كعنده سوه.. وكت حلو وحزين خلصنه.. حلو اجتمعنه بعد سنوات.. وحزين بالذكريات العافت ماعافت بينه.. طبعا حجيتلهه عن سامي وعن ابني الفقدته.. عن شوگي اله وحزني علي.. احتضنه بعض ودموعنه ماوكفت..
يومين احنه مخلصيهه بس بجي.. ثالث يوم.. طلعنه من مرحله البجي والمعاتب..
بدت الحياة تتسقر وياي.. بس ناقصني سامي.. سامي الي عافني وطلع.. ذبحني وذبح ابنه بيده وطلع.. كل مااتذكر.. اعصب من نفسي..
ليش هلكد تحبين بشر عافج بلا رحمة.. تركج حتى مفكر يسأل عنج..
مرت ايام.. وسامي بعده مختفي.. مااعرف وين ارضه.. الي اعرفه هو سالم.. شلون عرفت؟ كنت اتفرج تلفزيون.. داكلب قنوات.. وبين ماادير شفته طالع بالتلفزيون.. بغير مااحس شهكت..
احس گلبي راد يطلع.. خليت ايدي ع صدري.. ممركزه شيكول.. كان لقاء سريع.. ركزت بيهه ع عيونه.. ع شفافه الي كل شوي تتبسم.. ايييه يالدنيا..
كان قبل ميضحك اله وياي.. هسه الضحكه تارسهه وجهك.. تلوكلك يابعد كل معاناتي وواوجاعي..
صبت دموعي.. اجت زينه.. طفت التلفزيون وهو اساسا خلص اللقاء.. وكفت كبالي وكالت:شفتج! كل هذا علموده؟ نسيتي شسوه بيج؟
دنكت راسي واضم وجهي ودموعي باديه..
قربت مني.. خلت ايدهه ع ظهري ومشتهه..
حجت بهدوء.. كل كلمه عبالك ليهسه تتردد باذني..
زينه:خل نعوف حياة بيهه اسم جنس ادم.. خل نعيش بس اني وياج.. ننسى كل المرينه بي.. نعيش وحدنه.. مانحتاج احد..
شلت راسي وگلبي مكسور.. حجيهه صحيح.. هزيت راسي بأي..
اشتغل واكول هيج ياسامي.. اشوفك بالتلفزيون؟ تبخل عليه بجيه وشوفه عيونك.؟ لك مو حتى نسيت سوايتك ويايه.. نسيت والله.. كافي بعاد.. ارجعلي ..
كمت كملت شغلي.. كلام زينه بقى ابالي.. لشوكت احنه نبقى معتمدين ع غيرنا؟ منو الي مهتم بأمرنا..؟ حتى زينه محد سأل عنها ولااحد طلع وراهه... وسامي .. اووف.. ربالي عله..
قررت اطلع .. اطلع للدنيا واوجهه بوحدي.. موكفت ع سامي ولا ع غيره
كان يوم احد.. نهايه 2007.. بدلت وطلعت.. توجهت لجامعه بغداد..
اخذت ابن زينه ويايه.. تعود عليه طبعا وكلش صار قريب مني.. ايام كنت اشوفه ابني الي ماحضنته ولا شلته بيدي..
وصلنه.. احس خنكه وعبره بنص صدري.. كنت ادخل الها.. راسي مرفوع ومطمئنه عندي اهل .. عائله ملمومه.. امشي خطواتي واله شويه توكع دمعتي وتفضحني.. وصلت كليتي.. كملت الاجراءات.. واستلمت وثيقه تخرج اصيله.. لا مزوره ولا شي..
كان اغلب الاساتذه متغيرين.. اشكال جديده هوايه شفتهه.. قليلين من الي اعرفهم ع وقتي بقو..
طلعت.. تمشي السياره بينه.. دنيا شكد افترت عليه.. شكد كسرتني.. طلعت الها مخنوكه.. تعيسه.. حتى الشوارع و البيوت احسهه كئيبه..
رجعت للبيت وجبت غدا جاهز.. كانت زينه بشهرهه.. اخاف عليهه من نسمه الهوا.. الدلوعه صارت ام.. شالت حمل اكبر من عمرهه.. كنت اتمنى اني اشيل عنهه كل شي.. بس القدر تناصف الوجع بينا..
ايام وقدمت بيهه ع وزاره التربيه.. مدرسه.. بأختصاصي.. انگليزي..
