وجع ذكريات

ج 12

الثاني عشر

مادري شصارلي من سمعت صوت احد جاي ويفتح الباب.. خفت.. كبل درت وجهي واسرعت خطواتي للبيت.. دخلت .. اخذت نفس طويل..
شدسوين ؟ وين رايحه؟ 
رجعت افكر بعقل.. اذا رحتي وسألتي وعرفو وحدج عايشه؟ شحيصير بيج؟ سامي واكيد مات.. راح تبقى العالم تنهش بلحمج.. 
ليش ... شمعنى اني من الناس.. انكتبن عليه كلهن.. موت وفراك وحزن ..
والاتعس.. ليش؟ ليش حبيتي ؟ وشجابج ع الحب؟ 
ظليت الوم حالي..ايام واني انتظر وماكو.. لا حس ولاخبر..
بيهه ايست كلش.. صرت افرش المصلايه.. اصلي لامواتي.. ومن ضمنهم سامي.. من اكمل اقرالهم قرآن.. كنت مقتنعه هو مات..
رحت للموت برجلك.. ليش ماعفت العراق.. وليش بقيت .. 
نصبت عزا اله بيني وبين نفسي.. كل دمعه تنزل مني تحرك خدودي حرك.. مو بس خدودي احتركت... كلبي هم.. وروحي انتهت من زمان اصلا..صرت بقايا انسان.. 
صارت الدنيا بعيني سوده.. عايشه بس بالاسم.. اتحرك واسوي الشغل بس حتى يخلص الوقت.. لان اذا ابقى كاعده اتخبل واتهستر بالبجي.. صح ماكنت اسكت من اشتغل.. همين اظل ادندن وابجي.. بس مو مثل اذا كعدت بدون شغل.. اصير اضرب نفسي وأأذي حالي..
رحت للمطبخ.. اباوع ماكو شغل.. كله نظيف ومرتب.. كلت خل اطلع المواعين والجدوره اجلفهم.. بديت اطلع واجلف. وهنه مبيهن شي.. بس هيج يمكن لحظه خبال اجتني وسويتها..
دااغسل.. سمعت صوت الباب مال الشارع ديندفع.. انفتح .. خفت اتحرك واشوف منو.. مااحس اله سامي كبالي.. مصدكت.. غمضت وفتحت اريد اشوف خاف كمت اتخيل.. اي هو كبالي.. مو حلم ولا خيال..
تعبان.. عيونه ذبلانه وحمر.. لحيته طولانه.. باوعلي باسف ويأس..
اني مااعرف شنو صارلي.. عندي حجي هوايه اريد اكوله.. بعيوني دموع كومه.. بكلبي شوك ولهفه .. 
سامي:شلونج
من كلي شلوني.. انفجرت بعد.. الوحده والخوف والقصف الي كان فوك راسي عبالك كانن مثل القنبله مجموعات بداخلي.. انفجرت بعد مااتحمل..
ابجي واريد الحك اخذ نفس .. 
-ليش هيج.. ليش مو ردت اموت.. ياريتني متت.. ياريتني ماصرت ولا انخلقت.. 
تقرب مني.. حضني حيل.. حسيت بحضنته يأس مو طبيعي.. مكال شي.. غير بس.. اسكتي .. داحترك مثلي مثلج..
دفنت راسي بصدره.. ممصدكه..صدك رجع.. وسالم ومبي شي.. 
بعدني عنه.. دار وجهه وراح.. شفته طلع من الغرفه وبيده ملابس.. دخل حمام.. بس طول.. ماكدرت اسأله ليش مديطلع.. وصلت يم باب الحمام.. اسمع صوت هدكات بالحايط.. ركزت اكثر.. عرفت هذا هو كان يضرب الحايط بيده..يمكن فوك الساعه بقه..
طلع ميباوع بوجهي.. كبل راح للغرفه.. سدهه علي ومطلع..
اني بقيت بيومهه ابجي.. فرح وحزن.. لتستغربون.. لان اني كتله تناقض صرت.. بين حزن وفرح.. حب وخوف.. الم وراحه..
انتظرت ساعات ومطلع.. كلت اعوفه.. اكيد نفسيته تعبانه.. صعدت للغرفه مالتي قبل.. خليت راسي وشوي بالي مرتاح.. رجع سامي وموجود بالبيت.. فكرة وجوده كافيه تخليني انام.. نمت بليلتها نومه طويله.. مو عادتي كانت.. قبلها بايام كنت مااطول ساعه نوم.. افز وارجع انام وارجع افز وع نفس المنوال... بس بليلتها رجعت الروح بيه..
