وجع ذكريات

ج 7

الجزء السابع

ترددت ادخل.. خفت ورجليه كوه مشت.. اكول بداخلي شموديج ع الموت برجلج.. مادري شنو الي شجعني وخلاني امشي..
دكيت الباب.. دكتين تلاثه محد طلع.. فتت كبل.. دخلت للمطبخ اسمع صوت رجال.. ردت ارجع..مشيت خطواتي بالعكس.. بس رغد شافتني..
كالت تعالي ادخلي.. لتستحين.. تقدمت خطوات وميته خوف.. اكول شورطج لو باقيه بلسجن احسلج..
دخلت شفت شاب كاعد.. يطلع عمره بالعشرينات.. كاعد وبحضنه مجد..
شافني ابتسم وظل منتظر احجي.. سلمت ورد عليه..
رغد:قاسم.. رانيه.. مربيه الاطفال ومساعدتي الجديده.. رانيه.. قاسم اخويه..
سحبت نفس طويل.. يبووو عفيه كلب شكد اكل هبطات..
بقه يلاعب بالاطفال.. ويسولفون هو واخته.. محبيت احشر نفسي.. بلشت شغلي بالمطبخ.. طلعت لحم داسوي غدا.. هو شويه وطلع.. همات سلم عليه وطلع.. قاسم مثل اخته .. اريحي وبشوش كلش.. الابتسامه تارسه وجهه..
اجت رغد.. كالت عوفي اني اسوي الغدا.. روحي يم الاطفال..
رحت يمهم.. مجد وعهد... سووني فلم هندي..
كلش عصبيين ويشمرون العابهم ولحظة والثانيه يبجون..
طبعا رغد مدخلت يمنا ابد.. خطيه هلكد ماممللينها ماتريد تكون يمهم.. وصدك مرت ايام.. اني التهي ويه الاطفال وهي بشغل البيت.. تنظف وتطبخ.. حتى البيت صار بي فرق كومه.. نظيف ومرتب.. اما اني تخصصتلي غرفه بلطابق الثاني.. خلتلي بيها سرير قديم.. وميز تواليت..
كالت مؤقتا بين مااكدر اشتري اثاث غرفه كامل.. اني تشكرتها وكلتلها كلش كافي عليه هذا المكان.. وفعلا الي مثلي متطلب غير الرحمه والستر..
بهاي الايام اكثر من ليله كنت اخذ عهد يمي .. يبقى بس مجد وفهد..
تقريبا تعودت عليهم وع هوستهم.. خاصه عهد كانت كلش عصبيه ومتنجرع.. بس بالايام تعودت عليهه..
ام سامي عايشه بعالم ثاني كانت.. مالهه شغل لا بتنظيف ولا طبخ ولا شي..
تجيها اوقات تضوج من البيت تطلع لجاراتهه ومرات يجن صديقاتهه للبيت يبقن بالخطار.. كانت كلش مترفه وحايره بنفسها.. بكل وقت اشوفها بي هي نفس الكشخه واللبس... طبعا الي يشوفهه يكول شابه..
يوم من الايام اجاهم رجال يطلع عمره اربعينات.. مطلعت اني ضميت نفسي.. طلع اخو سامي.. مبقه بس شويه وراح.. كان جايب الهم مسواك ..
اني بهاي المده احس روحي طالعه.. ياريتها صدك تطلع وتخلصني..
بس اختلي وحدي يرجع بذاكرتي كل الي صار بيه.. من يوم رجعتي السوده لحد اللحظه الي اني بيهه.. اتذكر الايام الي قضيتها ويه اهلي قبل الحادث..
كأنو مقسوملي اعيش ذيج الايام حتى اتعذب اكثر..
مراح عن بالي ابسط تفصيل ابيتنه وسوالفنه ولمتنه.. اليوم الرجعت بي من شفت الشارع مالنه.. اليوم الي كعدت بي عبالي نفسي راح اموت واتمعنت بكل شي يمي وردت احضن اهلي.. وصدك انحكم عليه بالموت بعز الحياة..
وليله الحادث.. هذي الليله نص عمري يضيع بيهه..
ترجع تنعاد كبالي من اللحظة الي صالحتني بيهه امي ودموعهه اوف يادموعج يايمه.. عساني متت بمكانكم ولا نزلت دمعتج ولارحتي بسببي.. من اتذكر حضنها بذيج الليله كلبي ينعصر عصر.. ومو بس كلبي كل جسمي اتشنج لااراديا وابجي بجي بس الله العالم بي...
