وجع ذكريات

ج 10

الجزء العاشر

كبل سويت الكهوه.. خليت كلاص مي واخذتهن ورحت.. 
-اسفه تأخرت عليك ...
سامي:عادي مصار شي..
-بس موزين تشرب كهوه بالليل..
سامي:خليها هو شبقى عقل براسنه !
كان يحجيها بيأس..
ردت اروح كلت:تصبح ع خير..
اخذ رشفه وكبل كطعها كال اوكفي!
-ها استاذ؟ محتاج شي..
سامي:تعالي اكعدي.. خل نشوف سالفتج وين صفت..
بدون تردد كعد ع طرف المرجوحه..
عيوني تسأل قبل لساني..
سامي:تدرين بيتكم بي ناس حاليا؟
-هاا؟ منو؟
سامي:اخوانج..
-اخواني؟ اني معندي بس اخت وحده هي زينه..
سامي:هههههههه يامسكينه.. عندج اخوان اثنين واخت غير زينه..
-لا موصحيح.. اكيد مشتبه..
سامي:ابوج مو اسمه......
-اي.. 
سامي:ذول اخوانج.. من جهة الاب.. ابوج متزوج ع امج كان..
مااحس اله دموعي نزلت.. :دتشاقه مو ؟ بابا ميسويها وهو يحبنا وماكان يغيب عن البيت بس من يضطر يسافر محافظات بشغل!
سامي:اوووو.. كل هذا المريتي بي وبعدج غشيمه؟ ابوج متزوج.. اخوانج واحد عمره 19ولخ 12 واختج 17..
-شلون عرفت.. مداصدك! شلون وليش؟ بابا ميسويها! بابا كان يعشق امي!
صفن بوجهي.. كال:رانيه.. لتبجين.. محد يستاهل.. حتى ابوج..
ابجي واكله:لتحجي ع بابا انته متعرفه.. اكيد عمامي همه ورا السالفه واكيد همه يعرفون بزواجه!
سامي:شعرفج ماامج همين كانت تعرف؟ 
بقيت مدنكه وابجي.. صدك لو كذب.. شنو هاي هم مخطط ثاني من جديد.. اخوان؟ منو امهم؟ وليش محسينا ع ابويه وشلون كان يلتقي بيهه.. احس كلبي راد ينفجر من القهر.. تمنيت افلش كل اليمي تمنيت اشوف ابويه واعاتبه.. 
بعدين رجعت سألت سامي:شعرفت بعد؟
ابتسم وكال:انتي بريئه..
-شلون؟
سامي:عامر ...هو الي سواهه..
-شلون عرفت منو كالك؟
سامي:ههه بعدج متعرفيني ست رانيه.. هذي شغلتي .. ميخفى عني شي..
-زين شسوي؟ اسكت ع وضعي؟ويبقى عامر يفتر ع طوله؟
سامي:لتخافين.. انتي هناا بأمان .. كلها ايام وتنشملين بقانون العفو..وعامر سالفته يمي.. لتشيلين هم..
باوعتله حيل.. دموعي صبت مثل النهر.. ممصدكه واخيرا انعرفت الحقيقه وراح يجي اليوم الي اكدر اطلع بي للدنيا واعيش مثل الناس..
خفض صوته حيييل.. بنبره كلها حنيه وعطف ماسمعتها من ايام عمتي نضال كلي:ليش تبجين؟ مشبعتي بجي؟
غمضت عيني ودنكت.. مسحت دموعي.. ورجعت باوعتله.. كلت:زينه وينها؟
سامي:بعد ممعروف.. اول مااعرف راح اكولج..
-شكرا..راح تساعدني مو؟
ابتسم وخله ايده ع راسه وارتكى ع حافه المرجوحه:شتكولين؟
-اكيد غيرتك متقبلها اذا مساعدتني..
سامي:عفيه..بس خففي من هل دموع عاد!
ابتسمت ومسحت وجهي:مداابجي!
سامي:ههههه اي واضح .. يله روحي غسلي وجهج ونامي.. اي شي تحتاجي كولي..
-تسلم ابو فهد متقصر..
كمت واحس براحه وخنكه بنفس الوقت.. مرتاحه لان اخيرا لكيت احد يوكف ويايه.. والعفو همين جاي...مخنوكه بعد الي سمعته عن سالفه الاخوان وزينه الي ممعروف وينهه...ومخنوكه لان العفو ميكفيني يثبت برائتي.. 
صعدت لغرفتي.. ذبيت نفسي ع الفراش.. كل كلام سامي انعاد كبالي.. انعصر كلبي عصر من اتذكر اخواني.. مادري هل شي زين لو لا..
