اريد تفاعل اقوى القصه تستحق
صوت م̷ـــِْن تقره مو مثل الحرامي تقره وتطفر 🙄😐💔
#وجع ذكريات
Nada hs
الجزء الثاني
مااعرف شلون مرت ذيج الايام.. كلها توتر وقلق وخوف.. اهلي هم متوترين وماكو لا سالفه ولا كعده مثل البشر... بيت عمي مامنهم خبر.. بس عمي الثاني ادخل واجه لابويه وهم زاد الطين بله.. صار البيت عباره عن مشاحنات.. حته من صرنه نكعد سوه ماكو حجي .. مجرد كاعدين وتتحرك ادينه لو رجلينه وبس..
تقريبا شهر مر ع جيه بيت عمي.. اخر ايام من هذا الشهر حسيت شويه ارتاحيت ويمكن نسوني وبعد ميدكون بابي.. بس اهلي مارجعو مثل اول وياي بالذات امي.. احسها بكل نظره تعاتبني .. ومالومها ومااريد الي يقره يلومها لان هي همها تشوفني ابيت ومستقره .. وخاصه نسوان عمامي يعيرنها بيه ها ع ابو بنتج مقبلت واكيد عدها شي وصار الحجي اشكال الوان.. طبعا ماما تطلع وتزور اقاربنه مرات فتسمع حجي اشكال والوان.. محد رحمني من لسانه واني ممأذيه بشر.. حتى خوالي همين حرضو امي جبريها وخليها تقبل ومن هل حجي..صارت الناس مصدكه انه اني عندي شي ولذلك مااقبل...ماكول ماما ممصدكتني .. لا صدكتني بس الحجي الي سمعته خلاني اني اشك بنفسي مو اله هي..
وفديوم بعصريه رشينا الحديقه والطرمه غسلناهه.. هيج متعودين .. حتى من تطفى الكهرباء تكون الحديقه والحياطين بارده شوي.. كملنا وكعدنه ع حافه الي كانت اعلى من الحديقه .. يعني جزء من الطرمه كانت..
زينه كامت مني كالت خل اسوي جاي واجي.. من عافتني .. شعور غريب صار عندي.. حسيت بكل شي يمي بي حياة.. كل شي حواليه عنده احساس ويعرف بداخلي اني تعبانه...النبگايه كبالي اشوفها من فوك تتحرك ويخيلي هي تتحرك مو الهوى يحركها.. جوه رجليه شويه ثيل وطاش هنا وهناك.. السما حلوه ولونها يجذب .. صوت عصافير بس مااعرفت وينهن ولا شفتهن.. .. شي ع شي تولد عندي احساس غريب.. عبالك راح اودع هاي الدنيا ويمكن موتي قرب.. يكولون الي يقرب اجله يحس بهل شي.. اني هيج خيلي .. حبيت كل شي يمي وتعلقت بي.. باوعت بتمعن حتى اشبع عيني.. رغبه اجتني اروح احضن امي وابويه وزينه..خايفه من شي بس مااعرف شنو.. يمكن لان حجو بيه واني طولت السالفه ومقبلت.. ويمكن من الضغط النفسي ويمكن اني مجرد اوسوس زايد..هيج بقيت اقنع بنفسي..
دخلنه جوه نشرب جاي.. بعدها زينه ستوها تصب .. اندك الباب حيل .. ويه الدكه احس كلبي انشلع.. عبالك ملك الموت دك بابي.. شويه ودخلت مرت عمي .. واسمع صوت عمي وابنه ويا.. وكفت ع حيلي سلمت عليها وهي متنكه عليه كلش.. حته ماردت ع سلامي.. كبل خزرتني وكالت وين امج؟ كتلها جوه بغرفتهه تخيط..
طفرت زينه قبلها راحت لامي.. ظليت اني اروح وارجع بالمطبخ.. قلقه وخايفه.. واني الكنت مفكرتهم نسوني وبعد ميجون.. كنت اكول بداخلي.. معليج بالحجي.. ابقي ع موقفج ولا تقبلين مهما جبروج..
شي ع شي العناد صعد عندي كلش.. وصرت عصبيه واني اسمع صوتهم يصيحون وابويه خطيه ساكت محجه شي..
رحت للصاله..امي كاعده ع الكرويته ويمها مرت عمي مدنكه وتباوع ع الكاشي مخنزره..
-مامه.. تعالي شويه اريدج.!