هذيج الايام انحفرت بذاكرتي حفر.. متمر ليله اذا مااذكرها.. اصير مثل المجنونه.. مااسيطر ع نفسي من ابقى وحدي.. احس روحي تريد تطلع ويه كل شهكه بجي.. اما زينه.. اوف يازينه.. مااعرف شصار بيهه.. وحتى من كنت بالسجن... شكد كلفت عمه نضال تسألي عنها بس مكدرت تجيبلي خبر عنها... وين راحت.. هل سؤال اكل گلبي اكل.. هي ال بقتلي من هاي الدنيا الغبره.. وين حل بيها الوكت ..
لعد بابا؟ ليش هو بابا ينسي؟ الي عدها مثل ابويه تنكسر كسر من تفاركه... بس اني مو بس كسر.. لا تحطمت .. من شفته مذبوح ومن كل مكان مدججي.. ليش وبيا ذنب ابويه هيج صار بي.. مو لان هو بابا امدحه..
بس الناس كلها تعرفه شنو نفسه وشنو طيبته...
تقريبا مر اسبوع كامل ع وجودي ابيت رغد... تعودت عليهم .. بس خايفه من الي جاي..خاصه اليوم الي يجي بي سامي..
اسمع صوت التلفون الارضي دك .. اني مالي علاقه بي مااكدر اشيله.. رحت صحت رغد.. اجت طايره...
شالت التلفون وبدت تحجي.. اني خليتها ورحت اكمل شغلي...
اجتني طايره وملامحها كلها فرح..
رغد:رانيه رناوي !
-ها عيني؟! امريني؟
رغد:سامي باجر يجي.. واني هسه راح اروح للصالون .. الاطفال راح يبقون يمج.. بس فهد معليج بي اني اجيبه ويايه من اكمل..
-تدللين.. بعيني.. تأمرين شي ثاني؟
رغد:تسلميلي حبيبه كلبي..
ع فرحها صدك ابتسمت.. ونسيت خوفي من زوجها لايعرف سالفتي ويسويني مخازي.. راحت هي.. بقيت اني بين الاطفال والشغل.. ام سامي اجت كلش قبل اذان الظهر.. سألت وين رغد كلتلها بالصالون.. مردت ولا سألت ليش ووين.. خلتني وراحت لغرفتهه.. غديت الاطفال ونامو.. اجت رغد.. كانت صايره لعابه.. مسويه حواجبهه ومرتبه شعرهه بس هم بعد بي كسره... فرحتلها من شفتها مبتسمه.. كل كلامهه صار حبيبتي وكلبي..
كلت اكيد من راح يجي اني لازم اطلع من البيت.. بس كنت منتظره رغد هي الي تطلب مني اطلع.. بس هي يمكن من فرحتها نست تكلي روحي..
ويمكن هي رادتني ابقى علمود ارتب البيت واساعدهه...
صدك سوينه كبة بليلتها .. حضرنه جدر دولمه وكالت هو يحب البرياني همين بس ع باجر نسوي.. حضرنه كليجة وكيك.. مخلت شي مسوته.. طبعا اثنينه نشتغل بالاكل ... كان عدها سايق خاص تتصل بي ويجيبلهم الي يردو...
ثاني يوم كعدت الصبح مكلوبه احوالي.. خايفه لاانطرد ووين اروح..
بقيت ادعي وابجي ماانفضح ولا اتشرد من جديد...
نزلت لكيت رغد كاعده.. مو عادتهه بس اليوم لان جيه زوجهه.. مرتبه البيت وسابحه لكيتها تمشط..
صبحت عليها ورحت كبل للمطبخ.. شفت ام سامي تتريك وسارحه بعالم ثاني.. تتصفن ولا عبالك يمنه... كملت وكامت.. اني همين تريكت وبلشت بالبرياني حسب توجيهات المدام.. هي بقت بيومهه ويه اطفالهه واني كل شغلي صار بالمطبخ.. سمعت صوت باب الشارع انفتح.. جمدت بمكاني..
ماكى لحظات وانفتح باب المطبخ...
التفتت اجت عيني بعينه.. شكله يخوف.. خزرني ورجع راسه ليوره اول مشافني .. بعدين سلم.. مادري شلون كدرت ارد علي.. خله ودخل للصاله..