كعدت الصبح.. نزلت عيوني ادور ع سامي.. ملكيته.. كلت يجوز بالحديقه..
طلعت همين ماكو.. كلت يجوز بعده نايم.. رحت سويت ريوك مرتب.. ياهسه يطلع ياهسه ماكو..
صار الظهر وهو مطلع.. متت خوف.. معقوله راح؟ بس لالا شلون راح وميكول وبعدين هي سقطت بعد وين يروح..
دكيت باب الغرفه.. ماكو صوت.. خفت افتح الباب ومالكاه.. تشجعت فتحته.. شفته بفراشه.. اخذت نفس بعد هل هبطه.. 
مشيت خطوات اريد اقرب واشوفه.. 
كان صاحي.. منايم.. امدد صفح وايده جوه راسه.. عيونه حمر دم.. تقربت اكثر شفته يبجي ودموعه نازله.. كعدت بالكاع.. صار وجهه كبالي.. جريت كلنس كان ع ميز بصفه.. مسحت دموعه.. هو بقى صافن بوجهي.. 
سامي: خسرنا كل شي.. رانيه انغدرنا.. العراق انتهى بعد..
-اهم شي انته موجود.. لتبجي وتخليني بنار.. لخاطري كافي..
سحب ايدي.. جراني اله حيل.. نيمني بصفه.. مااكدر اشوف وجهه صرت.. بس كنت احس بدموعه تنزل.. بحياتي مكنت متخيلته يبجي ابد.. القوة العنده ماكانت عند بشر.. جريء وگلبه قاسي..
بس بذاك اليوم صرت مثل شمعه وتحترك بين اديه.. ظل حاضني وقت طويل.. ايدي صارت ويه امتداد ايده.. كل شوي يعصرها حيل..كان هذا الوجع الي بداخله هيج يسوي بي.. كانت ايدي تأذيني بس محجيت.. عفته يريح كلبه..اني همين مقصرت بيومهه بالدموع والبجي.. اثنينا نبجي . و كل واحد ع هم شكل.. 
انتبهت.. اني بفراش رغد.. استحيت من نفسي.. كمت.. هو بقى يباوعلي..
سامي:وين؟
باوعت ع انحاء الغرفه.. هو افتهم.. سديت الباب وطلعت..
القلق رجع ياكل بيه.. ليش تبجي ياسامي.. وشسوي واخليك تنسى همك.. ادري مو شويه لصار.. بس قدر الله وماشاء فعل.. مابدينا ولا بيدك انته كنت احاجي نفسي.. مااكدر انطق كباله هيج.. احس مااكدر اواسي..
واكيد عمه نضال حالهه بعد اتعس..
بقى سامي ع هل حال.. ايام طويله هيج بقى.. بس بالغرفه وللحمام.. هذا حده كان.. الاكل وجبه وحده واسمه اكل .. لكمتين ياكل بس.. كنت اخذله الاكل ع غرفته.. وهو بس ساكت ميحجي..
كلما اشوفه هيج كنت انقهر واتكآب.. 
صار صعب كلش.. ميحجي واذا حجه كلمه لو اثنين وبس نتر..
اني همين من شفته هيج ابتعدت عنه.. ماسويت اكثر من واجبي.. اكله وشربه وملابسه وبس.. 
مرت ايام وبالشهر تقريبا يله بده يستعدل.. ومو سامي الاول.. كلش مكسور كان.. وهو من قبل ميحب يجامل ولا يضحك.. ومنا سالفه الحرب صارت....شفته طلع من غرفته.. بيده ملابس كومه.. ركزت هذولي بدلاته العسكريه.. وين رايح بيهن؟
فتح باب السطح.. صعدت ورا.. طلع اكو طاسه مال بناء متروكه كانت فوك... خله ملابسه بيهه.. اني اباوع واكول هذا شديسوي يربي شجاه..
ذب نفط .. وعود كبريت وكبن.. اني من شفته كبل عطت لااا.. طبعا كنت ضامه نفسي بس من شفته حركهن لا طلعت كباله..
