وجع ذكريات

الجزء الرابع

nada hs

الجزء الرابع

رجعت للمكان الاظلم ..احس جسمي كله يون..تعب وخوف وحزن.. كلهن بيه..كل المصايب اجتني بيوم وليله.. مادري شلون خليت راسي ونمت.. صحيت ع صوت وحده.. اي كانت موقوفه همين..بس استغفر الله منها لا خلقه ولااخلاق... كل مره تحاجيني اني ماارد عليها..حتى صارت تصيحلي الخرسه .. كلت خليها تفكرني خرسه..اصلا البيه كافيني مالي خلك هيج نماذج.. ثاني يوم ..اجه المحامي.. 
سلم عليه وكل كلامه سريع كان..وراح احجي بالمختصر هاي المقابله..
كال:رانيه..كل شي ضدج هسه.. البصمات والمخدرات..وراح تتكون تهمه جديده عليج..هي حيازه مخدرات..اني راح اسوي الي يطلع بيدي حتى اساعدج.. بس اني متأكد مثل ماداشوفج هسه عمج وابنه همه وره هاي الجريمه..وشوفي القرار البارحة مو قانوني.. المفروض يرجعوج ع التحقيق من جديد بس مااعرف شنو الي ديصير؟! كلشي مخالف للقانون وحتى مداكدر اطلعج هل فترة بين ميصدر الحكم...
-زين شسوي.. والحل..
كال:الله كريم.. خلي املج بربج ..وان شاء الله ميخيبج.. 
طلع واحس اليأس وصل حتى للمحامي..بعد ماكان كل كلامه ثقه انه اني مو مجرمه وراح اطلع واني رافعه راسي.. صار موعد الحلسه الخ.. وصلت لهناك قبل الكل..بعدين التمو الادعاء والمحامي والناس الي مااعرف شنو الغايه من دخولهم للقاعه.. 
افتتح القاضي الجلسه ورجعو يحجون بالادله مال الجلسه الثانيه وهذا يصد وهذا يرد..مفهمت من كلامهم شي..كله وفقا للقانون ولاجريمه وحيازه ومااعرف ايش.. هوايه كلام.. والاتعس من هذا كله جابو اثنين شهود من منطقتنا شهدو انهم مشافو احد دخل لبيتنا ليله الحادث ولا حتى الايام القبله... معقوله مشافو سياره بيت عمي؟ لو هذوله هم اندسو عليه؟ اخر شي سمعت القاضي كال لكاتب.. سجل يمك..بده يكول الحكم.. .. احس شي ديخنكني ع البطيء مركزت ع كلام القاضي.. ردت يوصل للجزء المهم بسرعه..ردت اعرف شنو الحكم.. كال اعدام! اي سمعتها كلش زين اعدام عبالك ظلت تتردد باذني..اعدام اعدام.. المحامي التفت عليه وباوعلي بنظره اسف.. اسمع اصوات تأججت بس ممركزه ولااعرف شنو يحجون..ضرب القاضي ع مطرقه مالته وكال هدوء رجاءا.. رجع الهدوء وكمل كلامه لحد اخر كلمة..
اني صح كنت مستسلمه ومتمنيه الموت..بس بذيج اللحظه مااعرف شنو صارلي.. بديت اضرب بالمحجر بيدي واصيح ظالمين ظالمين.. لحد ما اغمى عليه وصحيت لكيت نفسي بيد بنات مرتبات مااعرفهن منو.. وبره قاعه المحكمه... شربت مي .. وباوعت بالوجوه.. بلكي اشوف المحامي مالتي.. شفته واكف ع صفحه.. صحته بصوت رايح منتهي استااذ.. استاذذ التفتلي وتقدم عليه كم خطوه.. 
كال:ها رانيه؟ صرتي احسن؟
-لا.. مراح اصير احسن اله لمن تطلع الحقيقه وينكشف المجرم.. ولكم دم دم اهلي راح هدر وتهموني الي! تهموني الي! اتذكر هنا فاقده وحجيت هوايه وبس هاي بقت ابالي.. اضرب ع صدري حيل واكول اتهموني الي..