التفتت ورا شفت رغد اجته طايره وحضنته.. صارت هلكدودتها بين اديه .. اني خليت ودرت وجهي بس اسمع صوت بوساتهم و غزلهم...
اني بقيت بالمطبخ .. اخاف يلاكيني ويروح يسألني شلون وليش واني مو شاطره بالكذب بس رغد لان ع نياتهه مشت عليها وكان وجود نضال هو الدافع الاكبر طبعا...
بقى كاعد يمهم .. اسمع صوت سوالفهم هو ورغد وامه.. يلاعب باطفاله..
تحسرت ع اللمه .. شذنبي اتهجول واعيش ابيت غرب..
اجتني رغد وحلكها مينلم من الضحكه.. كالت جاهز الغدا؟ كلتلها اي..
راحت كالتله حبيبي تتغده لو تسبح اول؟
جاوبهه واني من نبره صوته خايفه.. شحال لو سألني وخله عينه بعيني..
كالها اسبح.. دخلت هي وياه.. امه معجبهه كلش.. ظلت ادردم واتهز بيدها.. مادري ليش حسيتها تغار من رغد...
الاطفال بقو يمي كلهم.. ودوخوني بين الغدا الي لازم اصبه اول ميطلع وبين هوستهم وبين تفكيري وخوفي..احس راسي راد ينفجر...
طلع وكعد بالصاله شويه.. من اخطف من باب المطبخ اشوفه كاعد..
رغد رجعتلي مغيره ملابسهه.. كالت ها؟ تصببن؟ كلتلها ادللي ثواني ويمكم..
طلب ياكل بالصاله وبالكاع.. اني فرحت .. حتى ابقى بالمطبخ واتحاشاه..
تغده وكمل ودخل للغرفه.. رغد غسلت ولحكته.. الاطفال بقو يمي.. بس شنو كلش عصبتني بيبيتهم.. يرحون يمها تبقه تعيط عليهم وتصيح .. كأنها بس تريد رغد تطلع.. عاد اني شسويت... اخذتهم بالخطار.. سديت الباب وكعدنه وحدنه.. فهد انعزالي كلش.. احسه يتصرف تصرفات اكبر من عمره..
صح كان كاعد ويانه بس ماله شغل ابد.. بيده حاسبه صغيره ويلعب بيهه..
البيبيه مالتهم اجت يمنا.. باوعت علينا .. هزت ايدهه وراحت...
بدت عهد تنعس.. سويتلها ممه ونيمتها.. اووو وخلصت من واحد..
بقه الثاني.. تعبني كلش علما نام...
بقى فهد كاعد يمهم وهمه نايمين.. رحت غسلت المواعين.. نظفت المطبخ.. مااحس اله صارت العصر.. كعدو الاطفال.. ع صوتهم طلعت رغد..
تعذرت منها لان مكدرت اسكتهم هلمره.. هي كانت مبتسمه ومو مهتمه اصلا للحجيته..
راحت للمطبخ.. سوت جاي وحضرت الاستكانات.. طلبت مني اخذهم واروح لغرفتي.. اخذتهم ورحنا.. بس فهد مقبل يجي ويانه..
بقينه بالغرفه.. اني ع نار.. خايفه من رده فعل سامي.. معقوله ليهسه مسأل رغد عني؟ معقوله راح يسكت وميكول شي..؟
ظليت الوب .. اخر شي فتحت باب غرفتي. كانت قريبه كلش من الدرج.. يعني الصوت الي جوه ينسمع بسهوله.. سمعتهم يحجون بيه.. اني هنا كل جسمي تشنج..
سامي:والله يارغد انتي متوبين اله توكعين بمصيبه من الي دتدخليهم للبيت! يعني ماتصيرلج عبره؟ مو كلنا بلا مربيات بلا بطيخ!
رغد:عيوني انته.. هاي مو اي وحده.. مثقفه وخريجة.. والاهم نضال هي الي مدليتها بينا ودزتهه..
سامي:وشنو نضال ملاك؟ شعرفها بالناس؟
رغد:ياعمري شسوي.. شنو الحل ؟ مدالحك عليهم وحدي.. وشوف من اجتني لليوم حتى البيت صار نظيف ودالحك ع كل شي..حبيبي مااكدر وحدي وامك متقبل اجيب رشا ولاتقبل اتساعدني بيهم..
