وجع ذكريات

الجزء 6

الجزء السادس

كملت سهرتنا للصبح تقريبا.. نخطط ونحجي بموضوعي.. شلون راح ادبرها مااعرف.. القلق اكل كلبي.. رجعت الرجفه تجيني هوايه.. بعد مااختفت تقريبا.. بس بايام الي كنا نخطط بيها للطلعه رجعتلي واشد الحاله صارت.. حتى عمه نضال انتبهت الي وكالت هاي الرجفه اذا بقت بيج اصلا لتكولين اريد اطلع..
بقينه ايام نخطط ونخطط.. وصلت الاوراق الي كالتلي بيها عمتي.. خريجه وخبره سنه كامله كباحثه اجتماعيه.. شلون ومنين دبرتهن مااعرف.. حتى هويتي اجتني ..كل شغلنه كان حفر وطم.. مابينه شي ابد.. الي ويانه ميعرفن بمخططاتنه.. بس اتوقع عمه نضال حجت للشرطيات .. اي اكيد حجت وياهن.. مبقى غير يومين لطلعتي.. خايفه.. خايفه لاارجع لنقطه الصفر..
خايفه انفضح بين العالم وماعوزي الفضايح الي انحطت براسي كافي..
صرت ليلي ماانامه ابد.. حتى اذا حسيت بتعب جفني ميغمض ولااكدر انام...
يمكن من كنت انتظر الاعدام افضل من حالي بذيج الايام الي افكر اهرب بيهه.. يجوز الناس نست سالفتي بعد مامر سنه وكم شهر عليها... بس اذا طلعت من السجن اكيد كلها راح تذكرني وتريد بس تعرف مكاني وتاخذ حقها مني.. 
بالليله الي مخططين اروح بيها بلا رجعه للسجن.. كعدت يم عمه نضال.. اريد اشبع منها.. من طيبتها ومن سوالفهه.. طبعا خلال الفتره السابقه علمتني كل شي.. من الالف للياء .. حتى خريطه السجن رسمتها اليه وكالت من تجين ومنا ترحين.. صارت الساعه الي لازم اطلع بيهه.. 12 بليل.. وقت كلهه نايمه تقريبا.. الشرطيات قليل يفترن بهيج وقت.. وبيومهه اصلا محد وصل يم الزنزانه مالتنه.. يمكن توصيات عمه نضال ..
بدون مااحجي.. لان اخاف ينسمع صوتي ويكعدن النزيلات الي ويانه.. حضنت عمتي نضال.. شبكتها حيل وهمست بأذنها.. راح اشتاقلج مامه.. طلعت مني مامه.. كتله ادعيلي.. 
محجت شي بس لزمتني حيل.. هزتني مثل الي تكول انتي كدها لتخافين..
اجت وحده من الشرطيات.. اشرتلي بيدها من فتحه الباب.. دفعت الباب كان مفتوح.. مشيت خطوات كلي خوف وجسمي يرعش من رجليه لراسي..
مشيت حسب الخارطه الي كلتلي بيها.. اخاف باي لحظه يطلع احد بوجهي وارجع منين مااجيت.. اخاف التفت.. بقيت مجمده جسمي ع نفس الوضع مجرد امشي.. مادري شلون وصلت للباب الخلفي.. دفعته كان مفتوح.. طلعت بكل هدوء. ماردت احسس الحراس الي يم الباب الرئيسي..
وصتني عمه نضال.. لا تمشين سريع اله بعد ماتبعدين كلش عن السجن..
مشيت هوايه.. التفتت ماشفت بنايه السجن.. هنا اني مادري شنو صارلي .. ركضت كل قوتي.. اركض وابجي.. طلعت من سجن.. تحررت من قفص..
بهاي اللحظه عرفت شعور الطير شنو.. عرفت من يكولون قبل لا تحبس الطير لان تشيل ذنبه.. عرفت شنو هذا الذنب..
ركضت بشوارع فارغه... وصلت تقريبا شارع عام.. رجعت امشي مشي طبيعي .. بس نفسي سريع والهث.. باوعت داير مدايري.. مدينه غريبه.. مداخلتها بحياتي.. مااعرف اني وين هسه..
شفت بيت مو بعيد كلش.. بس هيكل واظلم.. مشيت ع كيفي.. وصلتله.. كبل صعدت للطابق الثاني.. تمددت كلش وي حافه الشباك.. حتى اسمع واعرف شديصير بره.. مااكدر اروح لاي مكان بهيج وقت..