اتذكر وراهه شفت سيارات تمشي وشارع وناس.. اي اي ع الاغلب هاي من رجعت ع التسفيرات..
يومين او تلاثه الي مرت ويمكن اكثر..واحد ويكلوله موتك وره مصادقة الحكم.. يعني مبقى شي كلها ايام معدوده..تمنيت تنتهي الاجراءات بسرعه حتى تطلع هل روح واخلص عاد.. ماافكر بشي غير الموت وحبل المشنقه.. صرت كل ما عيني تغمض شويه اختنك واعيط عبالي اني ع منصه الاعدام.. هوايه كوابيس واحلام مزعجة كلش.. لو ابقى ايام احجيها متخلص.. انتبهت ع اديه بهل فتره صارت ترجف ومااسيطر عليها ابد.. اكوم اشبك ايد بيد واضمهن لصدري حتى يهدن شويه.. حتى رجليه.. اكثر من مره اصفن اشوف رجلي تهتز لااراديا..
كله بفعل الظلام.. خسرت كل شي..كاعده بين اربع حيطان منتظره الموت.. 
تقريبا وره تلث ايام اجاني المحامي.. هم سلم عليه وسألني عن حالي.. كلي راح يتميز الحكم وان شاء الله يغيرو لان هوايه مخالفات صارت... وحجالي انه يمكن القاضي اله معرفه او صلة ببيت عمي او الشخص الي يحاول يخلي التهمه براسي واله ماكو قضيه مثلي تنحل ويصدر حكم من 3 جلسات الا ماندر..قبل ليطلع انطاني علاكه.. ابتسم بوجهي وكال هاي من اختي.. هي همات بعمرج .. معرفت شكو بالعلاكه.. اخذتها منه وشكرته.. مووقت ارفض بي اي شي يجيني.. تمنيت يطلع جايب ملابس.. وفعلا جايبلي شون ملابس كلها نظيفه ومستوره وجايبلي جبة سوده وحجاب.. اي يمكن استنكف عليه لان بلا حجاب.. ماكنت اعرف الدنيا هيج ضامتلي .. كنت ماخذتها بزودي ..
بقيت ايام وليالي انتظر..شنتظرمااعرف.. الموت؟ لو تغيير الحكم؟ 
كنت نايمه تقريبا مغربيه حسب تقديري اني.. اسمع صوت المحامي.. فز كلبي وكل جسمي مشت بي رعشه.. سلم عليه واني حتى مكدرت ارد.. اريده بس يكمل كلامه ويكلي شنو صار...
كلي..مبروك رانيه.. انرفض الحكم.. قرالي القرار التمييزي..ويه مااسمع صوته عيوني متحملت اكثر..حتى صوتي صرت ابجي بصوت.. اي فرحت من خلصت من الموت.. مو وقته ابدا.. حسيت اكو امل رجعلي..
واستبدلو الحكم بالمؤبد.. مااعرف شلون وليش وشوكت.. المهم عندي ماكو اعدام وموت .. بدو يحضرون اجراءات نقلي لسجن التسفيرات.. صفنت ع حالي وكلت..المن فرحانه؟ واذا بقيتي عايشه؟ شنو سمعتج بين الناس؟ واذا طلعتي بعد 20 سنه وين تولين ومنو يلفيج.. رجعت ابجي والطم.. اي الطم .. هوايه لطمت واني بالسجن.. ادك ع رجليه بحيث الكيهن بعدين زرك.. 
وصار اليوم الي لازم اروح بي للسجن..يعني مقري منا ل20 سنه.. بس اتذكر ال20 ارجع اتمنى لو ميته احسن يمكن.. لا مو يمكن ..اصلا اكيد افضل بهواي..لا اهل ولا بيت ولا سند المن ابقى وعود اطلع بعد 20 سنه..
نقلوني للسجن بعد ايام طويله.. وهناك اني مريت بفترة مااعرف شنو اسميها.. مرض او حالة نفسيه او صدمه.. المهم ذيج الايام خلصتها ماادري بالدنيا..حتى منتبهت ع الي ويايه ولا شكل المكان الكاعدين بي.. اكثر وقتي نايمه والاحلام المزعجة متفاركني.. واذا مو نوم صفنات ماادري بشنو كنت اسرح..بس ماانسى الرعشه الي صارت بيه من يوم الحادث لحد ذيج اللحظه.. كل وقتي بردانه وارجف.. اسمع اصوات الويايه.. بس مااركز ابدا.. 
