nada hs
بقيت انتظر سامي.. وشكد ساعات من عمري مرت بانتظاره.. اتصل بي ميرد عليه.. كله رفض.. طكت روحي .. اله شوي طلعت ورحت لبيتهم..
بدون مااحس.. كنت اغسل مواعين انهاريت .. الي واكفه انسان.. من دم ولحم.. كافي .. لشوكت وحدج لشوكت.. شلت الماعون بيدي وركعته..
تفلش.. رجعت وكعت للكاع واني ابجي.. لميته..
عفت الشغل كله.. ذبيت نفسي بالصاله.. ع الارضيه.. اباوع للسكف.. ماعندي شي اسوي.. سامي ومو يمي.. واكيد صار وقت ررحته للدوام..
ومرت الايام.. وحيده.. روحي لايبه.. ماارتاح بمكان.. اشتاق لسامي وهو مو يمي.. ع كد الالم والوحشه والخنكه.. فكرت اخذ اغراضي واروح يم رغد.. اي .. عاد مشاكل وصوت بشر يمي احسن من السجن الاني بي..
جهزت ملابسي وداريد اطلع.. بعدين كلت.. شدسوين.. وين رايحه..
اكعدي واسكتي.. قابل جديده عليج الظله وحدج..
ونزل سامي مجاز.. هنا كلت لازم اشوف حل للوحده الاني بيهه.. خلص صار اكثر من سنتين متزوجين.. همين حقي اصير ام..
عاد طفل يترس حظني واسمعه واخلص الوقت ويا..
تعمدت مااخذت احتياط.. قبل كنا متفقين ناخذ احتياط.. بيهه اني طول اجازته وطول ماهو يمي ماحميت نفسي من الحمل..
اروحله مشتاقه ومن صدك محتاجته.. بس يحظني ادوخ بين اديه.. كل شي بي يدوخني..
وخلصت اجازته.. يوم يمي ويومين يم رغد.. المهم هو موجود تحملت..
صارت علاقتنه طيبه كلش بذيج الفتره.. صار هو يتصل بيه ويذكرني..
يسمعني غزل وكلام يطير عقلي من راسي.. دعيت من الله اطلع حامل.. اريد طفل من سامي.. جزء صغير منه.. اشفي شوگي بي من يروح سامي..
كلت اكيد بس ينخلق.. سامي راح يحبه ويشيله بحضنه..
وصرت اتخيل واستبق الاحداث.. ياترى شراح يكون شكله.. وين اخلي..
شنو انطي حليب.. وووو سرح فكري زايد..
انشغلت هوايه بموضوع الحمل.. خف الهم عندي بسبب زينه ورفضهه.. اما اهلي اعتاديت.. مرت سنين ومانسيت ولا راح انسى يوم الاسود..
ومر ذاك الشهر وكل يوم يقترب بي موعد الشهريه ادعي من كل كلبي ودموعي تجري.. ادعي تفوت واطلع كبل.. وصار وتأخرت..
مصدكت نفسي.. كلت لا يجوز صارت عندي خربطه.. خفت اتحرك وتنزل عليه.. مادري شلون كنت افكر .. بقيت بس نايمه..
من نزل سامي مجاز.. بقى متعجب ع وضعي.. يكلي شبيج تمشين ع كيف وبس نايمه.. اي كنت اذا كلي ع شي اطفر طفر من مكاني..
مرت الايام.. ومااجتني.. وفات موعدهه كلش.. كان سامي بالدوام.. كلت مااخبره هسه.. لمن ينزل مجاز واروح احلل اني ويا..
كل ماالزم بطني اكون متأكده اكو شي بيهه.. شي من سامي.. تخيلته يشبه عيونه وملامحه .. تخيلته من هو بالكماط لحد مايصير مثل ابو.. رجال.. هيبه و صدر ديوان..