هو كاعد ويدخن.. يباوعلي ويباوع لملابسه الي تحترك.. كام. شمر الجكاره وسحكهه جوه رجله حيل.. رجع نزل.. اني بقيت صافنه ع ملابسه الي تحترك واحترك بنار وياهن.. اشو هم رجع وجايب بعد ملابس.. كان عنده رتب هوايه.. يعني هاي القطعه الي عليهه التاج والنجمه اقصد.. تكون مستقله عن البدله.. وتتلبس بيهه تلبيس.. شفته جايب الحاويه الي بيهه الرتب ..
خله البدلات.. رجع يشمر بالرتب وحده ورا الثانيه ويباوعلهن واحسه محروك دمه ع الصار.. 
عطت كافي الله يخليك.. عوفهن لتحركهن..
سامي:مداكدر.. مداكدر اشوفهن.. خليني احركهن مثل مااحتركت بغداد..
بجيت .. لك تروحلك فدوه كل بغداد واهلها.. بس لتسوي هيج.. دتموتني .. اطلع اتونس سافر .. دخيلك لتبقى تحرك بنفسك..
نزل وعافني عبالك ميسمعني.. اني كعدت.. بقيت ابجي واراقب النار لحد ماانخمدت وصارن البدلات رماد...
روحي صفت مثل الرماد الي اشوفه بالطاسه.. ويمكن هم ارجع اشتعل وهم ارجع انخمد رماد... رمااااد يتناثر وي الريح..
نزلت لكيته كاعد بالصاله.. وجهه ميتفسر..
كال:هل اسبوع اسافر.. لازم اشوف امي ورغد.. اخواني هم سافرو..
انقبض كلبي من كال سفر.. كلت اي راح يروح ميرجع.. 
-وشوكت ترجع؟
سامي:مادري.. اشوفهم وارجع بس مااعرف شكد اطول..
سكتت.. رحت كملت كم شغله.. كل مااتذكر حال سامي واني اشتغل اختنك.. مابيدي شي اسويه اله.. لو كان طالب عيوني انطيهيا..
كأني عايزه هم وقهر .. حتى حزني ع اهلي ومصيبتي صارن رقم2 وسامي وحالته طبعا رقم1..
بده يجهز نفسه.. يسافر لاهله.. طبعا مااعرفت تفاصيل منه.. شوكت راحو واخو الضابط شوكت رجع.. كل هذا محجالي عنه.. ومكنت اكدر اضغط علي بالحجي واحاول اعرف...
شكد توجعت.. شفته يتحضر للسفر.. يعني راح يرجع وجع الوحده.. الغربه والفقد.. راح ارجع بين حيطان.. وبس صوتي هو الينسمع بالبيت.. 
تجهز وراح.. راح حتى بدون ميودعني.. مااعتب علي.. كان وضعه صعب كلش.. ومحد راح يفهمه بس الي يكون بمكانه .. 
من كعدت ولكيته ماكو.. الخيبه الحسيت بيها كطعت كلبي.. ترك فراغ كبير بيه.. احس الجهه البيهه گلبي ثكيله والنبض اثكل بعد..
افتريت بالبيت بيومهه.. هم وحيده.. وهم تركج بدون ميودعج؟ بجيت .. تألمت.. عانيت.. وكلهن وحدي..
يوم اثقل من يوم يمر.. مااعرف شصاير بالدنيا بعد.. بس شفت الجوارين رجعو لبيوتهم. المحلات نهايه الشارع فتحت والاسواق.. 
هوايه خطر ابالي بايام غيبه سامي اترك البيت واروح.. اصلا ماعدت اخاف من احد.. الدوله واصلا اني معفو عني كان.. وسقطت بيد الامريكان..
واذا ع عمامي يردون يموتوني خل يموتوني.. مو اصعب من الموت الي اعيشه واني وحدي .. مو اصعب من الذكريات الي متفركني.. ولااصعب من ضياع اختي وين ماوين.. يعني ببساطه فكرت.. انه اني اتحملت هواااي وللصبر حدود.. اذا متت احسن الي.. احسن من عذاب روحي اليومي..
موتة يوم ولا كل يوم..
بكل مرة اتحضر واكول اروح وابطل.. سامي اسبوعين ومرجع.. كلت خلص.. المن باقيه.؟ حب؟ هو اصلا موالي؟ انتظر شنو بعد؟ ع الاقل اطلع اشوف اختي زينه وين..؟
والله تجهزت.. كعدت اباوع ع البيت.. رجعت كمت.. يله صار وقت الوداع.. كلها ودعتني وراحت.. هلمره اني خل اروح ..
