وجع ذكريات

ج 8

الجزء الثامن

تغدو وكملو... اني لازمه كلبي بيدي اكول هسه يصيحني ويفضحني..
يافشلتي منج يارغد ومن طيبة وياي.. صرت الوم حالي ليش طاوعت عمتي وهربت.. شتسوالي من انفضح مرتين بحياتي ع اشياء ممسويتها...
مر الوقت ومحد صاحني.. رغد وسامي بغرفتهم.. الاطفال يمي..
كملت المواعين والتنظيف.. اخذتهم ورحنه ع غرفتي.. ساعات منزلنا..
للمغرب يله.. خيلتهم بالصاله يلعبون.. ورحت اشوف شسوي عشا..
بلشت شغلي بالمطبخ .. اسمع صوت باب غرفه رغد انفتح.. 
عبالي هي الطلعت... التفتت شفت سامي.. كلبي رجف من شفته... خفت لا يحاجيني بموضوعي... كلت بس يحاجيني يحوز اطك عندي واحجيله الاول والتالي ولا هل العذاب العايشته...
بس محجه شي.. بقه يلعب ويه الاطفال.. بعدين اجه للمطبخ.. فتح الثلاجة اخذ شي منها بس معرفت شنو لان مالتفتت اصلا.. خله وطلع من المطبخ...
اخذت نفس طويل... حسره تجر حسره...
شكد تحمل هل روح وليش اني من دون الناس اعيش كل هذا.. بدون مااحس مزلت دموعي واني اغسل مواعين... مااسمع اله صوت رغد تكلي شبيج ليش تبجين؟ نوب صوتها كان عالي حيل يعني اكيد سامي الي كاعد بالصاله سمع..
جاوبتهه كلتلها اشتاقيت لامي وابويه...
ترحمت الهم وطلعت من يمي... كملت العشا واخذت عهد بحضني.. مادري ليش حبيتها هوايه لعهد.. تعلقت بيهه .. صارت اكثر نومتها يمي حتى من ابوها مموجود بالبيت اخليها يمي.. كعدت بالصاله وهم راحو يتعشون بالمطبخ... رغد اجتني كالت كومي حبيبتي اكلي ويانه..
كلتله مااشتهي.. كذب اني اصلا مماكله شي بس شسوي من خوفي..
انتظرتهم خلصو ... رغد كالت ابقي انتي يم الاطفال واني انظف واغسل المواعين.. بقيت كاعده بالصاله بيهم.. سامي غسل واجه كعد...
لا بيه اكوم ولابيه ابقى.. الخوف المريت بي بس الله اليعلم ...
صار كبالي.. ظل يتفرج ع التلفزيون.. واني ملتهيه ويه الاطفال...
عهد تعبت.. شلتها بحضني ورحت المطبخ.. كلت لرغد راح اخذها يمي..
اخذتها ودنصعد الدرج.. مااسمع بس صوت سامي صاح..
اوكفي..
وكفت واحس رجلي انشلت.. مكدر اقدمها خطوه بعد.. التفتت.. كانت عهد بحضني منيمتها.. بس مو غافيه لا بعدها كاعده..
تقرب عليها.. مسح ع وجهه.. ايده كلش قريبه مني صارت.. نوب دنك عليها باسهه.. راسه صار يم گلبي كلش.. يمكن حتى سمع صوت دكاته..
الهوى يمكن خلص بلحضتهه.. شال راسه اجت عيني بعينه.. كبل نزلت عيني.. كال اخذيها.. مادري شلون صعدت الدرج بدون لااوكع ولايغمى عليه.. وصلت للغرفه اخذت نفس طويل.. عبالك مثل الي كانو مغططين راسه بالمي وهسه خلو يتنفس...
مادري ليش تخيلت حركته مقصوده.. تذكرت الضباط بالتحقيق شسوو بيه وشلون بدو يساموني ع نفسي. تخيلت هو مثلهم.. واكيد هو مثلهم..
ليلتها منمت لوجه الصبح.. شويه وكعدت.. متعبانه ولا نعسانه.. بلرغم ليلي كله منمته... نزلت وهم لكيته كاعد..
سويت الجاي نوب سويت الكهوه مالته.. شفته كاعد بالحديقه مخلي رجل ع رجل ويدخن جروت.. خليت الكهوه كدامه وردت اروح.. صاح اوكفي..
وكفت وكلبي انقبض.. 
