مرت الليله علي ليالي وساهر يجلس بجوارها وسهر نائمه في ثبات عميق في الصباح تتململ ليالي وتفتح عيونها وتجد ساهر ينام بجوارها علي الكرسي
ليالي بابتسامه :ساهر يا حبيبي ساهر
استيقظ ساهر علي صوتها :ليالي حبيبتي انت كويسه
ليالي :الحمد لله يا حبيبي انت برده فضلت سهران جنبي طول الليل
ساهر :ما انت عارفه انا مقدرش علي بعدك يا جميل
ليالي :انا كويسه يا حبيبي ما تقلقش عليا
ساهر :انا عارف الحمد لله انت نمتي طول الليل ومفيش حاجه حصلت بس انا كنت خايف عليكي انت بقي لك فتره طويله مرتاحه من نوبه الخوف دي انا خفت عشان جات لك بعد المده الطويله دي يحصلك حاجه بالليل بس الحمد لله
ليالي :انا هفضل كده لحد امتي يا ساهر انا اعصابي مش بتتحمل اي ضغط انا نفسي اقدر اتحكم في اعصابي واقدر أواجه الخوف او أي موقف
ساهر :يا حبيبتي الحمد لله احنا كنا فين وبعدين انت بقيتي احسن كتير من الأول بكتير وان شاء الله شويه شويه هتبقي احسن
ليالي :انا مش عارفه مين اللي اسمه حسن ده وليه عمل كده
ساهر :ممكن ماتفكريش في الموضوع ده وان شاء الله انا هوصل للولد ده واعرف هو عمل كده ليه يلا بقي قومي عشان ماما وبابا قلقانين عليكي من امبارح وتعالي نطمن على سهر
ليالي :ليه هي سهر مالها
ساهر :مفيش هي بس كانت اعصابها تعبانه من اللي حصل واديتها حبايه مهدئ بس ايه اخدتها من هنا واتقلبت من هنا وسامع صوت شخيرها من هنا
ليالي :ماتقولش كده يا ابيه لو سمعتك هتعضك
فجأه دلفت إليهم سهر
سهر :هي مين دي اللي سامع شخيرها من هنا دا انا مش هعضك بس دا انا هاكل دراعك كله
ساهر :بصي هو انا صحيح اكبر منك بس انا مش قد عضتك انا ههرب
وركض ساهر الي الأسفل وسط ضحك ليالي وسهر
سهر :عامله ايه يا لولو يا حبيبتي
ليالي :الحمد لله يا حبيبتي
سهر :طيب يلا مش هننزل نروح الجامعه
ليالي :انا مش عارفه انا بيحصل معايا كده ليه
اقتربت منها سهر وأخذتها في حضنها :ليه بتقولي كده يا لي لي انت الحمد لله كويسه وقطع حديثها رنين هاتف ليالي
نظرت ليالي الي الهاتف :ده دكتور بدر
سهر :طب ردي بسرعه
ليالي :الو
بدر :انسه ليالي
ليالي :ايوه انا
بدر :انا بدر الدين ابن عمك
ليالي :طبعا عارفه حضرتك
بدر :انا كنت بطمن عليكي عامله ايه النهارده
ليالي :الحمد لله بخير
بدر :ممكن اطلب منك طلب
ليالي :طبعا اتفضل
بدر :لو احتاجتي لأي حاجه كلميني انت معاكي رقمي كلميني في اي وقت وتلاقيني تحت امرك
ليالي :شكرا لحضرتك
بدر :انا بتكلم بجد
ليالي :اكيد
بدر :طيب انا خلاص اطمنت عليكي اسيبك بقي عشان ماعطلكيش
ليالي :اوك مع السلامه
بدر :مع السلامه
أغلقت ليالي الهاتف وظلت صامته وشارده
سهر :لولو لولو لولو
ليالي :هه بتقولي ايه
سهر :لا دا انت مش هنا خالص هو الدكتور اخد عقلك
ليالي :بتقولي ايه
سهر :مش بقول بس واضح كده ان الدكتور طب في حبك يا لولو
ليالي :حب حب ايه يا سهر
سهر :اشتري مني والله انت ماشفتيهوش امبارح كان عامل ازاي ومسك الواد ده اللي اسمه حسن وضربه ووقعه علي الارض لولا الظابط مسكه كان موته من الضرب
ليالي :انا خلاص يا سهر مش هحب تاني
سهر :ايه اللي انت بتقوليه ده انت لسه صغيره اوي واكيد هتلاقي اللي يحبك بجد وان كان علي اللي اسمه حازم ده مكانش حب وانت عارفه انت بس كنت معجبه بيه وهو كان بيستغلك متخليش حب وهم يضيع عليكي حب حقيقي
ليالي :انت خلاص خلتيه حب حقيقي انا ماشفتيهوش الا مرتين وفي المرتين كنت تعبانه ومش مركزه
