وجع ذكريات

الجزء الاول

nada hs
الجزء الاول...

نزلت من الريم وخليت جنطتي مال السفر بچتفي والجنطه الشخصيه مالتي بايدي الثانيه... مشيت خطوات متثاقله كوه اجر بنفسي... اباوع ع الشارع فارغ مابي بشر..اثنين تلاثه بس الشفتهم...هدوء وجو كئيب..مادري ليش هيچ حسيت..بالرغم اني اليوم راجعه من بغداد ومخلصه اخر امتحان اليه بمسيرتي الدراسيه..بليل جهزت جنطتي بلقسم وودعت صديقاتي هناك.. عرفت بعد منلتقي واخر المشوار وصلنا.. 
وصلت للفرع الي قبل فرعنا..اباوع ع البيوت بصوره عجيبه..تعجبت من نفسي..عبالك اول مره داشوفها..
دخلت براس الفرع مالنه..من بعيد شفت سياره ابويه..قديمه وع كد حالهه.. ابتسمت لا ارديا من شفتها.. قربت كلش..فتحت الباب كان اكو سيمه مطلعيها من زرف من الباب..بس نجرها ينفتح الباب.. دخلت احس براحه.. اسرعت بخطواتي حتى اشوف امي وابويه واختي زينه...
لگيت امي بالمطبخ..شافتني اجتني تركض واني هم ركضت الها.. شبگتها وشميتها حييييل...كلش مشتاقه الها... صار شهرين منازله..امتحانات وشوي صعبه يوميه رايحه وراجعه.. زينه ع صوتنا اني وامي اجت.. بوستها وتحاضنه ..نوب ابويه.. بست راسه وهو سحبني اله حيل... تحمدولي ع السلامه وطمنتهم عن امتحاناتي.. ماكو موبايلات بذاك الوقت..يمكن مره بالاسبوع كنت اتصل بيهم ع الارضي ...
كعدت بالصاله..مددت اديه ورجليه بتعب.. البارحه منمت..شي ضرب ع شي ..تخرج ! شوق لاهلي! ضايجة ع صديقاتي.. الزواج الموعوده بي من ابن عمي عامر..هوايه بقيت افكر..منمت براحه..وكعدت من الصبح طلعت للنهضه وهوسه.. السيارات وصياح وعياط السواق والطريق لعبت نفسي بي ع ما وصلت الكراج.نوب طلعت للشارع العام صعدت ريمات.وهم هوسه وهاجً كروه وجيبي باقي.. كله دوخني.. 
جسمي تعبان واحتاج حمام بمي بارد اتنشط.. طلعت ثوبي الكشمير .. دخلت للحمام ..احس شويه فرحت وتغير مودي بعد ماشفت اهلي وصرت بنصهم..
اهلي همه بس امي وابويه وزينه.. اني الكبيره.. ورايه زينه وماعدنه احد بعد.. ابويه معلم..راتبه ع كد الحال..امي كانت تخيط للشارع وللاقارب وهم تسد من مصاريفنه شويه.. زينه صف خامس اعدادي.. امي دائما كانت تكول تمنيت يكون الجن اخو يحميجن من الدنيا ومن تغمض عيني ارتاح ..
مااهتمينه للاخ..بس احنه متونسين..ماعدنه لا مشاكل ولاشي.. ماعرفنه حچايه امي بمحلها... 
طلعت من الحمام لكيت ماما محضره صينيه اكل ومخليتها بالصاله ومشغله التلفزيون ع الشباب والمبرده مطفيتها تخاف عليه لانو ستوني غاسله..
ابتسمت للي شفته..ماكو مثل الام وحنيتها.. كالت
ماما:تعالي مامه.. اكلي وبعدين مشطي اكيد جوعانه..
زينه:والله اني همين جوعانه.. ليش مصبيتلي ماما؟
-لج والله عياره انتي! ولي خليني اشبع من طبخات امي.. 
كعدت بالكاع ع حصيره وتلفزيون كبالي ع ميز صغير.. امي تسألني عن حالي وحال البنات الي ويايه.. هي تعرفهن من كد مااسولف بيهن.. 
