وجع ذكريات

ج 11

الحادي عشر

صرت افتر بالبيت مثل المخبله.. اتمنى رغد ترجع.. اتمنى تبطل متسافر ونبقى كلنا ابيت واحد .. بس سامي مقبل يبقيهم.. خاف عليهم وهو مركزه حساس كان..
يومين صرت مثل المخبله بيهه.. لااعرف جيرانهم واطلع يمهم.. لا احد يجي للبيت.. ثالث يوم شوي احسن.. حتى بديت اكل .. بعد ماكطعت الاكل يومين.. بديت اطلع شغل من جوه الكاع.. مخليت شي مسويته.. جلف لاصغر مكان.. الطابق الثاني كله نظفته.. حتى السطح.. بس حتى اخلص وقت.. كملت شغل بالطابق الثاني .. اذب ثكلي حيل بكل بايه انزلها.. ماله وطاكه روحي.. اسمع صوت التلفون يدك...
تحولت من سلحفاه الى ارنب.. ركضت ركض..
شلت التلفون.. كان سامي.. احس كلبي تكطع..
سامي:الوو.. رغد؟
-الو..لالا.. اني رانيه..
سامي:ها رناوي..شلونج؟ وحدج انتي؟ راحو؟
كوه لازمه نفسي ماابجي:اي.. راحو..
سامي:محتاجة شي .. خوما خايفه؟ 
شكول.. كلهن بيه.. جاوبته:لا..
سامي:شبيج ؟ صوتج مخنوك شكو؟ باجيه؟
هنا اني انفجرت مااستحملت اكثر.. 
-اصلا راح اموت وحدي.. اني داموت.. داختنك..
سامي:هسه مااكدر احجي.. اذا كدرت امرلج بالليل.. كولي محتاجة شي؟
-لا.. كل شي موجود يمي..بس الله يخليك شوفلي حل. مداكدر ابقى وحدي .. البيت دياكلني اكل!
سامي:ماشي ماشي.. بالليل اجي..
سلم عليه وسده.. ممصدكه .. راح يجي.. واخيرا.. طكت روحي تلث ايام يمكن لو حيوان هم كان طك ومات.. البيت ياكل بيه اكل.. يمكن لو رايحين بغير ظرف ماكان تأثرت هلكد .. بس اسم الحرب والهجمان الي راح يصير كافي يخليني مااستقر بمكان..
رحت حضرت عشا.. والبيت اصلا نظيف.. انتظرت سامي.. ساعات ومااجه.. غفيت بالصاله ع امل يجي.. ماكو.. حتى بالليل فزيت اكثر من مره عبالي الكاه جاي مااجه.. 
كعدت الصبح.. مالي خلك اكوم من مكاني.. اباوع ع السكف واتمنى يوكع عليه واموت واخلص.. اكول المن كعدتي وليش منمتي نومه مثل اهل الكبور..
بقيت ع امل يجي.. ماجه.. صار الليل.. انتظرت وهم ماكو.. طبعا اني لازمت الصاله.. مااكدر اتركها.. اكول بلكت يتصل.. والتلفون كان بيهه..
مااتصل ولااجه.. تلث ايام كطعت الامل من جيته..
صرت اروح ادخل لغرفتهم هو ورغد.. اشبع عيوني بصوره وبملابسه وارجع ارتبهن واطلع.. 
كل مااسمع صوت سياره يمر بالباب اكول هذا هو.. وتفوت السياره وارجع اأيس من جيته.. 
تعشيت.. ودخلت حمام طويل بليتلها.. اريد الوقت يخلص.. مااريد ارجع للصاله واشوف البيت فارغ.. بحياتي مامريت بهيج شي.. ما عشت وحدي ولا يوم.. 
رجعت للصاله.. امشط وابجي.. خليت شعري مفلول.. مالفتيه ونمت.. 
كعدت ع صوت فتحه باب المطبخ.. متت خوف.. لان كنت نايمه.. وكنت مأيسه من سامي.. كلت اكيد حرامي.. سويت نفسي اني والميت.. كلت حتى اذا حرامي خل يبوك ويطلع براحته.. اديه صارت ترجف.. خليتهن بين رجليه حتى لاتتحرك البطانيه.. ويتخيلني نايمه ويبوك ويطلع.. واساسا ماكو شي يبوكه.. مخلو شي بالبيت بس المصروف مالي..يعني اله اذا راد يبوك القناني مال غاز وبذاك الوقت كانت تصير هوايه.. او يبوك الاثاث..
