وجع ذكريات

ج 15

الخامس عشر

نزلت جوه.. هدوء غريب... يمكن رغد رايحه.. رحت تريكت.. طلعت بوجهي ام سامي.. فزيت ..
ام سامي:ها شبيج! شايفه جني؟
-لا مدام حشاج!
ام سامي:كولي يوم او مامه.. لتكولين مدام..
-ماشي مامه.. 
ام سامي:من يرجع سامي اخلي يشوفلجن حل.. متتراهمن سوه انتن!
دنكت وسكتت..
ام سامي:شتسوين غده؟
-الي يعجبج؟!
ام سامي:لا لتسوين.. اني طالعه اتسوك ومنها اجيب غدا ويايه..
-براحتج مامه..
طلعت ام سامي.. رجعت وحيده.. هيج اني.. ياكل الهوسه والمشاكل تلتم .. يا ابقى اتمنى اسم البني ادم يمي..
رجعت جايبه غده وياهه.. تتغدى ولا مهتمه بالمشاكل ولا برغد الي سبتها وغلطت عليها.. شكد قويه.. عجبتني .. يمكن سامي طالع عليها.. 
خلصنه ايام بس اني وام سامي بالبيت.. هي ماتقربتلي كلش.. بقت علاقتهه رسميه كلش.. انتظرت رجعه سامي ع احر من الجمر.. منتظره شيكىل وشلون راح يتصرف.. 
وصارت اجازته.. ورجع.. استقبلته مثل كل مره استقبله.. متشيكه ومتحضره.. طابخه ومجهزه البيت..
بعد ماكعد وارتاح .. رأسا سأل عن رغد.. اني انقبضت روحي.. 
ام سامي جاوبته:ختولي.. وكحه موتتني!
سامي:شصار شكو؟
ام سامي:طردت هاي.. ولوما اني كان صفت بالشوارع!
التفت الي.. يسألني بعيونه اذا صدك.. هزيت راسي بأسف.
سامي:وتالي؟ 
ام سامي:مامه يمتراهمن! اي والله ميتراهمن! خليهن كلمن ابيت!
سامي رفع تك حاجب وبقى صافن..
ام سامي:اي اختار وقرر.. لا تحير نفسك وادوخ راسك بيهن.. انته مادري شجاك وورطت نفسك ! 
سامي:كافي الله يخليج.. راح اسوي مثل ماكلتي.. بس اسكتي شويه.
ام سامي:اوي.. ناس تشتري دوخه الراس شرايه!
صعدنه اني وسامي ع غرفه..
حضني من خصري..:شلونج؟ اشتاقيت!
-موزينه بدونك.. واني اكثر..
بوس عيوني:احبج.. والباقي خل يتمنون..
ابتسمت.. وفرحه دخلت كلبي م كال هيج..
-ورغد؟
سامي:ترجع مثل ماراحت.. بس اكولج.. ليش ماارتبلج البيت الصغير وحدج؟
-ها؟
سامي اشر براسه:اي البيت الي.....
-ها ها تذكرت.. مادري حبي.. اذا يناسبك عادي..
سامي:اي حياتي.. احسن النا احنه الاثنين..
-اموت بعيونك..
سامي:واني بكل شي بيج..
حضنته حيل... وهو يبوس بيه من ركبتي ونزل اكتافي.. ذبت بين اديه.. وصلنا للفراش.. وعيونه بعيوني وكل بوسه منه تعادل كنوز الدنيا.. صار بينا.. من هدت ارواحنه شويه.. كنت نايمه ع صدره.. دالعب بشعرات صدره الخفيفات.. وسألته..
-حبيبي؟
سامي يحجي بتعب:عيونه..
-زينه ؟ شخبارهه؟ ماصار الوقت حتى اشوفهه؟
سامي:اي.. بهل قريب.. راح اخليكم تلتقون..
-الله يحفظك الي يابعد روحي..
باسني من راسي.. سكت.. وبدت انفاسه تثگل.. اني مكدرت انام.. بقيت اتخيل اليوم الي اشوف اختي بي.. شلون احضنها ومنين ابوسها وشنو احجي وياهه وعن شنو اسألها.. يووو اتخيل وابتسم واخاف بنفس الوقت.. 
الى ان نمت اني والحماس الي بداخلي..
كعدت ع لمسه سامي ع خشمي..
فتحت عيني كان يبتسم.. :كافي نوم.. صارلج شكد منايمه؟
ابتسمت حضنته.. 