سامي:مادري شكولج.. بس لازم نسأل عن هاي المربيه..
رغد:لتخاف حبي.. اني تأكدت بنفسي .. ولو مو خوش مربيه ادزها النا نضال؟ معقوله نضال تحب تأذيني ؟ انت تعرفها مثل متعرفني..
سكت سامي ومجاوبهه.. اني دخلت للغرفه واحس جسمي ثلج.. اطرافي ترجف كوه سيطرت عليهن.. شلت الاطفال ونزلت.. خلص صارت مغربيه بعد... اخذتهم رغد مني وبقو يلاعبوهم ... اني كبل للمطبخ مااكدر اخاي عيني بعينه اخاف انكشف...
سويت الهم العشا... جهزت الطااوله وطلعت... صعدت للغرفه بعد مطلعت منها اله ع صوت رغد.. كانت جايبه التوم وشغلاتهم يمي.. بنظراتهه توسل وعطف.. كالت تبقيهم يمج؟ كبل وافقت بدون تردد..
خلتهم وراحت.. التهيت بيهم.. لحد منامو.. اني هم خليت راسي ومثل كل ليله ترجع الاوجاع والاهات مالتي..ذكرياتي السوده والاليمه تمردني مرد كل ليله.. لحد ماتنشف عيني من الدمع يله انام..
ثاني يوم .. متعوده اني اكعد قبل الكل.. احضرلهم الريوك واذا يكعد واحد من الاطفال اخذه يمي..بين ماتكعد رغد.. كانو بذاك اليوم ثنينهم نايمين ويمي.. عفتهم ونزلت.. اسمع صوت مي بالحمام الجوه.. طلعت كبل للمطبخ...
بديت اغسل الاكواب واحضر الجاي دااخدر.. مااسمع بس صوت خشن اححم..
التفتت كان سامي.. صبح عليه.. احسه يتفحصني من فوك لجوه.. مادري شلون كدرت اشتغل واتحرك .. كال..
سامي:سويلي كهوه..
يحجيها بامر ونتر.. كبل رحت طلعت الكهوه والدله.. اباوع ع اديه ترجف رجف.. يربي ساعدني ..
خليت الكوب ويا كلاص مي بصينيه وخليته كدامه.. كنت مدنكه.. بس احسه ديباوعلي..
سامي:انتي منين؟
-هاا؟
سامي:من يا منطقه داكلج؟!
ذكرت نفس المنطقه الي كلتها..
سامي:اهلج وين؟
-توفو بحادث سياره..
سامي:هاا.. ماعندج اخوه اخوات؟
-لا فد اني..
سامي:وين تعرفتي ع نضال؟
هنا كلبي عوزه شويه ويوكف:كنت باحثه بسجن.... والتقيت بيهه..
سامي:شوفي شغلج..
احسه مااقتنع بكلمه من الي كلته.. وخاصه كنت اشوف عينه تتوجه لايدي اكثرشي.. وايدي مشاء الله مقصرت بالرجف.. صارت تركص مو ترجف...
طلعت من المطبخ.. احاول الكي اي شغله الهي نفسي بيها.. رحت صعدت يم الاطفال.. انتظرت واحد منهم يكعد ماكو ... بذاك اليوم مادري شجاهم هلكد نامو.. سمعت صوت رغد كعدت.. نزلت.. سألتني عن اطفالهه واستغربت لان نايمين.. راحت صعدت الهم .. نزلت وهمه بيدهه كوه شايلتهم.. اخذت عهد منها .. سويتلهم ريوك وبديت اوكل بيهم.. هي راح يم زوجهه..
احسه عصبي زياده ونص كلامهه يجاوبهه ونص لا.. يعني انفه ومتكبر..
هيج حسيته..
خلص اليوم واني اتجنب ابقى بمكان هو بي.. بالرغم احس نفسي ماقنعته بكذباتي واكيد راح يدور ورايه...بليل هوايه خطر ابالي اطلع بدون مااحد يحس عليه.. ع الاقل يكون الي مجال اضم نفسي قبل انكشف واصير معروفه ع مستوى...
بس خفت.. مكدرت اطلع من باب الغرفه.. ثاني يوم.. همين كعدت من وقت تفاجئت بسامي همين كاعد.. كان يرش بالحديقه شفته..
غلست منه وكملت شغلي بالمطبخ.. حضرت ريوك وسويت الكهوه قبل ليطلبها هو.. من دخل كال..