جمدت نفسي تجمد... حتى نفس كوه كمت اسحب..
مااحس اله ايد وانحطت ع خصري.. كنت نايمه صفح.. ومغطيه راسي.. الايد الثانيه انرفع الغطه عني.. سديت عيوني حيل مااريد اشوف شراح يصير بيه.. كل ظني الحرامي..
اسمع صوت سامي بهدوء كال.. رانيه.. اني اجيت.. فتحت عيني ممصدكه.. هذا سامي لو مو سامي.. كانت ظلمه بس ضوه الكراج فايت ع المطبخ وللصاله.. اي هيئه راسه كانت هو سامي طلع..
كعدت ع حيلي.. هو همين كام من الكاع.. اريد الحك اخذ نفس ..
سامي:شبيج؟ خفتي؟
فتح الضوه.. مخليه ايدي ع كلبي وارجف.. 
-لا.. بس عبالي حرامي..
سامي:ههههه صدك ضحكتيني واني مالي خلك.. 
باوعلي .. رجع كعد بصفي.. اني مدنكه واحس كلبي يريد يطلع..
جر ايدي الي كانت ع صدري.. لزمها بخفه ..
سامي:هلكد خوفتج.. اسف..
ايدي زادت رعشتها بيده.. هم خوف وهم توتر..
جر ايدي الثانيه وطبكهن سوا..:كافي ياعيني اني هنا لتخافين.. منو يوصلج وانتي يمي.. 
بقى يفرك بيدي .. اني سكته مااحجي.. بس كلامه هداني.. شويه خفت الرجفه.. باوعت لوجهه.. شكد تعبان مبين ومتغير.. مااكدر اكوله.. سحبت ايدي . وكلت:جوعان؟ تريد تاكل شي؟
-اي والله.. جوعان وتعبان..حضريلي الحمام بلا امر عليج.. اسبح اول شي وبعدين اكل..
كمزت كبل.. طلعت ملابسه.. خليتهن بالحمام.. فتحت المي كاسرته .. كان بعده الوقت بارد.. رحت وكلتله تكدر تفوت..
دخل يسبح واني سويتله عشا ع السريع.. حضرته وخليته ع الطاوله..انتبهتالساعه كانت 1ونص..
كمل وطلع.. 
سامي:تدرين من البارحه مماكل شي.. انهلكنه بالاجتماعات ومااعرف وين راح تصفى..
-اكل الف عافيه مقدما.. 
بده ياكل ويضرب صفنات.. كل فكره كان مشغول بالحرب..
كمل.. كال سويلي كهوه اذا متصير زحمه..
-موزين تشربها هسه.. 
سامي:سويلي الله يخليج راسي مسطور..
-صار.. بس علمودك اني..
سويته.. واخذتهه بالصاله كان كاعد هو..
سامي:احد اجه للبيت؟
-لا.. من يوم الي راحو..
بقى يشرب وساكت..
سامي:رانيه..
-ها؟
سامي:وين ترحين اذا صار ومرجعت؟
-لتحجي هيج الله يخليك.. مااريد اتخيلها ابد.. كافي الصار بيه..
سامي:ااااااخ..
-سلامتك..
سامي:لو بيدي.. كان سفرتج وياهم..ممرتاح وانتي وحدج هنايه..
-هذا نصيبي. شسوي.. حتى انتم اطشرتو بس دخلت بيتكم..
سامي:اشش. شنو هل حجي !
-اي. هذا الصدك.. 
سامي:انتي جوهره .. غاليه وثمينه..
ظليت صافنه بوجهه.. ساكته مااعرف شجاوب.. 
شال ساعته من الطبله..:بعد تلث ساعات لازم اروح.. وبعد مااكدر اجي.. 
-بس اتصل.. طمني عنك..
سامي:هه خايفه عليه؟
-أإأمم.. 
سامي:رانيه اوف رانيه.. اتمنى اخلي راسي وانام نص ساعه بس..
-نام..مو كلت لتشرب الكهوه..
سامي:مااكدر عندي ادمان عليها..راح اخلي راسي واحاول انام..
-ماشي..
