وجع ذكريات

ج 13

الثالث عشر

اخذله صفنه شويه.. رجع عاط.. انتي راح تخبليني! طلعتي روحي كااافي! الج عين تعيطين بوجهي! لج اكسر راسج افتهمتي لو لا! مو تردين تمشين كلامج عليه! 
-وانته منو؟ وليش تفرض نفسك عليه! خاف شايف نفسك تفضلت عليه بالايام الكعدتهه يمكم والراتب مالتكم! كله ارجعه ممحتاجتلك!
مااحس اله راشدي بكل قوته ضربني..وغلط عليه بكل الي اجه بلسانه...اني منا صايره نار.. وهو مااعرف شيريد وين يريد يوصل ويايه.. يستعبدني لو يحبني لو شنو!
كمت اضرب ع وجهي والطم واصيح ليش تضربني ليش! .. هو يباوعلي ومثل الصخر متحرك بي شي.. اني زدت بالزايد.. صرت اخرط ببلعومي وصدري.. بحيث كمت مااحس بالالم من ازلغ بنفسي..
انتهيت كلش فقدت... وكعت للكاع.. ظليت ابجي وهو كاعد كبالي.. يتأمل بيه مثل الي يتأمل بمنظر حلو.. يمكن منظري حلى بعينه..
شويه وكام من مكانه.. اجه يمي.. خله راسه كبال راسي.. كال..
سامي:كافي.. تره كوه لازم اعصابي عليج.. يله كومي غسلي وتصرفي كأن مصار شي.. نسيني وانسي!
عطت اريد احجي.. كبل خله ايده ع حلكي..
سامي:كومي.. لتحجين شي وتخليني افقد عليج! كومي غسلي ..
سندني وكفت ع حيلي.. اريد ابعده عني وامشي ماكو.. بقى ساندني الى ان وصلت الحمام.. دخلت اباوع ع نفسي بالمرايه وكل حسره تطلع مني هلكدها.. شسويت حتى هيج اتجازه.. كل هذا المريت بي وبعدني موصلت لراحه! مكتوبلي العذاب كل عمري..
طولت بالحمام.. فاتحة المي وابجي.. عاط اطلعي فضيها!
غسلت وجهي ع السريع .. طلعت.. بقى يتفحص وجهي زين.. 
سامي:لتتخبلين مره ثانيه وتعيدين الي سويتي ..
ماحسيت بنفسي اله واني بين ادي.. حضني حيل.. ردت ابتعد عنه بس مكدرت.. كل جسمي انشل.. محتاجته من زمان.. 
همس باذني:تحمليني شويه هل فتره.. مداكدر اضبط اعصابي.. 
خليت اديه ع ركبته وحضنته حيل وبجيت.. ..
-احبك.. اموت بيك.. لتهملني واتحمل كل شي منك.. اني تعبت.. وانته راحتي..
بعد راسي عنه.. وطبع ع عيوني بوسه.. ع كل عين بوسه.. 
سامي:كافي هل عيون الحلوه هوايه بجت.. ريحيهن شويه.. 
رجع ضم راسي لصدره.. احتاجك عمر.. مو لحظة ولا يوم.. 
ماردت تنتهي هل لحظه.. تمنيت اغمض وهنا ينتهي عمري.. 
اخر شي بعدني شوي عنه وكال.. روحي لغرفتج.. موزين الي ديصير.. لا عليه ولا عليج.. اني كبل كمزت بطفرتين للدرج للغرفه..
ممصدكه الي صار.. احسه رجعلي.. يمكن طلعتي بيها خير كانت.. 
فرحانه وفرحتي متنوصف.. مفكرت لبعيد .. كل همي انه رجعلي...
شوي تحسنت تصرفاته.. يعني شوي يبتسم.. لو يسأل عن شي.. وصار يقضي وقت بالصاله والحديقه اكثر من الغرفه...
كعدت بيوم .. اسحل بنفسي سحل .. داريد اتريك شفت سامي بالحديقه.. طلعت اله.. صبحت علي.. وسألته اذا اسوي كهوه لولا.. طبعا ميرفض . درت وجهي ردت اروح صاح تعالي رانيه..
وكفت كباله.. اشرلي اكعد يمه ع المرجوحه..
-ها؟
سامي:ها؟
-شكو؟
سامي:مادري شكو..
-ياا! احجيلي ليش ردتني ابقى؟
سامي:اريد اتزوجج..تقبلين؟
-شنوو؟ عيد مسمعت؟
سامي حجاهه ع كيف وببطىء:زواااج..اريد تكونين زوجتي..