اجاوبهه وعين عليها وعين ع التلفزيون والاكل.. كملت وزينه اخذت المواعين غسلتهن وبقينه اني امشط وامي نسولف.. حسيتها بس تريد تفتح موضوع ابن عمي عامر.. لحد ماكالت..
ماما:رانيه مامه.. بيت عمج يمكن باجر يجون..
-شبسرعه ماما! وبعدين اني مو كلت بلغوهم اني مموافقه ولو يموت مااقبل بي؟!
ماما:يا بنيتي تظلين عنيده؟ ليش عامر شناقصه؟ احسن من حالنه بالف مره 
-وشبي حالنه؟ والله كلش عاجبني حالنه وان شاء الله اتعين وهم اساعد بلمصروف.. مامه عامر موطبيعي والله.. مادري شنو احس بنظراته!
ماما:غير يحبج؟ لعد اليحب شون يباوع؟ كليلي بالله شلون يباوع؟هاا؟
-نسيتي شلون جان يضرب امه؟ والله لو يبقى بس هو مااخذه.. شنو جبر هي خوما جبر؟!
ماما:لا مو جبر.. خليج براحتج.. ويعيروني بيج!
خلت وكامت مني..خلتني صافنه ع كلامهه.. يعني عامر احسه مو طبيعي مادري شلونه.. من هو صغير اتذكرله يضرب امه ومره شمر عليها چفچير التمن شگ كصتها وصارت دمايه ماانسى ذاك اليوم ابدا... مااعرف امي وابويه شلون مقتنعين بي وعايفين كل عيوبه ويفكرون بس بفلوسه؟
مااهتميت لردة فعل امي.. طبيت لغرفتنه اني وزينه.. لكيت فراشي مرتب والغرفه نظيفه.. المنظر وحدة كافي يريح العين والبال.. ذبيت نفسي ع فراش.. والتعب سره بجسمي كله..نمت.. كعدت حرانه..وعركانه.. كهرباء طفت.. ودنيا ظلمه.. احس روحي دايخه.. مشيت خطوات واني مقدمه اديه ليكدام حتى اندل الطريق.. من جوه الباب شفت ضوه خفيف.. عرفت هاي اللاله..لكيت امي بيدهه ثوب وتشتغل بي.. زينه امدده ع بطنها وبيدهه جريده.. ابويه مشغل الراديو ويسمع اخبار..بلرغم الضوه كلش خافت اهلي متصرفين عبالك اكو كهرباء وعادي..صوت الاخبار هو الغالب.. رحت كعدت يمهم..
زينه:صح النوم.. زين وكعدتي؟
-تعبانه ولج.. 
بابا نصه الراديو وكال:اني طالع.. تردون شي؟
زينه:اي بابا والله حرانه ومشتهيه باش..(عصير)
بابا:صار.. رانيه؟ شتردين؟
-هاا.. بطل ببسي وشويه حب بابا..
ماما:هسه وكتها! راح تصير 11 !
بابا:اي شعدنه.. خليهن يتونسن..
طلع ابويه وامي ظلت متنكه عليه وسكته.. مااعرف ليش تريد تنذبني هيج..
حاولت احجي وياهه افتح موضوع ماكو.. تجاوبني اي لو لا وتسكت.. اخر شي مليت..بقيت اسولف ويه زينه وحلينه كلمات متقاطعه.. اجه ابويه وشربنه وكرزنه حب وبعدنه نسولف.. هي تسولف عن صديقاتهه وعن الامتحانات مالتهه ومشاريعهه للسادس واني همين اسمع منها واجاوبهه هوايه سولفنه ذيج الليله.. امي وابويه راحو لغرفتهم نامو واحنه مستمرين نسولف .. صارت ب1 واجت الكهرباء.. 
-لج زوينه.. متخيلنا انام هنا ع المبرده؟
زينه بفرح وحماس:اي والله.. ابقي هسه اجيب فراشاتنه.. 