انتظرت سامي ع احر من الجمر.. بس كنت متخوفه من ردة فعله.. كان ميحجي بموضوع الاطفال.. واذا اجيت افت المووضوع ميجاوبني ويغير الموضوع.. كلت اكيد راح يفرح..
تحضرت.. حمام وملابس وشوي مكياج وكذا.. خابرني كال اني قريب ع البيت محتاجه شي.. كلتله لا محتاجتك انته..
دخل وعيوني تريد تاكله.. اريد اشبع منه شوف.. حضنته.. بوسته من شفافه ومن ركبته ومن صدره.. نزعتله ودخل حمام.. حضرتله الاكل..
طلع وكان وجهه مرتاح.. خبرني انه اجاه قدم.. يعني يترفع قبل وقت ترفيعه المحدد بست اشهر.. وكال ع الاغلب همين راح يجي قدم ثاني.. يعني قبل سنه يترفع.. طرت فرح.. منا اكو روح منه بداخلي.. ومنا اخباره تسرني..
كمل غده.. رحنه ع غرفة النوم.. كلي تعبان تعالي نيميني..
رحت حضنته وخليت راسه بين اديه.. كنت العب بشعره وحايره منين ابدي وشلون اكوله.. ردت احجي حسيته نام.. باوعت ع وجهه لكيته غافي..
بسته وغفيت ع ايده..
كعدت العصر.. كنت غاطه بنوم عميق.. عركانه ومصخنه.. احس جسمي نار.. طلعت اشوف سامي.. لكيته كاعد بالصاله ويتفرج ع التلفزيون..
رحت شمرت نفسي بحضنه.. لزم راسي كلي اشو راسج نار.. تلمس جسمي كال وهنايه همين.. كلج صايره نار..
-اكولك.. بس لتعصب..
سامي:احجي شكو؟
-يمكن اني حامل..
رأسا بعدني عنه وباوع بوجهي:شنو؟ شدتحجين؟
-حامل.. راح يجينه نونو صغير بي مني ومنك..
كام من مكانه:ومنو كلج اني اريده؟ اني مو طلبت اديرين بالج! ليش هيج صار؟!
صار حجيه صياح.. صوت صياحه خوفني كلش.. ظل يطلع من الغرفه يدخل بالخطار يرجع من المطبخ وبس يزمخ ويركع البيبان..
رحت صرت كباله..لزمت ايده واباوع بوجهه.. رأسا شمرهه مني..
عاط بيه:وخرييييي! عود شمفكره نفسج؟ شدسوين؟ هاااا؟ لج احجي؟! اني اجيت ارتاح يمج لو جيت حتى تسلبين راحتي؟
صبت دموعي:وراحتي اني بيك والي ابطني!
رجع عله صوته اكثر:لج لتخبليني! لتخليني هسه اتخبل ىاطلع من طوري عليج!
-بس هو ابنا.. حرام عليك هيج تكول..
سامي:ماريده نزلي.. باسرع وقت نزلي!
شفته راح للغرفه.. دموعي تصب وكنت متأكده منه مراح يتنازل ويقبل اجيبه.. لحكته للغرفه . كان ديبدل يريد يطلع.. اخذت القميص من ايده..
جريته وذبيته بالكاع..
-كاافي! راح اجيبه.. هذا الي ابطني روح.. مااقتلهه! اقتلني الي واخلص مني اذا اتريد..
مااحس اله ايده نصفطت ع وجهي .. اذاني انسدت.. احس وجهي صار نار..
دفعته من صدره.. وعطت .. اطلع منا! روح لرغد! روح لمرتك ذيج.. اني مو مرتك.. اني حرام اخلف.. حرام اكون ام.. حرام اعيش مثل البشر!
عبالي راح ينكسر كلبه عليه.. بس المفروض مااتوقع هل شي منه..
لان اعرفه ميكسر كلبه بشر..
