وجع ذكريات

ج 16

السادس عشر

مرت ايام.. كوه تنجرع.. ليل وحشه وظلمه حيل.. المنطقه احس نفسي ممأمنه بيها.. صار عندي هوس.. اقفل البيبان عليه.. وماكو شويه وارجع اتأكد اكول يمكن مقفلتهن.. واكثر من مره اعيد هل حاله.. لحد مايصدك عقلي خلص الباب مقفول..
النهار.. يصبرني صوت عصافير الحديقه.. يذكرني بعصافير حديقه اهلي.. ع النبكايه.. صرت العصر .. ارش الحديقه.. تطلع ريحه نفس ريحه حديقه اهلي.. ابقى استنشقها لحد ما ادوخ.. 
وبيوم.. باوعت للحديقه مال البيت.. فارغه.. مقفره.. لا زرع لا شجره.. خطر ابالي ازرع نبكايه.. اي .. مثل الي كانت ابيتنا... 
اونس حالي بيهه وبشوفتهه....
تعبت روحي .. ايام واني انتظر سامي.. مااجه.. يمكن نساني.. يمكن راح ميرجع.. 
اصفن بالبيت وحدي.. ماكو شي اسوي.. نظيف ويلمع ومرتب.. طبخ اطبخ واغلب الاحيان اذبه.. لان مااكدر اكل لو اكل بس شوي وتنسد نفسي..
ورجع سامي.. ورجعت ضحكتي برجعته..
حضنته وبجيت.. دموع متخلص.. وروح ماتهده ..
هو استغرب من حالي.. 
سامي:شكو ياعمري.. ليش كل هل بجي؟
-مشتاقتلك.. موتني غيابك!
سامي:لعد شلون ابطل؟ 
بحيت زايد وحضنته.. ماكنت منتظره هذا الجواب.. صدمني..
شميت رگبته حيل.. دخت بيهه.. كلك ع بعضك الي عذاب.. تعلقت بيك اكثر من روحي..
ومرت الاجازه بسرعه.. وراح سامي..كل شي حلو لابد ينتهي بسرعه...هيج تعودت بحياتي.. ورجعت الايام صعبه ومره حيل.. تنتهي الايام بملل كبير كلش.. ابقى ساعات اصفن ع السكف.. وابقى ساعات بالتنظيف.. وساعات باشياء تافهه ومالهه معنى.. بس مجرد اقضي وقت..
ورجع باجازه.. وانتهت .. وهمين رجع.. ومرت اشهر...بس صار كل ماينزل يطلعني.. يمكن حس بوجعي.. 
تعودت ع الوحده المره.. والساعات بغيضه حيل.. هوايه مرات نزلت الساعه واكلبهه حتى مااشوفهه.. لان اذا اصفن وهي كبالي تبقى روحي تلوب واكول كل هذا ديضيع من عمري..
وبوحده من رجعات سامي.. بقى كم يوم يمي.. اجاه تلفون.. بيهه الاجهزه النقاله ستوهه دخلت.. طلع يخابر بره.. اني كلت اكيد رغد وميريد يحاجيهه كدامي.. 
رجعلي والضحكه بوجهه.. ابتسمت لااراديا ويا.. 
سامي:كومي.. بدلي دنروح..
-وين؟
سامي:بدلي وتعالي.. بس اريدج قويه ماشي؟
من كلي هيج عرفت اكو شي مو زين بالطريق.. لبست وكل فكري شراح يصير ووين ماخذني.. 
مشت السياره مسافه طويله.. رحنه ع منطقه زراعيه.. يمكن هو نفسه البستان الي سبق وان حبسني بي.. 
طول الطريق اسأله ميجاوبني.. كلي نوصل وتعرفين..
وصلنه ع بيت داخل المزرعه.. انتبهت اكو هوايه بطاله شرب فارغه..يم البيت..شي مكسره وشي سالمه.. باوعت داير مدايري..
كانو اثنين ولد واكفين اباب وحده من الغرف.. من وصل اخذوله تحيه.. فتحو الباب وكلوله تفضل ...
لزم ايدي ودخلت ويا.. اجت عيني ع ظالمي.. احس الدنيا وكفت.. 
الحياة توقفت.. كلي ع بعضي انهزيت هز.. عامر كبال عيني.. رابطي بكرسي ومعصبين عيونه..