جابت الفراشات وتراوسنا حته اثنينه يجينا الهوى.. كصيبتها صارت يمي .. طول مانسولف اني اضفر اطراف كصيبتها وارجع افتحها.. ماكو شويه وطفت الكهرباء ورجعت حارة.. بس مو مثل حر هسه.. لالا هوايه افضل من هسه.. يعني واحد يكدر ينام .. رحنا اني وزينه اخذنه الغطيات مالتنه الي مخصصيها من تطفى.. قماشهه ململ يسمو .. بللناهن وعصرناهن حيل.. خلينه باب الترك مفتوح شويه حته يجينه هوى.. من تغطينا صارت تجينا نسمات بارده .. مانمنا اله للفجر.. بعدها مادرينا حر برد.. كعدت لكيت الساعه ب10 صبح.. امي تسوي غده وبابا ماكو.. صبحت ع امي وهي بعدها ع نفس الطنكوره وياي.. سويت الي ريوك..كعدت زينه وتريكنه سويه كملنا وكمنه نظفنه البيت والحديقه.. بيتنه ع كد حاله 120 متر.. بي غرفتين صغار جوه.. وحده لامي وابويه ووحده النا.. بايام الشته كلمن بابه مسدود علي.. بس بالصيف نبقي البيبان مفتوحه حته يدخل هوى المبرده مال صاله للغرفتين وهنه صفه..
اتغدينا وكل شي ماشي عادي..حتى اهلي راح منهم حماس البارحة .. من استقبلوني كلش فرحانين وطايرين بيه..اليوم مر عادي كانو من زمان اني يمهم ومكنت مفاركتهم... الظهر نمنه شويه اني وزينه .. تعبانين من سهره البارحة والسوالف الحلوة..
كعدت العصر قبل زينه..مشيت كوه..احس جسمي مكسر تكسر.. شنو هل تعب الفضيع الي طلع بيه..حته مالي خلك احجي ولا اسوي اي شي.. رحت للمطبخ..حميت الچاي ودورت ملكيت لا كعك ولابسكت.. شربته ع الناشوفي.. ماما اسمعهه تنظف بالحديقه وبابا يسولف وياهه.. ابتسمت وحدي من سمعت صوتهم مثل البلابل يغردون... فجأة تغيرت السالفه اسمع اسمي انجاب.. عدلت كعدتي ومسويت اي حركه حته اسمع زين..
بابا:حچيتي ويه رانيه؟
ماما:اوف اوف لذكرني! بنتك قافله .. واني ظاله بس الفشل وي العالم..
بابا:هاا..
ماما:والله كله منك! انت انطيتها مجال زايد وخليتها تروح كليه وابغداد وهناك طلعت عينهه علينه..
بابا:شتحجين ياعيني.. لعد اعوفهه بلا دراسه؟ خلص اذا متريد عامر مراح اجبرها ع اي شي..
ماما بزمخ:اوي! منك لبنتك! هسه اني شعليه مدوخه راسي!!
فرحت من سمعت كلام بابا.. شوي احس الضغط عليه خف .. 
والله قبل المغرب بشويه..تقريبا بدت الشمس تسلم.. اسمع صوت الباب اندك وصوت بابا يرحب ويسلم.. عرفت هم بيت عمي.. كلت بداخلي.. شنو حته مالحك ارتاح شويه البارحه رجعت! دخيلك ربي؟!
دخلهم ابويه للخطار.. وامي بعد ماسلمت عليهم اجت يمي.. سوت چاي وحضرت الدولكة ىكلاصات المي..
ماما:هسه شيصير لو تقبلين؟ والله اخاف عليجن من الوكت والدنيا كل شي بيهه.اني وابوج مدايمين الجن!
-مامه.. سمعت هل حجي منج الالاف المرات.. كافي الله يخليج.. 
زينه:شكو شبيكم؟ منو اجانه؟
-عامرالغثيث وابو..
ماما:عيب هذول عمج وابنه! استحي شويه..
صبت الچاي وراحت يمهم.. اني دخلت الغرفه مهتميت شراح يحجون.. اصلا راسي بارد من ناحيته ذيج الايام.. زينه اجتني تركض..
زينه:لج سمعت عمي يصيح! يمكن تلاغو هو وبابا!
