الجزء التاسع
البيت الي كنت بي.. صغير وبي اثاث كلش قليل.. مجرد تخم قنفات وغرفه نوم كامله واغطيه.. لا مطبخ ولا استقبال ولاشي...
ظلمت الدنيا.. جعت هوايه.. مو مال حلويات ونساتل.. طلعت للطرمه.. باوعت من جوه الباب.. حركه كلش قليله بالشارع...
رجعت دخلت.. شويه واسمع صوت الباب انفتح.. دخل سامي.. بيده علاكه..
وصل يمي خلاهن..
سامي:اكلي.. وباجر ارجعج للبيت..
-ها؟ يابيت؟
سامي:بيتي.. يعني يابيت؟ ليش عندج بيت انتي؟!!
-اي بيت ابويه.. بقى مااعرف شصار بي..
سامي:اكلي هسه وبعدين نتفاهم.. لعبالج صدكت بيج وراح اقتنع بغير ماسأل واشوف بنفسي.. راح اشوف صكدج من كذبج.. وياويلج اطلعين كذابه!
-ميهمني.. اصلا من راح تسأل كلشي راح تلكاه يكون ضدي..
ضحك بأستهزاء وكانه يكلي يعرف شلون يستفسر مو شلون مجان...
تعشيت .. وهو كاعد ع صفحه.. بس كل شوي المحه معصب وحواجبه مطبوكه.. مجرد حواجبه ع شواربه ع خزره عيونه كافيه تخلس الواحد..
كملت وكمت اغسل.. رجعت لكيته ع نفس الكعده. بقيت كاعده وهو همين.. لانحجي ولاشي.. انتظرته يروح مراح.. بقى كاعد بمكانه..
ايست من روحته.. درت وجهي ونمت... جسمي تعبان والضربه البرجلي ووجهي اذتني.. كنت بحاجة نوم ومو مهتمه منو يكون يمي .. عسى ما عزارئيل يكون يمي هم ميخالف...
كعدت الصبح.. التفتت ع مكانه مال البارحه ملكيته.. بقيت شويه بمكاني.. بعدين كمت غسلت وجهي.. شفت اكو صمون وكيمر ودبس.. تريكت بيهن .. كان لازم ادخل حمام.. سبحت وغسلت ملابسي.. الي ماعندي غيرهم الجنطه بقت يمه.. غسلتهن وشريتهن .. رجعت اني لفيت نفسي بالبطانيه ونمت... همزين مااجه لحد مانشفت ملابسي ولبستها يله..
من رجع كعادته لا سلام ولا كلام كبل كال.. تكدرين ترجعين من اليوم..
هزيت راسي بأي.. رجعت كتله اريد جنطتي..
راح للسياره جابهه واجه..
لبست وتجهزت حتى اطلع.. كال اني اوصلج..
ترددت اقبل.. اخاف برغد تشك بيه النوب... كال لتخافين رغد محجيتلها شي.. راح يبقى هل سر بيني وبينج لحد ماا كشف الصدك من الكذب..
صعدت بالسياره.. هو بس ساكت ميحجي شي ابد.. كل الي كاله انزلي! من وصلنا.. وماوصلني لباب بيتهم..
دخلت.. لكيت رغد بالمطبخ.. بس شكلها متنكه اوضايجة.. اول ماخطر ابالي انها زعلانه مني.. بس تذكرت انه زعلانه ع روحة سامي..
كل ما يروح هيج كانت تنعفس.. تبقى ضايجة ايام.. ومن يخابرها يكلها راح اجي لا تتغير تصير رغد ثانيه..
من رجعت.. شافت وجهي وخشمي شوي بي وروم.. كذبت كلتلها تحسس عندي وخشمي مورم.. شكوللها زوجج الضربني.. كنت كل مااصفن واذكر وحشيته ويايه احقد علي واكرهه..
حتى بيوم دخلت للاستقبال انظفها.. لااردايا صفنت ع صورته الي بلحايط.. حجيت عليه هوايه حجي.. مااعرف ليش هيج كرهته بالرغم اني كل الناس اذتني واي واحد غيره كان يسوي الي سواه وممكن اكثر..
صورته كان لابس بيها بدله عسكري زيتوني.. والبيريه براسه.. شكله مخيف.. حاجبه ثخين وشواربه .. حنطاوي .. بس بهاي الصوره ماادري شعجب مبتسم.. هو ميبين علي ابتسامه ابد.. بس اول ميجيهم يبتسم وبعدين يتكدر...
خلصناهه شغل هلفتره.. الاطفال كلش تعودت عليهم وصارو جزء مني..