سامي:تدرين ساعه 11؟ واني كلش جوعان..
كبل كمزت من مكاني:عيوني الك.. بس دقايق.. 
سامي:ماشي.. راح ادخل اسبح.. 
-اوكي حبي..
رحت اشتغل بواهس.. ناسيه المشاكل والقهر.. هيج اني بوجود سامي..
كملت العشا ع السريع.. كعدنا ناكل.. اباوعله واكول بكلبي عساني لاانحرم منك.. صوتك بالبيت هو دليلي..كملنا ورحت سبحت..
وبعد هل نومه الطويله.. من العصريه ل11.. سهرنه سوه. بالحديقه. بسوالف بيها الحلو وبيهه المر.. دخن هوايه بيومهه.. وشاركته الدخان.. كان يشاقيني ويكلي لتشربين ترا اجويج! كنت اعانده واشرب ويا.. يجي يمثل انه راح يخلي الجكاره يجويني ويرجع يوخرهه ويبوسني.. 
شكد ضحكت بيومهه.. حجالي عن شغلات تصير وياهم بالدوام.. دمعت عيوني من كد ماضحكت.. وكل مره اطلع بيهه صوت.. يحضني من راسي يخلي ع صدره حتى ليطلع صوتي..
تعبنا ع كد السوالف.. صفن بوجهي كال :يارب دوم هل ضحكه وجهج..
-بيك تكمل فرحتي وضحكتي..
سامي:يله نفوت.. راح تطلع الشمس علينا..
-هههه وتطلع.. ميهم مدام احنا سوا!
سامي:مو وكت خبال.. ترا نعست همين..
-يله ماشي ماشي..
دخلنا للغرفه.. شمرت نفسي بحضنه وغفيت.. بذيج الليله نوم راحه.. نوم بلايه هم.. وماكبله دموع وحزن..
صحيت دنيا ظهر.. ملكيته يمي..نزلت كملت شغلي.. وهو بعده مجاي..
امه همين اجنهه صديقاتهه وطلعت...
كملت دخلت حمام ورتبت حالي انتظره.. اجه.. عيونه كلهه فرح..
اريده يحجيلي بسرعه واعرف شكو..
سامي:رناوي.. حبيبتي.. هذا الاسبوع راح تشوفين زينه!
احس جسمي انشل.. دموعي صبت.. اجه عليه وحضني.. ممصدكه رجعت سأله.. سامي احجيلي سامي كلي شوكت يايوم وياساعه..
بعد شعري عن وجهي:هههه حبيبتي حتشوفيها بس اصبري.. 
-سامي صدك لو كذب؟ راح اشوف زينه؟
سامي:شبيج حبي.. كلتلج راح تشوفيهه وهل الاسبوع ان شاء الله..
بقيت اروح منا واجي منا.. ممصدكه.. بعد كل هل سنين راح اشوفج يازينه.. ورم كلبي عليهه.. اخيتي الدلوعه .. ام لسان .. الحنينه.. كلهن بيهه.. مخلوطه من كل شي زينه.. مااعرف اذا بقت مثل ماعفتهه لو هم كسرهه الزمن وغيرهه...
احس الكاع مسايعتني من الفرح.. وويه الفرح كان اكو خوف غريب بداخلي.. مااعرف منين.. 
محجالي سامي شلون وصل الها وشلون راح نلتقي.. كلي كلشي بوكته حلو..
بقيت كل يوم اكعد الصبح بواهس.. راح يصير الي تمنيته.. راح اسأله عن كل الاسئله لبراسي.. راح اقتل الهم والقهر الي اخذ مااخذ مني..
يوميه اسأل سامي.. شوكت وشلون.. طلع بيوم.. رجع بسرعه مطول..
كلي يله.. فرصتج تشوفيها..
بيهه مااعرف بنفسي شلون طلعت.. شلبست شحجيت.. ماادري.. رايحه الاكي اعزاز گلبي.. السياره تمشي واني اكله اسرع امشي.. اطلب منه يسرع واني اصلا مااعرف وين راح اشوفهه..
وصلنا الكاظميه.. استغربت... كلي راح تلتقيها يم الامام.. بس من اكولج يله.. اللحظات المرت سنين عبالك.. مادري ليش نفذ صبري واني الصبرت سنين وسنين.. اباوع بالوجوه.. اكول هسه تجي كبالي هسه تجي..