بقيت صافنه.. صدك لو كذب.. حلم لو علم؟؟ 
سامي:هييي.. وين صفنتي؟ جاوبيني !
-ها.. يعني صدك؟زواج؟
سامي:ليش مكذب عليج اني قبل؟
-مادري؟!
سامي:شنو الي متدري؟ كولي موافقه لو لا؟
-زين وو... و مدام رغد..
سامي:هذا شي خاص بيه.. مالها علاقه هي..
-لا..مااكدر .. رغد افضالهه هوايه ويايه.. ماانكر جميلها..
سامي:لتخلطين المواضيع ابعضهه.. اني احبج..ومايهمني احد.. لا رغد ولاغيرها!
-بس شلون؟
سامي:لا شلون ولابطيخ.. اني قررت وانتي هم لازم تختارين.. وطبعا اذا رفضتي انتي الخسرانه.. اطلعين منا.. ترحين لاهلج .. والله اعلم شحيصير بيج..اما اذا قبلتي.. راح انتقملج من كل شخص اذاج.. راح تمشين مرفوع راسج..
-ها؟
سامي:شو ها؟؟؟ ليش عندج شك؟
-لا حشاك..بس مادري خايفه.. 
سامي:الج كل الوقت.. فكري ورجعيلي جواب..
كمت منه.. اضرب اخماس باسداس.. معقوله؟ صح اني احبه بس متخيلته يطلبني للزواج.. اشتغل وامشي مااحس بنفسي.. بس افكار.. افكار وتمشي..
رغد والاطفال..احطمهم بهل سهوله؟ دخلت الهم مساعده اطلع منهم زوجة ابوهم.. شلون يارب شلون.. كل حياتي خلصت حيره.. مااريد احتار بعد اكثر.. اريد كلشي يجيني واحد.. مو اثنين واختار.. يا اكون يا اخسر كل مااكون.. جريت نفس.. بعد ماتعبت من التفكير.. يوم كامل.. اجيبها منا وارجعهه منا.. تناقضت.. اريده واخاف.. صارت كدامي كل مواقف رغد.. طيبتهه ..اسلوبهه الراقي.. لمتني من اول مادخلت بيتهه ..
ومنا حب سامي.. الي صار جزء لا يتجزأ مني.. صرت احسه الهوى.. اذا انكطع اموت.. شلون اكدر اعوفه وهو ديطلبني بنفسه وبكامل ارداته..
واني الي حبيت وسهرت وبجيت وهوايه تعبت.. كل سنيني صارت تعب ومذله.. ليش ارفض وليش ارجع نفسي للصفر..
ويرجع صوت بداخلي يكلي لااا.. لتصيرين ناكره المعروف وتهدمين عائله.. بس حتى ترتاحين انتي ع حساب عائله كامله..
يرد الصوت من جديد.. انتي منو الج؟ منو يلفيج لو ما سامي.. زين حتى اذا خلوج مربيه؟ يوم يومين؟ قابل الاطفال ميكبرون؟ وهم اساسا واضح انهم مراح يرجعون... وسامي بحاجتج.. اقبلي وانسي الدنيا ويا..
وهم يرجع تناقض بداخلي يرد.. تستاهلين الي صارلج والي راح يصيرلج لان انتي انانيه وتفكرين بس براحتج.. نسيتي اهلج؟ نسيتي اختج؟ شلون الج عين تزوجين !!!
بقيت ع هل حال ايام.. اتحاشى سامي ونظره عيونه حتى افكر زين قبل لاانطي كلمه.. ماعرف شلون خلص شهر اله شويه بهل سرعه.. بس التفكير يتعب الوحد وميخلي يحس بالوقت ..
وصلت مرحله راسي راد يطك.. مداوصل لنهايه.. اريد حل واحتاج احد يمي ينصحني.. ماكان يمي بس اربع جدران.. وصلت المرحله اسأل الاثاث والجدران اليمي.. احجي وياهم واتخيلهم يردون عليه.. بس همين مكان الجواب شافي.. همين يرجع يتناقض وحيره..
كنت ليليه انفجر بجي.. وبداخلي هموم وقهر بس الله العالم بيهه.. ليش اطلع من اختبار انزل بالاتعس منه... تعب مخي تعب..كافي تحمل وكافي الم.. اختاري راحتج وعيشي.. كافي تفكرين بغيرج.. هذا كان اخر تفكير اليه.. بعدهه كلت خلاص اكول رأيي وافضها.. اصلا هو انتظرني شهر اله شويه..
نزلت لكيته كاعد بالصاله يقره كتاب.. 
-ابو فهد..مسمعني.. رجعت.. سامي؟
سامي:اي حبيبتي؟ كولي؟
-اني موافقه!