مايكمل اليوم اذا مااطرب اذني بصراخهم وعراكهم... فهد ع نفس موقفه ويايه. ميتقربلي ابد.. شكد حاولت ويا.. بحجة لعب وبحجة دراسه ماكو..
مرتين قريته بيها دروسه ومن يكوم مني بعد عبالك ميعرفني..
تعودت علي هيج.. وكلش حبيت هدوءه .. ميحجي هوايه.. احسه مثل ابو.. جامد كلش وميتكلم بشي غير الي المهم...
بهل فتره همين رتبت غرفتي.. صارت يمي جربايه اطفال.. لان كنا اني ورغد نقسم الايام بينا.. صار ليله يمي مجد وليله عهد..
هي كلش كانت مرتاحه من ناحيتي وابد ماغثتني ولا سمعتني شي..
شكد حبيتها هل انسانه.. هاديه ومحبه ومحبوبه...
ام سامي ع نفس مشاويرهه..مرات يجنها نسوان صديقاتهه.. اني اضم نفسي اخاف لا وحده تعرفني منا منا... طبعا هويتي بقت يم سامي.. والشهايد المزوره اني بس شافتهن رغد واقتنعت بيه مزقتهن وذبيتهن... عبالي راح اخلص.. تالي وكعت بيد سامي والله اعلم شراح يعرف عني...
كنت بكل ليله اخلي بيهه راسي ع المخده اتخيل اليوم الي راح يطردوني بي... خايفه كلش لا تصير صدك ويجي هذا اليوم.. فكرت ارجع للسجن افضل حل اذا انطردت واكون قريبه من عمه نضال.. احسن شي.. وانتظرهه من تطلع هي اكيد متنساني.. مثل مااني منسيتهه.. هوايه اذكر ايامنه اني وياهه.. صح كانت بالسجن وكنت مثل المجنونه..
بس من اتذكرها احن لحضنها وسوالفهه..اتمنى التقي بيها باسرع فرصه..
مرت الايام.. وصار وقت نزول سامي.. كنت لازمه كلبي بيدي خاف مايصدك الي كلته والناس تعرف شي واني شي...
من اجه رغد بنفس الواهس والضحكه استقبلته.. بيها كانت ستوها مشتريه ملابس اشكال والوان.. راحت ويه اختها وبقو الاطفال يمي..
خطيه هم مانستني جايبتلي كلابيات للبيت..
من دخل وشفته كلبي وكع بين رجليه.. هو سلم وفات كبل .. استقبلو عائلته وامه... امه لمحتها كل ماتشوف رغد مبدله وتتماوع يمه هاي لو تهز بيدها لو تباوعلها بأستهزاء وادير وجهه.. طبعا مكنت كاعده يمهم بس لمحتها من كنت اشتغل...
تغده وبعدين دخل حمام.. اني اهلك نفسي بالشغل.. اريد التهي حتى مااكعد وابقى افكر وافكر.. بس الرجفة مارحمتني.. كل ماعون الزمه اله شوي يوكع مني.. كمت اثبت الماعون بالحوض مال سنك واجلفه.. مادري شلون كملت.. غسلت المطبخ بعدهه.. واخذت الاطفال وصعدت للغرفه..
كان دوري لازم احافظ ع هدوء البيت حتى سامي مينزعج...
للعصر نزلت.. لكيت رغد دتسوي جاي..
-ام فهد.. اني من باجر اروح..
رغد:اي حبيبتي والله كنت اريد اكولج بس استحي منج..
-لا عيني عليش تستحين هذا حقج واني الممنونه..
كيفت من كلتلها اروح.. زين وين اروح؟ هم ارجع للفندق ؟ وهذا سامي خاف يتخبل من جديد وصدك هلمره انطرد.؟
انتظرت بلكي اشوفه ويطلع بلكي يكول انه عرف عني شي يريح كلبه..
ماطلع ولا شفته.. بقى بالغرفه وحتى العشه مطلع ولا تعشه.. كالت رغد ميريد ياكل ميشتهي... اني كلت اكيد مني ميطلع..
اخذتله فاكهه وراحت.. اني بدوري اخذت الاطفال وصعدت.. بقيت الاعبهم وبالي مو يمهم.. مشغول فكري بهواي شغلات... يوميه تطلعلي سالفه جديده فوك الضيم المريت بي..
نيمتهم.. وحاولت انام.. طولت يله كدرت اغمض عيني وانام.. حتى بنومي ممرتاحه.. البشر حتى اذا عنده هم من ينام يكدر يرتاح شويه.. بس اني انكتبلي حتى بالنوم ماكو راحه... احلام مزعجة متفاركني.. الليله الي مااحلم بيها اتعجب اكول شعجب.. بس شنو مو مثل اول افز مرعوبه ولااصرخ..
