وجع ذكريات

ج 14

الرابع عشر

اجاني سامي للمطبخ.. طبعا دورت شغل من جوه الكاع... حتى الهي نفسي..
حضني من ظهري وكال:شبيج؟ مااحسج مرتاحه؟
بكلبي اكول واني شوكت ارتاح..ممكتوبتلي الراحه..
ابتسمت وكلت .. لا مابيه شي.. اصبلك؟
سامي:اي.. 
تصرفت عادي.. مردت اضوج سامي.. هو منا ناس تضغط علي يردو يرجع.. ماعوزه هم..
مرت ايام.. بيهه اني عشت ايام مرتاحه.. اي ضكت طعم راحه واخيرا.. انام ع صدره كل همي انساه.. يغازلني وبحجيه تطير فوك الريح.. اشتاقله وهو كبال عيني... 
بيوم كلي راح يروح لرغد.. حتى يرجع ونطلع شهر عسل .. كنت كلش ضايجة بوقت روحته. اتمنى مااخلي يطلع ويبقى كبال عيني.. كل مااذكر هو راح يسافر ترجعلي ايام القصف والخوف.. بس مااكدر اوكفه واكوله لا لتروح.. هم حقهه لرغد .. ومو حقي اني الاخذته منهه احرمهم منه.. 
الله اعلم شكان حالهه.. ماالومهه.. العندها سامي تقفل عينها وكلبها من كل الرياجيل.. 
ودعني وبكل مكان بجسمي طبع بيه بوسه .. يمكن هذا عذاب اخر جاي بالطريق وهيج ديودعني... شبكته حيل مابيه اعوفه.. لحد باب البيت اني شابكته وهو يمشي ويتعثر بيه.. 
طلع وخفت علي.. الوضع كان فالت كلش بيهه.. وهو بحكم شغله قبل مفروض يديرباله.. من يوم الطلع لحد اليوم الرجعلي بي بس ادعي ..
يوميه المغرب يمر عليه مثل السم.. شكد اكرم فتره المغرب.. تخنكني خنك بدونه.. وشكد كانت حلوه من هو موجود.. كل الوقت بوجوده حلو.. ومااحس بي اصلا.. 
بروحته.. شفت صور اطفاله.. اشتاقيت الهم.. واشتاقيت يكون عندي مثلهم.. حقي اصير ام.. اريد اجرب هل شعور.. اريد طفل احضنه انسى همي..
بس كلت مو وقته.. خل سامي يستقر ويشوف شلون بدوامه وبعدين نصرف..
كنت امسح بالاثاث.. مااحس اله ادين اثنين حضنتني.. عطت خايفه.. شفته سامي.. صارت العيطه فرحه وبيهه دموع.. ضربته ع صدره بخفه ورجعت حضنته..
-ياروحي وكلبي وعمري.. اشتاقيتلك موووت.. 
سامي يبوس بيه من راسي ويكلي:والله اني همين.. ماكدرت ابقى اكثر ورجعت لخاطر عيونج..
دخل يسبح.. يحب احد يساعده بهل فقره.. كانت رغد وهسه اني.. دخلت ويا وصارت سوالفنه لعب وضحك.. عبالك اطفال.. واحد شمر ع ثاني مي وتغركنا تغرك..هو كان راجع مزاجه كلش صافي وهادي.. كلت همزين راح وبدل جو.. حتى ليمل ويفكر بالرجعه لدوامه... 
طلع واشوف بعينه الراحه.. . سويتله اكل.. وكعدنا سوه اكلنا.. عيونه متفاركني.. شكد احب عيونه بيهن كل شي الي.. 
نام بالصاله.. اجيت مددت بصفه.. ع تخم...احس روحي هدت بوجوده.. نمت مرتاحه.. كل ماافز هو يمي ارجع انام رغد.. 
مرت ايام.. واحنه ع نفس حبنه.. ومافتح موضوع شهر العسل بعد.. اني همين سكتت...وبهل مده عرفت عنه كل شي تقريبا.. ماكان يضم عني.. وكلي بامور انه محاجيها لرغد ولاراح بحجيها بحياته..
عرفت حتى اقاربه.. عرفت حتى جماعته الي بداوم.. طبعا هو ماكان عنده اصدقاء مقربين.. ومن اسأله ليش يكلي شغلي مابي صداقه ووقت لهل علاقات.. جماعته ظلو يجو بين فتره والثانيه.. وهو بعد السفره لرغد والاطفال احسه شوي اتغير وخفف من عناده برجعته للدوام..