يجي وقت الاكل ياكلن ويشربن.. يوم من الايام الي باقيه اني بيها بفراشي كل عاده..وكان وقت غده.. مااحس اله وحده تكعدني بيدهه من يم فخذي.. فزيت خايفه منها.. خايفه منهن كلهن مو بس هي..الدنيا الغدرتني واخذت اهلي مني بعد ماأمن بيها...
كالت:كومي اكلي..
دنكت بغير مااباوع بوجهه:ماريد..
كالت:شنو متردين..كومي ماما كومي.. متريد؟! شوفي حالج وجهج! عمه نضال كالت خل تجي تاكل وبدون مشاكل..
كلت بداخلي يبوو نوب منو هاي نضال..اكيد وحده مشكلجيه واني ماعوزي.. يربي حتى بلسجن مخلصت.. شنو الذنب الي سويته حتى امر بكل هذا..
كمت امشي وراهه واباوع بالوجوه..كانت اول مره اتفحص اشكالهن.. ردت اعرف منهه منو هاي نضال الي دزت عليه؟
شفت وحده..شكلهه مو مال سجينه..لابسه كلبيه تخبل ونظيفه.. شعرها مسرح ومصبوغ اصفر..اديها وركبتها متروسه ذهب وشلون لابستهن وهو ممنوع ماادري..تاكل اكل مختلف عن الي جايبي..كله مشاوي ومواعين مرتبه..زين منين؟ وشلون يجيبو الها..؟ حتها كعدتها مختلفه عنهن..
كعدت تقريبا كبالهه..خليت كم لكمه من الصمون مدري خبز عود.. مينجرع .. بلا وعي وبدون جوع اكل.. هنه يهمشن همش واني حايره بس الوك اللكمة اجيبها منا واردها منا...
صاحت وحده دورت ع مصدر الصوت لكيتها العمه نضال! عاطت بيه تكلي اكلي وجهج مصوفر!
عيونها من تخزر كافيه تسكتني وتخليني اكل..اكلت بدون مشاكل وبدون حتى ميطلع صوتي.. كملت الوجبه وطشت اللمه.. الي راحت ويه شلتهه تسولف والي نامت والي طلعت جريده عتيكه..اني همات رجعت ع فراشي.. 
مرت ايام ع نفس الحال..وقت الوجبات يصيحولي ولازم تكون العمه نضال طرف.. ماكنت ارفض..اكل وياهن..واكثر من مره عمه نضال تسويلي لفه من اكلهه الخاص وتشمرلياهه.. اكلهه بدون تردد ومناقشه.. 
احس بنظرتهه سلطه وقوه مسيطره ع الكل بيها.. وفعلا هي هيج كانت.. محد يكدر يردلها طلب.. اكثر من مره شفت الشرطيات يجن مذلولات يمها ويسولفن وعبالك هي مديره السجن...
مااهتميت هلكد حتى اعرف هي منو وليش هل كد مسيطره..اصلا البيه كافي.. ومو بحال اسأل عن هيج شغلات.. هاي الايام المرت كانت مثل الظلمه الحالكه..مابيها نهايه ولااكو ضوه يدليني منين اطلع.. هيج كان السجن.. اظلم رطب وبارد لان بده الشتا تقريبا.. 
افكاري صارت عبارة عن امي ابويه اختي السجن والقاتل .. احاول اربط حتى اوصل لشي بس ماكو. اوصل لدرب اظلم مثل حياتي.. 
انفجر ابجي وانام..والنوم يصير غضب عليه..متمر نومه اذا مااشوف بيها امي وابويه..منظر الدم..الكوابيس الي كنت اظنها كوابيس بذيج الليله ماكانت كوابيس..كانت حقيقه بس الدوخه الي صارت بيه ذيج الليله منعتني اميز الحلم من الحقيقه..اي شفت وعبالي حلم..ماعرفت اله متأخر كلش.. اتذكر سمعت صوت امي تبجي..اتذكر شفت زينه انسحلت من رجليها.. كل هذا ومركزت بوجه القاتل..ويمكن كانو اكثر من واحد ويمكن اني هيج تخيلت..