تقريبا صارت جزء من حياتي هل الاحلام.. بيهن الي اذكرهن وبيهن الي نسيتهن.. اكثر حلم تردد عليه هو الحادث الاكشر.. شكد تمنيت اشوف امي وابويه ويحجولي انهم ارتاحومثل ماكل الناس تشوف موتاهه... لو اشوفهم بغير يوم ذبحهم حتى لو ميحجون.. بس ماكو .. حتى الحلم عاندني..
ثاني يوم كعدت من الصبح.. حضرت الريوك.. واكلت كم لكمه..
كنت داغسل كوبي الي شربت بي جاي.. اجه سامي..
سامي:صباح الخير.. اكو كهوه لا؟
تعجبت يحجي باسلوب ومايزكح..
-صباح النور.. بس دقيقه واسويها..
طلع هو للحديقه.. سويت الكهوه ع السريع ووديتها يمه.. كان صافن ع الاشجار .. خليتهن ورجعت للمطبخ..
صعدت لغرفتي حضرت الجنطه.. لبست ونزلت..
لكيت الصينيه والفنجان الي شرب بي الكهوه ع السنك.. كلت اغسلهن واروح خطيه رغد من اروح اني متلحك ع شي... ذبيت الجنطه بالمطبخ وبديت اغسل.. شفت سامي دخل .. سويت نفسي مااشوفه.. عبالي طلع كبل وسرحت بافكاري واني اغسل..
مااحس اله صوته يم اذني كلش..
سامي:وين رايحه؟
كلبي رجف.. بلعت ريك وانداريت.. كان راسه كلش قريب يمي..
باوعت بعيونه واحس الكلام طار مني..
-رايحه.. بارض الله..
سامي:ليش؟
-مدام رغد هيج رغبتها..
قرب راسه من يم اذني كلش.. اني نفسي انكطع..
همس:ابقي.. لترحين اني ماعندي مانع.. ورغد اني احاجيهه..
احس كلبي راد يطلع طول ماهو يهمس ويجر بحجايته جر.. مفتهمت السبب من هيج يحاجيني بهمس واله مشاور.. كلها كانت نايمه وحتى اذا حجه بصوت عالي محد راح يسمع..
بعد راسه عني.. بقى صافن بوجهي هزيت راسي بأي.. مااكدر اعارض ولاعندي كلام بهل لحظه اكوله..
شفت بنظرته اليه نظره مرتاحه من جانبي.. ابتسامه خفيفه انرسمت ع وجهه..
دار وجهه وراح.. اني بقيت صافنه .. كلبي يريد يطلع من سرعه مايدك..
حرت شسوي. اخذت الجنطه وصعدت بيها فوك.. خليتها وكلت بعد هو يتصرف ويه رغد.. واني اعرف بيها هي تكيف من ابقى يمها بس الظاهر كان سامي قبل الي طالب منها اروح وقت الي يجي..
كعدو الاطفال.. نزلتهم جوه.. ريكتهم.. كعد فهد همات تريك.. نوب رغد كعدت.. صبحت عليها.. وغلست ع موضوع روحتي..
شفتها كملت ريوك.. كلت
-ام فهد.. شوكت تحبين اروح؟ اسوي الغدا واروح؟
كنت حابه اعرف منها اذا سامي حجالهه لولا..
دنكت راسهه وهي دتغسل :لا لترحين.. خليج احتاجج..
حسيت خجلانه مني.. يوم تطلب اروح ويوم تطلب ابقى..
مهتميت.. بالنهايه كانت هل سالفه بصالحي.. بلشت شغلي مثل كل يوم.. بس منظر سامي وصوته وهو يهمسلي وعيونه الي اكلت عيوني مراحت من بالي.. كل ماذكرها كلبي يدك بسرعه...
مرت ايام.. هلمره بيها سامي طول باجازته.. كنت اتحاشه ابقى جوه.. لا يرجع يسوي هل حركات ويايه ولااكدر احجي ولااكدر اسكت..
قبل كنت خايفه يعرف الحقيقه.. هسه عرفها وشصار؟ صار خوفي منه اكثر.. ليجي اليوم اليطردني بي.. اخاف عنده قصد بحركته اليوم الصبح ووو هيج ظليت اكل بنفسي اكل.. ضربت ع راسي وكلت عفيه مخ شوكت ترتاح شوكت ترتاح!!!