مرت عمي عاطت:خير؟! كولي عدج شي احجي كدامنه! لو حتى بهاي عندج اسرار! نصت صوتها وظلت تكول.. استغفر الله استغفر الله.. مشايفه هيج بنات بحياتي كلهه.. صدك لو كالو الماينفعه مرضعه سوك العصا ماينفعه! ظلت تدرم.. امي اجت يمي.. سبقتها للغرفه .. دخلت وسديتها علينا.
امي بزمخ:كولي شعندج؟!
-اريد احجي ويه عامر..
امي وانرسم ع وجهه معالم الفرح:ياالله؟! خير يارب؟
-لا مامه.. بس احجي ويا .. مكلت راح اقبل.. بس خلوني احجي ويا..
امي:خوش.. خل نشوف تاليهه وياج..
طلعت امي .. انتظرتها تصيحلي حتى ادخل واحجي ويه الغضب.. كان لازم ادخل واوكفه عند حده.. لان الظاهر اهله ميفهمون.. فاحسن حل اصده وامنعه هو... هو صاحب الكلمةبالنهايه.. اذا كال لا اكيد اهله مراح يذكروني اصلا...
دخلت للاستقبال..مثل المرة السابقه.. ماكو بس هو كاعد.. بس هلمره اني اقوى.. مخايفه منه وعندي حجي هوايه ويا..
عامر:ياهله! واخيرا شفنه طولج الحلو! يحجيها بأستهزاء..
-هلا بيك.. كعدت مقابيله..
عامر:كالو تردين تشوفيني؟ واخيرا انكسر خشمج اليابس!
كلامه عبالك سم يمشي بعروكي انطيته نظره استهزاء:هه! ومنو كلك اني ميته ع شوفتك! جيت داحجي وياك مثل كل البشر الي يخاجوهه وتفهم !
عامر:شتقصدين؟
-مداقصد..بس اوصلك شي.. واسمعه مني حرف حرف..انته! مستحيل! تكون زوجي بيوم من الايام..ولهوايه اسباب.. ومو شرط اله تعرف اسبابي!
عامر احس عيونه رادت تطلع:منو علمج هيج تحجين ويايه؟ المنو تحجين هيج؟ اليه؟ نسيتي اني منو؟
-لا منسيت.. انت ابن عمي وتاج راسي وابطن عيني.. بس افهمني.. زواج مااريد.. عوفني اعيش لامي وابويه اعوضهم اونسهم اوديهم حج.. كل هذا ابالي.. ماريد اتزوج قبل مااسوي كل هذا.. ومااريد اعوف ابويه وامي اذا كبرو منو يشيلهم..
عامر:ههههههههه تردين تقنعيني هيج كلبج طيب وتتحسفين امج وابوج! لج احركج انتي واهلج ومحد يسأل عنكم ياحثاله! تربيه امج السز هاي! اخخ الله لو ااعرف عمي المطفي الاثول منين لكاهه!
عطت بي:احترم نفسك شنو تغلط ع مامه! كاعد ابيتها وتغلط عليها!
عامر:شوفي ولج.. تقبلين من طيب خاطر انسى كل هذا كلامج وافتح صفحة جديده وياج.. متقبلين راح اندمج ع اليوم الصرتي بي!
-شوف عامر.. مو كوه.. زواج اني وياك منتراهم! تريد ابقى ابن عمي اخويه حزام ظهري! بس لتكلي زواااج!
بدون مااشوفه شوكت كام من مكانه احس شعري راد يتملخ.. شلت راسي عيني بعينه اجت..
عامر:خاف امج معلمتج الادب! اني اعلمج الادب وهذا لسانج اكصه! اعرفي ويه منو جاي تحجين انتي!
ردت احجي كبل خله ايده ع حلكي:كولي! احد لاعب بيج وماخذ شرفج من جنتي ابغداد؟ كوليلي منو حتى ادفنكم سوى!
هزيت راسي بلاا.. عيونه بيهن منظر جحيم.. نار تلهب.. شر اسود وحقد سنين.. زاد الشد ع شعري.. .. بقى يجيب راسي منا ويودي منا..
عامر:راح اعوفج .. اخذي راحتج هسه ويه صاحبج.. ويجيج يوم ادوس ع راسج بقندرتي واخلي ابوج يقتلج بايده!
عاف راسي وابتعد عني خطوتين.. عطت كل صوتي واحس دموعي نزلت جمر:تخسه انته! تخسه ادوس راسي ياساقط!
