صعدت ليالي الي غرفتها وهي حزينه ومتعبه وصعدت خلفها سهر
سهر :مالك يا لي لي ايه اللي حصل من ساعه ما كنت مع حازم وانت مش طبيعيه
نظرت لها ليالي بنظره حزن ثم ارتمت في حضنها
ليالي :حازم سابني يا سهر وهيسافر قالي انه مكنش بيحبني هو بس كان مهتم بيا وانه مش هيضيع فرصه عمره عشان عيله زي انا حاسه اني هموت يا سهر
سهر :اهدي يا حبيبتي هو مايستاهلش اللي بتعمليه في نفسك ده عشانه انا كنت حاسه وتقريبا متأكده انا ودليده انه مكنش بيحبك هو كان طمعان فيكي كان شايفك فرصه قدامه ولما جات له فرصه احسن سابك وراح لها
سهر :مش قادره يا سهر مش قادره ازاي قد يلعب بمشاعري كده ازاي صدقته انا طلعت مغفله اوي للدرجه دي طلعت هبله اوي كده
سهر :لا يا حبيبتي انت مش هبله ولا مغفله انت بتتعاملي بطبيعتك ومشاعرك الحلوه بس الواحد مش لازم يمشي ورا قلبه ومشاعره بس لازم يحكم عقله كمان
قطع حديثهم دخول ساهر
ساهر :لي لي حبيبتي عامله ايه
ليالي :الحمد لله يا ابيه
ساهر :امال بتعيطي ليه
ليالي :لا دي بس دماغي بتوجعني شويه ومن الخضه لما العربيه خبطت فينا
ساهر :ماقدرتوش تاخدوا نمره العربيه دي
سهر :لا يا ابيه دي خبطتنا وجريت علي طول زي ما يكون اللي كان سايقها مستني بخبطنا ويجري
ليالي :مش معقول يعني ليه يقصد يخبطنا
ساهر :لي لي حبيبتي لو الوجع جامد ممكن اديكي مسكن
ليالي :المسكن ده ايه
ساهر :حقنه طبعا هيكون ايه
ليالي :لا شكرا انا بقيت كويسه والوجع راح خلاص هو انت والدكتور اللي كان تحت ده حد موصيكم عليا
سهر :اه صحيح انا اول مره اشوف ابن عمنا ده كان فين كل السنين دي
ساهر :بابا بيقول انه كان مسافر بره هو ووالده بس كانت العلاقات بينهم مقطوعه ولما عمي مات قرر انه يرجع ويتعرف علي اهله
سهر :خير ما عمل الصراحه شفتي يا لي لي عيونه يخرب بيت جمالهم
ساهر :نعم يا ختي اتلمي يا سهر بدل ما ألمك
سهر :انت غيرانه يا بطه مفيش حد احلي منك يا سمسم حتي اسأل ليالي
ليالي :وانا مالي يسألني ليه ييجي يسأل المعجبين اللي هيموتوا عليه
ساهر :بقولك ايه انت وهي انا مش فاضي لكلام البنات المايع ده انا جاي انام شويه عشان عندي عمليه الفجر يلا سلام
خرج ساهر وظلت ليالي شارده وعيونها تبكي في صمت
سهر :عشان خاطري يا لي لي ارحمي نفسك والله حازم ده ما يستاهل دمعه واحده من عيونك
ليالي :انا هنام يا سهر
سهر :هتنامي وانت زعلانه كده
ليالي :ما تخافيش عليا
سهر :بصي بقي انا هروح اجيب حاجاتي من اوضتي وانزل المطبخ اشوف فيه ايه نتسلى بيه واجي نقعد نرغي للصبح
ليالي :زي ما تحبي
خرجت سهر من الغرفه وظلت ليالي علي حالها
في مطار القاهره الدولي
السيده آثار الرفاعي والده بدر الدين وعز الدين ابنها من زوجها سراج الدين الذي تزوجته بعد أن انفصلت عن والد بدر الدين
عز :حمد الله على السلامة يا ماما
آثار :مصر وحشتني اوي يا عز واخوك وحشني اوي
عز :بس تفتكري يا ماما هنقدر نلاقيه بعد السنين دي كلها
آثار :قلبي بيقولي اني هلاقيه
عز :بس انت كنت حكيتي لي زمان ان والده كان مفهمه انك سبتيه ومشيتي من زمان وانه كان بيكرهه فيكي واخر مره حاولتي تشوفيه مرضاش يقابلك