خاصه كانو الرفاق الحزبيين يفترون بشكل مجموعات بهيج وقت... سمعت اصوات كلاب بعيده.. صوت صفاره الناطور هم قريبه كلش.. صار الصوت اقرب واقرب.. فات من يم البيت الي اني بي.. متت خوف لا يدخل ويلكاني.. الحمد لله طلع كبل.. 
شويه وسمعت هم اصوات مجموعه.. كانو يمشون ع كيف.. وسوالفهم باسلحة دمار الشامل وبيورانيوم.. مفهمت ع شنو.. ابتعدو وراحو...
ساعات مرت مثل السنوات.. ماتخلص..لااكدر انام ولااكدر اتحرك...
سمعت صوت الاذان..بقيت استغفر وابجي بسكوت..بده الضوه يطلع.. الناطور ماسمعت صافورته بعد..
نزلت ع كيفي.. تفحصت المكان زين.. كنت رافعه راسي ليفوك اباوع ع الطابق الثاني.. مااحس اله انلوت رجلي وتكومت بالكاع ع اخر بايه..
اول شي محسيت بشي.. شويه وصار الالم من اقل لاكثر..
لزمتها فركتها مفاد.. الزمها تزيد بالزايد.. كمت ابجي من الوجع.. فتحت الحنطه الي ويايه.. انطتنياهه عمه نضال وبيها ثوب وشال وكوستم.. كوه مطبكتهن ومكفيه الجنطه.. طلعت الشال لفيتها بي وكمت.. اعرج امشي تك رجل مااكدر ادوس بيها..
الالم خبلني.. نسيت حتى وين اروح ووين اولي.. تالي شفت ولد صغير.. سألته خاله وين الكه السيارات الي توصلني ع الكراج؟
كال اطلعي ع الشارع العام.. اصعدي بالريمات وهنه يوصلن هناك..
سويت مثل مكال.. وصلت الكراج.. عباره عن هوسه بهوسه.. عياط عياط مستمر.. اسمع صوت بغداد بغداد.. رحت كبل عليهن.. صعدت وذبيت ثكلي ع الكشن.. بقيت افرك برجلي ومدنكه.. وجع مينطاق.. لااكدر ابجي ولااكدر احجي.. بقيت مدنكه..
قبطت السياره.. واكثرها زلم كانت.. بس الي بصفي مريه جبيره وخبلتني كل شويه تسألني وصلنا؟ اكلها لا ترجع تنام شويه تكعد تكلي ها حبوبه وصلنا وارجع اجاوبها.. طلعت روحي ع ما وصلت.. طلعت الورقه الي نطتنياهه عمه نضال.. اخذت تكسي... وصلني ع الاسواق.. اخذت ملابس زينه.. واشتريت احذيه.. وبطريقي مريت للصيدليه..اخذت مرهم ..كان هذا حزء من خطتنا حتى من ادخل لبيت رغد محد يشك بيه ...
بعدين كان لازم انزل هل ليله بفندق.. وصتني عمه نضال اذا حالتي مسمحت من اول يوم اروحلهم انزل بفندق.. نزلت بفندق ع كد الحال.. محرد ردت مكان انام بي وحمام ادخل اسبح..
ذبيت الغراض البيدي وصارن هواي عليه واني منا اعرج وليله البارحه ليله مره ... مااتمناهه لبشر.. 
كعدت ع السرير.. صفنت ..كل الي مريت بي بسنه انعاد كبالي.. صوره امي وابويه كل شوي تجيني.. اختنك من اتذكرها.. احس كلبي يتفطر... وصلت لهنا ولهاي المرحله وبعدني ممصدكه الي صار...
دخلت اسبح وشوي ارتاحيت من خليت رجلي بالمي الدافي.. بس طلع بيها زراك.. نمت ماكعدت اله للمغرب.. تذكرت عمتي كالت لتبقين اكثر من يوم واحد بالفندق.. شفت نفسي زينه واكدر اروح اقابل بيت ابو فهد يعني بيت سامي ورغد... لبست ملابس من الي جبتهم.. واضطريت البس كعب ..
رغم رجلي مساعدتني بس استحملت... 
حضرت الاوراق.. خليتها بجنطه مرتبه.. باوعت لشكلي قبل لااطلع وبداخلي اكول ادبريها وعفيه عليج.. لتخافين الله وياج ويعرف انج مظلومه...