مااحس اله اندار عليه وبنفس الوقت ضربني راشدي بحيث فقدت الاحساس بنص وجهي.. انفتح الباب علينه شفت امي.. ارتبكت من شافت وضعي.. لازمه خدي ودموعي تجري.. صاح ع امه يله امشينا! هي طلعت بدون متحجي شي.. امي حاولت تقرب مني.. اني انفجرت بجي وباوعت بعيونها حيل.. رادت تخلي ايدها ع كتفي كبل نزلتها.. وركضت لغرفتي ... ابجي واحس مدارتاح بلبجي..اكو شي اقوى من الدموع بداخلي.. ماعرف شنو ولااعرف شلون اطلعه...
زعلت ع امي وابويه يوم كامل.. ماحجيت وياهم.. حتى الاكل كطعته.. بس اشرب مي.. وزينه تسويلي لفه جبن وكلاص جاي ابقى عليهن يوم بطوله.. يومين ع هل حال.. اريدهم يحسون بيه شويه.. اذا هو بعده ممتزوجني وغلط ع امي وابيتنا وفوكاهه ضربني ... احس بنظراتهم شي من التعاطف.. احسهم مو مثل قبل بس يردوني اوافق.. اجتي امي بالليل.. باستني من راسي.. كعدنه سكته.. مااريد احجي واعاتبهه واجرحهه.. وهي محجت.. ضوه اللاله كلش خافت.. حسيت امي تبجي.. اي سمعتها من تسحب نفس صوتهه مال واحد يبجي.. مديت ايدي ع خدهه.. محسيت بشي.. دموعهه كانت حاره .. لمن بعدت ايدي وتلمست اصابعي لكيتها ناكعه دموع.. انكسرت كلش ع دموع امي.. ماشفتها قبل بجت بس بفاتحه ابوها.. الي هو جدي.. وهسه نزلت دمعتها عليه.. حضنتها حييلل.. ادفن راسي بصدرها ..اتمنى ارجع بداخلهه.. ارجع لاحشاء امي.. مااطلع لهاي الدنيا الي بس باسابيع طشرتنه ودمرتنه..
وهي تبجي وصوتها يرجف..كالت:مراح يوصل طرف ثوبج هذا النذل.. ابوج راح لعمج وتعارك ويا وكله حتى اذا هي قبلت بعد اني ماانطيهه.. يابعد روحي. شعندي غيرجن اني.. لاتبجين خلي راسج مرفوع..
كلامهه قواني.. انطاني جرعه امل واحساس بالحياه.. حضنتها اقوى.. لحد مصاحت عليه ولج كسرتي ضلوعي! صوتها وهي تكول هاي الجمله ليهسه باذني.. ضحكت .. ابتعدت عنها شويه.. اسمع صوت زينه تكول هاا؟ انحلت ع خير ع خير واخيرا راح نرجع ناس عاديين..
-لج لعد شنو احنه مو ناس؟
زينه:لا ياناس! اصلا جنتو مثل الغوريلات.. كلش شوي واحد يطنكر بيكم.. ديله كومي سبحي مو الغرفه عفنت من وراج!
-ههههههه وجع يلثوله!
امي:ريحتها ورد قداح حتى لو مسبحت شهر..
زينه:اي مامه.. يكولون القرد بعين امه غزال..
كمت من مكاني واني امشي جريت كصيبتها:لج جوزي مني.. راح اسبح وجيبيلي ملابس وخاولي..
زينه:يله عيني خانم..هسه اجيبلج وصله المسح نشفي بيها واجيبلج بجامة بابا البسيها...
عطت من بعيد:كبر! مخبله تسويها!
احس الفرحة دخلت بكلبي بذيج الليله.. كلام ماما طلعني من ظلمه وقلق وتفكير.. سبحت بواهس.. اغسل جسمي بسرعه وحيل.. اريد اكمل بسرعه واروح اكعد يم ماما اكثر.. اشوف بابا شنو يحجي شنو يكول.. ارجع لنفسي وعائلتي.. وصدك كملت وطلعت.. لكيتهم ماكو بالبيت.. عرفت همه بالحديقه.. مشطت ع السريع وشربت شربت ووياه كعكايه ولحكتهم.. لكيت ماما امدده وزينه مخليه راسها ع رجليها.. وبابا مً يمهن اكيد راح يم الجوارين..اجيت ركض فتت بحضن امي.. اوف ياحضنج يايمه.. بي كلهن ..دفو..امان..محبة..