سامي وهو صافن:منو انتي؟ ومنين اجيتي؟
-اني رانيه..
سامي:روحي.. 
عفته ورحت.. متت خوف.. رجليه صارت وحده تضرب بالخ.. شلون اكيد عرف شي وحتى اذا معرف اكيد شاك بيه واله ليش هيج يسألني.. واذا شك اكيد راح يسأل عني وانكشف.. بيومهه سبيت عمري وندبت حضي الاسود.. حياتيش الي انتهت كلها هبطات وحزن وخوف...
سويت الغدا الهم بلا وعي.. تالي كلهم خل نطلع نتغدا بره.. طبعا رغد اجتني وكالت ترحين ويانه.. رفضت ومقبلت.. راحو اني بقيت وحدي بالبيت..
تغديت بلا واهس بس مجرد اقوي نفسي واكدر امشي ع طولي..
من رحت اغسل .. شلت راسي باوعت ع المرايه.. اشوف نفسي عبالك صايره مومياء.. وجهي ضعفان وتعبان.. عيوني من جوه اسود... 
دنكت مأيسه ماريد اشوف حالي وانقهر اكثر.. كافي الي بيه..
رحت صعدت دانام.. نمت شويه.. سمعتهم اجوي.. نزلت اشوف خاف رغد محتاجه شي مني..
شفتها كلش معصبه.. احجي وياهه متباوع بوجهي.. اخذت عهد من ايدها وصعدت.. نوب رجعت ع مجد همات اخذته.. كلبي كلش كام يلعب..
ليش معصبه وليش متباوع بوجهي.. معقوله عرفو شي عني..
صعدت للغرفه وياهم ..العب بيهم واني فاصله عنهم بس مجرد احرك الالعاب وياهم... تعبو نيمتهم.. اني مكدرت اكعد اصلا وره منامو.. بقيت اروح منا واجي منا..
خفت انزل لا اشوفه ويروح يسألني همين منو انتي... كلت انجب واكعد بالغرفه احسن...
كعدو عهد ومجد.. نزلنا جوه.. رغد مابينت.. بس فهد يطب ويطلع من غرفتهم.. نوب طلع سامي وصوت الباب حيل انركع... احس الركعه مال الباب صارت بيه.. 
شفته بدل وطلع.. مشيته عبالك رايح للحرب..شكد كان بيتهم كبير والكراج بعد اكبر بس هو ماشاء الله خطوه اباب المطبخ وخطوه بباب الشارع..
طلع معصب.. مادري شكو.. اني من التوتر كمت كل شي يصير اكول اي اكيد اني سبب المشكله..
بيومهه رغد حتى مطلعت تتعشى.. رحت دكيت الباب صاحت كل صوتهه روحي لحد يدخل يمي.. فزيت من عاطت بيه... اخذت التوم ورحت للغرفه.. بقو يلعبون لحد مانيمتهم... بقيت الوب.. ماارتاح اله لمن يرجع سامي واشوف اذا معصب لو هادي واشوف اذا يحجي او يبقى ساكت..س
ساعات انتظرت وهو ماكو.. تقريبا وره12 يله رجع.. سمعت صوت باب الشارع.. بس مسمعت صوت باب غرفتهم انفتح.. شكله مدخل يمها...
كان صوت بداخلي ذيج الليله يكلي انزلي واحجيله كلشي وانهي هل عذاب كافي بعد.. بس مااعرف شنو الي منعني.. الحمد لله منزلت.. ثاني يوم بقيت اتحمد ربي لان منزلت وحجيت.. عبالك عقلي مجان براسي ذيج الليله...
سويتلهم ريوك كلعاده وبين شغل البيت والاطفال خلص الوقت وتغدو ..
بس انتبهت سامي هم مدخل للغرفه...
اني صعدت لغرفتي وويايه الاطفال.. نسيت ترمز المي الي اخلي بي مي حار خاف اسوي مميات الهم.. نزلت بهدوء داجيبه..
مااشوف بس رغد بسيت النوم وكاعده بحضن سامي وتبوس بس.. كبل درت وجهي ورجعت.. بس همه شافوني.. متت بدمي.. ظليت ادعي ع نفسي شنزلج وشجابج ياعوبه.. 
سمعت صوت باب غرفتهم انسد بعدهه يله نزلت.. اخذت الترمز وصعدت..
سويتلهم ممات ونيمتهم.. نسيت حتى تعبي منهم بسبب الخوف.. 