خفت لا من تفوت مااشوفهه لو مااعرفهه.. خاف متغير شكلهه.. وخاف مااكدر اشبع منهه.. تخبلت اله شويه.. عقلي فصل!
كنا نراقب من بعيد.. بين المحلات والاسواق.. اباوع ع قبة الامام واكول دخيلك لا ترجعني خايبه.. بس اشوفهه.. واحضنهه.. واشوفي جروحي بيهه...
مااحس اله سامي همسلي.. كال روحي.. ذيج اياهه تمشي كدامج...
كنت اباوع بدون تركيز.. فاتت من كدامي هي ووياهه ابن عمي الاصغر من عامر.. جميل.. وبيدهه طفل صغير.. يطلع عمره اقل السنه..
رعش كل جسمي.. جلدي كزبر.. فاتت مني ومكدرت المسهه.. مشفت وجهه.. بس ظهرهه وهيئه جسمهه هي.. سامي لزم ايدي وباوع بعيوني حيل وكلي خليج قويه ولتصرفين بشي غلط.. 
هزيت راسي اي.. احس كلبي وكف اله شويه.. امشي ع كيف.. بيني وبينها خطوات بس.. امشي وابجي.. اشكر ربي خلاني اشوفهه.. وادعي الله يتمم لقائي بيهه واحجي وياهه.. انتظرت لحد مادخلت التفتيش.. كان بيني وبينها كم وحده.. امد راسي من بينهن حتى اشوفهه.. طلعت ووصل دوري بالتفتيش.. كلتلي وحده ينطيج مرادج ابو الجواد.. مايخيبج ان شاء الله..
كلهه التفتت عليه وشافت دموعي.. صارن شلال مو دموع.. حتى الكلنس انمرد بيدي.. دخلت زينه.. فتت اني وراهه.. وصلت يم الشباك..ابنهه بيدهه وتكله بوس حبيبي .. صرت وراهه كلش.. متحملت اكثر.. حضنتهه من ظهرهه.. هي فزت واندارت ولزمت ابنهه حيل.. الضياع والصدمه البعيونهه انحفرن بگلبي حفر..
ماشفت بس دموعهه كامت تصب.. رجعت حضنتني وصارت دموعنه بيهه نحيب ومعاتب.. انتبهنه وكعنه للكاع وابنهه بنصنه.. 
نريد نحجي منكدر.. البجي اخذ كل وقتنه.. صاحو علينه.. كافي وخرو فتحو مجال لغيركم..طلعنه للصحن.. وحده تباوع بوجه الثانيه.. احس بزينه تعاتبني .. 
زينه:ليش رانيه ليش؟ ليش سويتيها؟!
-لااا.. لتظلميني انتي همين.. 
زينه:وين كنتي.. موتي گلبي !
-اااااخ.. شحجي.. شكول.. ماعندي وقت.. بس صدكي مو اني.. ويجي اليوم الي راح تعرفين بي منو الي سواهه.. 
زينه:اني شاكه بس خايفه احجي..
لزمت حلكهه تسكت..:اريدج يمي.. زينه اريد اشبع منج.. لترحين.. منا وتعالي ويايه!
باوعت لايدي:تزوجتي؟ منو؟ وينه؟
-ايييييه.. لو تدرين شمريت وشفت.. تزوجت وزوجي هو الرتب حتى اشوفج..تعالي ويايه.. اصلا راح اطلع ابيت.. بس لترجعين هناك.. نعيش اني وانتي وابنج..
زينه:مااكدر! رانيه مااكدر.. جميل ميعوفنا.. موكافي انه ستر عليه واتزوجني!
عطت بيهه:لتحجين هيج! شنو ستر عليج.. خلي راسج مرفوع! كوليلي ديأذوج ؟ عامر مأذيج مو!؟
جاوبتني لا.. بس احس وره اللا وجع كبير.. رجعت حضنتهه وبست ابنهه.. صح هو ابنهه.. بس مادري ليش كزيت منه .. بي دمهم للانذال.. التفتت.. كالت اجه جميل.. فتحت عيونهه ع وسعهن تكلي بيهن ابتعدي.. اني درت وجهي وكمت.. بقيت امشي ع كيف.. ادعي علي الله ليوفقك انت واهلك.. حتى بهاي وكفتولي غصه.. سمعته سألهه منو هاي.. جاوبته بنيه تاخذ خيره.. كالها اي وشنو طلعلج؟! ابتعدت وبعد مسمعت الباقي.. عيوني مشبعت منهه.. واخاف التفت ويشوفني.. طلعت.. لكيت سامي منتظرني..