سامي:ع شنو؟
خفت ليكون بطل .. شحب لوني ونشف الدم بعروكي..
سامي:هاااا الزواج.. هههه واخيرا!
اجه يمي وحضني.. همسلي :انتي احلى شي صار بحياتي.. راح نعيش احلى اثنين.. من كان يكولي هيج اني عقلي تقائيا يروح يفكر برغد والاطفال وطبعا اهله واخوانه باذات...
فرحانه بس مو فرحه كامله.. بيهه نقص.. بيهه خوف.. بيهه مجهول مااعرف شنو.. بيومها مترددت ولا منعت حالي منه.. بقيت يمه.. طول الوقت هو كاعد يقره كتاب واني بحضنه .. بس هو كان يتصرف بهدوء وماكو كل طيش ولا تهور.. كمل قراءه.. عافه ع صفحه وباسني من كصتي.. باوعلي وابتسم.. سرحت بعيونه.. بيهن كل شي هل عيون.. دواي وعلاجي وبلسم جروحي.. بقينه متحاضنين وساكتين.. شويه وكال اني راح انام.. باجر ورايه طلعه الصبح..
-وين تروح؟
سامي:لجماعتي.. تردين اخذج ويايه؟
-ههه لا وين تاخذني.. استحي..
سامي:داشاقه ... مو صدكتي.. 
-يله روح نام..
سامي:وانتي همين.. وريحلي هذا همين! ضرب اصبعه ع راسي..
ابتسمت:ماشي..
سامي:تصبحين ع حب.. 
-وانت من اهله..
صعدت للغرفه.. خليت راسي عود مثل البشر من تريد تنام.. مااجه شي ابالي حلو.. كله تشائم وخوف.. اتذكر اني ابيت رغد وبحضن زوجهه مااعرف شنو يصيرلي .. اعصب من حالي.. ارجع اتمنى ماشفت سامي ولا حبيته.. اوووف.. بقيت استغفر لحد ماغفيت.. حتى من كنت استغفر مامقتنعه باستغفاري.. اكول شنو اطلبين ياذنب يغفرلج.. ذنب اطفاله لو مرته.. ذنب غربتهم لو ذنب كعدتج بين اديه.. يبووو يمكن ردت اتخبل ذيج الفتره..
الاتعس انه سامي ماحدد شوكت نعقد.. من يوم الي انطيته موافقتي ماكلي شوكت ولا حجى بوضوع الزواج اصلا.. ثاني يوم راح لجماعته.. للعصر يله رجع.. انتظر يحجيلي ويكلي باجر او عكبه او بعد اسبوع شهر .. بس كون يحجي .. ع الاقل النار الي جوايه تطفى.. 
كأنه نسى الموضوع.. تخبلت.. ردت ارجع احجي ويا وارفض.. لان كلش تأنبت ع رغد بذيج الفتره.. كلت خلص مدام ع اولها ارفض..
بس مادري شنو الي يصير بحياتي.. كله مكلوب.. 
بعد مرور اكثر من اسبوعين ع موافقتي.. اندك باب غرفتي.. فتحت ..
سامي:يله حبيبتي..
-ها وين؟
سامي:دنعقد؟ ها نسيتي شنو؟
ابتسمت لااراديا..
سامي:يله بدلي دنروح.. ورانه هوايه شغل..
بدلت ع السريع.. نسيت شكنت افكر.. نسيت الرفض.. نسيت رغد وكل الدنيا.. خلص حبيبي ونظر عيني حيصير زوجي بعد ساعات قليله..
نزلت كان منتظرني بالصاله.. اقترب مني ع اخر بايه.. باسني من راسي وكال احبج يل كلج براءه.. من كلي هيج جسمي كله كزبر.. اول مره اسمعهه .. براءة.. اي يعرفني مثل روحه.. يعرفني بريئه .. بس الظروف خلتني بنص وحوش وغابه.. 
شالني من اخر بايه من خصري.. نزلني واحنه نضحك.. بيهه سمعت ضحكتي ترن بالطابق الثاني.. ظلت تتردد اباذني..
صعدنا السياره.. اول مكعدت يمه لزم ايدي.. الطريق كله يمشي ولازم ايدي.. وطبعا وين ميشوف همر لو جندي امريكي يبقى يعد ويصف علي.. ينسى نفسه بعدين يشوفني يرجع يكلي فدوة لضحكتج..
وصلنا لمكتب شيخ.. عقدنا ع السريع وطلعنا.. ممصدكه نفسي .. بودي اعيط واصرخ واكول ياناس يمكن رجعت فرحتي.. لالا رجعت.. سامي هو فرحتي ..