شجابهم وليش كلها المصايب التمت بوقت واحد .. وين كانو.. وليش مااعرفت بغير ظروف؟!
تعودت ع الهم والقهر.. نمت وبكلبي الف حسره وسؤال ماله جواب..
وين تاليتج يا رانيه وين... 
ثاني يوم حاولت اكون افضل.. بس مااكدر انسى.. اخواني.. ههه.. صارو عندي اخوان بيوم وليله!
كملت شغلي.. وهمين ساعدت رغد بالاطفال.. هي بس نظفت وغسلت ملابس.. اما سامي كان كلش عصبي وميتحاجه.. عاط ع فهد من راح يمه.. هو شكد كان هادىء بس عاط بي من دون ميدري. بعدين رجع اعتذر منه وباسه.. اني هوايه فكرت اعوفهم.. عفو وراح يصدر بعد شكو باقيه يمهم بس خفت من عمامي.. حتى اذا هاي مراح يرحموني..
مر اليوم مثل كل يوم.. شغل اطفال .. نمت الظهريه شويه.. كعدت العصر رغد مبدله ورادت عهد ومجد همين ابدللهم... بدلو وطلعو.. عبالي سامي طالع وياهم.. تفاجئت من طلع من غرفته.. كان لابس كله اسود..
من شافني ابتسم..
سامي:تجين ويانه؟
-لا.. اخذو راحتكم..
بقى صافن بوجهي ومبتسم.. مااحس اله ايده صارت ع خدي.. مسح ع وجهي خفيف.. احس جسمي ثلج.. سمع صوت باب انفتح.. كبل نزل ايده وراح.. من راح عطره بقى يفوح ورا.. جريت نفس طويل انترس صدري من عطره.. اجت امه..
ام سامي:وين راحو؟
-مااعرف.. طلعو يغيرون جو..
دارت وجهه وكالت:اي هم يلوك لام عطوب!
ههههه صدك ضحكت من كالت هيج.. مااعرف ليش مغثوثه من رغد كلش.. ومااعرف شنو الجابرهه تبقى اكثر الوقت يم بيت سامي متروح يم اخوانه اذا ضايجه من رغد..
ظليت كاعده بالصاله وماانسى لمسه ايده ع خدي.. مااعرف شصارلي.. اجيبها منا ارجعهه منا اريد اقنع نفسي ماكو شي .. مااقتنع..
ليش هيج تسوي ياسامي.. تنقهر عليه؟ لو عندك نيه ويايه؟
بيومهه كلش اشتاقيتله. تمنيت يرجع من وقت.. هيج فجاءة وبدون مقدمات لكيت نفسي انتظره واروح وارجع اباوع ع الساعه.. ليش تقربت مني لهدرجة وليش عفتني دايخه بيك وبعطرك الي لسه ع خدي..
مااجو اله ورا العشا.. كلش طكت روحي ع مااجو.. صارت ابالي من يجي ورغد شلون تحضنه.. كلت نيالهه.. اي مادري شنو صارلي وخلاني هيج افكر بي.. هيج كل احاسيسي.. تمنيت يرجع يكعد ويايه.. اشوف عيونه شنو تكولي انتظر منه لمسه اخرى...
من رجعو.. استحيت اباوع بوجه رغد.. عبالك اني المذنبه..
هو بس شافني ابتسم.. خله علاكه ع كاونتر.. كال هاي الج.. بيها عشا..
تشكرته.. اخذتهه وكعدت اكل.. اكل بلا جوع ولا احساس بطعم..
كملت غسلت واخذت الاطفال وصعدت.. ليلي كله منمته..
اتمنى انزل جوه.. كل شوي اكوم اوصل يم الباب اريد انزل وارجع ابطل..
لحد ما انتبهت الاذان اذن.. خجلت من حالي.. استغفرت ربي وكلت ع الاقل احترم وجود رغد وطيبتها ويايه..
نمت شي ساعتين.. كعدت لكيته موجود بالمطبخ يريد يسوي كهوه لنفسه.. اي اليوم اني اتأخرت بنومتي وايس مني خطيه..
صبحت علي..
سامي:صح النوم.. صارلي شكد منتظر! 
-ها.. اسفه اخذتني النومه..
بكلبي اكول كله بسببك ليلي منمته..
اخذت الدله منه.. كلتله اني اسويهه ارتاح انت..