عيونه تسألني.. اني رجعت دموعي تصب.. 
صح شفته بس ما شفيت غليلي مال سنين.. رحنه ع السياره.. او ماصعدنه
سامي كال:هاا؟ شبيج؟ احجيلي شصار؟
-شفتهه.. بس ماشبعت منهه...
سامي:بعيوني.. تشوفيها مره واثنين وتلاثه.. حتى اذا تردين نروح لل.... نشوفهه هناك.. بسوك يم طبيب.. بأي مكان ..
-الله يحفظك ويحميك.. بلاك اني اضيع..
رجعنه للبيت.. وطول الطريق اعيد اللقاء بذهني وابجي.. سامي لزم ايدي بوسهه صبرني بس مفاد.. المريت بي مو مال بس حجي وتهده روحي..
ع كد مابجيت.. بس وصلت لفيت راسي ونمت.. كعدت عبالي اني كنت احلم ومشفت زينه.. اداركت الموقف وتذكرت الصار صدك مو حلم.. فرحت ورجعت حزنت لان مبين عليها ذاليهه.. وحزنت لان مشبعت منهه.. مسألتهه ولا حجينه هوايه..
كان سامي يتجهز خطيه لحاله ماحب يأمرني بعد ماشاف حالتي.. كلي باجر يروح لدوامه.. اخذت الجنطه من ايده وجهزتهه.. 
تعشينه اني وهو وامه.. صعدنه للغرفه.. ماحجينه.. بس خليت راسي ع صدره.. بين لحظه والثانيه تنزل دمعتي.. هو ماضغط عليه.. بس كل ماتنزل دمعتي يمسحها بيده..
ثاني يوم من الصبح راح.. ورغد بقت زعلانه طول هل مده.. بس قبل ليطلع كلي اتجهز بس ينزل انتقل ع بيت الي سبق واخذني اله من كان شاك بيه..
بقيت ايام بحاله حزن.. ع اختي وع الوكت الخلانه نسرق لحظات ونسرق نظرات حتى نشوف بعض..
ليالي طوال مريت بيهاا واحجي وابجي.. اكول ياعالم اختي هاي.. اختي اريدهه يمي.. ماكنت اقتنع بفكره زواجهه من جميل .. الاسوء انها مخلفه منه.. تمنيت اروح اجرها منهم واجيبهه يمي..
كل شي #ضدي
حتى الليل..
من بديت اسهر..
غفه وخلاني #وحدي
وهو اني شظال عندي؟
غير الصور ودموع #خدي..
حتى زينه.. عيونهه كانت مثل الي ممصدكه الحجيته.. يمكن مقتنعه اني القتلت امنا وابونا.. ايام واني احترك حرك.. شلون اوصلج وشلون احجيلج افهمج.. اوووف.. تعبت هوايه..
قبل لينزل سامي .. رجعت رغد.. بس شفتها رحت للغرفه.. مطلعت اله ع كد الحاجة ولمن اسمع باب غرفتهه ينسد..
اجه سامي.. اشوفهه تحضنه وتبوسه كبالي.. اني اباوعله واحسه مو الي.. مااكدر اقترب.. هو ماحس بيه ولا بعيوني الي الدمعه حاصرتهه..
ردتهه بس يركز حتى يعرف شبيه.. بقى طول اليوم يمهم.. مصعد ولااجاني
فوك الحرب النفسيه الاني بيهه.. كملهه هو عليه يتجاهلني..
لشوكت اصبر.... مو حتى الصبر مل مني...
ثاني يوم.. للعصر يله اجاني.. بعيوني عتاب هواي اله.. كنت محتاجه رجعته وهو ولا مهتم.. يمكن شاف عيوني وعرف شبيه وغلس.. ويمكن اصلا مادره عني..
سامي:رناوي..حبيبي.. نروح ع ذاك البيت؟
هزيت براسي اي .. بدون مااحجي..
رحت اخذت ملابسي.. كلي ملل وتعب.. متركت شي اليه هناك.. ودعت الغرفه وطلعت.. وكانت هاي اخر مره اشوف الغرفه بيهه..
نزلت شفت الاطفال كدامي.. تقدمت ومديت ايدي اريد احضنهم.. رغد رأسا جرتهم وراحت.. دنكت .. فشلت.. مثل كل حياتي الخلصت بس فشل..