كمت وياهه..رحنه يم باب الخطار حته نسمع.. بس ملحكنه ع شي.. اخر كلمات سمعناهن عمي يصيح (هاي تاليتك! بنيه ماكدرت تقنعهه! وتكشي حجايتهه عليك! شوف اذاا مااخذت عامر ماتطلع من بيتك اله لكبرهه!)
اسمع صوت ركعة بابا الاستقبال ونوب باب الشارع... يبووو هسه اني عايزه ..مصدكت ع الله اخلص من الدراسه ارتاح شويه..طلعتلي سالفه الزواج.. 
ضميت راسي بالغرفه ومطلعت ابد.. مااريد اسمع امي ترجعرتضغط عليه لو اشوف ابويه غير موقفه من حجي عمي.. لليل مطلعت..لحد مصاحتلي زينه تعالي تعشي.. احس الكل متنك عليه وسكته..ابويه اريده بس يرفع راسه ويحاجيني ماكو... كوه كمت امد ايدي واخلي اللكمه بحلكي..فشلانه من بابا واول مره هيج يعاملوني..اني الشبعت دلال منهم وصارولي خد وعين هسه اشوفهم متنكين عليه...
وره العشه ووره مكملنه المواعين ونظفنه المطبخ.. طفت الكهرباء.. طلعنه للحديقه ..امي راشتها وراشه الحياطين والنبگايه من عصر..الريحه مال تراب والمي تجنن.. فرشت امي الفرشه المتعودين نكعد بيها بلحديقه.. الكعده هاي جانت فرحتي وتسوه الدنيا ومابيها.. بس بذيج الليله ومن اشوف وجوه امي وابويه مااحس نفسي مرتاحه واكدر استمتع واخذ راحتي.. كعدنه سكته.. حته زينه محجت.. شويه ونسمع اصوات جيرانه.. متعودين من تطفى الكهرباء كلمن يطلع فراشه بالباب ويكعدون.. ويبقون هذا الي يدز شربت للثاني هذا الي يجيب حب عين الشمس ويكعد يكرز .. هيج جانت الناس متعوده وواحد يحب الثاني.. ابويه سمع صوت اصدقاءه.. خله وطلع.. احنه ممتعودين نكعد بره.. من شبينا بعد امي مقبلت ع هاي الكعده.. 
بعد ما بابا فتح الباب وبقه واكف ونسمعه يسولف ...
ماما:ولج شوفي اليوم شلون قهرتي ابوج؟ انتي لشوكت تظلين تعاندين! كليلي اذا عندج شي او حابه واحد احجي! احجي لتضمين ع امج!
-مامه منين جبتي هل حجي؟ شنو احب شنو اضم عليج؟ اني ممفكره بزواج هسه..وخاصه عامر لو يبقى بس هو بالزلم مااخذه..
زينه:مامه صدك تره مو غصب هي محابته وخلص..
ماما:انتي انجبي محد طلب رأيج! 
-خلص مو كال عمو لو تزوج عامر لو تبقى بدون زواج.. اني افضل ابقى بدون زواج..
ماما:ولج افتهمي ! انتن وحدجن ؟! منو الجن اذا متنا اني وابوجن! ولج هو ابن عمج! غصبا ما علي يحير بيج وباختج.. يبقه من دمنه ولحمنه..
اخذت نفس طويل وذبيته.. احس مخنوكه.. امي هوايه لحت عليه.. مفهمت اني مااريده مو كوه.. بس هي مصره اله تخليني اعكر مزاجي واضوج.. واني ادري لو شما يسوي عمي اني مااقبل بي..
مرت 3 ايام..وامي ع نفس الحجي يوميه.. كل متشوفني تفتح الموضوع.. كمت مااطلع من الغرفه حتى اخلص .. بس مفاد.. صارت هي تجيني.. ولوك لوك ومن هل حجي.. ياريتها يمي واسمع منها هسه.. المهم.. رابع يوم ع جيه عمي الاولى.. صادف يوم جمعه.. الصبح..