راح لمكانه المعهود.. بالحديقه ع المرجوحه.. بيومهه حبيت اسوي نفس الشي الي يحبه هو.. اشرب الكهوه.. كنت اكرهه ومااحب طعمهه ابد.. اصلا كنت اتعجب شلون تشربهه الناس ... 
سويت فنجانين.. دزيتله ورجعت اني كعدت بالمطبخ.. شربتها واحس طعمها مو ببشاعه قبل الي كمت اتصورهه..بس كان كافي المر الي جرعته بحياتي امر من هذي الكهوه.. كمل قبلي وجاب الصينيه..
سامي ابتسم:ها؟ شو اليوم كهوه؟
-اي حبيت اشربهه واصحصح..
سامي:صحه وعافيه..
-تسلم..
يالله شكد عاملني باسلوب.. كنت اشوف شلون عصبي وياهم وويايه شي ثاني.. 
مر اليوم بسرعه.. بالليل جهزت رغد شغلات سامي.. كنت اشوفهه واتمنى اني اجهز جنطته.. اشوف ملابسه واتحسر اقربهن يمي..
كنت كل ما اختلي وحدي اتناقض.. بين الحب الي صار بداخلي وبدون اي مقدمات.. وبين احتقاري لنفسي.. صرت الوم حالي.. معقوله هيج تسوين بالي مدلج ايده.. نسيتي جرحج ع اهلج الي اطشرو شي اندفنت وشي مجهوله وشي طلعت من جديد مااعرفهه؟ نسيتي كل هذا ورحتي تحبين؟
شكد لمت نفسي وشكد تناقضت وشكد تألمت.. اختمهه بجي.. اتمنى اموت واخلص.. طلعلي عذاب جديد وهم اكبر بعد..
صرت اتمنى يرجع بيه الوقت واقبل بعامر واتحمل كل شي منه بس يبقون اهاي بالوجود وابقى بنصهم واكحل عيني بيهم... شكد وشكد تمنيت.. وحياتي كلها خلصت امنيات..
من راح سامي صار البيت وحشه.. كآبه.. عبالك متعوده ع وجوده صار سنين.. وهنه ماكو غير كم شهر.. كنت اتمنى يتصل برغد واعرف اخباره.. بس هو حتى من كان يتصل بيهه متحجيلي.. اسمعهه تحاجي وتضحك واكول الحمد الله اكيد زين..
هوايه لمته اله.. بس بداخلي.. لمته لان خلاني افكر وقربني منه بحيث بعد مااكدر اطلعه من بالي.. شكد اعصب من حالي واتمنى ينقطع التفكير بي لحد مايصير راسي يون عليه من الوجع.. حتى رغد انتبهت الي.. كالت متغيره وعيونج ذبلانه.. واني مو بس عيوني ذبلت.. كلي ذبلت..
بس كلبي عايش ومنتظر امل من سامي...
اعرف مو حقي واني ناكره جميل وحقيره وغبيه وهوايه غبيه.. بس مو بيدي حبيته وخلص.. كل يوم يمر احبه اكثر واكثر.. ياريته ما انطاني وجه.. ياريته ما حجالي انه راح يساعدني.. ياريت يرجع الزمن.. اه اه..
خلصت الايام بملل.. كنت احس البيت جنه ومرتاحه نوعا ما..خاصه من اتذكر العفو الي مكان ع البال ولا ع خاطر... بس من طلعلي حب سامي صفح كلب موازيني..تمنيت باقيه بالسجن.. منتظره العفو وطالعه بدون مااجازف ولااعيش الخوف ولااتعرف بسامي واصير بالي صرت بي..
كنت اشوف رغد واتحسر اعيش مثلها.. عدها اهل.. وناس واصله.. يحبوها ودوم يجوها.. زوج واطفال واستقرار.. والاكثر حبيبها الها تحبه ووقت الي يعجبهه تقربله وتحضنه وتبوسه.. اني كبال عيني ومااكدر اقترب خطوه.. اشوف علامه تحذير عبالك.. احذر لاتقترب..
رجع باجازه.. بعد غيبه طويله...وكانت مو رجعه بالنسبه الي عيد.. بس هو كلش معصب.. مينفهم ولاينحزر.. حتى معاملته اللينه ويايه اختفت.. مو اختفت وانما خفت هوايه.. حتى مصارتلي فرصه احجي ويا.. مبقى بس 3 ايام ورجع..
كان الوضع كلش حرج.. بدايه الحرب ع الابواب..
ورغد حجتلي ع الاغلب هم راح يسافرون.. واذا سافرو اني اصفى بالشارع.. شكد بجيت بيوم الي كلتلي.. ليش حظي هيج ليش؟ شنو هل لعنة الحلت عليه وماعاد تخلص!