وبعد ايام وليالي بالسجن وع نفس الوضع..مااختلط ولا اسوي اي شي.. حتى سبح مسبحت..نفس الملابس الي انطانياهه المحامي بقت يمي وابدل وبس.. 
وبليله نمت ..
مااشوف بس ظل وحده كاعده يم راسي وتمسح علي.. من شفتها اختنكت.. ردت اعيط ..عبالي القاتل نفسه هيج خطرلي من شفتها...
كالت:اكعدي دتحلمين..اصحي ..لتخافين اني نضال..
من سمعت اسمهه شوي ارتاحيت.. بديت اشوف اكثر.. كان ضوه خفيف يدخل من شباك السجن..وهو مو شباك هيج بالاسم شباك لان صاير كلش بالسكف ومخلي ع كد تهويه.. 
كعدت ع حيلي انطتني مي..باوعت داير مدايري كلهه نايمه وعبالك ببيوتهم.. 
نضال:شبيج مامه..صارلج شكد تعيطين بمنامج؟! 
دنكت وخنكتني عبره..
نضال:لتخافين اني موجوده هنا لتخافين ابد..
اجه ابالي اسألها منو انتي؟ بس مكدرت ..اخاف حتى من السؤال..
نضال:شوفي حالج..ميصير هلكد تهملين حالج! انتي تدرين شكد صارلج هنا لو متدرين؟
-لا
نضال:صارلج شهر تقريبا! معقوله متدرين شكد؟ بس يله مبين الاحلام اكلت راسج واخذت كل عقلج..
-اي..
بقيت كاعده ولامه وجليه ع صدري باديه اثنينهن.. هي تسأل ونص اسألتها مااجاوب عليها..بس هي بصوتها وكلامهه حنيه.. مانترت ولا صاحت.. صح تحجي بجديه بس هادئه كلش..
ايست مني ومحجيتلها شي ابد..كالت براحتج..اني راح انام..اذا شفتي حلم مزعج لطلعين صوت هم نريد انام!!
خفت لاانام ويجيني كابوس وتعصب عليه..اي اخاف من اي شي.. مو بيدي الوكت هيج خلاني..
ثاني يوم الصبح جابو الريوك..وكمت اني من وحدي اكوم للاكل.. اشوف عيون نضال مطمئنه من اكوم اكل.. كملت ريوك وكعدت ع صفحه صافنه واكول وينج يازينه..شنو الصار وطشرنه الوكت وخلانه كل وحده بمكان.. وينج ..اخخ لو اعرف وين انتي وشصفى بيج الدهر.. 
قطعت فكري ايد عمه نضال ع ركبتي..كنت كاعده مقرفصه ..
نضال:كومي غسلي..اكو مي دافي وغسلي ومشطي..تره ريحتج بدت تفوح..
خجلت من هيج كالت.. 
نضال صاحت:نديمه! نديمه! انطي لهاي الحلوة صابونه وشامبو ومنشفه..واكو ليفه جديده بملابسي طلعيهه.. اجلفي زين..احب البنيه النظيفه!
كامت مني واني كبل وكفت ع حيلي ..انتظر نديمه تجيب الي كالت علي نضال.. انطتنياهن..وطلعت ملابس.. رحت ع الحمام..يعني زين نوعا ما.. مو كلش نظيف مثل حمامات بيوتنا..بس ماشي حاله..واني متأكدة لو ما نضال موجوده ماكان بهل مستوى.. كان يجوز اتعس بهوايه..
لكيت سطل مي حديد..تلمسته دااافي.. كزبر جلدي كله من خليت ايدي بالمي.. بديت اغسل واحس اطنان وسخ نزلت مني.. مااتذكر اصلا شوكت اخر مره سبحت سبح كامل.. 
ارتاحيت من غسلت..احس حتى ذهني صفى شويه.. طلعت كلها تكلي نعيما.. اني بس اهز براسي ومااحجي ولاارد...