آثار :انا هحاول أفهمه الحقيقه مره واثنين وثلاثه ومش هستسلم انا انحرمت منه سنين كتير وعمري ما هرتاح الا لما اقابله واعرفه الحقيقه واخده في حضني
عز :ان شاء الله ربنا يريح قلبك يلا العربيه وصلت
وتوجهوا الي السياره التي تقلهم الي المنزل الذي اشتراه عز الدين ليقيموا فيه
في احدي الكافيهات يجلس بدر الدين مع صديقه رائد
بدر الدين :مكنتش متوقع ان الخطه تنجح بالسهوله دي
رائد :انا برده بحذرك يا بدر بلاش تظلم البنت دي معاك
بدر :بقولك ايه يا رائد انا هنفذ اللي في دماغي ومفيش اي كلام هتقوله هيرجعني عن اللي في دماغي
رائد :ماشي يا بدر انا هقوم
بدر :رايح فين
رائد :هروح انت مش هتروح مش فيه عندنا شغل الصبح
بدر :لا هروح انا حتى لازم انام كويس عشان اعرف افكر كويس سلام
رائد :ربنا يهديك يا بدر ويشيل الغشاوه من علي عيونك
في الصباح استيقظت ليالي وهي تشعر ببعض الألم في رأسها
ليالي :اه يا دماغي ثم نظرت بجوارها وجدت سهر تنام بجوارها
ليالي :طبعا مش سهر كانت بايته معايا طول الليل لازم اصحى مصدعه ثم سمعت رنين هاتفها
ليالي :ومين ده اللي هيتصل دلوقت كمان
نظرت الي الهاتف فوجدت رقم غريب فاجابت عليه
ليالي :الو
بدر الدين :انسه ليالي
ليالي :بصوت ناعس ايوه انا مين معايا
شعر بدر الدين بشعور غريب عند سماع صوتها الناعس ثم تمالك نفسه
بدر :انا دكتور بدر الدين
ليالي :اه دكتور بدر الدين مين بقي
بدر الدين :انا ابن عم والدك
ليالي :سوري مش واخده بالي من حضرتك
شعر بدر بالضيق في نفسه :يعني ايه مش فاكراني خالص
بدر الدين :انا الدكتور اللي فوقتك امبارح وربطت لك الجرح
ليالي :اه الدكتور بتاع الحقنه المسكنه
بدر الدين :ياه يعني انت مش فاكراني وفاكره الحقنه
ليالي :اصلي بخاف منها موت
بدر :افتكرتني
ليالي :اه طبعا اهلا بحضرتك يا دكتور
بدر :انا بتصل عشان اطمن عليكي عامله ايه النهارده
ليالي :الحمد لله انا تمام
بدر :فيه اي وجع
ليالي :عايزني اقولك اه عشان اخد حقنه لا انا الحمد لله تمام اوي انا حتي هقوم اروح الجامعه كمان
بدر :ليه طب ما ترتاحي النهارده
ليالي :مش هينفع انا عندي محاضرات مهمه والامتحانات قربت
بدر :ماشي رقمي اللي ظهر عندك ممكن تسجليه ولو احتاجتي اي حاجه انا تحت امرك
ليالي :شكرا لحضرتك
بدر :حمد الله على السلامة مره تانيه سلام
ليالي :سلام
أغلقت ليالي الهاتف واقتربت منها سهر وهتفت
سهر :لي لي كنت بتكلمي مين
فزعت ليالي وقفزت :حرام عليكي خضتيني
سهر :اسم الله عليكي يا قلبي هه اعترفي كنت بتكلمي مين علي الصبح
ليالي :ده الدكتور بتاع امبارح كان بيطمن عليا
سهر :هيييح الدكتور الموز ابو عيون جريئه
ليالي :وبعدين بقى
سهر :اصلي اول مره اشوف في عيلتنا حد حلو كده
ليالي :بقولك ايه يلا عشان هنتأخر علي الجامعه كفايه الرغي بتاعك امبارح
ذهبت ليالي وسهر الي الجامعه ولم تكن تدري بمن يراقبهم
ومرت الايام بهدوء علي الجميع ولم يتغير سوي تقرب بدر من عمه وأولاده واستمرار في مراقبة ليالي وسهر
وفي يوم كان بدر جالس مع عمه في الشركه حتي اتي اتصال من سهر
زين الدين :سهور حبيبتي
سهر :الحقني يا بابا
زين الدين :في ايه
سهر :احنا مقبوض علينا في القسم ودخلوا ليالي الحجز بيقولوا انها متهمه في قضيه آداب وسرقه