الى ان اجه بيوم مبتسم بس وره الابتسامه احس اكو جرح..
اني واكفه ع السنك وهو يحك بوجهه ويحجيلي..
سامي:رانيه.. اني راح ارجع.. شتكولين؟
كبل شطفت اديه وركضت حضنته.. :احلى خبر ياعمري انته.. اي هذا حبيبي الي اعرفه ميهزك الصار..
سامي:كافي .. لتحجين مااريد اذكر شصار.. 
-ماشي ماشي..
سامي:احبج لان تفهميني.. واحبج اكثر من تصيرين عاقله!
-هههه ليش اني شمسويه بالله؟!!
يحجي ويأشر ع گلبه:مو شلعتي لهذا!
-واني اريد اشلعه واخلي يمي .. حتى يكون الي كل الوقت..
سامي:وهو الج الوقت والعمر كله ...
-يابعد عمري انت..
ماانسى الفرحه الي فرحتهه.. تأملت هوايه.. كلت حياتي الجايه احسن..
بده يراجع ع الرجوع مالته.. وماكو ظرف ايام كبل رجع.. صح كنت فرحانه بس شايله هم الخفارات...
ومثل متوقعت.. اول مرجع خلو بغير محافظه.. المحافظه الي كسرتني كسر وعفت كل اوجاعي بيهه.. حتى من كلي انه راح يداوم بيهه اعتفس وجهي وبقى يواسيني ويتوعد لعامر ..
حضنته وبجيت.. رجع انفتح بيه جرح عميق.. ماالتحم ولااختفى.. 
طلع للسوك.. فصل بدلات جديده.. كملن خلال ايام.. من لبسهن وحده احلى من الثانيه علي.. تاكل وتشرب ويا.. وشكد لايكه ... افتريت علي داير مدايره.. حصنته ودعيته اله من كل كلبي.. اخر شي حضنته حيل..
بوس راسي وطلع.. رشيت ورا مي.. ويمكن عوزي شوي واختم القرآن من طلع.. هلكد دعيت وهلكد بجيت..
عافلي مصرف.. تسوك همين قبلها.. ووصاني ادير بالي ع نفسي.. وهي نفسي وروحي راحت ويا اصلا...
بده دوامه يستقر.. وخفاراته ترتبت.. اعرف شوكت يروح وشوكت يجي..كنت انتظره لحظه لحظه بيوم النزول.. مالوم رغد.. ومااكول بس الله يساعد كلبهه.. ماطول بذيج المحافظه المشؤومه اكثر من شهرين..
رجع لبغداد.. صح بنفس المحافظه بس همين خفارات.. بس اسم وجوده قريب يمي كافي يخليني انام مرتاحه.. 
وطبعا الايام الي تمر بدونه.. ارجع رانيه.. الحزينه الكئيبه.. الايام السوده كلها تنعاد .. الدموع متوكف.. القهر يرجع ياكلني اكل..
وطبعا كله يختفي بس اشوفه كبالي.. ينسيني الدنيا ومابيهه من يجي.. 
اخوانه محد يوصله.. واعتقد لان عرفو انه تزوجني.. صار هو يروحلهم.. كان يحجيلي من يرجع منهم انهم يصرون علي يرجع رغد وامه.. بس ماكان يقبل .. واني بين نارين.. خاف تجي وتصير سالفتي علج وخاف هم تبقى متجي وتنحرم منه واصير اني صوج...
المهم مرت سنه ع السقوط.. وفوكها كم شهر ع روحة رغد ... دوام سامي استقر.. وتشكلت حكومه مؤقته بيهه.. 
ومرن تلث سنوات اله كم شهر.. ع اليوم الاسود المريت بي.. وع اليوم الي ماشفت بي زينه بعد.. ولا عرفت خبرهه.. سامي كلي باقرب وقت يعرف وينهه.. 
وصدك بوحده من نزلاته مجاز.. كلي عن زينه...
كنت ستوني متغديه اني وياه.. صعدنا فوك دنريد ننام.. خلاني بحضنه عادي مثل كل مره.. 
سامي:رانيه.. روحي..
-ها حبيبي؟
سامي:اريد اكولج شي .. بس ماريد تنفعلين ولا تبجين!
-شنو؟ كولي؟ اوعدك!
سامي:زينه.. اختج..
اني لااراديا صبت دموعي.. كبل اجه كبال عيني ظفيرتها .. صوت سوالفهه الحلوه.. اجه بخشمي ريحه شامبو سنان ومكيف ندى الي كانت متفاركه.. عطرهه الزوزو والفيجي.. كانت تعتز بيهن اكثر من روحهه... لقطات من حياتنه سوه مرت كبالي.. لا ع التعين اجن ابالي ..