ماادري شراح يصير بيه منا لساعه.. 
نمت وياهم بدون ماادري.. كعدت للمغربيه.. لكيت رغد بالمطبخ.. مسويه عشا والابتسامه تارسه وجهه..
رغد:حبيبتي.. ممكن نكعد نحجي؟
-اي تفضلي..
رغد:تعالي هنا..
كعدت ع كراسي مال ميز طعام المطبخ..
اني ميته خوف شراح تكول ياربي..
رغد:شوفي حبي.. اني ماانسى تعبج ويايه وفضلج عليه.. بس ..
بس اني مااكدر استضيفج هنا كل الوقت.. تكدرين هلفتره ترحين لبيتج ومن يطلع سامي تجين.. اني اتصل بيج بس عوفيلي رقمج..
دنكت واختنكت خنك.. مااكدر احجي من العبره الي خنكتني..
كوه تمالكن نفسي وكلتلها:بس انطيني مهله يومين ..
رغد:ماشي.. بس من استراحه سامي الجايه ياريت ترحين قبل ليجي.. وكتلج قبل هو ميحب مربيات وهيج امور...
-لا عادي مصار شي..
حجيتها والحزن اكل كلبي اكل.. يربي وين اولي.. فندق مااكدر ابقى بي.. بسهوله انلكي.. كلت خل تخلص هل يومين واشوف حظي وين راح يذبني هل مره.. بديت احضر اموري ع هل اساس.. انطتني راتبي الشهري .. واني مناك زايد عندي من فلوس عمتي..
كلت امشي حالي بيهن بين ميروح السيد سامي.. كعدت وره يوم.. خليت الها ورقه كتبت بيها ارجعلكم بعد اربع ايام.. وكانت الاربع ايام تقدير من عندي لروحه سامي.. لان مااكدر اطلع بدون ماانطي موعد لرجعتي وولا اكدر اعوف رقم تلفون منين اجيبه..
طلعت ومادري وين اولي.. يابيت الي ادكه ويستقبلني؟ خطر ابالي ارجع لبيتنا.. منها اعرف خبر اختي ومنها اكعد هناك.. بس استصعبتها لان مسافه هوايه وصرفيات تصير عليه والاكثر ترددت من كلام عمتي نضال..
حذرتني اوصل للبيت.... بقيت امشي لحد ماوصلت للشارع الرئيسي..
اخذ تكسي لو مااخذ؟ واذا اخذت شكله وين يوصلني؟ 
ظليت امشي حايره بزماني.. اباوع ع الناس واكول نيالكم تمشون ع طولكم.. كلت اروح لفندق ليله وحده.. وثاني يوم يحلها حلال..
رحت للفندق وداسجل يم موظف الاستقبال مااحس اله ذراعي نلزمت حيل.: التفتت كان سامي.. متت بدمي.. كان ميباوع بوجهي وبس يباوع للشارع وللموظف..
سامي:اخي بطلنا منريد حجز.. رجعلها هويتها..
رجع الهويه.. كبل اخذها منه.. هنا شوصف حالي..
ظلت لازم ذراعي لحد ماوصلنه ع سيارته كبال الفندق.. فتح الباب وشمرني شمر بالسياره..
كبل شخط السياره شخط.. ماللحك حتى اشوف السيارات والناس.. واصلا اني ياعقل الي بقى عندي حتى اباوع واركز...
السياره باقيلها شويه واطير يمكن.. احس الطريق صار مو عدل.. اي طريق ترابي.. انتبهت اكو اشجار وبساتين هوايه... دخلنه بواحد منهن... اشر لواحد كان بالباب سده.. اكو كان داخل البستان بيوت.. طبك السياره كبال واحد منهن... بقيت جامده وكاعده بمكاني.. شديصير ياربي..
بدون ميحجي اي شي.. فتح الباب وجرني جر...
فوتني ع البيت.. نوب لوحده من الغرف.. قفلها ...
اني حصرت نفسي بزاويه الغرفه... اقترب مني بخطوتين بس..
لزم وجهي بايد وحده.. خله وجهي كباله... عيونه تتوعدلي قبل لسانه.. 
سامي:سؤال واحد وماكو غيره.. جاوبيني علي.. منو انتي ومنو الي دزج؟
بجيت وصوتي رجف كوه طلعت مني:اني رانيه.. دزتني نضال..
دفع وجهي من ايده.. نوب رفع ايده وكل قوته ضربني راشدي.. ماادري شلون ماانشل وجهي ع ضربته...