كاعدين اني وزينه نخلي دكم لثيابنه الي سوتهن ماما النه.. مانشوف بس مريه وواكفه ع راسنه.. كانت مرت عمي.. كمنا وسلمنه عليهه وبوسناهه.. اني روحي طالعه منهه..هي تكرهني وتكره امي.. لان بابا اتزوج امي عن حب وعيالهه حبوهه وماقصر بابا وياهه بشي وشجعو يتزوج ع امي حته يخلف ولد او ع الاقل بنيه لان ماما عدها مشاكل بالخلفه بس مكانت تحجيلنا شنو المشكله..مو مثل هسه عادي الام تحجي لبنتها كل شي..كان اكو حدود بهل الامور.. من بلغنا امي علمتنه ومتنه خجل منها بيومهه.. وذاك يوم وهذا يوم محجينه بهيج مواضيع ابدا..
نرجع لليوم الي اجتنه بي مرت عمي.. كعدت يمنه بالصاله.. ماما طلعت من الحمام سلمت عليهه.. اني وزينه رحنه للمطبخ.. بحجة نسوي جاي فلتنه منهه منحبها.. مديت راسي من باب المطبخ شفت شحاطات اثنين.. عرفتهن مال عمي وعامر.. عمي يمكن من زمن جدي عنده هاي الشحاطه ومحافظ عليها وع نفس شكلها من وعيت ع الدنيا لهسه.. يجوز كان ميغير موديلها واني عباي نفسها ؟ بعد مااعرف.. المهم احنه نعرف عمي من شحاطته ..
كملت الجاي وصبيته.. وديت لمرت عمي وامي.. وصينيه لخ للزلم يم بابا.. كعدت يمهن..وبدن يحجن وشنو العيب وليش ووين الخلل وشنو الي يسعدج واذا رايده مهر وفلوس ووووو.. هوايه حجي .. كاعده ع اعصابي اني.. حته نص الحجي مسمعته اصلا.. بس اتذكر نظره امي بذيج اللحظات جانت تتوسلني اقبل واحسها تكلي اي قبلي ولتفشليني وتخلينهه تحجي بيه...
رجعت مرت عمي كالت:ها؟ شكلتي؟
-خاله..اني مااريد زواج هسه.. مو جبر هيه.. ابنكم الله يحفظه يستاهل وحده احسن مني ..
مرت عمي خنزرت علي وحجت بملامه:هي هاي كدرتج؟ مو ربيتي نص عمرج يمي ؟واكول شوكت ازوجهه لعامر؟ 
دنكت وسكتت.. شحجي وشرد عليها؟؟!
رجعت تمدح بابنها وتسوي مثالي وهيج سوه وهيج طلع.. وهي لهسه اثر الضربه بكصتها... يعني مو بس لانه ضارب وامه وعدائي مااقبل بي.. هيج اني كشخص مااحبه ولااطيقه وماممكن اتخيله زوجي ولا باي حال ولااي ظرف...
خلصت كلامهه ولفت عباتهه وراحت هي وامي يم الزلم.. اني من لزكولي عامر بالزواج كمت ماادخل ولااشوفه.. قبل لاكنت عادي اسلم علي هو واخوانه وتصير سوالف عاديه ونحجي.. 
اشو شويه ورجعن امي ومرت عمي.. امي ركضت لغرفتي طلعت ربطه وخلته ع راسي وهو اني اصلا مكنت محجبه.. بس مااعرف ع شنو خلتها..وبدت تدفع بظهري يله يله...
-شكو؟ شكو؟ مامه فهميني شكو؟
مرت عمي هي جاوبتني بالرغم اني اباوع بوجه ماما وانتظر الجواب منهه: عامر يريد يحاجيج..لتخافين مراح ياكلج!
من ايدها لايد ماما دفعني ودخلني كوم.. باوعت ماكو بس عامر ومدنك راسه.. ع صوت فتحة الباب رفع راسه.. اشو ذني طببني وسدن الباب .. حته عمي وابويه ماكو..لابيه ارجع ولابيه اتقدم خطوه..
كام عامر من مكانه وتوجه يمي..
عامر:وعليكم السلام؟! تعالي دنحجي كلمتين..