كعدت اريد امشط شعري صاير صوف.. مكدرت..صرت اكطع بي تكطع.. نضال شافتني صاحت ع كيفج! ملختي راسج!
سكتت مجاوبت..كلت بداخلي ليش هلكد مهتمه بيه.. احد مكلفهه؟ معقوله تكون طرف من الورطوني؟
كملت تمشيط وذبيت تلبيسه المخده انطني وحده جديده.. حتى الغطه اخذته وحده كالت عوفي هذا وانطيج غيره..اصلا الغرفه الي كاعدين بيها احنه عبالك بيت مو سجن..كلشي متوفر ويتحكمن بكيفهن يطلبن تجهيزات ومفارش ..وكله بزود العمه مالتهن..
انتبهت خلال هاي الايام انه نضال ادخن..ومن ادخن تضرب دالغات وتروح بعالم ثاني..احسها موجوعه من صدك.. بس شي بداخلي يكلي لا تأمنين لاحد هنا كلهن مجرمات..

كانت من ادخن اتشغل الراديو.. مرات تسمع اخبار واركز ويا الراديو كان الوضع خربان بوقتهه.. تصريحات بوش وردود صدام ووو.. ماكنت اهتم.. لوين متوصل توصل.. نضال همين من تسمع هيج اخبار تمل وتظل تتأفف تطفي اواديره ع الاغاني عدها بكاسيت..كله تشغل ام كلثوم لو سعدي توفيق لو حميد منصور لو سعدون جابر.. كنت اظل انصت لصوت الاغاني واني بفراشي وكل كلمه باي اغنيه اطلعها تذكرني باهلي وعيشتي قبل.. 
كنت بجنة ومااعرف اكو هيج جحيم بهاي الحياه..عبالي كل الناس مثل حياتنه هادئه.. وخاصه بذاك الوقت نادر مانسمع جرائم..اغلب هم الشعب قبل العيشه والعوز..هاي كانت اغلب المشاكل .. 
مرت ايام وايام..نضال كثرت مواقفهه وياي.. مااكدرت احجي وياهه واعرف هي منو شنو غايتهه.. عيونهه تكسر وتجبر...
بقيت محتفظه بسؤالي لنفسي..
بس بيوم نمت بليل قبلهن كلهن.. هم فزيت لكيتها يم راسي.. لكيت نفسي الهث وعركانه..يمكن كنت احلم بس مااذكر اني حلمت..
نضال:وتالي؟ صوتج بده يزعجني ترا! كافي تونين وتعيطين من تنامين!
نزلت دموعي بدون مااحس..كلت:مو بيدي ..
مررت ايدها ع شعري وكالت...:كافي تعذبين بروحج..كلنا سوينا اخطاء ودناخذ جزاءنه؟!
رديت كبل لاارديا:بس اني مسويت شي! ظلموني الناس الباطله!
نضال:منو هم؟
هنا وعيت ع نفسي شنو حجيت..ردت اتلافه الجواب مكدرت.. كالت تعالي ورايه.. مشيت وراهه خطوات..كعدت بمكان كعدتهه المعهود وبدت تدخن.. طبعا تحجي بصوت ناصي ومحد يمسع.. خلت مخده الي بصفهه.. كالت نامي كعدي الي يعجبج..
اني بدون تفكير مددت..صار راسي يم فخذها.. هي ادخن وتذب حسرات طويله..
كالت ايييه يل دنيا.. وين كنتي قبل اشهر؟
بجيت وكلت..بنص اهلي واحبابي..
نضال:وشنو الصار وجيتي هنا؟ لتفكرين تكذبين عليه..ترا اعرف قضيتج من اولها لتاليهه بس احب اسمع منج!
تفاجئت بحجيهه..منين وشلون عرفت؟ 
بديتلها قصتي من اولها...احجي بهمس ودموعي تصب.. وصلت مرحله مكدر اكمل بنفس نبره الصوت الخافته واني بنفس الوقت ابجي.. كمت اخلي ايدي ع حلكي حتى ميطلع مني صوت...
احس شي بصدري يخنكني..وجع بصفحه كلبي.. 

#وجع_ذكريات