بهاي الاجازه مالته.. كال راح يعزم اخوانه.. ماخفت .. كلت عادي مدام هو يعرف وساكت اكيد راح يغطي عني.. بدينه نجهز العزيمه اني ورغد.. نركض ومملحكين..مخله شي مطلبه نسوي الهم.. والمزعج بي يوكف ع الراس سوو هيج وخلو هيج.. واله هو يشرف..
اجو خوانه وزوجاتهم.. بيهم شبه منه بس اشوفهم احلى لان مبتسمين وما ضايجين ع لا شي.. زوجاتهم هم حبابات.. بس سمعت مناورات بالحجي صارت بينهن وبين رغد.. بحجة البيت نظيف لان اكو مربيه.. وهلمره الاكل طيب اكيد وصفه هاي البنيه الجديده.. كنت اسمع .. صح افرح بس من ناحيه اضوج ع رغد.. خطيه هي مستحمله فوك طاقتهه..
هم كعدو بالاستقبال بيومهه.. وفرشو سفره بالكاع.. تغدو كلهم سوى.. اسمع اخوانه سألو عني.. ماطوخ بالحجي عليه.. كلهم مربيه نعرفهه..
الشي الي معرفته لحد هل لحظه معرفه نضال بيهم.. مااعرف اذا كانو اصدقاء الهه لو اقاربهه..
حضرت الفاكهه والجاي والكهوه.. كانو كلش يحبون الكهوه.. انفصلو بكعدتهم.. صارو الولد وحد وزوجاتهم وامهم وحد.. بعدين امهم راحت يمهم.. قضو وقت حلو.. عائله كامله وكلها مستقره..
راحو والبيت فرغ.. ع كد ما كانو اطفالهم حركين.. كلت نعمه الله ع اطفال رغد وسامي.. واني الي كنت اشوفهم كلش وكحين طلع اكو اوكح منهم بقاطات...
بقيت اغسل مواعين العزيمه ورغد التهت بالاطفال.. كملتهن وصعدت..
بيومهه بقو الاطفال جوه.. نامو يم امهم..
ثاني يوم كان وقت روحه سامي.. جهزتله رغد ملابسه وعطوره وشغلاته..
قبل ليطلع لمحني بنظرات مااعرف شنو افسرها.. لحد ماطلع من باب البيت بقى يباوعلي.. اني همين مكدرت انزل عيني كنت انتظره يحجي..
من راح خلاني بنار.. بقيت افكر شسبب هل نظره وليش محجالي شي هلمره يعني لا كال عرفت عنج شي ولا كال معرفت..
بقيت طول هلمده اكل بنفسي اكل.. تجمعن هوايه مواقف اله ويايه.. من يوم الي لاعب عهد وهيه بحضني.. حسيت بوقتها كان متقصد.. ونوب اليوم الي ضربني بي وثاني يوم رجع حضني.. نوب همساته وصوته وقربه الزايد والماله داعي مني... شكد حاولت اصفي النيه واكول مو قاصدهه..
طول بدوامه هل مره.. رغد شفتها كلش تعيسه.. رادت تروح لاهلها ترددت مني .. كلتلها اذا تحب تروح واني همات اروح لبيتي الكذابي..
هي كالت لاابقي يم ام سامي واني اروح يوم وارجع.. صدك اجاهه اخوهه قاسم اللزكه.. بس راد يبقى ويكعد واخته كوه تاخذه وتريد تروح...
راحو واحس هدوء غريب عم البيت.. صارت ضوجه وكآبه.. صح هي متسولف ويايه بس ع كد شغلتي كمربيه.. بس وجودها هي والاطفال كافي يونسني...
اني استغليتها فرصه حتى اشبع عيوني وابجي براحتي.. اي ابجي ع كلهن.. امي ابويه اختي الحظ الي ماكعد ويايه..
ام سامي كانت اغلب الوقت بغرفتهه لو تطلع.. من تطلع كانت تجيب اكل جاهز.. فاغلب الايام مطبخت بيهه.. بس كنت انظف.. طولت رغد وهي كالت يوم واحد وترجع بس مرجعت..
بيوم دخلت غرفتها دانظفها.. نظفتها ورتبتها.. شي دفعني افتح الكنتور.. مااعرف ليش مكدرت امنع نفسي.. فتحت الخانات .. طلعتلي خانتهه.. ملابسهه مشمره وكانت كلها من الراقيه وتجنن.. بس هم مالومها.. خطيه متلحك...