-دفيني ماما بردانه..
ضربت ع كتفي خفيف:عياره لوما انسمطنا من الحر!
-هههههه لاماما.. مو هستوني سابحه وبردت.. يله دفيني بس شويه..
ظليت حاشره نفسي كوه يمها.. هي اخر شي ملت مني لان ماوخرت عنها.. بقت تمشي اصابعهه ع كذلتي.. ع حرارة ايدها نص شعري نشف.. كل التعب البيه احسه يطلع ويه لمسة ايدها.. مادري شلون غفيت.. بس كافي كان حضن امي عليه ..خاصه اخر فترة صار جفا بينه وابتعدت عن امي هوايه..قبل كنت كل ميعجبني اخلي راسي يم صدرها وهي متعوده ع الوضع.. مهما كبرت احس هذا بيتي صدك.. ممصدكه بذيج الليله امي رجعت تحبني وتتقبلني مثل قبل.. ممصدكه امي وكفت ويايه.. كل الي صار كابوس وانتهى.. بس ماكنت اعرف الكاوبيس يمكن نرتاح منها شوي وترجع النا بخوف ورعب اكثر واكثر...
بعد ماغفيت بحضن امي.. ع فرشه قديمه.. وجوه النبكايه بالضبط.. احس واحد يكعد بيه.. امي واكفه يم راسي وتكول.. اكعدي يله اجت الكهرباء.. تعالي نامي جوه.. كمت بتعب عجيب غريب.. احس رجليه صارت خيوط.. يمكن بوقتها لو مقطوعه رجلي مكان حسيت بيها..صرت اخلي ايدي حياطين وامشي كوه.. حتى عيني احسها تغمض وحدها..
مادري شلون وصلت للغرفه... ذبيت نفسي ع فراش وماحسيت ع شي بعدهه... بس اتذكر اجتني كوابيس مزعجه كلش..
مااعرف شكد اخذت وقت بنومتي.. كعدت راسي يريد ينفجر.. اباوع زينه ماكو يمي.. اكيد هسه دنيا ظهر واخذتني النومه.. بقيت بفراشي شويه واستغربت الهدوء الي يمي.. لا صوت امي..لاصوت الشغل الي تشتغله! زين زينه وينها.. كلت يجوز بالحديقه لو بالطرمه..
خليت رجلي ع الكاع احسها انطوت.. عجيب.. شنو راح اتكرم!
بيه مابيه وصلت باب الغرفه.. هو اصلا كان مفتوح.. احس غشاوة صارت ع عيني..اجيت اوكع من طولي... تقدمت خطوتين لاخ.. اشوف اكو نقط دم .. معقوله زينه جايتهه الشهريه وممنتبهه؟ لو بابا ذابح ديج اليوم؟ هيج اجه ابالي واكثر ضني بابا ذابح ...قبل بابا يجيب الديج هو يذبحه بايده جوه النبكايه... كلت اي بابا ذابح اليوم.. بعدين تقدمت خطويتن وكلت زين شجاب الدم لهناا؟ فتت من باب غرفه امي.. هي تصير ع يساري من نطلع من غرفتنا اني وزينه.. الباب ممسدود.. اكو فتحة صغيره دائما ماما وبابا يخلون طابوكه للباب حتى يفوتلهم هوى المبرده.. ردت اطلع كبل للمطبخ.. بس عيني طرفت لدم هوايه بغرفتهم.. بلاوعي دفعت باب الغرفه .. المنظر الي شفته مااتمنى لعدوي.. جمدت بمكاني! اريد احجي اريد اعيط اريد اصيح ماما بابا.. مااكدر.. اريد اقترب اشوف شنو الي صار وبيهم روح لولا؟ هم مكدرت......
المهشد هو دخلت رانيه لغرفة امها وابوها وكانو مذبوحين وابوها فوك الذبح طعنات ببطنه وجوانبه.........
أنت تقرأ
وجع ذكريات
Roman d'amourرحت للفندق وداسجل يم موظف الاستقبال مااحس اله ذراعي نلزمت حيل.: التفتت كان سامي.. متت بدمي.. كان ميباوع بوجهي وبس يباوع للشارع وللموظف.. سامي:اخي بطلنا منريد حجز.. رجعلها هويتها.. رجع الهويه.. كبل اخذها منه.. هنا شوصف حالي.. ظلت لازم ذراعي لحد ماوصل...