تمدد بمكاني الي كنت نايمه بي.. واني كمت طفيت الضوه.. كعدت بالكاع ومرتكيه ع طرف التخم.. حسيته نام.. انفاسه ثكلت.. شكد كان تعبان شكله بذيج الليله.. جوه عينه اسود وضعفان وجهه.. درت وجهي علي.. بقيت صافنه بملامحه.. يربي شكد شكله رجولي وحلو.. وقبل كمت اتخبل من شكله.. مادري شلون غفيت .. جسمي ع الارض.. اديه ع التخم ومخليه راسي عليهن.. يمكن انفاسه هي خدرتني ونمت..
حسيت شي يمشي ع شفتي.. فتحت عيني.. شفت سامي كاعد.. مبستم ومرجع راسه عني.. اخذتلي صفنه.. اريد استوعب شصار.. عرفت هاي كانت بوسه منه.. احس نار كبت بوجهي.. رأسا كمت.. باوعت للساعه.. كانت 4 الصبح..
هو كام.. كال:اني لازم اروح هسه..
دخل لغرفته.. طلع بعده ديلبس ملابسه.. كعد ع التخم.. لبس البسطال.. باوعلي بنظره اخيره.. ابتسم.. تمنيت ارجع اشمر نفسي بين ادي.. تمنيت اروح ويا حتى لو للموت.. اباوعله ودموعي صبت وحدهه..
شافني بجيت.. كام.. صار كبالي كلش.. جرني لحضنه حيل.. اني مااوصف شعوري بذيج اللحظه لان الكلمات متكفي اوصفه..
احس الدنيا صارت هلكدها بعيني.. بعد وجهي عن صدره.. باوعلي ومسح دموعي..
سامي:كافي شنو هل دموع شلال لو مطر!
-لتعوفني.. 
سامي:اذا رجعت.. مراح اعوفج.. 
-لتحجي هيج وتعذبني.. مااتحمل والله!
سامي:لتبجين.. دموعج غاليه.. بس ادعيلنا.. اذا مرجعت.. سامحيني لان مكدرت اساعدج...
حضنته حيل.. دموعي ماوكفت.. صرت اشهك وابجي.. 
طلع وويه كل خطوه منه بكلبي اكول لتروح.. وصل باب الشارع.. فتحه.. رجع التفت عليه.. ابتسم وطبع بوسه ع خدي وكال.. احبج رانيه..
بعدني مااستوعبت الي كاله.. شفته اختفى.. طلع .. راح..
عفيه كلب.. شكد تتحمل بعد.. يوميه مصيبه يوميه وداع يوميه حزن..
شوكت افرح.. شوكت اعيش مثل العالم.. ماريد فرح.. اريد حياة مرتاحه.. بس ماريد اكثر..
رجعت للبيت.. دفنت نفسي بالمكان الي نام بي.. احس المي البجسمي كله طلع من عيني دموع... صرت احجي وابجي.. محد يمي واريد ربي يمسعني ويرحمني هل مره.. صرت اصيح كافي ياااللهي .. كافي مااتحمل.. ثكلت من الحمل والهموم.. ساعدني ياربي.. كنت اتكطع.. ومن الحركه الي صارت بيه ذاك اليوم جريت ثوبي الي لابسته من صدره وانشك.. نوب دكيت ع صدري من جهه كلبي واضرب واكول كافي اوكف اوكف لاادك خليني اموت.. ارحمني اذا ماكو رب رحمني..
رجعت استغفرت.. مسحت دموعي.. كمت غسلت وجهي ورجعت.. افتر بالبيت.. وحيده.. يمكن لو مجاي كان احسن.. اصلا بديت اتعود ع الوضع لوحدي.. من اجه فتح كل جرح بيه هلكده..
كلامه ميروح عن بالي لحظه.. اذا رجعت مراح اعوفج.. اكيد مراح ترجع.. حظي واعرفه.. عطره بقى بملابسي.. بمكاني الكنت نايمه بي..
لمسته حضنته.. الاحبج السمعتهه منه..كلهه صارت فلم سينمائي كل شوي ينعاد.. 
شسوي واكدر ارتاح واستقر.. يمكن اصعب ايام حياتي المريت بيها هي ايام الحرب.. الوحده تقتل... تمنيت ارجع للسجن.. تمنيت عمتي نضال يمي.. تمنيت اعرف اخبارهه واكيد هي طلعت بالعفو.. بس مااعرف ليش مفكرت توصلني.. 