سامي:هاا؟ شكلنا؟
-احجيلي وينها! احجيلي الله يخليك!
سامي:لتخافين.. مابيهه شي.. يم بيت عمج..ابو عامر!
-شنوووو! لا سامي.. كول غيرهه الله يخليك!
كمت من مكاني.. وسامي بس يريد يرجعني لحضنه.. اني فاقده.. اريد افتهم شلون وليش وشوصلها يمهم!
حضني حيل.. بجيت هوايه.. وهو سكت مجاوبني ع شي.. كلي اهدي يله احجيلج.. 
تمالكت عيوني.. بس ماتمالكت اديه.. بقن يرجفن..
لزمهن وبده يفرك بيهن..
سامي:زينه يمهم.. من يوم الحادث هي يمهم.. مكدرت اعرف اله هسه.. 
-يعني شنو؟ يعني اتزوجت واحد منهم لو شنو؟ ليش باقيه يمهم؟!
سامي:لا هيج باقيه يمهم.. ممتزوجه بعدها..
-اكيد مطيحين حظها.. زينه.. لج حبيبتي وروحي... يارب يحفظج ويحميج.. يارب اجمعني بيهه..
سامي:امين.. بس كافي هدي شوي! شوفي شصار بيج! لوادري ماحاجي..
بقيت ابجي واون.. مادري شلون غفيت.. كعدت احس خدودي امشكه من كد الدموع.. عيوني نار.. قدمت اديه طخن بادين سامي.. كان حاضني..
انداريت علي.. تأملته وبسته.. لوماانت وين اروح اني..
هو كان نايم.. صحى ع بوستي ورجع ضمني اله.. همس باذني شلون صرتي؟ 
كلتله اصير زينه من اشوفهه..
وعدني يجمعني بيهه باقرب وقت.. شلون وشوكت محجالي اكثر.. كلي شغلي هذا ومن يصير الوقت اني اخذج بيدي الهه..
نوع من الملل تسلل لحياتي بعد ماعرفت بزينه.. ردت بس اعرف ليش باقيه يمهم وشعجب اخواني الي اخذو البيت مخلوها وياهم؟ السؤال زرف گلبي زرف.. طار واهسي كلش.. حتى سامي هملته شويه.. شفته بده يلمح الي عن اهمالي اله.. عاد هنا رجعت فكرت بي.. اني اصلا من دونه ولا شي.. شلون اهمله وشلون اعوفه..
رجعتله بحب اكبر وشوق ماله حدود.. عوضته عن الايام الي حزنت بيها ع اختي وحظها الي ميقل عن حظي..
صرنا روح جسد.. اذا نفترق واحد بينا هو يموت.. 
واستمرت حياتنه..وكل شي هادي وحلو.. كل ايامي حلوه ويا.. مااذكر يوم مر واحنه متزاعلين لو شايلين ع بعض.. وطبعا اني متنكتبلي راحه .. اذا مريت براحه فهي مو اكثر من شي مؤقت..
بعد مامر ع زواجنه حوالي سنه.. وطبعا بهاي السنه سامي كان يتردد ع عائلته.. الغيره كانت تاكلني اكل.. صح هي زوجته وهم الها حق .. بس مااكدر مو بيدي .. مجرد مااتذكر هو راحلهم.. تجي ابالي حضناتهم لو اليوم الي شفتهم بي متحاضنين بالصاله.. لو بوساتهه اله.. اتخيل كل شي يصير بينهم.. ابقى اشتعل واطفى.. لحد ميرجع.. 
مراحلهم هوايه.. مو اكثر من تلث او اربع مرات.. اني بكل مره عوزي بس مااتخبل.. غيره ووحده وحزني السابق الي بعده غصه بگلبي..
كلها تجتمع من اكون لحالي.. مكافي الخفارات الي ابقى بيهه وحدي.. نوب اجت سفراته الهم..
المهم تحملت.. محسسته بشي.. من اشوفه كبال عيني انسى العتاب وانسى الوجع.. 
قبل لتكمل السنه ع زواجنه.. وطبعا بس عقد شيخ ماكو عقد رسمي.. 
كنت كاعده بالحديقه.. لااراديا اتبسم واتذكر سامي وليله القبلها هوايه تصرفنا مثل الاطفال ههه.. يكمز ورايه واني مثل الطفل.. اشرد منه اله..