مااحس اله الكفخات صارت تجيني من كل مكان.. وكعت للكاع.. الم بنفسي حيل اخاف ع بطني.. مااريد اتأذه وبروح مني الطفل..
هو تخبل عليه.. صار يغلط ويفشر.. يضرب بدون وعي.. اني اريد اكوم مااكدر.. لابيه ابعده ولا بيه اكوم.. احس جسمي كام يون من الضرب.. كل ضربه عافهه بيه من اذكرها هسه احس وجعهه يرجع ..
عبالك كان متقصد.. يركز اكثر الضرب ع ظهري.. اريد احتمي منه.. اريد اعيط مااكدر.. بس اصيح بصوت مخنوك ابني.. ابني لتموته.. حرام عليك!
وهو ظل يعيط ويغلط.. يكلي مفكرتي! مكلتي! شلون تسويها شلوووون..
اله شويه اغمى عليه واني جوه ايده.. احس ظهري خدر من كد الضربات..
غمضت عيني مااحس ع شي.. استحوذني نعاس فضيع..
وع الاغلب فقدت .. صحيت وره شويه.. وجع ببطني وظهري.. استندت ع الجربايه.. كعدت ولازمه بطني.. احس شي يتكطع بداخلي..
كل صرخه وجع طلعت مني..هدت حيلي.. لازمه بطني ولا اكول لا ماما.. ابقى اني اريدك.. اني اريدك .. لا تطلع.. خليك بس اتحمل ياروحي..
مادري بعدهه شكنت اخربط.. كل جسمي يون وجع.. وراسي يفتر من غير وجع بطني وظهري.. كمت بيه مابيه من الغرفه.. ردت اروح للحمام اغسل وجهي.. لازمه بطني واصرخ اكول ماما شسوي .. شسوي ومااخليك توكع... دخلت للتواليت.. مااحس اله قطعه كبيره وكعت مني.. احس روحي انشلعت وياهه.. انتهيت.. سانده نفسي بحايط بالحمام واصرخ..
شفت الحمام انملى دم.. عبالك نهر يجري.. وجع كطعني تكطع..
كل جسمي صار يرجف.. غسلت رجليه.. خليت منشفه بين رجليه وفتحت المي بالحمام وطلعت.. هم طلعت خايبه.. حتى الي ابطني خسرته..
شخسر بعد وترتاح مني الدنيا..
ذبيت ثوبي.. لبست غيره.. لبست هوايه قطع اتذكر.. كنت كلش بردانه.. اخذت مسكن الم هوايه.. مااتذكر شكد بس هوايه..واحس بالدم الي يطلع مني كومه.. فرشت فراش بالكاع.. لفيت نفسي ببطانيه واني ارجف برد.. وكانت مو كلش بارده.. جو خريف..
متت برد.. لحد مادخت ونمت.. حتى من نمت بيومهه.. الكوابيس القديمه..رجعتلي .. ماما وبابا مذبوحين.. حتى زينه شفتها مذبوحه وياهم..
وهوايه كوابيس مزعجه.. بس مكنت اكدر اصحى من نومي ..
ع كد الالم والتعب مكدرت اصحى..
ماصحيت اله ثاني يوم الصبح.. لكيت نفسي غركانه بدمي.. مابيه حيل اوكف..وجع بعظامي وبكل جسمي.. خو ظهري احسه مفلش..
شلت الفراش ذبيته.. اصلا كان مخضب تخضب بالدم.. هو والبطانيه ذبيتهم.. دخلت للحمام همين ذبيت ثوبي والملابس الجوا..
اغسل وابجي بس ماكو دموع.. بس ارجف واون.. رجعت طبكت ثوب اليه وخليته.. ماكان الدم يوكف.. طلعت للصاله.. شغلت الصوبه.. نمت بصفهه..
ليش سامي ليش.. اعرفك قوي وماتنكسر بسهوله.. بس ليش تقتل ابنه..