بقيت بالبيت.. كان سامي تارس البيت مسواك.. يوم اطبخ يوم لا.. الوضع يوم عن يوم يتأزم.. كنت كاعده بالحديقه .. اسمع الجيران.. مخبوصين وهوسه.. افتهمت همه همين راح يطلعون من بيتهم خوفا من الحرب.. 
من سمعتهم صرت لا اني بسما ولا اني بكاع.. ع الاقل كان اسمهم ناس بصفي.. اذا صار شي اروح يمهم.. هسه وين اولي..
يوم عن يوم اسل.. حتى الحيل راح مني.. دموعي نشفت.. صار البجي بس ونين .. بلايه دموع.. كل ايامي السيئه يوميه تنعاد.. حتى ايام الطفوله الحلوة نسيتها.. بس الايام الي بيهه ذكريات توجع لا هاي ترجع تتكرر الف مره باليوم... اتذكر باخر كل ونه اصيح يمه وينج احتاجج.. اريدج يمي..
احس صار عندي موقف تجاه بابا.. صح هو راح لدار حقه.. بس مااعرف ليش صارت كل معزتي ومحبتي لامي.. 
مو اكول بطلت مااحبه.. لااحبه.. بس شي مكسور بداخلي.. من يوم الي عرفت بي عندي اخوه.. هذول الاخوه الي عمامي ياما وياما كالو لبابا اتزوج حتى تحيبهم.. اكيد همه وره هاي السالفه.. ذيج الايام .. ع كد الالم والحزن البيهه.. اتمنى اكطعهم واشرب من دمهم..
شكد حقدت عليهم.. اتذكر عامر واكوم اغلي غليان..اكب نار اصخن اتمني افلش وجهه وراسه.. اكيد يسرح ويمرح واني الطاح حظي بهذا كله..
اتذكره من ضربني وسكتت.. مادري شلون سكتتله.. 
اتمنى تندار الدنيا وارجع اخذ حقي منه.. بس اشو الدنيا مدير بس عليه.. يوميه ماخذه مني عزيز..
ذيج الايام.. كنت مااهتم.. وين انام وين اكعد شاكل ششرب.. بكل مكان اتعب انام.. اكل يوم اسوي يوم لا.. يعني شمااوصف هل ايام مااوصل ربع المعاناة بيهه.. 
بدت الحرب.. وصار صوت القصف.. هنا اني مو بشر صرت.. مثل الفار.. اركض منا واجي منا.. صار صوت الضرب بالليل.. وحدي..كهرباء انقطعت.. والصوت يدوي دوي.. كان صوت غريب.. بحياتي مسامعه صوت الطلق ولا الصواريخ ولا الطيارات.. 
البيت يهتز هز صار.. اني صرخت بكل صوتي.. اعيط كاااااافي.. ماااتحمل ياربي كاااافي.. وكعت للكاع.. سديت اذاني حيل وقرفصت نفسي.. صرت اعلي صوتي واصرخ حتى مااسمع صوت الضرب..
مقرفصه بنص الصاله ووحدي.. منا وجع الوحده ومنا خوفي ع سامي.. اسمع واكول اكيد راح بيها.. راح بهاي الضربه.. لا راح بهاي.. 
شوصفهه.. ليله ظلمه؟ لا بعد اتعس.. ليله سوده.. لا هم انكس بعد..
مااتمنى بشر يمر بيهه.. 
فقدت وعيي بيها.. من كد ماعيطت وخفت.. فقدت.. صحيت دنيا عصر.. ماكو صوت قصف. بس صوت طيارات.. طلعت للكراج.. خايفه اتقدم اكثر وتصير ضربه فوكي.. اخر شي كلت يله .. هي روح وحده.. كم مره تريد تطلع.. خليها تطلع وارتاح..
وصلت لباب الشارع.. فتحته.. شفت المنطقه والشارع مهجوم هجم.. ماكو ولا بشر البيوت اغلبهه فرغت.. ذاك من ذاك الي بقه ابيته..
رجعت للبيت.. خطر ابالي اصعد للسطح.. اشمر نفسي وارتاح.. اي احسن مما باقيه لاني ميته ولا اني عايشه..