انفتح الباب عبالي سامي.. اني ابتسمت حيل كل ضني هو رجع.. لان طلع يتسوك ويرجع.. انكلبت ابتسامتي ورأسا سديت حلكي وكمت لااراديا..
اني مصدومه ورغد كبالي همين مصدومه... 
اريد احجي ..فقدت النطق.. شفت الاطفال لازمتهم بيدها كبرانين.. فهد لازمته بيبيته ودخلو.. ياالله شكول وشحجي.. وين كان هذا اليوم..
اقتربت مني.. عوجت حواجبهه حيل.. 
رغد:انتي شدتسوين؟
تلعثمت مكدرت احجي.. احسها عرفت بالخيانه.. تجمعن دموعها بعينها.. واني همين دموعي نزلت جمر ع خدي..
رجعت عاطت:احجييي شدسوين هنا؟!!!!
-مأ أ إأم..
رغد:شمبقيج لهسه؟! ليش مرحتي؟!اخذتي مني مو؟ اخذتي لهيج مديجينا ولا يوصلنا؟!!!
-سامحيني.. مو بيدي والله!
لزمت شالهه شمرتهه بالكاع وعاطت:شنو الي موبيدج! انتو خنتوني مو؟! احجييي! لج شمبقيج هنا لهسه! مو كلولي رحتي؟ ليش رجعتي؟!!!!
ام سامي:صدك انتي شمبقيج هنا؟ كل هل مده بقيتي هنا لو شنو؟
اثنيهن واكفات كبالي.. الموقف الصرت بي ماانحسد علي.. ولا رغد تنحسد ع حالهه.. اثنيهن يسألن.. مااكدر احجي .. بس دموعي تصب.. كل موقف من رغد من يوم الدخلت بيتهم لحد اللحظه صار كبالي..
تمنيت سامي يرجع بسرعه واتلافه الموقف ويرد عني.. رغد تخبلت وصارت تضرب ع وجهه وتريد تهجم عليه.. كوه لزمتهه ام سامي.. اني انحصرت بطرف الحديقه.. رغد صار وجهه عباله عن قطعه حمره..
دموعهه تصب وصوتهه تشرح.. 
عله صوت عياطهه.. صارت تشهك وتبجي وتغلط عليه.. ام سامي لزمتها كوه جرتها لجوه.. 
دخلو كلهم.. بقيت بالحديقه مااكدر ادخل .. اختنكت خنك.. احس شي ع بلعومي وغصه بنفسي.. اريد اعيط مااكدر.. باوعت للسما.. كلت دخيلك يارب ساعدني.. خلص لو تاخذها لهل روح لو تخليني اعيش مرتاحه..
حيلي راح.. كعدت بالثيل.. كمت مااشوف من دموعي.. صحت يمه وينج تعاي اخذيني وياج!! وهمين اسمع صوت رغد جوه تعيط..
انفتح الباب.. دخل سامي وبيده علاليك.. انصدم من شافني.. عاف البيده واجاني..
سامي:شبيج ؟ حبيبتي ؟ منو وياج؟؟
مكدرت اجاوب.. دموعي هي الي حجت.. باوع وراه.. شاف احذيه ..
جرني من ايدي كومني.. دخلت المطبخ وخايفه اتقدم اكثر.. اسمع صوت رغد بالصاله تعيط.. رجعت خطوه ليوره.. جرني اتقدم ويا..
مشيت .. رغد كاعده وادك ع نفسهه.. شافته كبل طفرت علي.. رادت تضربه راشدي هو كبل دنك منها ولزم ايدها حيل.. انفجرت تبجي.. 
بقت تضرب بي ع صدره وابطنه وتغلط.. يريد يلزمهه مكدر..هي عبالك مكينه واشتغلت ماتطفى.. لزم اديها اثنيهن.. طبكهن عليها وحضنها حيل..
اخذها دفع وهي بحضنه للغرفه..
ام سامي تباوعلي وتفر بيدهه.. وتكول مهزله! والله مهزله!
طول سامي مطلع. كل لحظه تمر عليه بسنه.. مسمعت صوت عياطهه بعد.. الاطفال يمنه بالصاله.. اريد اقترب منهم بس خايفه.. متردده..
بقيت اروح واجي.. اجتمعت كلهه عليه.. خوف وغيره.. 
اخر شي بلا شعور رحت للمطبخ.. اشتغل ودموعي تصب.. بگلبي اكول اطلع سامي.. اطلع مااتحمل اكثر.. اطلع داتخيل تسوي كل الي سويته اليه.. 