عيوني منزلت منه.. نسيت الطريق ونسيت اشوف الدنيا شصار بيهه.. نزلنا يم اسواق.. كلي اخذي الي يعجبج.. بقى هو برا.. اخذت كم قطعه ملابس جديده.. ع مكياج ع شغلات احتاجهه ..
طلعنا.. كال بعد الحلقه.. وصل ع سوك الذهب.. كال ابقي هنا.. اني عبالي هو راح يختار ويجي.. طلع راح لصديقه وكله دزلي الموديلات العندك للبيت.. 
وصلنا ع البيت.. ماكو شويه واجه واحد.. جايب ذهب واني لازم اختار.. طبعا هذي الطريقه كانت رغد تسويها.. يدزلها وهي تختار..
يعني مو شي جديد.. اختاريت حلقه ناعمه.. بيهه زكزاك خفيف .. مكدرت اختار الباقي.. استحوذني خجل مو طبيعي.. هو الي اختارلي.. وطبعا بعد ذوقه عيني ماتقنع باي ذوق..
طلع ابو الذهب.. بقينه واحد صافن بالثاني.. اني كنت ممصدكه.. حتى من الفرح ايدي رجعت ترجف.. كنت كاعده ع التخم.. هو اجه كعد بالكاع ولزم ايدي.. باسهه.. كال كافي ترجفين.. شنو قصتج..
-مادري.. ممصدكه..
سامي:هههههه .. حبيبتي.. خلص هياتني يمج .. صدكي تره اخليج تصدكين غصبا عليج..
حضني وحجالي هيج.. يمه معت بين اديه.. حتى نعست.. اي عيني مكدرت افتحهه ومخي عبالك انشل.. وعيت ع نفسي بغرفه رغد.. وع فراشهه.. هو فوكايه ويباوعلي.. ماكدرت ابقى بالغرفه.. احس نفسي كلش لئيمه.. مو كافي اخذت زوجهه؟! نوب ع فراشهه.. كمت ع حيلي.. جريت ايده.. 
وكف.. كلي وين..
-موهنايه.. مااكدر..
سامي:هاا.. فهمتج..يله براحتج.. اذا متحبين نأجلها؟
دنكت وسكتت..
سامي:جاوبيني؟ ترا اني محتاجلج هوايه ومااريد اجبرج ع شي!
شمرت نفسي بحضنه.. وكلتله اني همين محتاجتك اكثر..
صعدنا ع غرفتي.. وصرت زوجته من صدك... 
هو بقى بيومهه يصنف ويضحك عليه.. واني مااكدر ارفع عيني بعينه.. واوف من نام هو.. شكد بجيت برغم فرحتي .. بجيت امي مو يمي.. وماصارلي عرس مثل العالم والناس.. بجيت غدرت بالمره الي دخلتني بيتهه واكلت وشربت وياهه.. كنت ابجي بسكوت.. بس دموع تصب.. وروح تحترك.. حتى بعز الراحه ماارتاح اني.. بجيت لحد ماغفيت.. باخضانه ع دفو انفاسه.. ع لمسه ايده.. 
كعدنا حالنه حال اي عرسان.. كانت ليل .. حوالي 11 او 12..
سويت عشا.. طول العشا يغازلني وعيونه صارت ضحكتي.. اتمنى يبقى طول الوقت كبالي.. سبحنا.. طلعنا ع حديقه هو الي طلب هيج..
كعد هو واشرلي ع حضنه.. رحت دفنت نفسي بي.. صدك اتمنى ادفن نفسي بي بعد مااطلع.. 
بقى يلعب بشعري وكان لسه مبلل.. كلي..
سامي:اووف شكد احبج .. مااحس نفسي كنت مرتاح.. 
-يعني ماكنت مرتاح وياهه؟
سامي:قصدج رغد؟
-اييي
سامي:مادري.. ممفتهم شي وياهه.. اعرف هي تحبني.. بس مااعرف ليش مااكدر ابادلهه نفس الشي..
-اذا عرفت شنو راح تسوي؟
سامي:وليش خايفه..؟ اني هنا وتخافين؟ اصلا لتفكرين عرفت واله ماعرفت!
-اني وحده خاينه مو؟
سامي:لا.. انتي حبيبتي وخلص.. 
-صدك تحبني؟
سامي:لعد شنو العب وياج؟ مو بس احبج.. انتي عشقي .. اتمنى عمري كله يخلص وياج..
-من عمري ع عمرك.. 
نضال وين؟ هم تعرف خبرها؟
سامي:لا.. ماعرف..