فتحت خانه لخ.. طلعت مالت سامي.. ملابسه مرتبات ومعلكات.. مصفطات بطريقه حلوه كلش.. لاااردايا انمدت ايدي ع ملابسه.. مشيتها من يم الرتبه ونازل.. هو كان بوقتهه مقدم.. تاج ونجمه.. مكدرت امنع نفسي.. بلا ماانتبه لحالي لكيت نفسي دااشتم ملابسه.. بيهن عطره الي يفوح.. كبل انتبهت رجعتهن وسديت الخانه.. كلت بداخلي عوبه شدسوين.. غبيه غبيه!
طلعت من الغرفه وسديتها.. احس كلبي كام يدك ميه..
كل مااتذكر سوايتي اعصب من نفسي.. شجاج وين تردين توصلين وشتفكرين.. كان البيت فارغ كلش.. حتى النوم صار صعب يجيني.. اتكلب يمين ويسار وماكو نوم.. ثاني يوم اجت رغد.. احس الحياه رجعت بيه..
انتبهت عليهه اشو هل مره كلش ضايجة.. من اسألها ع شي تنتر نتر بيه.. بس ويه اطفالهه لا كله حياتي وحبي واسلوب وخلك طويل..
تجنبتهه.. ماااعرف شنو ظرفها حتى احكم عليها...
وره شي يومين.. اتصل بيها سامي.. هي فرحت وبدت ترتيباتهه المعهوده.. اني من عرفت بجيته مااعرف خفت لو فرحت.. مااعرف..
اجه ثاني يوم.. ماله كل خلك.. رغد طفرت اله حضنته وهو كبل بعدها..
سلم ع اطفاله من وره خشمه.. حتى اكل مراد.. سبح وكبل للغرفه..
ياربي شكو.. شصاير؟ معقوله اني سبب الضوجة مالته؟
هيج كان تفكيري اي احد يضوج احسبه مني ضايج.. لان كنت عباره عن قنبله موقوته وتمشي.. مصايب وفضايح ورايه.. وياريت اني صدك مسويتها حتى ماالوم حظي...
للعشا طلع.. رغد بقت بالغرفه.. كعد بالمطبخ..اني ستوني مكمله العشا بيهه
-تحب تاكل شي؟
سامي:لا.. روحي لغرفتج..
فشلني.. خليت وصعدت مثل مطلب.. شويه وصاحتني رغد.. نزلت كانو عهد ومجد اثنينهم يبجون وهي تريد تقري فهد.. وبنفس الوقت كان وقت عشا.. يعني كلها التمت عليهه.. اخذتهم منهه.. عشيتهم وصعدنا..
هي وفهد وسامي بعدين تعشو ورانه...
طبعا صعدنا من وقت كلش.. علمود فهد يدرس.. عفت عهد ومجد يلعبون..
بس صار الوقت اسويلهم ممات حتى ينامون.. الترمز فارغ لازم افور مي..
نزلت.. كان البيت هدوء.. بس اسمع صوت رغد ادرس بفهد..
رحت للمطبخ.. بديت اخلي المي بدله واريد اخلي ع الطباخ..
دخل سامي من باب المطبخ..
باوع بوجهي واني هم مكدرت انزل عيني..
لا اراديا كلتله:ها؟
رد عليه همات بهاا؟!
-لا هيج. محتاج شي؟
سامي:تعبااااان..
اول مره كان يحجي هيج.. انقهرت من كلي تعبان..
-شكو؟
سامي:اعتقد كارثه راح تصير بالعراق.
-امريكا؟
سامي:اي..
سويلي كهوه وجيبيها ع الحديقه..
-ماشي..
فورت المي . ع سريع سويت ممات.. رضعتهم وهزيتهم شويه ونيمتهم.. تقريبا نسيت الكهوه الي رادهه سامي.. ردت انام ع اخر لحظة تذكرت..
كبل فزيت من مكاني.. نزلت اباوع ع غرفه رغد مطفيه الاضويه يمكن نامو.. ردت ارجع اصعد.. بعدين كلت خل اتأكد يجوز بعده كاعد..
صدك مديت راسي من باب المطبخ..شفته كاعد والجكاره بيده ..
يتبع..
أنت تقرأ
وجع ذكريات
Romanceرحت للفندق وداسجل يم موظف الاستقبال مااحس اله ذراعي نلزمت حيل.: التفتت كان سامي.. متت بدمي.. كان ميباوع بوجهي وبس يباوع للشارع وللموظف.. سامي:اخي بطلنا منريد حجز.. رجعلها هويتها.. رجع الهويه.. كبل اخذها منه.. هنا شوصف حالي.. ظلت لازم ذراعي لحد ماوصل...