نزلت واخذت تكسي وكانت دنيا مغرب.. بس امان مو مثل هسه.. عادي مغرب ليل نهار.. انطيت العنوان لابو التكسي.. صح اني كنت ابغداد ادرس بس مااعرف هلكد بكل المناطق وبغداد كبيره كلش..
وصلت ع المكان المطلوب.. كان شارع هادئ ونظيف .. البيوت الي بي كلش راقيه.. بحيث كلت بداخلي اذا بيت ابو فهد مقبلوني اشوف واحد من ذولي البيوت.. تمشيت كوه بالكعب.. سألت بنيه كانت تلعب اباب بيتهم .. وين بيت ابو فهد .. اشرتلي بغير متحجي.. وصلت للبيت..
دكيت الباب ماكو احد طلع.. دكيت الجرس اكثرمن مره.. كلت بداخلي هو انتي الي كل هذا صار وياج تردين حظج يكعد هسه.. درت وجهي اريد اروح ..سمعت صوت مريه صاحت اجيت اجيت .. منووو
-اني..
فتحت الباب .. بنيه شابه.. مو كلش شابه يعني.. تطلع نهايه العشرينات.. بس هي شوي ناعمه .. لابسه ثوب وردي فاتح كلش وبي كتافيات.. شعرها مكزكز ولابسه طوك..بيضه كلش.. حواجبهه شكر ..ملامحها حلوه.. جسمها وجهه.. حلوه هي...
كل هذا شفته بنظره وحده... هي كالت ومستغربه مني..
تفضلي عيني؟
-هنا بيت ابو فهد مو؟
اي عيني.. منو حضرتج ؟
-اني رانيه.. من طرف الست نضال..
يااااا.. حبيبتي نضال.. وين شفتيها ؟ طلعت؟ زينه هي؟
-لا .. مطلعت بس تسلم عليج هوايه..
ياعيني .. تفضلي تفضلي .. نسيت ادخلج.. والله سطرني هذا الدعسوقه مالتي!
دخلت وراهه.. من باب المطبخ.. مطبخ كبير كلش.. بي اثاث حلو بس كلش فوضى.. مواعين كومه بالسنك.. الطباخ وسخ..
وصلنه للصاله.. كانت مفروشه كلها.. تخم ملوكي يخبل.. واكو مريه كاعده تباوع ع تلفزيون.. من شافتني استغربت..
كالت:منو؟ 
جاوبتهه:يوم هاي صديقه لنضال..
كالت:اهلا وسهلا.. اني رايحه لام كامل.. شويه وارجع..
عرفت من خلال الكلام والنظرات المريه الكبيره تكون ام زوج رغد..
كعدت .. جابتلي مي .. 
بقت تسألني شلونها نضال ووين شفتيها.. اسألتها الكثيره لعثمتني.. بعدين رتبت الكلام بعقلي قبل لااجاوب.. حسب موصتني عمتي.. حجيت باسلوب راقي وهادىء.. بدون تسرع ولا ابين ارتباك .. بس بداخلي نار .. خايفه ازلك بالحجي لو يطلع مني شي ومتقبلني واذا مقبلتني وين اولي..
حجتلي عن نضال وعن اطفالهه.. بس معرفت صله المعرفه او القرابه بينهم شنو.. ومكدرت اسأل اخاف..
بعدين سمعت صوت طفل يبجي .. خلتني وراحت.. اني تفحصت المكان زين.. حركت اديه ورجليه بعد ماكنت مشنجه حالي علمود كعده الاتكيت..
رجعت وبيدهه طفل عمره اشهر تقريبا.. يبجي وهي تمشي وتهز بي..
كالت:زين ام نصر ليش دزتج؟ 
خجلت منها ودنكت.. بعدين كلت بثقه:للخير ان شاء الله.. اذا كنتي حابه اساعدج بالبيت وبالاطفال..
مسمعتني من صوت الطفل.. رجعت عدت كلامي.. ابتسمت .. بعدين كالت اجيتي والله جابج.. زين شنو مخلصه وشنو مهاراتج وخبراتج؟
اني بحركات خفيفه طلعت الاوراق من جنطتي وخليتهن ع الميز.. شرحتلها مثل موصتني عمتي.. خريجه واشتغلت باحثه اجتماعيه بالسجون.. تعرفت بنضال .. وقوت علاقتي بيهه وهي الي دزتني ومن هل حجي.. كنت احجي بثقه.. لدرجة اني صدكت كذباتي.. 