دامشي لباب المطبخ.. مااشوف اله سامي كبالي.. 
سامي:وووووين؟ خير؟
-اني رايحه.. ماله داعي بعد وجودي هنا..
سامي:عوفي البيدج ورجعي لغرفتج!
-وع اي اساس اني ابقى هنا؟ اطفالك موجودين حتى ابقى ؟
سامي عاط:كافي تعاندين ارجعي كلت!
صوته خوفني.. اخذت الجنطه وصعدت فوك.. خليتهه ونزلت جوه.. كلت اتصرف كأني ممسويه شي.. ويمكن جيته بيهه صالح قبل لااطلع..
نزلت كان بالحمام.. كعدت انتظره بالصاله..
طلع تصرف كأنه مشافني.. دخل غرفته.. 
صار عندي فضول اعرف اخبار رغد.. والاطفال.. كلش اشتاقيت الهم..
دكيت الباب علي.. صاح ادخلي..
-اكدر احجي وياك؟
سامي:شكو؟
اشرتله براسي ع الصاله. طلع كدامي وكعد ..
سامي:احجي شكو؟
-لا ماكو شي سلامتك.. بس حبيت اعرف اخبار الاطفال وامهم.. ووالدتك..
سامي:زينين..
ردت يحجي اكثر بقى ساكت.. يربي وتاليهه..
-زين شوكت يرجعون؟
سامي:ميرجعون بعد.. 
-هاا.. ليش؟
سامي:اي.. هيج افضل..الوضع خطر هنا..
-اذا خطر ليش رجعت؟
سامي:شسامعه عني؟ اشرد من الموت؟
-لا.. بس داكول..
سامي:انتي شخبارج؟ ليش لزمتج تردين ترحين؟
-موزينه.. وليش حتى مااطلع.. داختنك وحدي.. اريد اشوف اختي اعرف وينهه.. 
سامي:عوفيهم.. لتفكرين ترحيلهم.. 
-ليش؟
سامي:احسن..
-شنو هي حزوره؟ ليش حتى مااروح لاختي.. ؟؟!هاي اذا عرفت وينها!
سامي:يعني اله يقتلوج يله ترتاحين! ابقي هنا! بس انطيني وقت اني راح اتصرف وياهم..
-شحتسوي؟
سامي:اخذلج حقج وزايد..من عامر ..
-لا عفيه..تره هو مجرم يروح يتعرضلك لو يتعرضلي!
سامي:معليج انتي.. بس انطيني وقت .. راح تشوفين شحيصير بي..
كان يحجي وممتردد ابد من كلامه..
خفت ليروح يقتل عامر.. وهو هيج كان مبين ع ملامحه..
بقينه سكته.. لحد ماراح لغرفته.. بقى ايام ع هل حال.. عصبي وكله نتر ميتحاجه ابد.. تجنبته كلش.. بنفس الوقت اتمناه يحاجيني ويسولف ويايه.. اصلا كافي عليه الشهرين العشتها وحدي.. ردت بشر احجيله اشكيله يسمعني يواسيني .. بس سامي كان حابس نفسه بقوقعه.. مو راضي يتجاوب ويه الوضع.. بيوم اجو جماعه.. عرفت هم جماعته.. طلع وياهم .. لليل يله رجع.. خفت من مرت الساعات ومارجع.. كلت يجوز غدرو بي ويجوز صار بي شي.. ماارتاحيت لحد مارجع.. اووووف .. بكل مره يدخل بيهه اني قبلهه ماكله طن خوف وقهر.. من اشوفه ماادري شيصير بعقلي .. اله شوي يضرب.. اعصب واشتاقله واحبه وبودي اعيط واصرخ بنفس الوقت....
بس تمر لحظات.. يروح هذا الاحساس.. والكي نفسي تايهه بين عيونه..
هو من خلصت الحرب ماعاد يهتم بيه مثل الاول.. حتى كلامه مو اقل من رسميات وكذا.. عبالك نسى قبل ليروح شكلي.. عبالك نسى الاحبج!
ليش؟ موهي لحد هل لحظه تتردد بأذني.. !
بديت ابتعد عنه.. وبنفس الوقت احترك.. كان لازم اخلي حد لكرامتي ويا.. مو كافي اني باقيه بس لان هو ميقبل اطلع! صرت بالبيت عباره عن خدامه اله.. ماعرف بره شكو..قررت اطلع من البيت.. كافي داتحمل فوك طاقتي ماتحمل الاحبه يتجاهلني..