كان موضوع السفر محرد حجي.. مااعرف اذا راح يصير او لا.. بس طبعا اعرف حظي مسبقا .. اكيد يرحون.. واذا راحو اني اتيه واضيع...
اتصل وره يومين من راح.. كنت اتمنى اسمع صوته.. 
اجت رغد حجت ويا.. اباوعلهه عيونهه قلقه.. من خلصت المكالمه بجت بجي عبالك كانت منتظره يحاجيهه حتى تبجي.. ركضت يمهه.. معبالي تبجي لان حتصير حرب.. كل ظني صاير شي.. خفت من بجيها ودموعهه..
كوه فهمت سبب بجيهه.. كالت باقرب وقت سامي راح يطلعنا من العراق.. لان وجودنا هنا خطر..
وكالت اكيد سامي راح يبقى وراح ينقتل... من سمعت طاري القتل احس روحي رادت تطلع.. دمعتي بطرف عيني ومااكدر انزلهه خاف تثير شك..
بقت تبجي وشافتهه ام سامي .. رشتهه بمي وظلت تدرم عليها.. بيش طالبه ابني وفال الله ولا فالج ومن هل حجي.. انهدت عليها فد هده.. مااكدر احجي وياهه وامنعهه من رغد.. هي كلش عصبيه ومتتحاجه واخاف تطلع مني حجايه انشحت بيهه...
يوم كامل رغد لااكل ولاشرب.. بس تبجي.. اطفالهه يمي.. منا شغل همين ومنا اني هم صايره نار .. خايفه ع سامي من الحرب..
مادري شلون خلص اليوم.. ثاني يوم ام سامي راحت للسوك.. جابت جنطه سفر وياهه.. وبدت تحهز نفسهه.. مكيفه ولايمهه السالفه.. معبالك عدها اثنين ولد ضباط ويجوز يرحون بيهه.. 
رغد من شافتهه زادت بالبجي.. صارت تبجي وتكلي شوفيهه هاي ام هاي؟
حرت شلون اسكتهه.. شكلها وجعتي مثل وجعتج؟
هديتهه بكم كلمه.. الله كريم واكيد متصير هل حرب والرئيس موجود منو يطب كاعنه ووو... من هل حجي..
كامت هي سبحت والاطفال يمي.. خليتهم بالصاله وطشرت الملاعيب مالتهم..
رحت اني المطبخ اسوي غدا.. مااشوف بس طبه سامي علينه.. باوعتله من فوك ليجوه.. ممصدكه.. شحلو طولك من تفوت.. هيج بداخلي اكول.. اتمنى اطفر يمه واحضنه واشتمه..
سامي:السلام عليكم.. شلونج رانيه؟
-الحمد لله . وانت.. شنو الاخبار طمنا؟
سامي:مو زينه الاخبار.. وين رغد؟
-دخلت للحمام هسه..
سامي:رانيه.. تعالي نحجي..
طلع للطرمه لحكته..
-ها خير؟ كول ابو فهد؟
سامي:اكيد عرفتي امي ورغد راح يسافرون؟
-اي؟
سامي:وانتي يارانيه؟ شلون وين ترحين وين اخليج؟
-مادري..
سامي:مااكدر اطلعج واصلا مااكدر اطلع جواز الج.. فهميني شسوي؟ 
طلعت مني بدون ماادري بسرعه كلتها:اخذني وياك!
سامي:رناوي.. وين اخذج؟ رايح لحرب اني لو ارجع لولا! فهميني وين تأمنين اكدر اخليج؟
صبت دموعي وكلتله بجهنم.. احسن مكان ارتاح بي..
سامي:رانيه كافي دلع! ماعندي وقت ! احجي وين اكدر اوديج؟
-مااريد اروح لمكان.. ابقى هنا .. 
سامي:كافي بجي .. اني روحي طالعه لتبجين دخيل ربج!
-خايفه!
سامي:ادعيلنا وبس..
الخبصه والهلع الشفته بعينه خوفني اكثر واكثر.. نوب يكلي ادعيلي.. صدك ايست.. كل امل بلحياة راح مني..
طلعت رغد من الحمام.. كبل اني رجعت ع المطبخ.. تصرفت كان مصار شي.. مدنكه راسي اشتغل وابجي.. شلون بيه..
ركضت علي حضنته.. بوسته من ركبته ومن عيونه.. صارت تبجي وتحجي تكوله روح ويانه وعوف الحرب.. يرد عليها ومنو اهل الحرب؟ غير احنا؟ شلون اعوفهه؟
من كانت تحضنه وتبوسه شفت نظراته اليه.. كأنه ميريد هل شي يصير كدامي.. 