سامي:ريحة كهوه؟ سويتي؟
-اي
سامي:خوش.. جيبلياهه بالحديقه..
كان اكو مرجوحه بالحديقه.. جبت طبله وخليتهه.. رجعت جبت الصينيه..
ماشفت اي تعبير منه غير الحواجب المخنزره وروحه بخشمه احسه..
خليتهن ورحت ع شغلي... تقريبا بقى 3 او4 ايام بنزوله.. اتذكر من راد يروح رغد انكلبت احوالهه.. ضايجة وبس مطنكره متحجي..
جهزتله ملابسه وراح... من طلعت خطيه طلعت ورا رشت المي ودخلت عيونهه مدمعه.. خلتني وحدي ويه الاطفال وراحت...
كلش تكأبت بيهه.. واني مااكدر اقترب منها اكثر واتجاوز حدودي.. ملازم ادخل بخصوصيتها.. بس انقهرت عليهه.. هو يعاملهه ابرود كلش.. وهي طايره بي.. عن الله بس اول يوم اجه بي احسه ملهوف عليها ومشتاق الهه..
مرت الايام.. عدت رغد مرحله الضوجة والعزله.. رجعت تهتم بالبيت والاطفال ويايه.. كأنها تعودت ع غيبته.. يمكن اتصل بيها مره او مرتين.. بس بكل مره يتصل ترجع تنعفس عفس...
صح كنت انقهر عليها بس مرات اكول نيالي اذا كان بس هذا همي بالدنيا..
لعد لو ماره بمصايبي شكان سوت..
بايام غيبه سامي اجه اخوهه قاسم... انتبهت اله كلش مرتب وانيق.. بس الشغله الي محبيتهه بي.. نظراته وملحته الزايده... خليتلهم عصير وردت اروح للمطبخ اصر اله اكعد يمهم.. وطبعا رغد كل شوي تطفر لمكان..
فمن كان يبقى وحده يمي احس نفسي داختنك... استحي اشيل راسي وهو بس يباوعلي...
فرحت من راح... كبل كمت ع شغلي.. كلعاده بين تنظيف واطفال.. ام سامي هم راحت يم ابنها الثاني... عرفت عدها 3 ولد وبنات اثنين...البنات مزوجات اثنينهن... الولد همين كلهم مزوجين وكلمن بيته...
حسيت بهل فتره بنوع من الاستقرار... شويه احس نفسي اهدء وافضل..
صح الكوابيس مفارقتني ولا الحزن الي بداخلي يروح...
بس كان الوضع شوي مريح.. من ناحيه بيت دافي وعائله احسهم صارو مني وبيه... رغم رغد علاقته بيه ع كد الشغل...
بس هذا الاستقرار ماطول هوايه.. من يوم الي عرفت بي سامي راح ينزل مجاز همين... هم نفس الحال.. عافت اطفالهه يمي وراحت للصالون.. مشفت ذاك التغيير عليها... بس هي حلوة عموما...
هم نفس الحاله جهزنه كل الاكلات الي يحبهه.. وهل مره كالت يمكن يعزم اخوانه.. اني كلش توترت من كالتهه... شلون بيه من يجون وشيخلصني من اسئلتهم..اكيد همين نفس اخوهم..
كشخت رغد بيومهه والبيت اصلا منظف ومرتب.. الاطفال همين غسلنالهم ولبسناهم ... وكلهه كعدت تنتظر سامي.. اجه قبل الغده بشويه... بنفس اللهفه ركضتله رغد... شكلهم يخطف الكلب من تركضله ويحضنها...
كانت هي كلش ناعمه مقارنتا بي.. هو طويل كلش..
حتى عيونها تبقى تلمع وبس تراقب بتفاصيله.. من شافني انعقج وجهه.. كان ستوه يضحك ويه مرته واطفاله.. بس شافني تغير وجهه..
طبعا مااسولف ع الهبطه الي اكلتهه.. كلبي صار بين رجليه.. كلت اي اكيد هاي النظره وراهه شي.. لازم عرف عني شي ماكو غيرهه...
دخل للحمام ورغد همات ويا.. كمل وصبيتلهم ورتبت الطاوله وطلعت من المطبخ..
ظليت اروح منا واجي منا... شلون بيه وياترى شنو سبب نظرته اليه من عقج وجهه...

يتبع..