اخذت جنطتي.. لبست وطلعت.. هو كان بغرفته .. بقيت امشي بالشوارع.. دمعتي بطرف عيني.. وين كنت وين صرت.. يابه ليش عفتني.. يمه وينج.. 
تعالو اخذوني يمكم.. حياتي عذاب..بدونكم.. اني انتهيت..
امشي وهموم الدنيا كلها بيه.. هوايه ابتعدت عن بيت سامي.. اي حتى انت ياسامي اعوفك.. انت اساسا مو الي.. اني التجاوزت واني الحبيتك ويمكن اني مجرد نزوه بالنسبه اله.. والاحبج طلعت بضرف هو ماكان يدري بنفسه.. اي اكيد هيج.. ماله غير تفسير..
وكفت بنص الطريق.. وين رايحه؟ شدسوين؟ عندج اهل وراجعه الهم؟ اخخخ شكد تناقض.. اخخخ شكد وجع.. صرت اباوع ع السيارات.. اتقدم كم خطوه وانهي هل عذاب؟ 
درت وجهي.. كافي .. انتي جبانه من الموت.. جبانه حتى من حبج..
جبانه حتى مرحتي ادورين اختج.. جبانه مرحتي تشوفين اخوانج..
كعدت ع الرصيف.. سرحت هوايه.. بزماني..بحزني بكل شي مريت بي للحظة.. مااسمع بس صوت رجال يصيح.. كومي منا .. كطعتي رزقنا!
التفتت علي.. كان رجال كبير.. نرفزني.. يصيح وعبالك كاعده ابيته مو بشارع عام.. كمت ..بقيت امشي ع الرصيف..
مااشوف اله سيارة سامي.. باوعت عبالي سياره تشبهه.. بس كان هو الي بيهه رأسا درت وجهي بس لمحته.. كلبي يرجف.. امشي وعيني ع المحلات الي بصفي.. تصرفت كأنما مشفته ولاشافني.. كلت اي عدت.. راحت .. 
مااسمع بس صوت البريك كلش قوي.. خفت التفت.. ظليت امشي ورجليه تتراجف.. مااريد التفت.. امشي ووين متوصل توصل..
حسيت اكو شخص ورايه.. اسرعت خطواتي.. سمعت صوت خطوات همين اسرع ورايه.. مااحس بس العته ويه ايدي..
انداريت.. عيون تتطاير نار وشرار.. خزرني.. جرني جر ومشى بيه للسياره.. ردت بس احجي وانطق مكدرت..
كعدت بالسياره بشمره منه.. صعد وركع الباب حيل.. بس الله اليستر شحيسوي بيه..
كبل شغل وانطلق..بس ابتعدنا عن الاسواق والناس الي شافتنه هنا سامي انفجر.. عاط بكل صوته.. وين موليه! فهميني وين موليه! انتي مخبله لو صاحيه! اظل يوميه اركض وراج ! 
ردت احجي بس طلعت مني أ هو رجع عاط بيه.. اش ولا حرف! لتحجين خبلتيني ! لج فهميني شلون اطلعين ! شلووووون...
ظل يعيط شلون شلون .. تخبل عليه رسمي... من صوت عياطه نزلت دموعي وماعدت اشوف شكدامي ولا اليمي..ردت بس احجي واجاوبه مخلاني.. كل ماافتح حلكي يعيط.. لحد ماوصلنه البيت.. دخل السياره جوه.. فتح الباب ويعيط انزلي! 
نزلت وبسرعه دخلت المطبخ.. شمرت الجنطه.. ردت اصعد للغرفه كال اوكفي بعد حسابج مخلص.. من كلي هيج اني تهسترت.. صح كنت اتمنى ميعوفني ويفرط بيه.. بس همين مااريده هيج يستملكني وبس يعيط ويحجي..
-كااافي! ياحساب عندك ويايه! من جبتني لهسه واني ساكته! شتريد ! ليش لحكتني! تريد ابقى خدامه! خلص .. اني جزعت اني مليييييت.. ياعالم ارحموني شويه .. كافي كل واحد اخذ جزء مني....! 
انفجرت ابجي واحجي.. هو بقى صافن ع ردة فعلي..توقعت راح يجي يصالحني لو يعتذر.. بس الصار عكس ماتوقعت...

يتبع..