صبت دموعي.. ردت اشهك خليت ايدي ع حلكي.. باوعلي سامي.. رفع عيونه وحواجبه مثل الي يكلي لطلعين صوت.. 
تقرب يمه مسافه.. وطبعا كان عامر مطيحين حظه كتل.. خشمه مدمه وصايره حالته حاله.. رجع ضربه بوكس ع وجهه وكعه للكاع.. داس ع راسه كدامي.. بده برفس بي من كل مكان..متحملت اكثر.. ردت اعيط خليت وطلعت.. باوعت للسما وشهكت.. مشيت مسافه حتى لا ينسمع صوتي..
ظليت ابجي بصوت.. مكدرت اكتم اكثر.. اسمع من بعيد صوت صرخات عامر.. اااااه... شكد تعذبت.. وشكد ادمرت.. وانته هياتك مذلول .. شكد كابرت يمي وشكد نعثلت عليه.. وشكد غلطت ع امي.. اندار بيك الوكت وهيج صار بيك... 
طول مااني اسمعه يصرخ.. اذكر كل الصار بيه بسببه.. موت اهلي.. السجن.. سمعتي.. غربتي عن اختي.. الاخوان الي طلعو مادري منين.. شكد حطمني هل انسان.. بس مكدرت اشوف شلون كانو يضربو..
طلع سامي ينزل بردان قميصه.. حتى كان عركان ويلهث.. اشر للي بلباب .. دخلو وصار صوت عامر عياط اكثر..
عياطه ترس اذني.. سديت اذاني.. مااتحمل اسمعه.. 
-فدوه.. طلعني منا بسرعه.. مااتحمل اكثر.. راح اموت..
سامي:لالا! معبالي انتي هيج انهزاميه! ردت تاخذين حقج بيدج؟!
-يعني شتريد اقتله؟ 
سامي ذب نفس طويل:لا! يله تعالي اصعدي..
صعدنه السياره.. طول الطريق ابجي.. ماارتاح حتى من الي ظلمني ياخذ عقابه.. كلت لسامي:ليش متعوفه وتخلي ينحكم.. لتورط نفسك بي.. خل القانون هو الي يحاسبه..
ابتسم بأريحيه وثقه..كال:احنه القانون! 
-عوفه.. خل يشوف السجن ويشوف الي اني شفته!
سامي:لا.. مراح نتركه بسجن.. احنه نسجنه هنا.. واذا تردين بهل لحظه ارجع بطلقه وحده انهي..
-لا.. لتقتله.. 
سامي:ماشي.. شطلبين انفذ.. نروح نتعشا؟
خزرته! تعجبت شلون اله نفس ياكل بعد الي سواه بعامر واصلا شكل عامر وهو مدمى كافي يسد النفس..
سامي:ههههه شبيج حبيبي؟ يله مناكل اليوم لخاطر عيونج..
رجعنا ع البيت.. صح الانتقام بده.. بس همين ممرتاحه.. مااعرف ليش..
صح هو ظالم ولازم ياخذ عقابه.. بس همين مااريد اعذبه وبشي مو قانوني!
بقى امره يمي.. بعد ايام.. اتصلت بسامي.. كان تاركلي نقال بالبيت..
كلتله عوفه.. لتخلوه .. كلي راح نتركه.. بس بمكان مقطوع.. وهو قدرته للرجعه..
-لااا.. سامي لتخلي يموت؟
سامي:اخخ لو ماانتي كان قتلته قتل الكلب!
-ليش گلبك قاسي؟!
سامي:ماكو مجال للعواطف!
-هسه شنو راح اتركو لو لا؟
سامي:والله اني افضل يموت لان كل شي يصير.. يجوز يطلع منتبه او عرف منو احنه؟!
-والحل؟
سامي:راح نتركه بس معاق..
-يعني؟
سامي:بعدين اشوف.. هسه عندي شغل.. يله بعدين اتصل..
سديت التلفون.. صفنت وكلت صارلج شكم سنه تعانين؟ شكم سنه صار مفاركه اختج؟ وشكد عانيتي وشكد تعبتي؟ 
كنت اتعجب ع القدره العندي.. لو حاجيلي عن شخص ثاني عاش نفس قصتي.. يمكن كنت مصدكت ع القدره والقابليه العنده.. بس هاي اني .. مثل مااني .. صفيت تعلاكه جروح.. كلمن يعلك بيه جرح ويروح...