ليش تكسرني بي.. ليش تضربني هيج.. موبشر اني..
بقيت الوم بي بداخلي واني اباوع ع الصوبه.. اتخيله باي لحظه يجيني.. مر الوقت ومااجاني ولادك تلفوني..
كمت اكلت خبز وتمر عندي.. ردت اشد حالي شوي.. طلعت التلفون ودكيت ع سامي.. كنت محتاجته يجيني.. لان صارت الدوخه فضيعه عندي..
كلت راح اموت وحدي .. اي ثلجت اطرافي وعركانه واني بردانه وكبالي صوبه بس ممأثر بيه..وجع رجع يجيني.. بس خفيف مو مثل اول ماوكع الطفل.. شسولف عن حالي بذاك اليوم.. وحيده واحس روحي كوه مجلبه..بجسمي.. تمنيتها تطلع بسرعه وارتاح.. ينتهي الوجع وتروح كل ايامي السوده بدون ماتذكرهه الناس..
كنت مااعرف نفسي.. ساعه انام.. ساعه اكعد وميته برد.. الدم الي نزفته بي جليكان..
صحيت ثاني يوم الصبح.. كنت جوعانه وبنفس الوقت من اذكر الاكل تلعب نفسي.. كمت سويتلي ريوك.. اكلت من لاجاره.. بس وره الريوك جعت اكثر.. كمت سويتلي غده.. اطبخ وعيني مانشفت دموع.. حسرات واهات بيه... اله شوي اختنك واموت بوحده من شهكاتي..
كل شوي الزم بطني ممصدكه ابني راح.. كنت انتظر وكنت اظن وكنت اظن وتالي خاب ظني..
هنا اني حقدت ع سامي.. تمنيت مااشوف وجهه بعد.. اذاني باعز شي اليه.. بسلوتي الكنت انتظرهه واتأملهه.. ماانسى وحشيته من ضربني.. يضرب دون رحمه.. وفوكاهه ماوصلني ابد.. اتصلت بي مره وبعد غلقت التلفون وشمرته... ورجعت وحيده.. حته الروح البداخلي انشلعت..
اخذوهه غصب مني.. مثل مااخذو كل شي حلو..
بهل الايام نظفت البيت كله.. روح ابني هنا طلعت.. هنا اخلقت وهنا انتهت..
اشتغل ودمعتي بعيني.. شكول عليك سامي.. واني الكنت افديك بروحي..
تتحسف عليه طفل منك..
مرت ايام.. ومااحد اجاني.. كنت اكول سامي زعلان بالله.. زين اهله ليش محد يجيني.. معقوله محجالهم.. اي يسويهه.. هو ميحجيلهم حتى اذا متت.. المشكله ماعندي رقم احد بيهم.. فكرت اروح لبيت رغد واشوف ام سامي واحجيلهه.. اكيد ماتقبل بالظلم..
بس مسويتهه ومطلعت.. ايام واني انتظر.. وصار عندي هم جديد تبجي عيوني عليه.. هو طفلي.. ومناك اني مامقصره همومي.. من ياصفحة التفت والكه راحه؟
يوم يومين وسامي ماكو.. اعرف صار وقت نزلته ومااجاني...
فقدت ومخليت لا لطم ولا بجي.. حتى شعري ملخته.. شنو الذنب السويته حتى هيج يصير بيه.. ماادري شوكت ارتاح واجر نفس مابي شهكه حزن..
أنت تقرأ
وجع ذكريات
Romanceرحت للفندق وداسجل يم موظف الاستقبال مااحس اله ذراعي نلزمت حيل.: التفتت كان سامي.. متت بدمي.. كان ميباوع بوجهي وبس يباوع للشارع وللموظف.. سامي:اخي بطلنا منريد حجز.. رجعلها هويتها.. رجع الهويه.. كبل اخذها منه.. هنا شوصف حالي.. ظلت لازم ذراعي لحد ماوصل...