مرت ليلتين.. ماتنعرف شنو.. نوب اكو قصف نوب لا.. وكعت جامه بغرفه ام سامي.. تفلشت من كد القصف.. بيهه متت.. احس اني التفلشت مو الجامه.. واصلا اني من زمان فلشني زماني..
لميت الكزاز.. تجرحن اديه ومااحس بوجع.. ليش.. لان الوجع البداخلي والخوف اكبر بالالاف المرات..
صرت متعوده تقريبا ع صوت القصف.. بس اول ميبدي اخاف.. بعدين يصير عادي.. صار كل همي سامي.. امشي وافتر بالبيت واصيح وينك سامي.. ادعي ربي يحفظه ويحمي.. يارب لا تحرك كلبي بي.. كافي الفقدتهم لليوم.. كمت البس قميصه مال بدله العسكريه وافتر بي... احسه موجود ويايه اذا لبستهه.. يوم ويومين انتظر وهو ماكو.. وين رحت ياسامي..
اكيد متت.. هو كالها.. يجوز ميرجع.. مو يجوز.. صارت اكيد..
لا تلفون دك ولا احد وصل... الانتظار.. الوحده.. الضياع.. كلهن التمن عليه.. ماصار اختبار من رب العباد.. احسه صار انتقام.. هوايه فكرت وتخيلت نفسي اطلع اركض بالشارع ووين مااوصل اوصل..
اموت؟ اصلا اني صرت اشتهي الموت.. هيج حياة تجبر الواحد يتمنى الموت..
صعدت للطابق الثاني.. وحده من الغرف كان شباكها للشارع.. 
وحده منهن مفلشه.. باوعت للشارع.. همرات الامريكان تفتر... طبعا ماكنت اعرف اسمهه همر.. بعدين عرفت من الناس..
كلت اكيد سامي راح.. لو قتلو او اخذو يمهم.. يربي شسوي.. شلون اكدر اوصلك ووين اندليك.. حتى مكانه بالضبط مااعرفه وين.. مكان حساس قريب من الرئيس وكبل..
اكيد تلفو بالحرب.. اكيد انقتل.. هيج فكري صار.. صرت مااثبت بمكان..
اذا كعدت مااطول اكثر من دقيقتين بنفس المكان نوب اغير مكاني. وهم مااثبت اكثر من دقايق واكوم.. مامستقره.. مامرتاحه...
نسيت طعم الاكل والشرب.. نسيت النوم شنو طعمه.. نسيت الكعده شلون تصير... بغداد سقطت.. وانتهى كل شي.. حتى الاسرى مال ايران رجعت يمكن وسامي مرجع.. وينك وين ارضك..
طبعا انقطعت الكهرباء ايام.. وهمزين كان اكو لايت. هذا الاستيل الصغير..واكو بطاريات هوايه.. كنت احتفظ بي بليل.. اشغله.. ابقى اضوي ع الحيطاين والصور .. امدد وابقى اضوي ع كل مكان يمي.. لحد ماانام..
بكل مره اغفى بيهه.. ادعي ع نفسي مااكعد.. بس مااطول اكثر من عشر دقايق وارجع افز.. خايفه ومرعوبه.. 
كنت مستعده ادفع عمري كله بس اعرف خبر عن سامي.. كان اكو دفتر تلفونات.. حاولت اكثر من مره اتصل ع مكان عمل سامي.. بس ماكو حراره بالتلفون انقطعت...
صارت الهمرات والارتال الامريكيه عادي تفوت بالشارع.. واكو ناس صارت تستقبلهم.. تنطيهم مي واكل.. طبعا كل هذا كنت اشوفه من الغرفه الفوك.. اوخر البرده شويه واباوع.. 
قررت اطلع اسأل.. بعد مااتحمل اكثر.. اروح للجيران اول.. بلكت سامعين شي عنه.. واذا ماكو اطلع ادور بارض الله الواسعه...
لبست .. فتحت القفل مال باب الشارع.. طلعت.. اباوع يمنه ويسرى.. وين ابدي وين اروح اسأل منو اول.. توجهت للجيران الي كبالنه.. كانو موجودين شفتهم اكثر من مره.. طلعو للامريكان ويحجون وياهم..
دكيت الباب.. محد طلع.. رحعت ادك اقوى.. سمعت صوت رجلين تمشي ...

يتبع