سامي:كافي رغد.. انطيني مجال افهمج.. هاي الجوازات كملت.. خلال هذا الاسبوع انطيكم خبر وسافرو.. 
رغد:لتعوفنا الله يخليك.. سامي بدونك اموت اني.. لتروح للموت برجلك!
سامي:كافي حبيبتي.. كلمن بيومه.. 
فات جوه بوس اطفاله.. وراح لغرفه امه.. شويه وطلع منها.. وصلته رغد ع باب الشارع.. ترش مي ورا وتبجي.. اني هم بعد هنا مضميت دموعي.. بجيت بحي مال قهر سنين...
طلع من البيت واحس مراح يرجع.. احس رجليه معادت تشليني.. ماادري شسوي. رغد بس تبجي .. الاطفال نامو بدون اكل.. اني همين حالتي اصعب من حالهه...
للعصر اجه قاسم.. دخل جوه. واخته تبجي وهو يواسي بيهه وعينه عليه.. كلت اني وين وهذا وين.. هسه كل عقله يريد اباوعله!
اسمعه يسألها عني ويكلها وين تروح.. هي صاحت ماادري ماادري..
بعدين كللها همه همين راح يسافرون يجوز ...مبقه شويه وطلع..
كلها راح تروح.. انتي يارانيه! وين تولين..
بدت رغد تجهز للروحه.. اني همين ساعدتهه.. حضرت الها ملابس اطفالهه وشغلاتهم الضروريه.. شفتها اخذت من ملابس سامي حضنتهن وبجت وخلتهن بجنطته...انمردت مرد من اشوفها هيج تسوي.. اني اريد احد يهديني ويكلي لتخافين سامي راح يرجع.. وهي تتصرف كأنه ميت..
حضرو كل شي.. فلوسهم وذهبهه.. عافتلي مصرف اليه همين.. وكالت وقت الي تردين روحي.. وصتني اقفل البيت من اطلع..
اثنينه خلصانهه بجي ومناحه.. كلت وينج عمه نضال اطلعي ياام كلب القوي وام حجايه الحلوه.. صدك تمنيتها يمي.. لو كانت هي موجوده يمي ماخلتني مهزوزه ومكسوره هيج..
وره شي يومين من جيه سامي.. دك التلفون... كلنا خايفين... نباوع ع التلفون ومحد يكدر يقرب يشيله.. بعدين رغد تشجعت وراحت للتلفون..
بقت بس تبجي وتكول اي اي اي .. اخر شي دعت دعاء شطوله.. سدته..وكالت..باجر نروح للمطار..بقت تبجي وماتدري بالدنيا وين..
انقهر عليها لو انقهر ع حالي.. مادري..
ثاني يوم.. تجهزو.. الاطفال.. هي .. ام سامي.. شلعو كلبي من صدري من اشوفهم يتحضرون للروحه.. رغد ضايجة كلش ولحظه والثانيه تبجي.. 
ام سامي عادي اصلا ولا يمهه...
بوست الاطفال.. شميت ريحتهم.. غلاتهم من غلاة ابوهم.. بيهم ريحته ودمه .. شلون راح افاركهم.. حضنتني رغد وبجت هوايه.. كالت ديري بالج ع البيت.. اذا رجعنا ترجعين منا وبينا.. واذا مرجعنا ادعلينه وين ماكنتي..
اصعب شي الوداع.. خاصه اذا متعرف بعد وراه لقاء لو لا..
طلعو ..روحي راحت وياهم.. طلعت وراهم.. كان السايق مال سامي هو الي جايهم.. رشيت وراهم مي.. ابتعدت السياره الى ان طلعت الشارع..
سديت باب الشارع.. اباوع ع البيت.. ادخل لو ماادخل.. شلون راح ابقى وحدي.. وشنو من عقاب كاتبلي ياالهي حتى باقى وحيده بكل مكان اروحله!
دخلت وبكل زاويه ىبكل ركن بالبيت بجيت ذاك اليوم..
لحد مانشفت عيوني وراسي انسطر .. دخت ونمت بالصاله ..
كعدت مغرب.. وحشه.. ماكو صوت.. جسمي مكسر.. تعبانه.. عيوني احسها تريد تطلع من وجهي.. 
كمت بيه مابيه.. غسلت وجهي.. افتر بالبيت.. شسوي.. حتى شغل ماكو..
لا طفل يبجي والتهي بي.. يارب انطيني الصبر.. 

يتبع...