-تكدر تحجي!
سحبني من ذراعي واحس حته لزمته قويه كلش.. شويه ويكسر ايدي يمكن..
عامر:لا تعالي اكعدي.. اريد افهم شنو سبب رفضج؟
-مو غصب! مااريد زواج...
عامر وعيونه كلها حقد عليه:هاا؟!! يعني متحبين احد ومنتظرته؟
-استغفر الله؟! منين الك هل حجي! كافي تسفط من كيفك.. اني زواج مااريد لو ابقى عمري كله مااقبل بيك!
لزم كف ايدي وعصره حيل.. شهكت وصحت:اخ! عوفني دتوجعني!
عامر:الج مهلة منا لاسبوع.. يا تقبلين! لو راح تتمنين يرجع هذا اليوم وهاي اللحظه بالذات وتبوسين رجلي وتقبلين وانت الممنونه!
-عوف ايدي! انت ماعندك احساس! متفهم بالكلام! داكلك مااريدك يابني ادم مااريدك! بدون ماانتبه عله صوتي واجن امي ومرت عمي.. هو رأسا فلت ايدي ودنك راسه..
مرت عمي:شبيكم ليش صوتكم طالع؟!
اني خليت وكمت منهم رحت للغرفه..حسيت روحي اختنك! يعني ماصارت عطله ولا صار تخرج تهنيت بي؟! وين كانت الي هاي؟ اوووف.. 
اجت زينه وهم ظلت تريد تعرف ليش صوتي طلع وشحجينا.. اختصرتها وكلت ..زينه كافي لتحجين مالي خلك اجاوبج! بين ماكملت حجايتي
اسمع باب الشارع مالتنه انركع.. عرفت بيهم راحو.. بكلبي دعيت عساكم لا رجعتو ولا ذكرتوني... ظليت طول اليوم بالغرفه .. احس راسي راد يطك من الالم.. عيوني رادت تطلع.. الكاع تفتر بيه.. طلعت لامي وكوه احجي.. ردت منها براسيتول صاحت بيه ماكو! 
رجعت للغرفه وبعد مطلعت.. لثاني يوم اني اتلوى من وجع راسي .. ومحد اهتم بيه بس زينه.. خطيه لكيت كمادة ع راسي الصبح من كعدت.. تمنيت من اكعد اكون حلمانه ومصار الموقف ويه عامر ولا اجو اهله ولا حجو بيه.. كمت تريكت وساعدت بتنظيف البيت وامي متنرفزه مني كلش.. واني اشتغل.. خطر ابالي اقبل واخلص من نظرتهم الي ومن حجي بيت عمي .. اي اي اقبل احسن حل..حتى اذا مكنت سعيده ويا اقبل..المهم رضا امي عليه
بس مابقت هل فكره ابالي اله ايام معدوده.. بعد شي تلث ايام لكيت نفسي بنفس فكري الاول.. ماريد عامر لو يبقى اخر شخص.. وركبني عناد مو طبيعي ردت اسويها تحدي وياهم.. كلت وين توصل خل توصل مو اني الي انجبر.. تعبت ع نفسي وتغربت عنهم بدراستي وردت اكون مستقبل تالي اروح بكل سهوله لواحد جاهل ومتخلف .. حته دراسه ممكمل سادس ابتدائي وياريت متوقفه ع الدراسه.. شكو شغله موزينه موجوده بي..
تقريبا ورا اسبوع من جيتهم عليه وشوفه عامر.. اجتني امي وهمين فاتحتني بالموضوع.. وبنفس الطيبه الي تبدي بيها حديثها كل مره ونفس الكلام المعسول والحلو بلكي تقنعني اقبل يمكن عبالهم اني طفل وينضحك عليه..
مخليتها تكمل .. قطعت كلامها..
-لو تنطبق السما ع الارض مااقبل وهذا اخر كلام عندي وكافي تضغطون عليه تره مليت وصلت لهنا عندي!
خزرتني امي وهزت براسه مثل الي يكول ياحيف.. كامت مني.. شهكت بنفس طووويل.. شوكت اخلص من هل سالفه.. 

يتبع..