بقت اكثر كلامهه بام نصر.. كالت ياعيني تعرف اخبارنه .. سوده عليه.. اكيد متغيره .. والله لو ما الاطفال اروحلهه.. بس دشوفين.. مالحك احك راسي..
بيد شايله ابنها وبيد شالت الشهايد المزوره الجبتهه.. قرتهن واشوفها تبتسم..
كالت:يايوم تكدرين تجيني؟ زين انتي يامنطقه ساكنه؟
هنا كلبي راد يوكف.. شكول وين ساكنه.. عمتي نست تكولي شكول بهاي النقطه.. كلتلها بوحده من مناطق بغداد الي سبق وان كانن صديقاتي بالجامعه منها.. يعني منطقه مو كلش راقيه.. ع كد الحال حتى تكون كذبه تتصدك..
مشت عليها.. كملت كلامي..كتلها بس اني فقدت اهلي بحادث سياره.. وصراحه مستصعبه الكعده ابيت وحدي واقاربي كلها بالمحافظات مو هنا. كد ماكدرت كذبت وذللت نفسي.. كنت اشوف العطف بعينها..
كالت:زين ليش متاجرين بيتج وتسكنين ويانه؟
مثلت دور الي مقابله وتمسكنت شويه..
اصرت عليه.. كالت اني بحاجة هيج وحده ووين كنتي من زمان وو من هل حجي.. 
اني هنا رضخت وسكتت.. اصلا اكول شي وارفض بس بداخلي اريدها تلح عليه حتى ابقى يمهم.. ابنهه نام بحضنهه وهي دترضع بي.. شويه ودخل علينا طفل .. عرفت هذا فهد الكبير.. يطلع عمره ب9 سنوات او اكثر..
يباوعلي متعجب واحسه متنرفز مني.. مسأل كدامي ابد.. راحت تخلي ابنها الصغير اسمه مجد.. راح وراهه.. اسمع صوته بس مو كلش واضح.. سألها عني.. وجاوبته مامه هاي راح تساعدنه وتخلينه نرتاح.. تعلمكم وتكعد وياكم.. يعني صارت عدكم مامه ثانيه..
ياالله شكد صوتهه وكلامهه يريح الكلب.. بالرغم هي من طبيتهم لحد لحظه مخبوصه وتركض ومملحكه.. 
رجعتلي.. كالت حبيبتي تكدرين تاخذين راحتج.. اني راح اغسل مواعين واحضرلكم عشا.. اني فزيت من مكاني.. 
-لا مدام .. صدك حذب هذا واجبي اني..
هي ابتسمت وصارت ملامحهه هااااادئه كلش.. كانها فرحت.. عاد صدك اني توجهت كبل للمطبخ.. غسل وجلف.. مواعين كومه.. زباله مطشره والارضيه تجنن بس وسخه.. همات نظفتها.. بعدني داانظف ودخلت ام سامي .. كالت..
ها خير؟
- هذا واجبي.. اي شي تحتاجي بعد اني موجوده؟
شبسرعه؟ خير ياطير؟ تعرفج رغد لو هيج؟
-اي..
اوي.. هسه اني شلي شغل.. اذا سويتي عشه جيبيليا لغرفتي.. خل رغد ادليج بيهه..
كيفت من مادققت عليه.. شهل عائله ياربي.. يخبلون.. اول يوم وحبيتهم شحال لو بينا عشره..
كملت التنظيف ورغد مابينت بعد.. كأنها ماصدكت اني اجيت.. يمكن نامت خطيه.. الي حجتلي عنه عمتي كالت عدها 3 اطفال.. بس اني مشفت غير 2 
رحت للثلاجة.. يبووو متروسه خيرات الله.. سويتلهم عشا وزلاطات..
سويت عصير.. لان هاي صفات المربيه والمساعده الناجحه.. هيج كالت عمتي .. اهتمي بصحتهم بابسط تفصيل اهتمي..راح يصدكوج..
اخذت صينيه صغيره لام سامي.. دكيت الباب.. عيني شفت الخانم لابسه بجامه وتيشريت.. طالعه قرقوز ههههه...
خليت الاكل الها.. وكفت مثل الصنم كبالها واديه مكتفه ليكدام..
-مدام.. اشربي العصير مفيد لصحتج.. واي شي تحتاجي اني موجوده..
اشرتلي بيدهه عود روحي..
طلعت ورحت دكيت الباب ع الغرفه الي دخلت بيها رغد..