وصارت ولادة زينه.. بيهه متت خوف عليهه.. مااريدهه تتوجع.. لوبيدي اني اتوجع بدالهه.. اخذتهه ورحنه للمستشفى.. اسمع صوت صرخاتهه واتكطع تكطع عليهه.. صرت مثل المخبله اروح وارجع..
كتلتني كتل من تصيح وينج يمه.. يمه تعاليلي راح اموت.. يمه اريدج يمي..
ع صوتهه عيوني غوركت .. اريد اوكف بجي مااكدر.. حتى الناس السمعتهه وشافوني .. انقهرو.. شفت نظرات الشفقه بعيونهم..
منين اجيبلج امي يازينه.. منين.. اااخ.. الله ليوفق الكان السبب..
جابت زينه.. طلعوهه من الردهه.. متت من شفتهه.. حضنتهه واكلها بلا وعي اني امج.. اني هنا.. شلت بنتهه.. صغيره كلش.. يمكن ع كد ماانقهرت بيهه من كانت حامل.. وع كد ماشافت ضيم من بيت عمي..
كنت لازمه بنتهه.. سميناهه فرح.. خلص لازم فرح يدخل حياتنه..
مركزه بيهه حيل.. مااحس ع حالي ودموعي عشره عشره.. تخيلتها ابني الماشفته.. شعور غريب.. طفل ونفس صغيره بيدي..
شويه وجتنه عامله.. كالت يردوج بالطابق الجوه.. خفت ليكون جميل لو اهله.. نزلت وبكل خطوه احس يضيع من عمري يوم..
شفت حمايه.. عسكريين.. بنصهم واحد طويل.. كان داير وجهه.. خليت ايدي ع گلبي لااراديا.. هذا سامي.. اي هو..
اندار عليه.. مشيت خطوات.. وصارت الخطوات عبالك سنين..
بيهن عتاب وبيهن جروح.. بيهن غصات وحسرات..
وصلت كباله.. عيونه فحصتني من فوك ليجوه.. كنت اشوف بعيونه حب وشوگ.. بس مااعرف شنو الي صار..وتفارگنه..
لحظات بس ساكتين.. الكلام ميطلع ولا يعبر عن البينا..
سامي قطع السكته وكال:شلونج؟
شكلك شلوني.. بيا حال عفتني وليش رجعت وشلون اجاوبك؟!
سكتت.. ودنكت.. هو سكت.. التفت .. رجع باوعلي..
سامي:الحمد لله ع سلامتهه.. اي شي تحتاجو اني موجود..
-تسلم..ابو فهد افضالك غركتنه..
اشر لجماعته.. ركضو كدامه..
سامي:همه راح يكملون البيان.. معليج بالباقي.
مكنت مهتمه لهل موضوع.. قاطعته وكلت:شجابك؟ ليش اجيت؟
سامي:ليش تردين اعوفكم وحدكم؟
-عفتنه وسويتهه قبل.. روح سامي روح.. لتحط ع الجرح ملح..
سامي:اني اسف..
-هه.. ع شنو؟ انسى.. كل شي بينا انتهى.. باقرب وقت راح اطلع من بيتك.. وراح اردلكم افضالكم..
سامي:لتحجين هيج.. صح كل شي انتهى.. بس البيت هذا الج.. وراح يكون باسمج..
-تكفر عن ذنبك مو؟
سامي:مااذنبت بشي اني!
-هه بعدك سامي الاعرفه.. متتغير لو يمر قرن زمان.. ممحتاجه بيتك.. خلص بس اتركونه بحالنه..
انداريت اريد اروح.. لزم ايدي.. حتى الي بلمستشفى انتبهو.. وهو كان جاي عسكري.. صار راسي كلش قريب يم اذنه..
همس:رانيه .. اني طلگتج..
غمضت عيني .. احس روحي بدت تطلع.. من رجليه لراسي..
مااعرف ليش هيج صار بيه.. اصلا اني ايست منه.. ومر سنه اله شوي ع فراگنه..
بس مادري ليش تخربطت احوالي من كلي طلكتج..
جريت ايدي ومشيت..
مادري شنو القدره العندي الخلتني واكفه ع طولي وامشي.. مكدرت ادخل يم زينه.. رحت لنهايه الممر.. فتحت الشباك اجت ضربه هوى قويه بوجهي.. مو اقوى من ضربات الحظ التعيس وياي..