بس شسوي مااكدر احجي.. كله بكلبي ..
الساعه صارت عبالك متمشي.. ايست وصعدت للغرفه..كان تيشيرت اله ع الحربايه باقي.. حضنته حيل وبجيت..سامي ماطلع اله لليل.. 
من سمعت صوت باب غرفتهم تمنيت انزل.. تمنيت اعاتبه .. احضنه واشكيله..
ماكدرت انزل.. بليلتها ماغمضت عيني.. احس داخلي محطم وبس بالاسم اني انسان.. اي هيج مثل الاطار صفيت.. بس اطار فارغ مبي شي..
كل لحظه وكل دقيقه تمر اصرخ .. مو صرخه عاديه.. لا صرخه وجع.. ميعرفها بس الي مار بيها.. هاي الصرخه الي من تطلع تحس روحك راح تطلع وياهه.. حتى جسمك ينعصر وياهه لااراديا.. هيج مر الليل عليه..
كعدت ثاني يوم.. تعبانه كلش.. اتمنى اوكف تفكير واريح عقلي.. اباوع لكل شي يمي بملل وروح زهكانه.. 
نزلت.. لاكتني رغد.. نظرته عينهه كافي تخجلني من حالي.. ماحجت.. بس نظراتهه الي ندمتني ع اليوم الي اجيتهم بي..
رحت اتريك.. عيني ع باب غرفتهم واكول هسه يطلع سامي .. مطلع.. واساسا هو طالع من وقت.. راح لدوامه.. تريكت.. سويت غدا.. رغد اختفت من كدامي.. مشفتهه .. بس اطفالهه يفترون يمي.. شكد كنت مشتاقه الهم بس الظرف الي انحطيت بي مكدرت اقربلهم.. رحت عليهم.. حضنتهم وبوستهم.. همه مستغربين مني.. ناسيني..
للعصر.. كنت بغرفتي.. انفتح الباب كل قوته.. كانت رغد.. وكفت ع حيلي من شفتها.. هي كبل راحت للكنتور.. طلعت كل ملابسي.. الي شكته والي خلته بجنطه.. مااكدر اوكفهه.. اخذت الجنطه وشمرتهه من الدرج.. وكالت يله اطلعي ولي من بيتي منين مااجيتي!
-لا ام فهد! وين اروح! وسامي؟ ميقبل سامي!
رغد:اشش! لجيبين اسمه ع لسانج! بنت الشوارع.. اطلعي من بيتي ولتحجين ولا حرف..
نزلت وويه كل بايه بالدرج دمعتي توكع من عيني..هي صارت.. واصلا مبين شنو نهايتنه اني وسامي.. خل اروح واعوف الجمل بما حمل.
ذا يحبني راح يلكاني ويرجعني.. واذا لا.. الله يصبرك ياگلبي..
نزلت اجت بوجهي ام سامي..
ام سامي:وين؟ خير؟ شعندج؟
رغد عاطت وهي ورايه:خليها تنقلع منا احسن ماارتكب بيها جريمه! افه عليج نضال هيج ادزيلي وحده.. 
ام سامي كالت باستهزاء:روحي مامه.. يانضال يابطيخ! .. رجعي انتي لغرفتج.. سامي اذا عرف اني الاوكع بيهه.. 
رغد:مو بكيف احد! هذا بيتي! سمعتي هذا بيتي اني من زمان متحملتج! بحياتي طلعتي روحي بالسفر والغربه ربيبتيلي عله! شوكت اخلص.!
ام سامي:اكلي خره! بنت الحواوين! هذا بيت ابني ! مايعجبج انتي اطلعي!
بيتج ام حلك! نسيتي منو الجابج! لج لو مااني ماشافج بعينه ولا صرتي هنا!
رغد صبت دموعهه وجهه انطعن احمر وكالت:اي . اني اطلع.. واشوف تاليهه وياكم!
ام سامي:كعدي بغرفتج وفيكنا شرج! لاتخبصين سامي بشغلات طايح حظهه! وانتي يله.. رجعي معليج بالحجي..
شلت جنطتي .. رجعت صعدت.. دخلت الغرفه اخذت نفس.. طلعت حسره ويه الاه.. يمكن الحظ ابتسملي هل مره..لو ماا ام سامي كان صفيت بالشارع.. اول مره اشوف منها موقف حلوه هل مريه.. لوما هي مااعرف شصار بيه.. بقيت بغرفتي.. مطلعت منا لثاني يوم..

يتبع..
#وجع_ذكريات