-زين هي منين تعرفكم؟
سامي:معقوله متعرفين؟ هي بنت خاله رغد!
-شنووو!؟
سامي:ها شبيج؟ شنو خفتي منها؟
-لا يالله! اني شسويت! هسه شتكول عني؟ 
احتضني حيل وكال:معليج.. كافي تفكرين بالكل.. فكري بيه وبحالج وبس!
-ااااه.. ليش اني هيج حظي..
سامي:انتي بحضني وتكولين حضج محلو؟
-لااااا.. اصلا هذا احلى شي بحياتي.. 
سامي:اي يروحي.. باوعي بالسما..
باوعت.. شفتها تخبل.. متروسه نجوم ترس.. ليله صافيه وهادئه كلش.. وشوي حاره.. 
-تدري شتمنى؟
سامي:كولي وانفذه الج..
-نبعد عن الناس.. اني وانت.. نصير بعاد عنهم ببعد هذا النجم..
سامي:ههههه للاسف طلبج تعجيزي! اختاري غير شي؟اي شي يخطرلج كولي..
-هاا؟ ماادري!
سامي:نسافر سوا؟
-صدك؟
سامي:اييي.. نروح شهر عسل.. نعوض الايام الي مرينا بيهه..
-مادري.. انت شتشوف؟
سامي:باقرب فرصه نسافر..
-زين ورغد والاطفال؟
سامي:مبيهم شي.. قبل لا نطلع شهر عسل اروحلهم..
-شوكت يرجعون؟
سامي:لا ماارجعهم.. لا هسه ولا بعدين..
-بس.. همه يحتاجوك!
سامي:ممقصر وياهم.. فلوس عدهم تكفيهم سنوات.. 
-مو بس فلوس.. يحتاجوك انت خله راسه يم ركبتي وكال:مااريد اعوفج.. اني احتاجج انتي وبس..
بوسته .. وممصدكه.. كنت اشوف رغد استحي منهم.. وبايام مرت حسدتها تحضنه وتبوسه .. هسه صارت ويايه.. دااعيش تحت ظله.. باحضانه.. 
دخلنا متحاضنين من الجوانب.. صار كل شي بينا.. مكنت اكدر ابعد عنه شويه.. حتى من ننام.. ادفن حالي بي دفن.. 
مرت الايام.. واحنا مثل اي متزوجين.. حياه حلوه ومريحه.. بعد الصبر والالم العشته.. بدو جماعته يجو للبيت.. واكثر من مره كلوله يرجع للعسكريه.. كان يرفض ويتخبل من هل طاري.. يكول اني محافظت ع الوطن شلون ارجع وبيا وجه.. شكد حاولت اقنعه مقبل.. كان قافل كلش ميرجع.. وبيوم من الايام.. كنت انظف بالكراج.. مااشوف بس اخو سلام الكبير.. سلم عليه وهو مثل المصدوم من وجودي.. سأل عن اخو.. كلتله جوه.. دخل سلم علي وتحاضنو.. كانو مشايفين بعض.. وسلام ستوه راجع من السفر هو وعائلته وحب يزور اخو.. طبعا سامي بهل فتره كان مقاطع الدنيا.. مطلع بس مرتين او تلاثه لجماعته.. ويروح يتسوك من نحتاج شي....
بقو يسولفون ع الوضع وواحدهم بي غصه مثل غصات گلبي..
مهتميت بحديثهم عن الحرب.. شردت بافكاري.. مااسمع بس سلام يكول لسامي.. المربيه ليش بعدهه لهسه؟ شنو رغد راح ترجع؟
بكل برود كله والله تزوجتهه لرانيه.. ورغد ماارجعهم هسه..
سلام:شنووو! صدك تحجي! لا اله الا الله! من شوكت؟ وليش مبلغتنا!
سامي:مصار هوايه.. وبسرعه بسرعه.. وهاي عرفت!
سلام:زين ورغد؟ تعرف؟
سامي:لا.. ومااريد تعرف.. لان هي مخبله ومادري شنو ممكن تسوي !
سلام:يااخي شمورطك متكلي! خفض صوته حيل.. كمت اسمع كلمه وعشره لا.. ع الاغلب يريد يعرف اني منين وشلون وصلت وشوكت صارت علاقتنه... سامي ماحجاله شي.. عادله نفس الحجي الي حجى الهم سابقا..
اني متت خوف.. فشله وخوف.. شيكول عني .. مصدكت دخلت بيتهم وخربته! من طلع احسه يذمني بنظراته.. شكد فشلت من نفسي.
حتى مرحت يم سامي من طلع......

يتبع