سامي:احجييييي! لتخليني اتعامل وياج بغير اسلوب ميعجبج ابد..
وكعت للكاع.. اصلا ماكو قدرة اتحمل ابقى واكفه.. اديه ورجليه صارت ترجف... عيوني صارت اطلع جمر ومنا صفحة وجهي طايره...
صحت كافي ياعالم ارحموني.. مالي ذنب والله... كافي.. موتني وخلصني 
مااسمع بس صوت سحب اقسام المسدس.. شلت راسي لكيته مخليه بوجهي.. الي يشوفه ماكان يتخيل انه راح يتردد ويعوفني بدون ميقتلني...
سامي:اقتلج بس كولي منو انتي ومنو دازج ادخلين بيتي!
بديت ابجي واحجي.. حجيتله كل شي.. بس ماوضحت الحقيقه واني مظلومه.. كتله اني مجرمه اني قاتله اني قتلت امي وابويه وعرفت نضال بالسجن وشردت ..
شالني من شعري بايد وحده.. وخله المسدس ع حنكي.. 
سامي:احجي مثل الاوادم خل افتهم! ماعندي وقت اظل اجر الحجي منج جر..
لزمت ايده حتى يخفف عن شعري.. 
-ابوس رجلك اقتلني خلص.. ماريد اعيش.. اقتلني اساسا اني انحكمت اعدام..
سامي:لج شتحجين انتي؟ 
-بس اقتلني كلشي ماطلب منك.. ماريد شي بس موتني اريد ارتاح ..
لزم شعري اكثر بدون رحمه وصاح:احجي عدل واله راح ابدي اعذبج!
اني كنت فاقده وبس اكوله موتني موتني.. مااحس اله اجاني بوكس ع وجهي .. حسيت شي حار نزل من خشمي.. تلمست طلع دم... 
سامي:اذا متحجين راح اسكطج كتل هنا... احجيلي منو انتي وشنو غايتج؟
بديت ادوخ وخشمي ماوكف دم.. كنت ارفع راسي اريد يوكف ماكو... 
رجع انطاني ركله برجله.. صارت الضربه ع فخذي.. احس نفسي كمت مااستوعب الي يصير.. دوخه فضيعه صارت براسي والظلام كدام عيني..
صحيت ع كفخات منه وراش مي ع وجهي..
سامي:هاي دروبج مو عليه.. تعرفين منو الي كدامج لو لا؟ لج عرفتج من عيونج كذابه وشغلتج مو خاليه! احجي لا قسما بالله اكسر عظامج..
اشرتله بيدي مثل اي يصبر عليه حتى اكدر احجي.. شمرلي كلنس من جيبه اخذته مسحت الدم بي.. 
عدلت كعدتي.. طبعا الغرفه متروكه وصايره عباره عن ترابه... توصلت تلوص.. بديتله قصتي من اولها.. حجيتله عن اهلي وعن اختي وبيت عمي.. عن كل شي مريت بي.. عن الجريمه والسجن والسنه الي خلصتها بي عن نضال ... كنت احجي واشهك بجي.. هو يروح ويجي بالغرفه ومسدسه بيده.. بس طبعا احسه ممصدك الي اكوله..
طلع من الغرفه وقفلها من بره.. اني كبل ركضت ادك ع الباب واعيط لتعوفني دخيلك.. لتعوفني اموت هنا... 
خله وراخ.. شكد دعيت علي بذاك اليوم.. صارت ظهر واني وحدي.. اصيح ومحد يسمع.. تعبت من الصياح.. اباوع من الشباك الشارع بعيد عن البستان وماكو ولا بشر بالبستان... صارت مغرب.. هنا اني انقبضت روحي.. اصلا هو وقت المغرب يزيد وحشه الروح... وبمثل وضعي شنو تتخيلون حالي..
بدت ايدي ترجف.. خوف وقلق.. بردانه ووحدي بمكان مكطوع..
اعيط بين لحظه والثانيه محد يسمعني..
غمضت عيني ومااعرف نوم لو فقد وعي.. ع الاغلب فقد وعي.. لان صارت عندي رجفة قبلها كلش قويه... ماصحيت اله لثاني يوم.. كانت الشمس طالعه.. بعدني وحدي.. كبل ركضت ع الشباك اريد اشوف بلكي احد اصيحه ينقذني.. صرخت بصوت عالي.. ايست .. كمت ابجي واصرخ من الشباك.. ربيييي دخيلك شنو سويت وهيج تعاقبني... ربييي اني هم من عبادك ... 