صبت دموعي بحرگه.. معقوله.. كلشي انتهى خلص؟ راحت ايامي الحلوه وياك.. نسيت من تكلي راحتي وياج.. نسيت من تغفى بين اديه.. نسيت من تبوسني من عيوني وتكلي اطيب بوسه منا؟ ماكنت اعرف بوسه العيون بيهه فراگ.. لو كنت اعرف ماخليتك تبوسهن..
هديت شويه.. غسلت وجهي ورحت لزينه.. لكيتهه كاعده ع حيلهه وتوكل بأبنها سيف.. ابتسمت مااريد ابين شي..
زينه:ها؟ وين رحتي منو صاحج؟
-سامي.. هه.. جاي يعرض خدماته؟!
زينه:هاا؟ يعني شفتي؟ حجيتو؟ شكلج؟ ليش ماكان يجي؟
ابتسمت بسمه وجع:اي.. اطلكنه خلص.. جماعته همه ديسوون بالبيان..
زينه:ياا! لج ليش؟ وشوكت؟
-مااعرف .. زينه انسي هذا الموضوع البيه كافيني..
زينه دنكت واحس بيهه انكسرت عليه..
بقت بيومهه بالمستشفى.. طلعنه ثاني يوم.. كنه محهزين شي بسيط للنونو..
مجرد كم قطعه ملابس وكاروك.. الكاروك الي ياما صفنت بي ايام ووجع روحي هو الي يحجي .. يحجي الي بيه..
سويتلهه غده.. تغدت ونامت هي وفروحه.. اخذت سيف وطلعنا للسوك..
رحت بعت من الذهب مالتي بس الحلقه.. مطاوعني گلبي ابيعهه.. كلت احتفظ بيهه.. كنه مخلصين مصرف.. مابقه شي عندي..
انترست جنطتي فلوس.. مهتميت.. كلهن صرفتهن ورجعت.. مخليت شي مجبته..ملابس لزينه واليه.. للنونو ولسيوف.. شغلات نحتاجهه..
العاب للاطفال.. رجعنه وسيوف كان كلش فرحان..
لكينه زينه كاعده ودتغسل لفروحه.. كملتهه واخذتهه منهه.. ساعات وفروحه بحضني.. عيوني متشبع منهه..
ملامحهه بدت يوم عن يوم تظهر.. طلعت تشبه زينه والحمد لله مو عليهم.. ماردتها تطلع عليهم..
وبيوم.. فتحت خانه سامي .. طلعت كل ملابسه.. خليتهن بعلاكه كبيره كلش.. وعفتهن بالباب .. من تجي البلديه تاخذهن.. بس گلبي منطاني مااعوف قطعه منهن.. عفت واحد من قمصانه العسكريه.. وكانت الرتبه بعدهه بي.. وعفت فانيله من الداخليات مالته..
ضميتهه بين ملابسي.. حتى لا تشوفهه زينه وتلومني.. وحتى يبقى شي منه بين اغراضي..
بذاك اليوم دموعي موكفت.. عبالك ايامي الحلوه ويا انتهت مثل الحلم..
هيج مكتوبلي.. الحلو ينتهي بسرعه..
ومرت ايام.. وطلع اسمي بالتعيين.. مااوصف الفرحه المرينه بيهه.. اني وزينه.. حتى ركصنه.. ركصنه وبكل خطوه تنزل دموعنه.. كنت محتاجه للتعيين.. من سنين مافرحنه هيج فرحه.. كبل ركضت ع فرح بوستها..
كلتلها عساج دوم فرحتنه.. واخيرا دخلت فرحه لبيتنه..
وكملت اجراءات التعيين.. وطبعا كنت اعرف سامي هو اليسر امري.. لان ماعندي وثايق رسميه لاهلي وعائلتي.. مشيت بس بالجنسيه العندي والشهاده
شكيت انه هو يكون توسط وخله اسمي بالتعيين..
كملت الاجراءات وتحدد الموعد الي اباشر بي.. بس قبلها كان لازم انطلع جنسيه لفروحه.. طلعت الاربعين وهي بلا جنسيه..
حصلنه رقم جميل.. اتصلت بي.. بلغته لازم يسوي جنسيه لبنته.. واصلا نفوسهم هناك.. ماتردد.. ولا عصب من حاجاني.. كأنه ماصدك خلص من زينه.. كلت بداخلي ياحسافه ايامج يمهم يازينه..