مشت السياره.. سرحانه .. دايخه.. نزلت الجامه.. الهوى هادي .. اخذت نفس طويل.. حتى بالهوى مخنوكه..
وصلنه ع البيت.. فتح الباب.. شفت فلين وبلاستك مشمر..كان مال اثاث الجديد.. كل شي كان مخربط بالداخل.. مشتري هوايه غراض.. بس ممرتبات ولا البيت نظيف.. هو بس وصلني.. حضني وبوسني بس صرت مااحس بيهن من كل كلبه طالعات.. ويمكن من الغيره هيج حسيت..
عافني وراح.. بلشت تنظيف..هوايه اخذ وقت التنظيف.. كلي قبل ليطلع لتعبين نفسج بس نظفي شوي شوي.. اني كملت تنظيف.. بلشت ارتب الغراض.. الثلاجة والطباخ.. تخم بالصاله.. فرشات بالاستقبال..
غرفه النوم مرتبه مبيهه شي.. بس مسحتهه وعزلت ملابسي واغراضي..
انتظرت ساعات.. مااجه سامي.. كلعاده.. ومثل كل مره اكون بيهه وحدي لازم تنختم وحدتي بدموع .. لحد مانمت...
ثاني يوم الصبح.. كعدت جسمي مكسر.. ظهري عبالك مفلش.. ع كد ماتعبت بالاغراض الرتبتهه.. اجه سامي.. تفاجئ لان سويت كل شي لحالي..
لامني لان اشتغلت وحدي.. مهتميت.. رحت عزلت المسواك الي جابه.. وجايب همين سيت جدوره وطاوات.. مواعين واكواب.. يعني شغلات مطبخ.. رتبتهن.. هو بقى بالصاله.. رحت يمه..
كبل وكف وكال اني رايح..

رحت حضنته.. وكلت:خليك لتروح.. اني بحاجتك .. لتعوفني وحدي..
سامي:مااكدر.. عندي شغل.. اجيج بلليل اذا صارلي مجال..
طلع وعافني.. تغديت.. ونمت.. وصار وقت الغروب واني همين لوحدي.. لشوكت ابقى وحدي مااعرف.. كعدت استغفر واصلي وادعي ربي يلهمني الصبر.. صبت دموعي .. من صدك تعبت..
انتظرت الليل.. متعشيت كلت انتظر سامي.. ساعات وهو ماكو.. 
غفيت.. رجعت كعدت ع امل الكي. هم ماكو.. انهاريت فد مره.. ابجي ومااهده.. صرت اتخيله هو ورغد.. ديسمعها مثل الكلام الحلو الي يكوله اليه؟ ديبوسها مثل ميبوسني؟ ديضحكون مثل ماكنا نضحك؟
احس خدي احترك من كد البجي..حتى صرت مااكدر امسح خدي..
عودت روحي تون....
والونه صارت طرب...
والناي لو مايون ....
چا حاله حال الگصب....
رجعت نمت واتخيل سامي باي لحظه يجي.. كل شوي افز عبالي الكاه .. صار الصبح واني حتى النوم سم عليه.. منا البيت جديد عليه.. منا وحدي.. منا فكرة وجود حبيبي بحضن غيري كافيه تموتني..
مااجه اله وره الظهر.. بكلبي شايله علي هوايه.. بس مااكدر اعاتبه ليزعل مني.. اخذته بالاحضان.. برغم شكد كنت موجوعه ومكسوره منه...
احسه كلش صار بارد ويايه.. اذا اجيت احضنه ميبقى مثل قبل بس يبوسني لو يبادلني بحضنه اقوى.. ماكو لحظات ويبعدني عنه...
بقى اليوم بطوله يمي.. بس احسه مو يمي.. بس جسمه يمي.. عقله وذهنه شارد.. شسوي واخلي بالك يمي.. قنعت نفسي انه مشغول بالدوام..
ثاني يوم .. سبح وراح.. كان لازم يروح لدوامه..
بقى الشك ياكل گلبي اكل.. اكيد راح يروح يم رغد .. اكيد راح تبوسه وتحضنه.. شسوي وتهدى روحي.. اعرف هم حقها.. واعرف اني الزايده بنصهم.. بس گلبي ميطاوعني..
ودعني وطلع.. شكد صعبه الوحده.. ادخل لبيت مابي بس اني.. ماينسمع صوت بس صوتي..
ذبيت حسره.. دخلت.. خلص تعودت ع الوحده.. 

يتبع...

٣١‏/