تمددت بالكاع وبقيت ابجي.. مرت الساعات وعطشت وبردانه.. سامي مااجه وايست منه اصلا.. بلاوعي مني بديت اضرب ايدي بالحايط.. تملخت وعظام ايدي صارت توجعني.. لو كان اكو وسيله بذيج اللحظه اموت نفسي بيها ماكان ترددت ابدا...
تحركت بالغرفه حتى ادفي نفسي.. هو الجو مو كلش بارد.. بس اني بردت من الهم الي مريت بي...
بكل حايط بالغرفه ضربت راسي اكثر من مره.. احس راسي كام يفتر.. ردت اموت نفسي باي طريقه.. استعجل بالموت وماانتظره ع البطيء..
لحد ماوكعت من طولي.. محسيت ع شي بعدهه...
بديت اصحصح حسيت نفسي بسياره دتمشي.. بس ممتأكده من هل شي.. مثل حلم اليقظه.. ساعه اكول داحلم وساعه اكو لا هاي حقيقه...
اريد ارفع نفسي واحرك جسمي مااكدر.. بس اشوف ظلام.. بديت اشوف اضويه مال شوارع.. كدرت اكوم.. كعدت ع حيلي جسمي مكسر تكسر..
باوعت للسايق.. كان سامي..
عطت بي ليش ماخليتني اموت! ليش! انته مابكلبك رحمه؟!
هو كان ساكت محجه شي.. وكفت السياره.. فتحلي الباب جرني من ذراعي بس ع كيف...دخلنا ابيت.. كان صغير وع كد حاله مو مثل بيتهم...
فوتني للحمام.. كال غسلي...
غسلت وجهي واديه ورجليه... كان المي يخليني اصحصح اكثر وارجع اتذكر السواه بيه...خاصه ايدي صارت تحركني من المي.. ع كد ماتزلغت
طلعت من باب الحمام لكيته بوجهي منتظرني...
-تريد ترجعني للسجن مو؟ رجعني هسه وخلصني..
سامي:كافي تلغين!
-هه هم انته عليه؟ تره اعرفك واعرف نماذجك! كلكم تفس الخرا!
مو طبعي اتهجم ع شخص بس مادري شنو صارلي وفقدت بالحجي علي.. لحد ما انركعت راشدي لخ... فقدت اعصابي اكثر وصاركل جسمي ع نفس الرعشه مو بس اديه... دموعي تصب واحجي واغلط حتى سبيت اليوم الصرت بي .. حتى كفرت بلحظتها.. مراح يفهمني بس الي يمر بحالتي.. وااتمنى مااحد يمر بيها ابد الابدين... 
اتذكر حتى فشار فشرت علي وع نضال وع اهلي لان جابوني للدنيا...
مااحس اله اديه اثنينهن حوطني وضمني اله حيل.. دفعته وضربته ع صدره بس ماكان يتأثر.. عبالك جبل واكف.. استسلمت واصلا حيل مابيه...
بقيت ابجي بصوت مبحوح وهو يهمس باذني اششششش... كافي كافي...
كان كل جسمي يهتز.. مكدرت اسيطر ع الرعشه البيه.. هو كام بي وميشد جسمي اله... حركني خطوات.. نمت ع القنفه.. جابلي بطانيه غطاني بيهه .. درت وجهي ودموعي تصب بعدها.. ظليت ابجي والرجفه مفاركتني بليلتها...
لحد مانمت.. نمت للصبح.. كعدت ملكيته.. افتريت بالبيت.. ماكو.. شفت الباب مفتوح.. فكرت اطلع وانسى هاي الفتره المريت بيها وارجع للسجن منين مااجيت... شي لزمني.. يكلي لطلعين.. لتجازفين مره ثانيه..
بقيت بالبيت.. لافه نفسي بالبطانيه افتر.. جعت رحت ادور شي .. لكيت علاكه.. فتحتها كانت حلويات وعصير ومي.. كبل اكلتهن... 
شويه هديت وخفت الرجفه هوايه.. رجعت تمددت.. احس حمل ووكع من عندي من سامي عرف الحقيقه.. ميهمني شيصير بعدهه.. يرجعني للسجن يقتلني.. المهم خلصت من القلق...

يتبع..
#وجع_ذكريات