سهر :بس هو كان مركز اوي
ليالي :بقولك ايه قومي يلا عشان لو قعدت معاكي مش هنخلص من رغيك ومش هنلحق حتي محاضره بعد الضهر
سهر :كده ماشي انا هقوم البس بس لسه كلامنا ماخلصش
خرجت سهر من الغرفه وتركت ليالي تفكر في كلامها ولكنها قالت لنفسها لا انا مش هدخل تاني في قصه حب فاشله بس يا تري هو فعلا زي ما سهر بتقول انه يكون لا لا اكيد لا
معقول احب تاني ازاي لا مش معقول
ده الحب الأولاني خلاني اسأل واقول
تاني يا حبي تاني ماكفايا يا زماني
نجري ورا الأماني ونضيع ويا المجهول
اهرب والا اجرب والا اصبر والا ايه
ابعد والا اقرب والا مردش عليه
بس ده صعبان عليا من اللي بشوفو في عينيه
تاني يا حبي تاني ماكفايا يا زماني
نجري ورا الأماني ونضيع ويا المجهول
معقول احب تاني ايوه وليه مش معقول
ده الاحساس اللي جاني خلاني اقول على طول
تاني يا حبي تاني ماكفايا يا زماني
نجري ورا الأماني ونضيع ويا المجهول
عند بدر ورائد
بدر :حلو اوي لحد كده يلا تعالي معايا
رائد :علي فين
بدر :هنروح الجامعه
رائد :ليه
بدر :لازم تلاقيني قدامها في كل مكان لازم اشغلها بيا
رائد :ليه بقي
بدر :عشان تنسي اللي اسمه حازم ده خالص وتتعلق بيا انا
رائد :وبعد ما تتعلق بيك
بدر :يبقي العذاب اكبر
رائد :حرام عليك يا بدر انت هتندم بعد كده
بدر :وبعدين بقى يا رائد هتيجي معايا ولا اروح لوحدي
رائد :خلاص خلاص هاجي معاك يلا
في الجامعه
تقف ليالي مع سهر أمام الجامعه مع صديقتهم دليده وفجأه صرخت سهر
سهر :الحقي يا ليالي الدكتور ابو عيون جريئه جاي علي هنا
ليالي :ايه بتتكلمي جد
سهر :اه والله مش مصدقاني اهم جايين وراكي
فجأه سمعت ليالي صوت بدر
بدر :انسه ليالي
التفت ليالي اليه بارتباك :دكتور بدر
بدر :انا كنت ماشي من هنا وشفتك ازيك يا انسه سهر
سهر :الحمد لله ازيك يا دكتور ثم نظرت الي دليده دي صاحبتنا دليده
بدر :اهلا وسهلا وده رائد صاحبي وزي اخويا وشريكي ثم نظر لرائد وجده ينظر الي سهر وهتف باسمه :رائد رائد
رائد :انسه سهر انت مرتبطه
تعجبت سهر من حديثه :نعم
رائد :انا بحبك وعايز اتجوزك
سهر :ايه
بدر :رائد انت مالك انت بتقول ايه
رائد :أركن انت بس علي جنب يا بدر هه قولتي ايه يا سهر
سهر :لا صاحبك ده يا دكتور بدر باين عليه مجنون 🤪
رائد :اعتبر دي موافقه
ليالي :معلش يا دكتور بدر احنا لازم ندخل المحاضره دلوقت
رائد :هستناكي يا سهر ما تتاخريش مع السلامه يا حبيبتي
ضحكت الفتيات ودلفوا داخل الجامعه
بدر :انت مجنون يا بني ايه اللي انت هيبته ده
رائد :أصلها حلوه اوي يا بدر بقولك ايه مش هي بنت عمك
بدر :اه
رائد :خلاص خليها توافق تتجوزيني
بدر :لا دا انت مجنون فعلا
رائد :اسمع بس مني خليها تتجوزني عشان اساعدك في خطتك
بدر :وهي هترضي تنجوزك دي فكرتك مجنون
رائد :مجنون مجنون بس اتجوزها
في مكان آخر في إحدى الدول الاوربيه حيث سافر حازم نجده يجلس وهو حزين ومعه صديق له
صديقه :خلاص بقي يا حازم
حازم :خلاص ايه بقي هو يخليني اسيبها وبعدين يرسم عليها هو
صديقه :وانت وافقت تسيبها ليه
حازم :العرض بتاعه كان مغري اوي
صديقه :طيب ليه بقي اللي مضايقك ولا انت بتحبها
حازم :لا طبعا حب ايه بس انا بعد ما جيت هنا لقيت اني جوازي منها كان هيبقي احسن ليا
صديقه :وناوي علي ايه
حازم :انا مش هسيبه ياخد هو كل حاجه انا هرجع تاني لها
صديقه :وهي هترضي تبص في وشك بعد ما سيبتها
حازم :ما تقلقش انا هعرف ازاي اخليها ترجع لي