دكيت ع كيف.. يمكن كانت نايمه.. عفتها .. رحت اني تعشيت.. اكلت كومه منا اني صار ايام ممرتاحه ولا ماكله.. البيت كلش هادىء .. ستغربت صار الليل وسامي مااجه..شنو هذا وشنو من شغل اي يخلي لحد هسه مجاي..
شويه وطلعت رغد كفشتها منثوره وهي منا شعرهه مكزكز حيل واشكر.. عرفتها كانت نايمه.. كالت تعشيتي .. كلت اي.. ردت عوافي..
سمعت صوت بجي مال طفل.. كلتلها اخذي راحتج اني موجوده..
دخلت للغرفه.. يبووو قصر بحاله.. الاثاث عجيب مشايفه منه ابد.. بس شنو كله مخربط.. مخاد مشمره .. ملابس منثوره.. شفت بنيه صغيره تطلع بكد مجد.. عرفت هي توأم مالته.. شلتها وهي بس تبجي .. مااعرف شتريد ولااعرف اسوي ممه.. يربي شلون.. ظليت امشي واهز بيهه.. لحد مانامت خطيه وهي جوعانه.. 
احس راسي انسطر من صوت بجيها.. خليتها منا كعد الثاني منا..
بس كان ساكت مايبجي.. طلعته من الغرفه حتى لايكعد اخته...
كعدنه بالصاله.. هو كان ستوه يتعلم يكعد.. خليت تكيات ورا وعجوانبه.. كعدته وجبتله العاب من غرفتهم... طلع فهد من الاستقبال يمكن.. لان كنت بعدني مداخله اله.. جايب دفتر اله وراح لامه... شافني وكبل دار وجهه.. عبالك ممعتبرني موجوده...
اسمعه يحجي هو وامه بدروسه.. بعدين خلاهه ورجع.. هي هم كملت اكل واجتني.. كالت خل اعرفج باطفالي والبيت وعائلتنا...
بقت تمشي بالبيت واني افتر وراهه.. حجتلي اكثر شي عن اطفالهه.. خاصه التوم مجد وعهد.. من تحجي كانت كلش متململه منهم.. خو من تحجي بام س
سامي احسها تختنك.. وفعلا مبينه ام سامي من النوع الصعب.. 
صعدنا للطابق الثاني مال بيتهم.. اكثر الغرف فارغه.. كالت وحده منهن راح تكون اليه.. كلش فرحت.. واخيرا راح استقر ع الاقل مؤقتا..
من نزلنا باوعتلي واحسها متردده تحجي...
بعدين كالت:اكلج حبيبتي.. اني مااكدر اخليج كل الايام هنا.. يعني من يصير نزول سامي تكدرين تاخذين عطله..
هاا؟
رغد:اي.. لان الصراحه ميحب المربيات والمساعدات.. ويما جبت ومقبل واضطر اصرفهن.. فأنتي من يصير وقت نزوله الج مطلق الحريه ومنها ارتاحي من هوسه اطفالي.. وهاا.. راتبج مستمر..
بلعت ريك وكلت اي..
بقيت دايخه وين اولي يربي.. اذا اجه سامي وكعد بالبيت وين اولي..
حجتلي عن زوجهه سامي.. ضابط ودوامه مو منتظم.. يعني حسب حاجتهم اله بالدوام يروح.. كلش خفت من كالت ضابط.. وعرفت ليش عمتي نضال كالت اياج تخلين سامي يشوف هل الاوراق المزوره..
المشكله مكان عمله كلش حساس وقريب من الرئيس..يعني اكيد متعبر علي سالفتي.. ذيج الليله كان كل فكري شلون يقتنع وخاف يروح يسأل عني ويعرف الحقيقه من جيتي الهم...
كلش تأزمت من حجتلي هيج.. كان لازم ادور خيار ثاني بهل حاله.. اي اتوقع كل شي .. يجوز يرجعني للسجن ويجوز يبلغ عني... مادري شلون نمت بليلتها... ثاني يوم كعدت من الصبح.. رغم التعب.. ورجلي زوركت كلش.. سويتلهم الريوك حضرته وكتبت بورقه صغيره... طالعه اجيب اغراضي وارجع..
لبست وطلعت.. رحت للفندق .. بسرعه لميت غراضي الي بقيتها وطلعت..
رجعت لبيت رغد.. خفت لا من ارجع الكي زوجها راحع.. شلون ووين اروح وين انطي وجهي...
وصلت وشفت سياره برازيلي حمره واكفه ابابهم.. 

يتبع...
#وجع_ذكريات