من يوم الي طلعت منهم محد سأل عليها... لمن جابت اني الاتصلت بجميل وطلبت منه جنسيه.. واجانه لبغداد.. شاف بنته.. وابنه..
بس زينه مكدرت تطلع وتشوفه.. انطيته البيان وكال هو راح يكمل الباقي ويدز الجنسيه باقرب وقت..
من راح.. دخلت ع زينه بالغرفه.. لكيتهه مخنوكه بدموعهه.. وجهه احمر ودموعهه تصب واديهه ع وجهه.. حضنتهه حيل.. شويه وهدت..
كعدنه نسولف.. سألتها ليش بجيتي؟ مشتاقه اله؟
هزت ايدهه وكالت:صدك تحجين.! لواشوفه يحترك كدام عيني مااطفي..
شفتي؟ هو سأل عني؟ جاب اسمي؟ اكو ابو يعوف اطفاله؟
-طبه مرض.. مو اتفقنا نعيش بس لنفسنا ولسيف وفرح..؟
هزت راسهه اي..
طبطبت ع ظهرهه..اي هيج اريدج.. احنه سوه.. بعد ميكسرنه الوكت مرتين!
ومرت ايام قليله.. باشرت تعييني بدايه 2008 .. بمدرسه قريبه.. موكلش قريبه يعني بمنطقه ثانيه واصعد سياره يله اوصل.. بس المهم اكو تعيين ومصدر رزق نعيش منه... كان الوضع شوي صعب بدايه دوامي بالمدرسه.. ممتعوده وخايفه من الماضي.. خايفه تعرف الناس والمدرسات الي ويايه.. شوي شوي بديت اخذ ع الوضع.. وترتب الجدول مالتي..
يوم عن يوم اندمج ويه طالباتي.. كنت بمدرسه متوسطه.. حبيتهن.. كلش حبابات واغلبهن يحبن درس الانكليزي ومتعبني.. عدا كم وحده دجة دبل كانن ..بس همين معفتهن.. درستهن بكل ماعندي من جهد..
ومرت الايام.. واستلمت راتبي.. اول لكمه من تعبي .. ركضت للبيت..
تغدينه.. كملنه وطلعنه اني وزينه والاطفال.. كان نذري اخلي تراجي باذن فرح من اول راتب اليه.. ورحنه واشتريت ووفيت نذري الهه..
وها.. اجتنه جنسيه فرح بيد واحد منعرفه.. تعجبت من اجانه.. اخذتهه منه وتشكرته وراح.. ومرت الايام.. وصرت اطمس نفسي طمس .. بالحياه بالمدرسه بالطالبات بالشغل..
كنت كل اسبوع اعوف حصه .. مناخذ بيهه درس.. اكعد ويه الطالبات واسمع مشاكلهن.. صوت كلش اجتماعيه وياهن. احب اسمع الهن.. وبالنهايه هنه يسألني ست شنسوي بهيج حال.. مشاكل هوايه.. وكل سنه دفعه جديده..
حتى مااتذكرهن..
زينه بقت فتره بالبيت.. بس بعدهه شجعتهه تكمل السادس.. هي كانت مستسلمه وكاعده.. كوه قنعتها تقدم.. وصارت هي تقديم للخارجي وهي طلاك.. خلصت من جميل.. اني طلبت منه .. وهو بكل هدوء كال اي راح اطلك ماعندي اشكال بس تتنازل عن كل شي.. من حجيتلهه معارضت..
كالت اتنازل عن كل شي بس مو اطفالي.. كلتلها ارتاحي اصلا ميريدهم..
هو كان بوقتهه متزوج.. طبعا مرت عمي الحيه متعوفه.. وعبالهه راح نكطع نفسنه علي..
أنت تقرأ
وجع ذكريات
Romanceرحت للفندق وداسجل يم موظف الاستقبال مااحس اله ذراعي نلزمت حيل.: التفتت كان سامي.. متت بدمي.. كان ميباوع بوجهي وبس يباوع للشارع وللموظف.. سامي:اخي بطلنا منريد حجز.. رجعلها هويتها.. رجع الهويه.. كبل اخذها منه.. هنا شوصف حالي.. ظلت لازم ذراعي لحد ماوصل...
